1. Ада́м биле Ева бачыт үүлгеткен соонда, Иегова чүнү кылган? (Эге дөс 3:15).

 АДА́М биле Ева бачыт үүлгеткен соонда, Иегова удатпаанда оларның үре-салгалынга идегел бээр кайгамчык өттүр билген медеглелди чугаалаан. Ону Эге дөс 3:15-те бижээн (номчуптуңар).

2. Эге дөс 3:15-те өттүр билген медеглел чүзү-биле онза?

² Бо өттүр билген медеглелди Библияның эң эгеки номунда бижээн. Ынчалза-даа ол Библияның өске-даа номнары-биле сырый харылзаалыг. Хөй арыннарны чаңгыс ном кылдыр тудуштурары дег, Эге дөс 3:15 база Библияда шупту номнарны чаңгыс медээ кылдыр тудуштуруп турар. Ооң кол утказы — Бурган Эрликти болгаш ооң талалакчыларын узуткаар дээш Камгалакчыны чоргузуптар b. Ол үеде Иеговага ынак улус кайы хире өөрүп-хөглээр деп бодаар силер!

3. Бо статьяга чүнү сайгарар бис?

³ Бо статьяга Эге дөс 3:15-те өттүр билген медеглелге хамаарыштыр мындыг айтырыгларны сайгарар бис: Ында кымнарның дугайында бижээн? Ол канчаар күүсеттинип турар? Ону чүге билир боор ужурлуг бис?

4. Эге дөс 3:14, 15-те «чылан» дээрге кымыл база ону кайыын билир бис?

⁴ Эге дөс 3:14, 15-те «чыланны» болгаш ооң «ажы-төлүн» база «херээженни» болгаш ооң «оглун» (азы «ажы-төлүн»)  бижээн. Ында кым кымны илередип турарын Библия биске тодарадып алырынга дузалап турар c. «Чыландан» эгелээлиңер. Ол шын чылан турган болза, Иегованың Эдем сесерлиинге чугаалаан сөстериниң утказын билбес ийик. Ынчап кээрге, Иегова сарыылдыг чаяалганы шииткен. Ол кымыл? Ажыдыышкын 12:9-та «шаандагы чылан» дээрге Эрлик деп тода бижээн. Ынчаарга «чыланның» ажы-төлү дээрге кымнарыл?

5. Чыланның «ажы-төлү» дээрге кымнарыл?

⁵ Чамдыкта Библияда «ажы-төл» деп сөстү, ачазын өттүнүп турар ажы-төл дег, бир кижини өттүнүп турар улуска хамаарыштыр ажыглап турар. Чыланның ажы-төлү дээрге, Эрлик ышкаш, Иеговага база Ооң чонунга удурланып турар көзүлбес чаяалгалар болгаш кижилер-дир. Олар — Нойнуң үезинде дээрде бараалгалын каапкан дээрниң төлээлери болгаш адазы Эрлик ышкаш алдынар каржы кижилер-дир (Э. д. 6:1, 2; Ин. 8:44; 1 Ин. 5:19; Иуда 6).

6. «Херээженни» чүге Ева деп болбазыл?

⁶ Бо өттүр билген медеглелде «херээжен» дээрге кымыл? Ол дээрге Ева эвес-тир. Чүге? Бир чылдагаан дээрге ол өттүр билген медеглелде херээженниң оглу чыланның бажын буза шавар дээн. Ам чаа көрдүвүс, чылан дээрге каржы дээрниң төлээзи Эрлик-тир. Ынчаарга Еваның кандыг-бир оглу ону өлүрүп шыдаар бе? Чок. Ынчап кээрге, Эрлик канчаар узуткаттырар?

7. Эге дөс 3:15-те «херээжен» дээрге кымыл? (Ажыдыышкын 12:1, 2, 5, 10).

⁷ Эге дөс 3:15-те «херээженни» билип алыр дээш, Библияның сөөлгү номун  көрүптээлиңер. (Номчуптуңар: Ажыдыышкын 12:1, 2, 5, 10.) Ажыдыышкын номунда анаа херээжен кижиниң дугайында биживээн. Ында ону «бажында он ийи сылдыс-биле каастаан оваадай кедип алган», а буттарының адаанда ай бар дээн. Ол херээжен Бурганның Чагыргазы деп кайгамчык төл божуп алган. Ол Чагырга дээрлерде, ынчаарга херээжен база дээрлерден боор ужурлуг. Ол Бурганга шынчы дээрниң төлээлеринден тургустунган Иегованың организациязының дээрде кезиин илередип турар (Гал. 4:26).

8. Херээженниң «оглу» кымыл база ол кажан тыптып келген? (Эге дөс 22:15—18).

⁸ Библия биске херээженниң «оглун» билип алырынга дузалап турар. Ол Авраамның үре-салгалындан боор ужурлуг. (Номчуптуңар: Эге дөс 22:15—18.) Ол өттүр билген медеглел Авраамның дорт салгалы болур Иисуска күүсеттинген (Лк. 3:23, 34). Ынчалза-даа Эге дөс 3:15-те төл анаа кижи болбас ужурлуг, чүге дизе ол Эрликти узуткаар болгай. Ынчангаш Иисус 30 хире харлыг турда, Иегова ону ыдыктыг сүлдези-биле чаап каан. Ыдыктыг сүлдеге бүргеткен үезинде Иисус херээженниң оглу апарган (Гал. 3:16). Иисус өлгеш, дирлип кээрге, Иегова «ону ат-алдар болгаш мактал-хүндү-биле» демдектеп каан. Бурган аңаа «дээрге база черге бүгү эрге-чагырганы», ол ышкаш «эрликтиң ажыл-херээн дазылындан тура тыртар» эрге-чагырганы база берген (Евр. 2:7; Мф. 28:18; 1 Ин. 3:8).

9, 10. а) Херээженниң оон өске «ажы-төлү» дээрге кымнарыл база олар кажан ооң «ажы-төлү» апаар? б) Улаштыр чүнү сайгарар бис?

⁹ Ынчалза-даа херээженниң оон өске «ажы-төлү» база турар ужурлуг. Павел элчин ооң дугайында еврей-даа, еврей эвес-даа шилип чагдырганнарга мынчаар бижээн: «А бир-тээ Христоска хамааржыр болганыңарда, силер ынчан Авраамның үре-салгалы, Бурганның аазаашкынының салгакчылары боор силер» (Гал. 3:28, 29). Кажан Иегова христианнарны ыдыктыг сүлдези-биле чаап каарга, олар херээженниң төлдери апаар. Ынчап кээрге, ооң ажы-төлү дээрге Иисус Христос болгаш ооң-биле кады чагырар 144 000 кижи-дир (Ажыд. 14:1). Олар Адазы Иегова дег боданырын база алдынарын кызып турарлар.

¹⁰ Эге дөс 3:15-те маадырлар кымнар дээрзин билип алдывыс. Ам Иегова ол өттүр билген медеглелди канчаар күүседип турарын база ону чүге билир боор ужурлуувусту кысказы-биле сайгарыптаалыңар.

11. Херээженниң оглу кандыг уткалыг таваңгайынче шактырган?

¹¹ Эге дөс 3:15-тен алырга, чылан херээженниң оглунуң таваңгайын шаптар. Кажан еврейлер болгаш римчилер Эрликке алыскаш, Бурганның Оглун шаажылап каарга, ол сөстер күүсеттинген (Лк. 23:13, 20—24). Бир эвес кижи таваңгайын кемдедип алыр болза, ол кезек үе ишти кылаштап шыдавас. Ооң-биле дөмей, Иисус үш хонук ишти чүнү-даа кылып шыдаваан, чүге дизе өлүг турган (Мф. 16:21).

12. Чыланның бажын кажан буза шавар база ол канчаар болур?

¹² Эге дөс 3:15-те өттүр билген медеглел күүсеттинер кылдыр, Иисус дирлип кээр ужурлуг турган. Чүге? Чүге дизе ол медеглелде херээженниң оглу чыланның бажын буза шавар дээн. Ынчангаш Бурганның  Оглу дирлип келген. Шаажылаттырган соонда үшкү хүнде ол дирилгеш, дээрлерге өлүм чок чуртталганы алган. Иегованың айыткан хүнүнде Иисус Эрликти узуткаар (Евр. 2:14—15). Христос шилип чагдырган чагырыкчылар-биле кады чер кырында Бурганның дайзыннарының, чыланның ажы-төлүнүң, когун үзер (Ажыд. 17:14; 20:4, 10) d.

13. Бо өттүр билген медеглелдиң күүсеттинип турары чүге биске дорт хамаарылгалыг?

¹³ Бурганга бараалгап турар болзуңарза, бо өттүр билген медеглел силерге дорт хамаарылгалыг. Чүге? Херээженниң оглу Иисус черге кижи кылдыр чурттап чораан. Ол Адазын тергиини-биле өттүнүп турган (Ин. 14:9). Ооң ачызында бис Иегованы билип алгаш, Аңаа ынак апарган бис. Оон ыңай Иисустуң өөредиглери база амгы үеде ооң чыыштарны канчаар удуртуп турары биске улуг ажык-дузаны эккеп турар. Иисус бисти Иегованың сеткилин өөртүп чурттаар кылдыр өөредип турар. Оон аңгыда, Бурганның Оглу таваңгайынче шактырган, азы өлүп каан болганда, бис шупту келир үеже идегелдиг бис. Чүге дизе Иисус дирлип келгеш, «бисти кандыг-даа бачыттан арыглаар» өргүлдү Иеговага берген болгай (1 Ин. 1:7).

14. Иегованың Эдемге чугаалаан өттүр билген медеглели дораан-на күүсеттинмээн деп кайыын билир бис?

¹⁴ Иегованың Эдемге чугаалаан өттүр билген медеглели дораан-на күүсеттинмес турган. Чүге дизе херээжен болгаш Эрлик ажы-төлдүг апарып база олары бот-боттарының аразынга дайзыннар болу бээринге үе херек турган. Бо медеглелдиң утказын билир боор ужурлуг бис. Чүге дизе ында Эрликтиң делегейи Иегованың бараалгакчыларынга хөңнү чок боор дээн оваарындырыг бар. Соонда Иисус ооң дугайында база сагындырган (Мк. 13:13; Ин. 17:14). Ылаңгыя бо сөөлгү 100 чыл дургузунда ол өттүр билген медеглелдиң чамдыызының күүсеттинип турарын көрүп турар бис.

15. Бо делегей бисти чүге дам-на көрбестеп турар, ынчалза-даа Эрликтен чүге кортпас бис?

¹⁵ 1914 чылда Иисус Хаан апаргаш, удатпаанда Эрликти дээрден дүжүр октапкан. Ам ол Бурганның дайзыны черден өске кайнаар-даа барып шыдавайн, бодунуң өлүмүн манап турар (Ажыд. 12:9, 12). Ынчалза-даа ол анаа олурбайн, өжээргеп, килеңин Иегованың чонунче тө каап турар (Ажыд. 12:13, 17). Ынчангаш бо делегей Бурганның бараалгакчыларын хүнден хүнче көрбестеп бар-ла чыдар. Ындыг-даа бол, Эрликтен болгаш ооң талалакчыларындан кортпас бис. Харын-даа бис Павел элчинниң: «Бурган бистиң талавыста болза, кым биске удурланып шыдаарыл?» дээн сөстеринге катчып турар бис (Рим. 8:31). Эге дөс 3:15-те медеглелдиң хөй кезии күүсеттине берген болганда, Иеговага бүзүрээр шупту чылдагааннарывыс бар.

16—18. Эге дөс 3:15 Кёртис, Урсула база Джессиканың чуртталгазынга кандыг салдар чедирген?

¹⁶ Эге дөс 3:15-те Иегованың аазаашкыны чуртталгавыста бергелерни ажып эртеринге дузалап турар. Гуамда миссионерлеп чоруур Кёртис үлешкен: «Чамдыкта берге байдалдар тургустунуп кээрге, Иеговага шынчы артары белен эвес. Ынчалза-даа Эге дөс 3:15-те өттүр билген медеглелдиң  дугайында ханы боданып тургаш, дээрде Адамдан салдынмас чордум». Иегова бергелеривистиң когун үзер үени Кёртис четтикпейн манап турар.

¹⁷ Бавариядан Урсула дээр угбавысты Эге дөс 3:15-те өттүр билген медеглел Библия — Бурганның аксындан үндүр тынган Сөзү деп бүзүреткен. Угбавыс ол аазаашкын биле өске-даа өттүр билген медеглелдер аразында сырый харылзаалыг деп көрүп каан. Ол чүүл ооң сагыш-сеткилинге дыка дээштиг болган. Урсула ону мындыг сөстер-биле илереткен: «Бир дугаар кижилер бачытты кылыптарга, Иегова дораан-на кижи төрелгетенинге идегелди бергени сеткил-чүрээмни доюлдуруп, кайгаткан».

¹⁸ А Микронезиядан Джессика мынча дээн: «Алыс шынны тып алган үемни кажан-даа утпас мен. Эге дөс 3:15-тиң күүсеттинип турарын ийи караам-биле көрүп турар мен! Ол чүүл Бурган бистиң мынчаар чурттаарывысты күзевээн деп сагындырып турар. Оон ыңай бо медеглел Иеговага бараалгаарындан артык эки чүве чок база келир үе мээң манап турарымдан ушчок тулган боор деп бүзүреткен».

19. Эге дөс 3:15-те өттүр билген медеглел төнчүзүнге чедир албан күүсеттинер деп чүге чигзинмес бис?

¹⁹ Эге дөс 3:15-те өттүр билген медеглел күүсеттинип турар деп көрдүвүс. Херээженниң болгаш чыланның ажы-төлү кымнар дээрзин тодарадып алдывыс. Иисус, херээженниң оглу, таваңгайынче шактырган, ынчалза-даа ол ам өндүр улуг өлүм чок Хаан апарган. Иегова херээженниң барык шупту ажы-төлүн чыып алган. Бо медеглелдиң бир дугаар кезии күүсеттинген болганда, ийи дугаар кезии база албан күүсеттинер деп чигзинмес бис. Чугаажок, херээженниң оглу чыланның бажын буза шавар. Эрлик кезээ-мөңгеде узуткаттырып алырга, Бурганга шынчы улус улуг тынып, кайы хире өөрүп байырлаар-дыр?! Ынчангаш, акы-угбалар, черле дүжүп бербеңер! Бурганывыс бүзүрелге төлептиин бадыткаан. Херээженниң ажы-төлү таварыштыр Ол «чырык черде бар-ла чоннарга» төнчү чок йөрээлдерин кудар (Э. д. 22:18).