1, 2. Христиан кижини кандыг уткалыг бедик бажыңга дөмейлеп болур? (1 Коринфичилерге 15:58).

 ТОКИОГА 1970 чылдарның төнчүзүнде 60 каът бажыңны тудуп каан. Бо-ла чер шимчээшкини боор черге ол бажың бузулбайн, туруп шыдаар бе дээш, улус кайгап турган. Ол бажыңның быжыг болган чажыды чүде? Инженерлер ону кадыг-быжыг, чер силгиирге-даа шимчээш, эвинче туруп аар кылдыр чогаадып каан. Бурганның бараалгакчылары база шак ындыг бедик бажыңга дөмей. Кандыг уткалыг?

² Христиан кижи кайы хире кадыг-быжыг боорун база байдал ёзугаар канчаар алдынарын билир болза эки. Ол Иегованың хоойлуларынга болгаш негелделеринге хамаарыштыр чайгылыш чок боор ужурлуг. (Номчуптуңар: 1 Коринфичилерге 15:58.) Христиан кижи Бурганның дүрүмнеринге чагыртырынга белен, оларны күүсетпес чылдагаан дилевес. Оон ыңай болдунар-ла болза, азы байдал негеп кээрге, «чайлап бээринге белен» болуру чугула (Иак. 3:17, Чаа делегей). Өйүн билир кижи эмин эрттир чымчак-даа, кадыг-даа болбас. Бо статьяга канчаар чайгылыш чок боорун көөр бис. Оон Иегованың талазын быжыг ээлээр дээн шиитпиривисти кошкадыр дээш, Эрликтиң ажыглап турар беш аргазын база аңаа канчаар удур туржурун сайгарар бис.

3. Ажыл-чорудулга 15:28, 29-та Өндүр улуг Хоойлу Берикчизиниң кандыг хоойлуларын бижээн?

³ Иегова, Өндүр улуг Хоойлу Берикчизи, чонунга кезээде тодаргай хоойлуларны берип чораан (Иса. 33:22). Чижээ, бирги векте удуртукчу чөвүлел христианнарны бо үш талага туруштуг болурунче кыйгырган: 1) дүрзү-бурганнардан ойталап,  чүгле Иеговага бараалгаары, 2) ханны ыдыктыг деп хүндүлээри, 3) библейжи мөзү-шынар негелделеринден туттунары. (Номчуптуңар: Ажыл-чорудулга 15:28, 29.) Бурганның бараалгакчылары бо үш талага канчаар туруштуг артып болур?

4. Иеговага бүрүнү-биле бердингенивис чүден көскү? (Ажыдыышкын 4:11).

⁴ Дүрзү-бурганнардан ойталап, чүгле Иеговага бараалгаар бис. Бурган израильчилерден бүрүнү-биле бердинген чорукту негеп турган (Ы. х. к. 5:6—10). Бурганның Оглу Эрликке күткүдүп тургаш, чүгле Иеговага мөгеер ужурлуг бис деп тода чугаалаан (Мф. 4:8—10). Ынчангаш дүрзү-бурганнарга чүдүвес бис. Оон ыңай шажын башкарыкчыларын, политиктерни, спортсменнерни болгаш билдингир ыраажыларны, артисттерни бурганчытпайн турар бис. Бис чүгле «бүгү чүвени чаяаган» Иегова Бурганывыска мөгеер бис. (Номчуптуңар: Ажыдыышкын 4:11.)

5. Иегованың амы-тынны база ханны ыдыктыг дээн хоойлузун чүге сагып турар бис?

⁵ Иегованың амы-тынны база ханны ыдыктыг дээн хоойлузун сагып турар бис. Чүге дээрге хан амы-тынны — Бурганның үнелиг белээн — илередип турар (Лев. 17:14). Иегова кижилерге эътти чиирин чөпшээрээш, ханны чиирин хоруп каан (Э. д. 9:4). Бурган израильчилерге Моисейниң хоойлузун берип тургаш, ол айтыышкынны катаптаан (Лев. 17:10). Оон ыңай Бурган бирги векте удуртукчу чөвүлелди шупту христианнарга «хандан... ойталаңар» деп айтыышкынны бээринче оттурган (Аж.-ч. 15:28, 29). Эмнээшкинге хамаарышкан шиитпирлерни хүлээп тургаш, ол айтыышкынны чайгылыш чок сагып турар бис b.

6. Иегованың бедик мөзү-шынар негелделерин сагыыр дээш, чүнү кылып турар бис?

⁶ Иегованың бедик мөзү-шынарлыг негелделерин сагып турар бис (Евр. 13:4). Павел элчин шын эвес күзелдеривисти узуткаарын сүмелээн. Ынчангаш самыыралче идип болур чүүлдер көрбес база кылбас бис (Иов 31:1; Кол. 3:5). Багай чүве кылыр күзел тыптып кээр болза, Бурган-биле найыралывысты үрептер кандыг-даа бодалдардан болгаш кылдыныглардан ол дораан дезер бис.

7. Чүнү кылырынче хөөнненип алыр болзувусса эки база чүге?

⁷ Иегова «чүрээвис ханызындан» аңаа дыңнангыр болурувусту манап турар (Рим. 6:17). Бурганның бүгү айтыышкыннары биске ажыктыг база ооң хоойлуларын албан сагыыр ужурлуг бис (Иса. 48:17, 18; 1 Кор. 6:9, 10). Бис Иегованы өөртүр дээш, бүгү чүвени кылып, ыр күүседикчизиниң ышкаш хөөннүг бис: «Чүрээмни Сээң дүрүмнериңни күүседир кылдыр кезээ мөңгеде, бүрүнү-биле ээлдирип алдым» (Ыд. ыр. 118:112). Ынчалза-даа Эрлик бистиң Иеговага дыңнангыр болур дээн шиитпиривисти кошкадырын кызып-ла турар. Ол кандыг аргаларны ажыглап турар?

8. Иегованың талазын быжыг ээлээр дээн шиитпиривисти кошкадыр дээш, Эрлик истеп сүрүүшкүннерни канчаар ажыглап турар?

⁸ Истеп сүрүүшкүннер. Иегованың талазын быжыг ээлээр дээн шиитпиривисти кошкадыр дээш, Эрлик дорт халдап азы сагыш-сеткиливисти ундарадырын күзеп турар. Ооң сорулгазы — бисти «сыырыптар[ы]», азы Иегова-биле найыралывысты үрээри (1 Пет. 5:8). Бирги векте христианнар шын алдынар шиитпирлиг хөөннүг боорга, оларже кыжанып, эттеп-соп, безин өлүрүп турган (Аж.-ч. 5:27, 28, 40; 7:54—60).  Эрлик истеп сүрүүшкүннерни ам-даа ажыглавышаан хевээр. Россияда болгаш өске-даа чурттарда акы-угбаларывыска каржы-хажагай хамаарылга ону бадыткап турар. Шынап-ла, Бурганның шупту бараалгакчылары истеп сүрүүшкүннерниң дорт азы өске-даа хевирлеринге таваржып чоруур.

9. Бүдүү базыышкынга белен болуру чүге чугула? Чижектен чугаалаңар.

⁹ Бүдүү базыышкын. Эрлик чүгле дорт эвес, а бүдүү база халдап турар. Ынчангаш ооң «хамык кара сагыжын» билип алыры чугула (Эф. 6:11). Улуг кезиишкин эртер деп турган Роберттиң чижээн көрээлиңер. Ол кандыг-даа байдалда хан кутпазын эмчилерге чугаалаан. Хирург эмчи ооң шиитпирин хүндүлээн. А кажан Роберттиң чоок улузу чоруптарга, кезиишкин эртер хүннүң мурнунда кежээ палатазынга анестезиолог эмчи чедип келген. «Кезиишкин үезинде хан херекчок боор чадавас, ынчалза-даа ханны дөмей-ле белеткеп алыылы» — деп, ол Робертке чугаалаан. Эмчи ол чоок улузу чокта шиитпирин өскертиптер чадавас деп бодаан. Ынчалза-даа Роберт туруштуг артып, кандыг-даа байдалдарда хан куттурбазын катаптаан!

10. Кижилерниң бодалдары чүзү-биле айыылдыг? (1 Коринфичилерге 3:19, 20).

¹⁰ Кижилерниң бодалдары. Бо делегейде улус ышкаш боданыр болзувусса, Иегованы болгаш ооң негелделерин чоорту уттуптар айыыл бар. (Номчуптуңар: 1 Коринфичилерге 3:19, 20.) «Бо делегейниң улузунуң мерген угааны» Бурганны дыңнавазынче бо-ла ыдалаар. Пергамда, Фиатирада чамдык христианнар дүрзү-бурганнарга чүдүп, мөзү-шынар чок улустуң салдарынга алзыпкан. Иисус ол ийи чыышка дорт сүме берген, чүге дизе олар самыырап турган улусту соксатпааннар (Ажыд. 2:14, 20). Амгы үеде бисче база шупту талазындан халдаашкыннар чоруп турар. Өг-бүлевистиң кежигүннери база таныыр улузувус бисти күзелдерге алзып, арын-нүүрүвүстү херекке албазынче ыдалап болур. Чижээ, олар библейжи дүрүмнер эргижирээн, бодунуң күзээшкиннеринге алзырында багай чүве чок дээр.

11. Быжыг бүзүрелдиг артар дизе, чүден оваарныры чугула?

¹¹ Чамдыкта Иегованың айтыышкыннарын чедишпес деп бодай бээр бис. Безин «бижээн чүүлдүң кызыгаарын ажыр» базар күзел тыптып кээп болур (1 Кор. 4:6). Иисустуң үезинде шажын башкарыкчылары шак ынчаар алдынып турган. Олар Бурганның хоойлузунче кижилерниң чогааткан дүрүмнерин немеп, бөдүүн чоннуң чуртталгазын нарыыдадып турганнар (Мф. 23:4). Иегова биске Сөзү болгаш организациязы таварыштыр тода айтыышкыннарны берип турар, ооң кырындан чүнү-даа немээн херээ чок (У. ч. 3:5—7). Ынчангаш Библияда бижээн чүүлдүң кызыгаарын ажыр баспайн, хууда айтырыгларга хамаарыштыр дүрүмнер тургуспайн турар бис.

12. Эрлик «хоозун угаашкыннарны» канчаар ажыглап турар?

¹² Меге. Эрлик кижилерни мегелеп, аңгылаштырар дээш, «хоозун угаашкыннарны» болгаш «бо делегейни башкарган хоойлу-дүрүмнерни» ажыглап турар (Кол. 2:8). Бирги векте ол кандыг чепсек ажыглап турган? Бирээде, кижилерниң угаан-бодалынга үндезилээн философияны. Ийиде, Бурганның хей-аът киирбээн иудей өөредиглерни. Үште, христианнар Моисейниң хоойлузун сагыыр ужурлуг деп үзел-бодалды. Ол бодалдар меге, чүге дээрге олар ёзулуг мерген угаанның Үнер дөзү Иеговадан кичээнгейни чардыктырып турган. Амгы үеде Эрлик кижилерни массалыг информация чепсектери болгаш социал четкилер таварыштыр мегелеп турар. Ону таварыштыр Эрлик янзы-бүрү даап  бодаашкыннарны, меге медээлерни болгаш политиктиг пропаганданы тарадып турар. COVID-19 деп хамчык аарыг үезинде аңаа шынзыккан бис c. Бүзүрел чок информация дыңнаан улус хөй-ле дүвүрелдерге алзып турган. А Иегованың Херечилери Бурганның организациязының айтыышкыннарын дыңнаар болгаш, ынча дыка дүвүревээннер (Мф. 24:45).

13. Чардыктырар чүүлдер чүзү-биле айыылдыг?

¹³ Чардыгыышкыннар. «Ёзулуг чугула чүүлден» чардыкпас болзувусса эки (Флп. 1:9, 10, Чаа делегей). Чардыктырар чүүлдер ажыктыг ажыл-херектерже үндүрүп болур үевисти, күжүвүстү оорлай бээр. Аъш-чем, суксун, дыштанылга, ажыл дээн ышкаш анаа херектер чуртталгавыска эң чугула апаар болза, өскээр чардыга бээр бис. (Лк. 21:34, 35). Оон аңгыда, хамааты хөлзээзиннер болгаш политиктиг маргыштар дугайында медээлер дыңналып-ла турар. Ол база биске айыылдыг какпа апарып болурун утпаңар. Чүге дээрге бис биле тура-ла азы билбейн-даа кайы-бир таланы шилип ап болур бис. Эрлик бо шупту аргаларны чаңгыс сорулга-биле, шынчы болур чүткүлүвүстү кошкадыр дээш, ажыглап турар. Аңаа канчаар удурланып болурувусту база бо айтырыгларга канчаар туруштуг артарын сайгарыптаалыңар.

14. Иегованың талазынга туруштуг болурунга биске чүү дузалаар?

¹⁴ Бурганга чуртталгаңарны бараалгатканыңарны, сугга суктурганыңарны бодап чоруңар. Ол базымнарны кылырынче силерни чүү оттурган? Иегованың талазын ээлээр изиг күзел. Алыс шынны тып алганыңарга канчаар шынзыккан силер? Иегованың дугайында алыс шынны билип алгаш, дээрде Адаңарга ынак апарып, ону хүндүлеп эгелээн силер. Быжыг бүзүрелди сайзырадып, ооң мурнунда кылган бачыттарыңар дээш бурууңар миннинген силер. Сеткил-чүрээңер силерни шын эвес ажыл-херектерни каапкаш, Бурганның күзел-соруунга  таарыштыр чурттаарынче оттурган. Бурган силерни өршээп каан деп билип кааш, сеткилиңер чиигей берген (Ыд. ыр. 31:1, 2). Христиан чыыштарже барып, өске улус-биле кайгамчыктыг чараш алыс шын билиглерни үлежип эгелээн силер. Оон чуртталгаңарны Бурганга бараалгадып, сугга суктуруп алган силер. Ам мөңге чуртталгаже чедирер оруктан чандыр баспас дээш, хөөнненип алган силер (Мф. 7:13, 14).

15. Шинчилеп кылыры база ханы боданыры чүзү-биле ажыктыг?

¹⁵ Бурганның Сөзүн шинчилеп, ооң дугайында ханы боданыңар. Ыяштың ханы дазылдарының ачызында быжыы дег, бүзүреливис Бурганның Сөзүнге ханы дазылданы бээр болза, база быжыг боор бис. Ыяш өзерге, ооң дазылдары ханылап бар-ла чыдар. Библияны шинчилеп, ооң дугайында ханы боданырывыска, бүзүреливис улам быжыгып, Бурганның айтып берген оруу эң-не эки деп оон-даа артык шынзыгып эгелээр бис (Кол. 2:6, 7). Иегова бараалгакчыларын эрткен үеде канчаар камгалап чораанын база ооң айтыышкыннары болгаш сүмелери оларга канчаар дузалап турганын боданыңар. Чижээ, Иезекиил көстүүшкүнге дээрниң төлээзи өргээни канчаар кызып хемчээп турганын кичээнгейлиг көрген. Ол көстүүшкүн ооң бүзүрелин быжыктырган. Моон бис база арыг мөгейиишкинге Иегованың негелделерин канчаар сагыырынга хамаарыштыр чугула кичээлдерни шиңгээдип алыр бис (Иез. 40:1—4; 43:10—12) d. Бурганның Сөзүнден ханы уткалыг билиглерни шинчилеп, ооң дугайында ханы боданыр дээш үени үндүрери биске чугула.

16. Робертти бердинген чүрээ канчаар камгалаан? (Ырлар 111:7).

¹⁶ Бердинген чорукту сайзырадыңар. Давид хаан Иеговага кезээде ынак болур деп шиитпирлиг хөөнненип алган. «Бурганым, мээң чүрээм быжыг соруктуг» — деп, ол ырлап турган (Ыд. ыр. 56:8). Бис база Иеговага долузу-биле ынаныр болзувусса, чүрээвис бердинген болур. (Номчуптуңар: Ырлар 111:7.) Кырында чугаалашканывыс Робертке бердинген чүрээ канчаар дузалаанын көрээлиңер.  Анестезиологтуң Робертке кезиишкин үезинде хан турзун дээнин сактыр бис. Роберт ол дораан мынча деп харыылаан: «Бир эвес хан кудар деп барзыңарза, эмнелгеден чоруптар мен». Соонда Роберт мынчаар сактып чугаалаан: «Мен бичии-даа чигзинмээн мен. Чүрээм серт-даа дивээн».

17. Роберттиң төөгүзүнде биске кандыг өөредиг бар? (Чурукту база көрүңер.)

¹⁷ Эмчиге чыдар мурнунда-ла шиитпирни хүлээп алган болгаш, Роберт туруштуг арткан. Баштай ооң Иегованы өөртүр күзели тыптып келген. Оон ол амы-тынның, ханның ыдыктыының дугайында Библияда болгаш аңаа үндезилээн ном-дептерде чүнү чугаалаанын хынамчалыг шинчилээн. Оон аңгыда, Иегова бир-ле чүвени негеп турар болза, боттарывыска-ла ажыктыг деп, ол шынзыккан. Кандыг-даа шенелдеге таварышсывысса, бистиң чүрээвис база бердинген артып болур.

18. Иеговага бүзүрээринге Варактың чижээ бисти канчаар өөредип турар? (Журналдың даштында чурукту көрүңер.)

¹⁸ Иеговага бүзүреңер. Иегованың айтыышкыннарынга бүзүрел Варакка тиилеп алырынга канчаар дузалаанын көрүптээлиңер. Израильчилерниң дозуг-камгалалдары, чыдалары чок-даа болза, Иегова Варакка Ханаанның шериг баштыңчызының чепсегленген аг-шерии-биле тулчурун дужааган (Башт. 5:8). Девора медээчи Сисараже болгаш ооң 900 дайынчы тергелеринче уткуштур шынааже бадып кээр кылдыр Варакка чугаалаан. Дайзынның тергелеринге ажык черге дайылдажыры эптиг-даа болза, Варак дыңнангыр болган. Ооң дайынчылары Фавор дагдан дүжүп кел чыдырда, Иегова дайзыннарже дээрден чаъс-чайыкты кудупкан. Сисараның дайынчы тергелери малгашка кадалып каарга, Бурган Варакка тиилелгени хайырлаан (Башт. 4:1—7, 10, 13—16). Бис база Иеговага болгаш ооң төлээлери таварыштыр берген айтыышкыннарынга бүзүрээр болзувусса, тиилелгени алыр бис (Ы. х. к. 31:6).

19. Иегованың талазын чүге быжыг ээлексеп турар силер?

¹⁹ Бо делегейге шынның оруундан салдынмас дээш, үргүлчү демисежир ужурлуг бис (1 Тим. 6:11, 12; 2 Пет. 3:17). Истеп сүрүүшкүннерге, бүдүү базыышкынга, кижилерниң бодалдарынга, мегеге, чардыгыышкыннарга алыспаалыңар (Эф. 4:14). Иеговага бердинген болуулуңар, туруштуг база ооң айтыышкыннарын кезээде чайгылыш чок дыңнаалыңар. Оон аңгыда, бодамчалыг болуру чугула. Дараазында статьяга Иегова биле Иисустуң бодамчалыг чорукту канчаар көргүскенин сайгарар бис.