ӨӨРЕНИР СТАТЬЯ 30
Ынакшылыңарны улаштыр өстүрүңер
«Бүгү тала-биле... [ынакшылдыг] өзүп-мандыыр ужурлуг бис» (ЭФ. 4:15).
ЫРЫ 2 Сээң адың — Иегова
ДОПЧУЛАЛ a
1. Библияны өөренип эгелээш, чүнү билип алган силер?
БИБЛИЯНЫ өөренип эгелээниңерни сактып келиңер. Бурганның ады бар боорга, кайгаан боор силер. Бурган кижилерни алдыы оранда хилинчектевейн турарын билип кааш, сеткилиңер чиигей берген чадавас. Ол ышкаш чок апарган чоок улузуңарга ужуражып, олар-биле черге дываажаңга чурттаар деп билип алгаш, дыка өөрээн боор силер.
2. Бурган-биле найыралыңар канчаар эгелээнин чугаалап көрүңер (Эфесчилерге 5:1, 2).
2 Бурганның Сөзүн хөй өөренген тудум, Иеговага ынакшылыңар дам күштелип эгелээн. Ол ынакшыл силерни билиглерни амыдыралга ажыглаарынче оттурган. Силер библейжи дүрүмнер-биле башкартынып, шын шиитпирлерни хүлээп эгелээн силер. Оон Бурганны өөртүксээш, угаан-бодалыңарны, аажы-чаңыңарны өскертип алган силер. Ада-иезинге дөмей болуксаар чаш кижи дег, дээрде Адаңарны өттүнүп эгелээн силер. (Номчуптуңар: Эфесчилерге 5:1, 2.)
3. Кижи бодунга кандыг айтырыгларны салып болур?
3 Бодуңардан айтырыңар: «Сугга суктурган соонда Иеговага ынакшылым улам күштелген бе? Мээң боданып, алдынып турарым Иеговага оон-даа дөмей апарган бе? Чижээ, акы-угбаларга ынакшылды оон-даа хөй илередип турар мен бе?» «Баштайгы ынакшылыңар» соой берген болза, муңгараваңар. Бирги векте христианнар-биле шак ындыг чүүл болган. Ынчалза-даа Иисус олардан ойталаваан. Ол силерден база хая көрүнмес (Ажыд. 2:4, 7). Алыс шынны чаа билип алган үеде ынакшылыңарны оттуруп болуруңарны ол билир.
4. Бо статьяга чүнү сайгарар бис?
4 Иеговага болгаш чанывыста улуска ынакшылды моон-даа улаштыр канчаар сайзырадырын бо статьяга чугаалажыр бис. Оон ынакшылывыс улам өзер болза, бисти болгаш өскелерни кандыг йөрээлдер манап турарын көөр бис.
ИЕГОВАГА ЫНАКШЫЛЫҢАРНЫ АМ-ДАА ӨСТҮРҮҢЕР
5, 6. а) Павел элчин кандыг бергелерни көрген? б) Иеговага улаштыр бараалгаарынга Павелди чүү күш киирип турганыл?
5 Павел элчин Иеговага аас-кежиктиг бараалгап чораан-даа болза, ооң бергелери эвээш эвес турган. Ол ырак-узак черлерже бо-ла баар турган, а ол үеде аян-чорук кылыры ындыг-ла белен эвес. Павел орукка «үерлээн хемнерге-даа, дээрбечилерге-даа» таваржып чораан. Оон ыңай ол алыс шынның удурланыкчыларынга чаңгыс удаа эвес эттедип-соктуруп турган (2 Кор. 11:23—27). Павелдиң сеткилинден дузазын акы-угбалар чамдыкта үнелевес турган (2 Кор. 10:10; Флп. 4:15).
6 Павелге дүжүп бербезинге чүү дузалаан? Бижилгеден болгаш бодунуң дуржулгазындан ол Иегованы дыка эки билип алган. Бурган аңаа ынак деп, ол шынзыккан (Рим. 8:38, 39; Эф. 2:4, 5). Павел боду база Иеговага дыка ынак чораан. Бурганга ынакшылын ол «Ооң улузунга [хөйү-биле] бараан бооп тура» көргүскен (Евр. 6:10).
7. Иеговага ынакшылды өстүреринге биске чүү дузалап турарыл?
7 Бурганның Сөзүн ханы шинчилээн тудум, аңаа ынакшылывыс өзер. Библияны номчуп тургаш, үзүндү бүрүзү Иегованың дугайында чүнү чугаалап турарын билип алыр дээш кызыңар. «Иегова меңээ ынак деп, бо үзүндү канчаар көргүзүп турар? Бо шүлүктер мени Иеговага ынак болурунче канчаар оттуруп турар?» деп бодуңардан айтырыңар.
8. Бурганга ынакшылывысты өстүреринге мөргүл канчаар дузалап турарыл?
8 Оон ыңай мөргүлге Иеговага минниишкиннеривисти ажыдар болзувусса, аңаа ынакшылывыс өзер (Ыд. ыр. 24:4, 5). А Иегова мөргүлдеривиске харыылаар (1 Ин. 3:21, 22). Азиядан Кхан b угбавыс мынча дээн: «Библияны өөренип тургаш, Иегованы билип алгаш, аңаа ынак апарган мен. А мээң мөргүлдеримге харыылаарын көргеш, аңаа ынакшылым оон-даа күштүг апарган. Ынчангаш Иегова меңээ кезээде чүүлзүнер кылдыр шын алдыныксап эгелээн мен».
ӨСКЕ УЛУСКА ЫНАКШЫЛЫҢАРНЫ АМ-ДАА ӨСТҮРҮҢЕР
9. Тимофейниң акы-угбаларга ынакшылы өзүп турган деп чүден көскү?
9 Павел христиан апарган соонда, каш чыл эрткенде, Тимофей деп аныяк оол-биле таныжып алган. Тимофей Иеговага болгаш кижилерге ынак чораан. Чылдар эрткенде, Павел ооң дугайында Филиппыда христианнарга мынча деп бижээн: «Силер дээш... ёзулуг сагыш човаар... өске ындыг кижи менде чок» (Флп. 2:20). Мында Павел Тимофейни эки илеткелчи азы организакчы салым-чаяаны дээш эвес, а ооң ха-дуңмазынга ынакшылы дээш мактап, магадаан чадавас. Ол үениң акы-угбалары Тимофейниң кээр үезин четтикпейн манап турган деп чигзинмес бис (1 Кор. 4:17).
10. Анна өөнүң ээзи-биле акы-угбаларга ынакшылын канчаар көргүскенил?
10 Бис база акы-угбаларга дузалаар аргаларны дилеп турар бис (Евр. 13:16). Мурнунда статьяда чугаалашканывыс Аннаның чижээ бо-дур. Улуг шуурган болган соонда, Анна ашаа-биле бир өг-бүлеге чеде берген. Бажыңының крышазы аңдарлы бээрге, ол акы-угбавыстың арыг идик-хеви артпаан болган. Анна мынча дээн: «Бис оларның хевин чуггаш, баскаш, чараштыр аайлааш, эккеп берген бис. Ону кылыры биске көңгүс берге эвес болган. Ынчаар аравыста быжыг найырал тыптып келген. Бис ам-даа эдержип чоруур бис». Ол миссионер өг-бүлени дуза чедиреринче ынакшыл оттурган (1 Ин. 3:17, 18).
11. а) Ынакшыл көргүзеривиске, өске улус чүнү миннир? б) Ынакшыл көргүзеривиске, Иегова чүнү миннип турар? (Чугаалар 19:17).
11 Улуска ынакшылдыг болгаш чылыг-чымчак хамаарылганы көргүзеривиске, олар Иегованы өттүнүп турарывысты эскерип болур. Олар бистиң чылыг-чымчак хамаарылгавысты бодап турарывыстан артык үнелээр чадавас. Кырында чугаалашканывыс Кхан угбай аңаа дузалашкан улустуң дугайында чылыг-чымчак сактып чугаалаан: «Мени суртаалче ап турган угбаларга дыка-ла өөрүп четтирер-дир мен! Олар мени бажыңдан алгаш, шайладып, оон бажыңымга чедирип каар турган. Олар кайы хире күжениишкиннер үндүргенин ам билип тур мен. Олар ону ынакшыл-биле кылып турган». Буянныг херектеривис дээш, кижи бүрүзү четтирдим дивес. Кхан аңаа дузалажып чораан улустуң дугайында мынча дээн: «Мен оларга өөрүп четтиргенимни дыка илередиксээр мен! Олар ам кайда чурттап турарын билбес мен. А Иегова билир. Ол мээң орнумга четтиргенин илередир кылдыр мөргүүр-дүр мен». Кхан угбай дыка чугула бодалды чугаалаан. Иегова бистиң кандыг-даа, хензиг-даа буянныг херектеривисти эскерип турар. Бурган ону үнелиг өргүл деп санаар, албан эгидер өрези кылдыр көөр. (Номчуптуңар: Чугаалар 19:17.)
Иегова-биле найыралын быжыктырып турар кижи улуска дуза кадар аргаларны дилээр (12-ги абзац).
12. Чыышка акылар ынакшылын канчаар көргүзүп болур? (Чуруктарны база көрүңер.)
12 Акылар ха-дуңмага канчаар дузалап, ынакшылды илередип болур? Джо́рдан деп аныяк дуңмавыс чыышка оон-даа хөйнү кылыксап турарын бир удуртукчуга чугаалаан. Удуртукчу акывыс ооң кылып турар эки чүүлдери дээш мактааш, каш сүмени берген. Чижээ, Хурал залынче эртежик келгеш, улусту уткуп, чыыштарга харыылап, суртаал бөлүү-биле доктаамал бараалгап, өскелерге ажык-дузаны көргүзериниң дугайында боданырын ол сүмелээн. Джордан ол сүмелерни ажыглаан. Ол ажыктыг арга-мергежил өөренип алырындан аңгыда, акы-угбаларга оон-даа артык ынак апарган. Джордан бир чугула чүүлдү билип алган: кижи хуралдың дузалакчызы апаргаш, улуска дузалажып эгелээр эвес, а улаштыр дузалажыр ужурлуг (1 Тим. 3:8—10, 13).
13. Кристиан ынакшылды улаштыр илередип тургаш, канчаар катап хуралдың удуртукчузу апарган?
13 Бир эвес сен хуралдың дузалакчызы азы удуртукчузу кылдыр бараалгавайн барган болзуңза, канчаар? Буянныг херектерже оттуруп турган ынакшылыңны болгаш ажыл-херээңни Иегова утпаан (1 Кор. 15:58). Ынакшылды улаштыр көргүзүп турарыңны ол эскерип турар. Кри́стиан хуралдың удуртукчузу эвес апаргаш, дыка муңгараан. Ындыг-даа бол, ол мынча дээн: «Хүндүткелдиг хүлээлгем бар-чок-даа болза, Иеговага дөмей-ле улаштыр бараалгап, шыдаар шаам-биле бүгү чүвени кылыр деп бодап алган мен». Үе эртерге, ол катап хуралдың удуртукчузу апарган. Кристиан ажыы-биле үлешкен: «Эгезинде бичии дүвүрээн мен. Ынчалза-даа Иегова энерели-биле мени катап удуртукчу кылдыр томуйлаан болганда, ону күүседип шыдаар мен. Чүге дээрге аңаа болгаш акы-угбаларга ынак болгай мен».
14. Грузия чурттуг угбавыстың сөстеринде кандыг өөредиг бар?
14 Иегованың чону чанында улуска ынакшылды илередип турар (Мф. 22:37—39). Чижээ, Грузиядан Елена мынча дээн: «Эгезинде чүгле Иеговага ынак болгаш, суртаалдап турган мен. Аңаа ынакшылым күштелген тудум, кижилерге база оон-даа ынак апарган мен. Оларның кандыг бергелерге таваржып турарын база кандыг темалар сонуургап болурун боданып эгелээн мен. Ооң дугайында хөй боданган тудум, оларга дузалаар күзелим улам күштүг апарган» (Рим. 10:13—15).
УЛУСКА ЫНАКШЫЛ ЙӨРЭЭЛДЕР ЭККЭЭР
Чаңгыс буянныг херек дыка хөй улуска йөрээлди эккеп болур (15, 16-гы абзацтар).
15, 16. Чурукту көрүңер. Улуска ынакшыл көргүзүп чоруур улусту кандыг шаңнал манап турарыл?
15 Акы-угбаларга ынакшылды көргүзеривиске, өске улуска база ажык-дузалыг. COVID-19 деп хамчык аарыг үезинде Пао́ло кадайы-биле улгады берген угбаларга электроннуг херекселдерни суртаалга ажыглап өөредип каан. Чижээ, планшедин сайгарып чадап турган бир угбай оларның дузазы-биле ону өөренип алган. Ооң ачызында угбавыс Сактыышкын кежээзинче төрелдерин чалаан. Видеохарылзаа таварыштыр ол байырлалче 60 кижи катчып келген! Паоло биле ооң кадайының күжениишкиннери ол угбайга-даа, ооң төрелдеринге-даа ажык-дузалыг болган. Соонда ол угбай Паолога мынча деп бижээн: «Бисти, назылаан улусту, өөредип турарыңар дээш, четтирдивис. Иегованың база силерниң кылган шупту чүүлдериңерни кажан-даа утпас мен, дуңмаларым!»
16 Ынакшыл билиглерден, салым-чаяандан артык чугула деп, Паоло чугула кичээлди шиңгээдип алган. Ол мынча дээн: «Ооң мурнунда кожуун хайгааракчызы турган мен. Акы-угбалар илеткелдеримни уттупкан боор, ынчалза-даа буянныг херектеримни ам-даа утпаан деп бүзүрээр мен».
17. Ынакшыл көргүзеривиске, оон ыңай кымга ажыктыг?
17 Улуска ынакшылды көргүзүп тургаш, кандыг йөрээлдер алырывысты безин билбес бис. Чаа Зеландияда Джо́натан ону бодунга көрген. Бир субботаның изиг хүнүнде ол орук чанында чааскаан суртаалдап турган эгелекчини көрүп каан. Оон ол дараазында субботадан эгелеп, акызы-биле кады суртаалдаар деп бодап алган. Ооң буянныг херээ бодунга канчаар дузалаптарын билбээн. Джонатан мынча дээн: «Ол үеде суртаалдаарынга шоолуг ынак эвес турган мен. Эгелекчи акыйның канчаар суртаалдап, улусту кайы хире чедиишкинниг өөредирин көргеш, суртаалга ынакшылым оттуп келген. Оон аңгыда, бүзүрелдиг эштиг апарган мен. Ол меңээ Иеговага чоокшулаарынга дузалап, бараалгалга ынакшылымны оттурган».
18. Иегова бистен чүнү манап турар?
18 Иегова бисти аңаа болгаш өскелерге ынакшылды өстүрзүн деп күзээр. Бир эвес ооң Сөзүн номчуп, ханы боданып, үргүлчү мөргүүр болзувусса, Иеговага ынакшылывыс өзер деп билип алдывыс. А акы-угбаларга херек кырында дузалажыр болзувусса, оларга ынакшылывыс күштелир. Ынчан Иеговага болгаш акы-угбаларга оон-даа чоокшулап, найыралывыс кезээ-мөңгеде уламчылаар!
ЫРЫ 107 Бурганның ынакшылының үлегери
a Иеговага хөй чылдар дургузунда бараалгап чоруур азы ону чоокта чаа билип алган-даа болзувусса, улаштыр өзүп-мандып болур бис. Аңаа чүү дузалаарын бо статьяга сайгарар бис. Иеговага болгаш өске улуска ынакшылды канчаар сайзырадырыл? Бо статьяның дугайында боданып тургаш, чүнү чедип алганыңарны база чүже чүткүп болурун боданыңар.
b Чамдык аттарны өскертип каан.