1, 2. а) Иисус өөреникчилеринге кандыг айыыл дугайында чугаалаан? б) Өөреникчилери Иисусту чүге каапкан? (Чурукту база көрүңер.)

 «СЕТКИЛ-САГЫШ — сергек, а мага-бот — суларгай» — деп, Иисус чугаалаан (Мф. 26:41б) a. Ооң утказы кандыг? Кижилерниң тергиин эвезин, чазыптарын билир болгаш, Иисус ол сөстер-биле өөреникчилерин боттарынга идегээринден оваарындырган. Каш-ла шак бурунгаар элчиннер Дээргизин канчап-даа кагбас бис дижип турган (Мф. 26:35). Шын алдынарынга олар чигзинмээннер, а нарын байдалда хенертен чазыптарын көңгүс бодавааннар. Иисус ынчангаш оларга: «Күткүлгеге алыспас дээш, серемчилелдиг болуп, мөргүңер» — дээн (Мф. 26:41а).

² Өөреникчилери Иисусту дыңнавааны харааданчыг. Башкызын тудуп аппаарга, олар канчаар алдынган? Аазааны ышкаш, элчиннер ооң чанынга арткан бе? Чок. Олар корткаш дезиптерин боттарындан черле манаваан (Мф. 26:56).

3. а) Бот тогдунары Иеговага шынчы болурунга канчаар шаптыктап болур? б) Бо статьяга чүнү сайгарар бис?

³ Бот тогдунар чоруктуң өртээ эмин эрттир аар. Бис шын алдынып, Иегованы өөртүксээр болгай бис. Ынчалза-даа тергиин эвес болгаш, күткүлгеге алзып болурувусту утпазы чугула (Рим. 5:12; 7:21—23). Бачыт кылыр күзел күштүг апаар байдал хенертен тургустунуп болур. Иеговага, ооң Оглунга бердинген артар дизе, Иисустуң чагыын дыңнаар ужурлуг бис. Бо статьяга баштай кандыг талаларда ылаңгыя оваарымчалыг болурун сайгарар бис. Ооң соонда күткүлгелерден боттарывысты канчаар камгалаарын, а төнчүзүнде  серемчилелди чидирбезинге чүү дузалаарын чугаалажыр бис.

ЫЛАҢГЫЯ ОВААРЫМЧАЛЫГ БОЛУРУ КАЯА ЧУГУЛА?

4, 5. Дыка шыңгыы эвес бачыттар безин чүге айыылдыг?

⁴ Чамдык бачыттар өске бачыттар ышкаш улуг эвес. Ынчалза-даа ол бачыттар безин, Иегова-биле хамаарылгавысты кошкадыптар айыылдыг база аар бачытка чедирип болур.

⁵ Шупту улус күткүлгеге таваржыр. Аңгы-аңгы болганывыста, кижи бүрүзүнүң кошкак талалары бар. Бир улус эр-херээжен чорук кылыр бачытка удурланыр ужурга таваржып турар. Өскелери порнография көөр азы мастурбация кылыр күштүг күзел-биле демисежип чоруур. А чамдык улуска килеңни, кижилерден коргуушкунну азы шупту чүвени бодунуу-биле кылыр күзелин чагырары белен эвес. Бачыттыг күзээшкиннер оон-даа хөй болгай. «Кижи бүрүзүн ооң бодунуң-на күзээшкиннери күткүүр» — деп, Иаков бижээн (Иак. 1:14).

6. Кижи бодунга шын көрүштүг болуру чүге чугула?

⁶ Бодуңарның кошкак талаларыңарны билир силер бе? Чамдыкта четпестеривисти миннип, шынны хүлээп алырындан коргар бис. Азы чүден-даа кортпас бооп, маадыржып чоруур бис бе? Ынчалза-даа бодун мегелээри эки чүүлге чедирбес (1 Ин. 1:8). Оваарымчалыг болбас болза, Бурган-биле найыралы быжыг христианнар безин күткүлгеге алзып болурун Павел сагындырган (Гал. 6:1). Кижи бодунче шын көрүштүг болуп, бачытка алзып болур айыылдыг байдалдарны эскерер ужурлуг (2 Кор. 13:5).

7. Кандыг талаже ылаңгыя кичээнгей салыр болза эки? Чижекти чугаалаңар.

⁷ Кошкак талаларывысты тодарадып алгаш, чүнү канчаар бис? Тускай кичээнгейни ынаар салыры чугула! Чижекти көрээлиңер. Библейжи үелерде хоорайның ханазының кошкак талазы эжиктери болгаш, ону дыка камгалаар турган. Бис база шак ынчаар күткүлгеге удурланыр ужурлуг бис (1 Кор. 9:27).

КҮТКҮЛГЕЛЕРДЕН КАНЧААР КАМГАЛАНЫР?

8, 9. Чугаалар 7-ги эгеде оол улуг бачытты канчаар оюп болур турган? (Чугаалар 7:8, 9, 13, 14, 21).

⁸ Күткүлгеден канчаар камгаланыр? Чугаалар номунда 7-ги эгеде аныяк оолдуң  төөгүзүнде кичээлдерни көрээлиңер. Куду мөзүлүг херээжен кады дүн эрттиреринче чалаарга, ол оол удурланмаан. 22-ги шүлүкте: «Аныяк оол доп-дораан ону эдерип чорупкан» дээн. Бодаарга шупту чүве хенертен болган ышкаш. Мурнуку шүлүктерден алырга, оолдуң мелегей шиитпирлери ону бачытка чедирген.

⁹ Ол кандыг шиитпирлер? Шупту чүве кежээки үеде аныяк оол «херээженниң чурттап турар кудумчузундан» эрткенинден эгелээн. Оон херээженниң бажыңының талазынче оол чорупкан. (Номчуптуңар: Чугаалар 7:8, 9.) Самыын херээженни көрүп кааш, олче углапкаш, аңаа ошкадып, ооң чугаазынга алзыпкан. Ол херээжен оолга бодун эки кылдыр көргүзер дээш, эп-найырал өргүлдерин эккелгенин чугаалаан. (Номчуптуңар: Чугаалар 7:13, 14, 21.) Бир эвес ол аныяк оол мелегей базымнар кылбаан болза, күткүлгеге алыспас, бачыт үүлгетпес ийик.

10. Угаадыглыг чугаалар номунда оолдуң частырыын амгы үеде бир кижи канчаар катаптап болур?

¹⁰ Чугаалар 7-ги эгеде болуушкунга Иегованың кандыг-даа бараалгакчызы таваржып болур. Ындыг бачыт үүлгеткен кижи шупту чүве хенертен болганын кайгаар. Эрткен болуушкуннарны сактып кээр болза, шупту чүве канчаар болганын көрүп каар. Иеговага ынак эвес улус-биле эдеришкен чадавас. Азы барган черлери, дыштанылгазы, кирген сайтылары христианнарга көңгүс таарышпас турган. Мөргүвейн, Бурганның Сөзүн номчувайн, чыыштарже барбайн, суртаалдавайн барганындан база бооп болур. Чугаалар номунда аныяк оолду улуг бачытка чедирген таварылга хенертен болган деп болбас.

11. Бачыт кылбас дизе, чүден оваарныры чугула?

¹¹ Биске ол төөгүде кандыг кичээл бар? Чүгле бачыттан эвес, харын-даа аңаа чедирер бүгү чүүлден ойталаар ужурлуг бис. Шак-ла ындыг оваарындырыгны аныяк оол биле мөзүзү куду херээженниң төөгүзүнде көргүскен. Соломон: «Ооң оруктарын изеп, азып-тенивеңер» — деп чагып-сургаан (У. ч. 7:25). Ол ышкаш сүмени: «Ындыг херээженче чагдаваңар, ооң бажыңының эргининче-даа чоокшулаваңар» деп Чугаалар номунда 5-ки эгеде бижээн (У. ч. 5:3, 8). Ийе, бисти бачытка чедирип болур бүгү чүүлден ойталаары чугула b. Христианнарга тааржыр чамдык херектер безин, хууда биске айыылды чедирип болур (Мф. 5:29, 30).

12. Иов кандыг шиитпир үндүрген база ол шиитпир күткүлгелерден ону канчаар камгалап турган? (Иов 31:1).

¹² Бачытка чедирер байдалдардан камгаланырда быжыг туруш херек. Ол талазы-биле Иовтан үлегерни ап болур бис. Ол херээженче кажан-даа «туралап көрбес бооп карактары-биле дугуржуп алган». (Номчуптуңар: Иов 31:1.) Иов бодунуң керээзинге дүүштүр чурттап, ооң ачызында кадайынга кезээде шынчы чораан. Бис база күткүлгеге алзып болур ажыл-херек кылбас мен деп, быжыг шиитпирленип ап болур бис.

13. Бодалдарын хынаныры чүге чугула? (Чурукту база көрүңер.)

¹³ Оон аңгыда, бодалдарывысты хынаныр ужурлуг бис (Хост. 20:17). Чамдык улус мөзүзү куду херектерни сагыштаалаарында багай чүве чок деп бодаар. Кол-ла  чүве ону кылбайн турар мен деп сагыштыг. Ынчалза-даа ол улуг частырыг. Шын эвес күзелди өпейлээр кижи ону өөскүдүп, чемгерип турар. Ынчалдыр демисежир апаар күткүлгени бодунга боду-ла тургузуп алыр. Үе-үе болгаш, шын эвес бодалдар тыптып кээп болур. Дораан-на ону ойладып, эки бодалдар-биле солуур ужурлуг бис. Туржуру берге апаар шын эвес бодалдарны күштүг күзелче өзерин болдурбайн, бодувусту улуг бачыттан камгалап алыр бис (Флп. 4:8; Кол. 3:2; Иак. 1:13—15).

14. Күткүлгелерден оон ыңай канчаар камгаланырыл?

¹⁴ Күткүлгеден оон өске канчаар камгаланып болур? Бурганның хоойлулары-биле чурттаары биске-ле ажыктыг деп хензиг-даа чигзинмес ужурлуг бис. Бурганның мурнунга ыядынчыг болбазын дээш, бодалдарывысты, күзелдеривисти өйлээри берге апарып болур. Ынчалза-даа күжениишкиннеривис хилис барбас! Чүге дизе Бурганның харыы кылдыр бээр тайбыңы — эң-не үнелиг белек.

15. Буянга ынак болуру күткүлгелерге удурланырынга канчаар дузалаар?

¹⁵ Арыг күзелдерни бодувуска өстүрер ужурлуг бис. Каржыга хөңнү чок, буянга ынак болурунга өөренип алыр болзувусса, бачытка чедирер чүүлден ойлап, шын алдынары биске чиик болур (Ам. 5:15). Баш удур эскербээн, бодаваан күткүлгеге хенертен таварышкаш безин, канчаар алдынарын билир болгаш, белен боор бис.

16. Бурган-биле найыралга хамаарышкан херектер шын эвес күзелдерден канчаар камгалаар? (Чурукту база көрүңер.)

¹⁶ Шын күзелдерни сайзырадырынга чүү дузалаар? Бурган-биле найыралды быжыктырар ажыл-херекти хөй кылыры чугула. Христиан чыыштарга азы суртаалга Иегованы өөртүрүн кызып, багай чүүлдерже сундукпас бис (Мф. 28:19, 20; Евр. 10:24, 25). Бурганның Сөзүн номчуп, боданып тургаш, буянга ынак болуп, каржыны көөр хөңнүвүс чок кылдыр өөренип ап турар бис (Иис. 1:8; Ыд. ыр. 1:2, 3; 118:97, 101). «Күткүлгеге алыспас дээш, серемчилелдиг  болуп, мөргүңер» — дээн Иисустуң сөстерин сактып чоруңар (Мф. 26:41). Мөргүп тургаш, үени дээрде Адавыс-биле эрттирер бис. Шак ынчалдыр биске дузалажыр база ону оон-даа өөртүр күзеливисти быжыглаар арганы аңаа бээр бис (Иак. 4:8).

СЕРЕМЧИЛЕЛИҢЕР ЧИДИРБЕҢЕР

17. Пётр кандыг коргушка алзып турган?

¹⁷ Чамдык четпес талаларывыстан долузу-биле адырлып алыр бис. Ынчалза-даа өскелери катап эглип болур. Ону Пётрнуң чижээнге көрээлиңер. Ол кижилерден корткаш, Башкызындан үш катап ойталаан (Мф. 26:69—75). Соонда ол Синедрион мурнунга Иисустуң дугайында дидими-биле чугаалап турган. Бодаарга ооң коргуушкунундан ис артпаан ышкаш (Аж.-ч. 5:27—29). А чылдар эрткенде еврейлерден сезингеш, өске язы-сөөктүг акылар-биле чемненмейн барган (Гал. 2:11, 12). Пётрнуң кижилерден коргар эрги бүдүжү ынчан эглип келген. Ол оон долузу-биле адырлып албаан чадавас.

18. Шын эвес чаңчылдан адырлып алган-даа болзувусса, чүнү сактыры чугула?

¹⁸ Шак ындыг чүүлге база таваржып болур бис. Кандыг уткалыг? Адырлып алган чаңывыс катап эглип кээр айыыл бар. Аңаа хамаарыштыр бир акывыс: «Мен порнографияны он чыл ишти көрбээн болгаш, оон шагда-ла адырлып алган мен деп бодаан мен. Ынчалза-даа ол чаңчыл кайнаар-даа читпейн, чаштынып алгаш, мени манап турган черлик аң дег болган» — дээн. Акывыс ол шын эвес күзелге төлептии-биле алыспаан. Ол демиселди бо делегейниң төнчүзүнге чедир чорудар апаарын акывыс билип каан. Эрги чаңын катаптавас дээш, оон-даа оваарымчалыг болуп, өөнүң иштинден, удуртукчулардан дузаны ол дилээн.

19. Ам-даа адырылбаан чаңчылывыс бар болза, чүнү канчаар бис?

¹⁹ Ам-даа адырылбаан чаңчылывыс бар чадавас. Ол бисти чагыра бербезин дээш, чүнү кылыр бис? Иисустуң: «Серемчилелдиг болу[ңар]» — деп сүмезин эдерип, үргүлчү  оваарныр болза эки. Боттарывысты күштүг деп бодаар-даа болзувусса, шын эвес күзелдер оттурар байдалдардан ойталаары чугула (1 Кор. 10:12). Ооң мурнунда дузалаан чүүлдерни кылырын уламчылаңар. Чугаалар 28:14-те: «Бодун үргүлчү оваарымчалыг ап чоруур кижи амыр-чыргалдыг» деп сүмелээн (2 Пет. 3:14).

БИСТИ КАНДЫГ ШАҢНАЛ МАНАП ТУРАР?

20, 21. а) Күткүлгелерге алыспас дээш кызар болзувусса, кандыг шаңнал манап турар? б) Бодувустуң талавыстан бар-ла шаавыс-биле кызар болзувусса, Иегова чүнү кылыр? (2 Коринфичилерге 4:7).

²⁰ Күткүлгелерни оюп чоруур күжениишкиннеривис хилис болбас деп бүзүреп болур бис. Бачыт чүгле «түр када таалал» бээр (Евр. 11:25). Иегованың дүрүмнери-биле чурттаар кылдыр чаяаттынган болгаш, ону сагыыры биске аас-кежикти эккээр (Ыд. ыр. 18:9; Э. д. 1:27). Ынчангаш Иегованы өөртүп чорааш, чүнүң-биле-даа деңнеттинмес шаңналдыг — арыг арын-нүүрлүг, мөңгеде чурттаар быжыг идегелдиг бис (1 Тим. 6:12; 2 Тим. 1:3; Иуда 20, 21).

²¹ «Мага-бот — суларгай» деп сөстер бачытка күш четпезивисти илеретпээн. Чүге дизе Иегова херек бүгү чүүлдү бээринге белен. (Номчуптуңар: 2 Коринфичилерге 4:7.) Бурган биске анаа күжүвүстен ажа бээр күштү бээр. Бодувустуң күжүвүс дээрге хүнден-хүнче күткүлдер-биле демисежип турар хууда күжениишкиннеривис-тир. Ол бистиң харыысалгавыс. Боттан хамааржыр бүгү чүүлдү кылыр болзувусса, Иегова мөргүлдеривиске харыылап, күш четпээнивис бергелерге дузалажыр деп чигзинмес бис (1 Кор. 10:13). Ооң дузазы-биле кандыг-даа күткүлгени ажып эртиптер бис!