1, 2. Садок дээрге кымыл? (1 Чылдар 12:22, 26—28).

 ХЕВРОННУҢ хая-даштыг черинге 340 000 ажыг эр улустуң чыглып келгенин сагыштаалап көрүңер даан. Олар Давидти бүгү Израильдиң хааны кылдыр чарлаар дээш чедип келген. Дайынчылар үш хүн иштинде каткы-хөглүг чугаалажып, ырлажып, дойлаан (1 Чыл. 12:39). Аңаа хөй улус аразынга Садок деп аныяк кижи база турган. Ол улустан ылгалы шоолуг чок-даа болза, Иегова олче кичээнгейни салып, бисти ооң дугайында билип алзын дээш сагыш човаан. (Номчуптуңар: 1 Чылдар 12:22, 26—28.) Садок дээрге кымыл?

² Садок бараалгакчы, Авиафар деп дээди бараалгакчы-биле кады ажылдап турган. Аңаа Бурган хөй мерген угаанны болгаш ооң күзел-соруун билип алыр арга-шинекти берген (2 Хаан. 15:27). Ынчангаш кижилер Садоктан мерген угаанныг сүме айтырып кээр турган. Ол дидим бараалгакчының дугайында бо статьяга чугаалажыр бис.

3. а) Иегованың бараалгакчылары чүге дидим болур ужурлуг? б) Бо статьяга чүнү сайгарар бис?

³ Бо сөөлгү хүннерде Эрлик улам күштүг килеңнеп, Бурганның чонунче халдап турар (1 Пет. 5:8). Эрликти болгаш ооң каржы делегейин Иегова узуткап кааптар үени дыка манап турар бис (Ыд. ыр. 30:25). Амдыызында Бурганның Чагыргазын деткип, Иеговага шынчы артарынга акы-угбаларга дузалажыр ужурлуг бис. Ынчангаш дидим болуру чугула. Садоктуң үлегери биске канчаар дузалап болурун көрээлиңер.

 БУРГАННЫҢ ЧАГЫРГАЗЫН ДЕТКИҢЕР

4. Бурганның Чагыргазын деткиирде чүге эрес-дидим чорук херек? (Чурукту база көрүңер.)

⁴ Бис Иегованың Херечилери, Бурганның Чагыргазының талазын эжелеп, ону бүгү сеткиливистен деткип турар бис (Мф. 6:33). Ону кылыры ындыг-ла белен эвес. Чижээ, Эрликтиң каржы делегейинге Иегованың дүрүмнерин сагып, ооң өөрүшкүлүг медээзин суртаалдаарынга ёзулуг дидим чорук херек (1 Фес. 2:2). Оон аңгыда, хөй-ле политиктиг маргыштарже болгаш делегейниң херектеринче киришпес бис (Ин. 18:36). Ындыг байдалдарда быжыг туруштуг артары чугула. Иегованың хөй бараалгакчылары шеригден ойталап, политикага киришпес болгаш, акша-төгериин чидирип, эттедип, кара-бажыңнарже суктуруп турар.

5. Садокка Давидти деткиирде чүге дидим чорук херек болган?

⁵ Садок Хевронче чүгле Давидтиң хааннаашкынын байырлаарынче эвес, а чепсегленгеш, дайылдажырынга белен келген (1 Чыл. 12:38). Шак ол аныяк оол, Давид-биле кады, Израильди дайзыннардан камгалаар хөөннүг болган. Садок өргээ-майгынның бараалгакчызы болгаш, дайылдажыр дуржулгазы чок турган чадавас. Ынчалза-даа ол дыка дидим турган.

6. Давид Садокка чүге дидим чоруктуң эки үлегери болган? (Ырлар 137:3).

⁶ Садок бараалгакчыга дидим болурунга чүү дузалаан? Ол күштүг, эрес-дидим улус аразынга турган болгаш, олар эки салдарлыг болганы чигзиниг чок. Чижээ, Давид дидими-биле «израильчилерни дайын-чаага баштап турган» боорга, чон ону хааны болзун деп күзээн (1 Чыл. 11:1, 2). Дайзыннары-биле тулчуп тургаш, Давид үргүлчү Иеговага идегеп чораан (Ыд. ыр. 27:7; номчуптуңар: Ырлар 137:3). Садоктуң чанынга өске-даа төлептиг улус: Иодай болгаш ооң оглу эрес-дидим Ванея база 22 нояннар турган (1 Чыл. 11:22—25; 12:26—28). Олар  бүгү сеткилинден Давидти деткип, ооң чагыргазын камгалаарынга белен болган.

7. а) Бистиң үевисте дидим чоруктуң үлегери кым? б) Видеода Нси́лу акый кандыг үлегер көргүскен?

⁷ Канчаар дидим болгаш күштүг апарып болур бис? Иегованың чагыргазын эрес-дидими-биле деткип чораан улустуң чижектериниң дугайында боданыр болза эки. Хаанывыс Иисус Христос — эң кол чижек. Ол Эрликтиң политиктиг херектеринге киржиринден туруштуг ойталаан (Мф. 4:8—11; Ин. 6:14, 15). Иисус бодунуң күжүнге идегевейн, Иеговадан дузаны кезээде дилеп чораан. Бисте амгы үениң чижектери база бар. Бүзүрелинге башкартып, шеригже барбайн, политиктиг ажыл-херектерге киришпейн турар аныяк эр улус хөй. Оларның төөгүлери-биле jw.org a сайттан таныжып болур.

АКЫ-УГБАЛАРГА ДУЗАЛАЖЫҢАР

8. Хуралдың удуртукчуларынга дидим чорук кажан херек апаар?

⁸ Иегованың бараалгакчылары бот-боттарынга дузалажырынга ынак (2 Кор. 8:4). Чамдыкта ону кылырда дидим чорук херек. Чижээ, дайын болган черлерде акы-угбаларның Библиялары, ном-дептери, аъш-чеми, идик-хеви чок чадавас. Ха-дуңмавыстың бүгү херек чүүлү бар болзун дээш, ынакшылдыг удуртукчуларывыс амы-тынын харамнанмас (Ин. 15:12, 13). Олар эрес-дидим Садокка дөмей.

9. Давид Садокка чүнү дааскан? (2 Хааннар 15:27—29). (Чурукту база көрүңер.)

⁹ Давидтиң оглу Авессалом ачазының орнунга хаан болур дээш, ону өлүрер деп шиитпирлээн (2 Хаан. 15:12, 13). Давид Иерусалимден ол дораан чоруур ужурга таварышкан. Ол чалчаларынга: «Туруңар, дезип чоруптаалыңар! Оон башка Авессаломдан камгаланыр кандыг-даа аргавыс чок-тур» —  дээн (2 Хаан. 15:14). Давид эштери-биле хоорайдан чоруп тура, Авессаломнуң планнарын дамчыдар идегелдиг улусту Иерусалимге арттырган. Ону Садокка болгаш өске бараалгакчыларга дагзып каан. (Номчуптуңар: 2 Хааннар 15:27—29.) Оларга оваарымчалыг алдынары эргежок чугула, чүге дизе ол чүүл билдине бээр болза, амы-тынындан чарлып болур турган. Бодунга ынак, өжээргек, кара сагыштыг Авессалом ону кедеп турарын билип кагза, Садок биле ооң эштерин чүү манап турарын, чүгле бодап көрүңер!

10. Садок эштери-биле Давидтиң амы-тынын канчаар камгалаан?

¹⁰ Давид план тургускаш, Садоктан база Хусий дээр өске шынчы эжинден дуза дилээн (2 Хаан. 15:32—37). Давид тулчуушкунга белеткенип алыр аргалыг болзун дээш, Хусий план аайы-биле Авессаломнуң бүзүрелин чаалап алгаш, кажар сүме берген. Оон Хусий чүнү сүмелээнин Садок биле Авиафарга дамчыткан (2 Хаан. 17:8—16). Олар ону Давидке дыңнаткан (2 Хаан. 17:17). Ынчалдыр Иегованың дузазы-биле, Садок болгаш ыдыктыг бараалгакчылар Давидтиң амы-тынын камгалаан (2 Хаан. 17:21, 22).

11. Садок дег дидими-биле акыларга канчаар дуза кадып болур силер?

¹¹ Садоктуң дидим чоруун өттүнүп, айыылга таварышкан акыларга дузалажырын дилээр болза, канчаар силер? 1) Айтыышкыннарны сагыңар. Берге байдалдарда демниг болуру дыка чугула. Салбырдан айтыышкыннарга дыңнангыр болуңар (Евр. 13:17). Чыыш айыыл-халапка белеткенип, канчаар алдынарын билир боор кылдыр, удуртукчулар айтыышкыннарны доктаамал сайгарар ужурлуг (1 Кор. 14:33, 40). 2) Дидим база оваарымчалыг болуңар (У. ч. 22:3). Бир чүүл кылыр бетинде, боданыңар. Херекчок айыылдыг базым кылбаңар. 3) Иеговага ынаныңар. Кады бүзүрээн  ха-дуңмага дузалажып тургаш, Иегова чүгле олар эвес, а силер дээш база сагыжы аарып турар деп утпаңар. Ол силерге акыларыңар дээш сагыш човаар эң-не айыыл чок арганы шилип аарынга дузалаар.

12, 13. Виктор биле Виталийниң төөгүзүнде кандыг кичээл бар? (Чурукту база көрүңер.)

¹² Виктор биле Виталий дээр ийи удуртукчулар Украинаның девискээринде кады бүзүрээн акы-угбаларынга чем биле суг чедирип турган. «Аъш-чемни кайыын-даа тып турдувус» — деп, Виктор чугаалаан. Улаштыр мынча дээн: «Боолаашкынга бо-ла таваржып турган бис. Бир акывыс садыындан аъш-чемни элбээ-биле берген. Ооң ачызында суртаалчыларның кезек үеде чиир чеми турган. Ону машинаже чүдүрүп турувуста, бистен 20 хире метр черге ракета часты берген. Ол хүн дургузунда акы-угбаларга улаштыр дузалажыр кылдыр дидим чорукту Иеговадан чаннып дилеп келген мен».

¹³ «Меңээ эрес-дидим чорук дыка херек турган. Баштайгы оруумче 12 шак үнген. Ол үе дургузунда Иеговага мөргүп чораан мен» — деп, Виталий чугаалаан. Дидим-даа болза, оваарымчалыг турганын ол үлешкен: «Кезээде мерген угаанны, биче сеткилди дилеп турган мен. Чүгле чагырганың чөпшээреп каан оруктары-биле халдып турдум. Акы-угбаларның чаңгыс мага-бот дег ажылдаарын көргеш, бүзүрелим дыка быжыккан. Бир улус оруувусту тургузуп белеткээн, а өскелери гуманитарлыг дузаны чыггаш, чүдүрүп турган. Артканнары Виктор-биле бисти чемгерип, дыштандырып турган».

ИЕГОВАГА КАЖАН-ДАА ШЫНЧЫ БОЛУҢАР

14. Ынак киживис Иегованы кааптарга, чүнү миннип болур бис?

¹⁴ Чоок эживис азы төреливис Иегованы кааптарга, биске ёзулуг шенелде апарып болур (Ыд. ыр. 77:40; У. ч. 24:10). Ол кижи-биле хамаарылгавыс чоок турган болгаш, ону хүлээп алыры дыка аарышкылыг. Шак ындыг бергени эрткен болзуңарза, Садоктуң шынчы үлегери силерни күш киирип болур.

15. Иеговага шынчы артарынга Садокка чүге дидим чорук херек болган? (3 Хааннар 1:5—8).

¹⁵ Чоок өңнүү Авиафар саттыныкчы апаарга, Садок Иеговага шынчы арткан. Ол болуушкун Давидтиң чагыргазының төнчүзүнде болган. Давид кырый бээрге, Иегованың Соломонга аазаан хаан дүжүлгезин Адония кара туразында эжелээрин оралдашкан (1 Чыл. 22:9, 10). Авиафар Адонияның талазынче чайгыла бергеш, чүгле Давидтен эвес, а Бургандан база хая көрүнген. (Номчуптуңар: 3 Хааннар 1:5—8.) Бодап көрүңер даан, Садокка ол кайы хире улуг согуг-дур! Садок биле Авиафар 40 чыл ажыр кады демниг бараалгап, алыс шын «Бурганның аптаразы» дээш сагыш човап турганнар (2 Хаан. 8:17; 15:29). Ол бүгү үе дургузунда олар ийилээ Давидтиң чагыргазын деткип, хөй ажыл-херекти кады кылып келгеннер (2 Хаан. 19:11—14).

16. Иеговага шынчы артарынга Садокка чүү дузалаан?

¹⁶ Авиафар саттыныкчы апарган-даа болза, Садок Иеговага шынчы арткан. Давид Садоктуң бердингенинге кажан-даа чигзинмээн. Адонияның сүлчээзи билдине бээрге, Садокка, Нафанга болгаш Ванеяга Соломонну хаан кылдыр шилип чаарын Давид дааскан (3 Хаан. 1:32—34). Чанында шынчы бараалгакчылар Садокка дыка улуг деткимче болуп, Иеговага шынчы артарынга дузалаан (3 Хаан. 1:38, 39). Соломон хаан апаргаш, Садокту Авиафарның орнунга дээди бараалгакчы кылдыр томуйлаан (3 Хаан. 2:35).

17. Эжиңер азы төрелиңер Иеговадан хая көрнү берзе, Садоктан канчаар үлегер ап болур силер?

 ¹⁷ Садоктан кандыг үлегер ап болур силер? Бир эвес эжиңер азы төрелиңер алыс шынны каапкан болза, Иеговадан быжыг туттунуңар (Иис. 24:15). Бурган силерге шын алдынарынга күштү болгаш дидим чорукту бээр. Аңаа ынаныңар. Бурганга мөргүп, аңаа шынчы бараалгап чоруур улус аразынга туруңар. Иегова силерниң бердингениңерни үнелээр, албан шаңнаар (2 Хаан. 22:26).

18. Марко биле Сидсениң төөгүзүнде кандыг кичээл бар?

¹⁸ Ма́рко биле ооң өөнүң ишти Си́дсениң чижээн көрээлиңер. Оларның ийи улуг уруу алыс шынны каапкан. Марко мынча дээн: «Чаш төлүңнү бир дугаар көдүрүп алырыңга, ынакшыл сени дола бээр. Урууңну камгалаар дээш, чүнү-даа кылырынга белен сен. Уругларывыс Иегованы кааптарга, шыдажыр аргажок аарышкылыг болган». Марко уламчылаан: «Ындыг-даа бол, Иегова кезээде чанывыста. Ол биске бот-боттарывыска дузалажыр арганы берип, сагыш човап турар. Мен күш чок каарымга, Сидсе деткиир, а ол харыксырай бээрге, мен ону деткиир мен». Сидсе немээн: «Иегова чокта ол бүгүнү эртип шыдавас бис. Шупту чүве мээң буруум-биле болган деп бодалдар-биле бодумну хинчектеп турганымны сактыр мен. Ону Иеговага чугаалаан мен. Каш хонук эрткенде, Хурал залынга хөй чылдар иштинде көрбээн угбамга ужуражы берген мен. Ол мени куспактааш: „Эргим дуңмам, Сидсе. Сээң бурууң эвес деп утпа“ — дээн. Иегова мени кагбайн, суртаалга өөрүшкүмнү чидирбезинге дузалап турар».

19. Бо статьяны өөренгеш, кандыг сорулгалар салып алдыңар?

¹⁹ Иегова бараалгакчыларындан, Садок ышкаш, дидим болурун күзээр (2 Тим. 1:7). Ынчалза-даа чүгле бодуңарның күжүңерге даянмаңар. Бистиң Бурганывыс аңаа идегээривисти күзеп турар. Эрес-дидим чорук чедишпес болза, Иеговадан дилеп мөргүңер. Ол силерни Садок ышкаш дидим кылып каар! (1 Пет. 5:10).