1. Алыс шынны чүү дээш үнелээр силер?

 ИЕГОВАНЫҢ бараалгакчылары библейжи алыс шынга ынак. Оларның бүзүрели аңаа үндезилеттинген (Рим. 10:17). Иегова христиан чыышты «алыс шынның чөленгиижи болгаш үндезини» болзун дээш тургускан деп бүзүрээр бис (1 Тим. 3:15). Удуртукчу акыларывыска күзелдии-биле дыңнангыр бис. Ол акылар биске Библияны база Бурганның күзел-соруун билип алырынга дузалажып турар (Евр. 13:17).

2. Алыс шынны билир-даа болзувусса, кандыг айыыл бар? (Иаков 5:19).

² Бис алыс шынга болгаш Бурганның организациязынга ынак бис. Ынчалза-даа ол оруктан аза бээр айыыл бар. (Номчуптуңар: Иаков 5:19.) Эрлик чүгле ону манап турар. Бир эвес Эрлик Библияга азы Бурганның организациязының берип турар айтыышкыннарынга бүзүреливисти кошкадып шыдаптар болза, ол дыка амыраар (Эф. 4:14).

3. Алыс шындан быжыг туттунары чүге чугула? (Эфесчилерге 6:13, 14).

³ Номчуптуңар: Эфесчилерге 6:13, 14. Удавас Эрлик кажар нүгүлдү нептереткеш, хөй-ле чоннарны Иеговага удурландырыптар (Ажыд. 16:13, 14). Бурганның бараалгакчыларының бажын төөредир дээш, ол дыка хөй күш үндүрер деп билир бис (Ажыд. 12:9). Ынчангаш мегени шындан ылгап өөренип, алыс шынга шынчы болуру чугула  (Рим. 6:17; 1 Пет. 1:22). Коргунчуг хилинчекти ажып эртип алырывыс оон хамааржыр.

4. Бо статьяга чүнү сайгарар бис?

⁴ Бо статьяда шынны мегеден ылгаарынга база Иегованың организациязынга бүзүрээринге дузалаар ийи шынарны көргүскен. Улаштыр алыс шындан быжыг туттунарынга ажыктыг үш сүмени сайгарар бис.

ШЫННЫ ТОДАРАДЫРЫНГА ХЕРЕК ШЫНАРЛАР

5. Шын биле мегени тодарадып алырынга, Иеговадан коргуш канчаар дузалаар?

⁵ Иеговадан коргуш. Бургандан коргуушкун аңаа ынакшылывыс-биле сырый харылзаалыг. Иеговага дыка ынак болгаш, ону хомудадыптар хире чүүлдерни кылбазын кызар бис. Биске эң-не кол чүүл — Иегованың бедик үнелелин чедип алыры (У. ч. 2:3—6; Евр. 5:14). Ынчангаш ачы-буянны каржыдан, шынны мегеден ылгап өөренирин күзээр бис. Кижилерден коргуушкун Иеговага ынакшылывысты кошкатпас ужурлуг. Чүге дизе кижилерниң сонуургаар чүүлдери колдуунда Иеговага таарышпас.

6. Кижилерден корткаш, 10 хайгыылчы чүге шынны чугаалаваан?

⁶ Бургандан артык кижилерден коргар болзувусса, алыс шынга дүүшпес чүүлге бүзүрей бээр бис. Моисей Аазаттынган черни көөрү-биле 12 хайгыылчыны чорутканын сактып кээлиңер. Оларның 10 кижизи хананейлерден корга берген, ол коргуушкун Иеговага ынакшылындан күштүг апарган. Хайгыылчылар чонга: «Ол улуска удур тулчуп шыдавас бис, олар бистен күштүг-дүр!» — дээн (Сан. 13:28—32). Ында шын база бар, чүге дизе хананейлер израильчилерден күштүг болган. А Бурганның чону дайзыннарын тиилеп шыдавас дээри шын бе? Иегованы бодавас  кижи ынчаар чугаалаар! Бурган израильчилер ол черни ээлеп алзын деп күзээн, 10 хайгыылчыга ону сактыры чугула турган. Оон ыңай олар чоокта чаа Иегова чонун канчаар камгалаанын утпас ужурлуг. Ынчан хананейлер Бурганның күжүнге бодаарга, чүү-даа эвес дээрзин билип каар турганнар. Нуннуң оглу Иисус биле Халевке бодаарга, өске хайгыылчыларның бүзүрели кошкак болган. Иисус биле Халевке Иегованың көрүжү чугула болгаш, олар чонга: «[Иегованың] сеткилинге кирер болзувусса, Ол бисти демги черже чедирип... черни биске бээр...» — дээн (Сан. 14:6—9).

7. Иеговадан коргуушкунну канчаар сайзырадып алырыл? (Чурукту база көрүңер.)

⁷ Иеговадан коргуушкунну сайзырадып алырынга чүү дузалаар? Шиитпир хүлээр санында-ла, Бурганның үзел-бодалын боданыңар (Ыд. ыр. 15:8). Библейжи үзүндү номчуурда бодуңардан: «Ындыг байдалга таварышкан болзумза, канчаар алдынар мен?» — деп айтырып көрүңер. Чижээ, бодуңарны израильчилерниң аразында 10 хайгыылчының корткан сөстерин дыңнап турар кылдыр сагыштаалаңар. Оларга бүзүрээр силер бе? Азы корга бээр силер бе? Иеговага ынак болгаш, кижилерден кортпас силер бе? Иисус биле Халев шынны чугаалаарга-даа, чон бүзүревээн. Түңнелинде Иисус биле Халевтен аңгыда, Аазаттынган черже ол салгалдан кым-даа кирбейн барган (Сан. 14:10, 22, 23).

8. Кандыг шынарны кызып сайзырадыр болзувусса эки база чүге?

⁸ Биче сеткил. Иегова алыс шынны чүгле биче сеткилдиг улуска ажыдып бээр (Мф. 11:25). Библия өөренирин саналдаарга, дузаны биче сеткилдиг хүлээп алган бис (Аж.-ч. 8:30, 31). Ынчалза-даа өрү көрдүнеринден кичээнири чугула. Оон башка бодувустуң көрүжүвүстү библейжи дүрүмнерден болгаш Иегованың организациязының айтыышкыннарындан дээре деп бодай бээр бис.

9. Биче сеткилдиг артарынга биске чүү дузалаар?

⁹ Биче сеткилдиг артар дизе, Иеговага бодаарга, кайы хире чөгенчиивисти сактыры чугула (Ыд. ыр. 8:4, 5). Бургандан өөренир күзелди база биче сеткилди оон-даа эки сайзырадырынга дузаны оон дилеп болур бис. Иегова бодунуң бодалдарын Сөзү болгаш организациязының үндүрүп турар материалдары таварыштыр элбээ-биле үлежип турар. Бурган бодувустуң эвес, а ооң үзел-бодалын үнелээринге дузалаар. Библияны номчуп тургаш, Иегованың биче сеткилдиг чорукка ынаан, а турамык, өрү көрдүнер чүүлге хөңнү чогун көргүскен бадыткалдарны чыып алыңар. Хүндүткелдиг хүлээлгелер алгаш, улус кичээнгей салырга, биче сеткилдиг бооп, оваарымчалыг болуулуңар.

АЛЫС ШЫНДАН БЫЖЫГ ТУТТУНАРЫНГА ЧҮҮ ДУЗАЛААР?

10. Иегова эрткен үеде айтыышкыннарны кымны таварыштыр бээр турган? Амгы үеде ону канчаар кылып турар?

¹⁰ Иегованың организациязынга кезээде бүзүреңер. Иегова чонунга айтыышкыннарны баштай Моисейни, а сөөлзүредир Нуннуң оглу Иисусту таварыштыр берип турган (Иис. 1:16, 17). Бурганның шилип алганы ол эр улусту израильчилер хүлээп хүндүлээр турда, шупту чүве эки турган. Чүс-чүс чылдар эрткенде, христиан чыыш тургустунган. Баштай удуртулга 12 элчиннерден кээр турган (Аж.-ч. 8:14, 15). А сөөлзүредир оларга Иерусалимде өске  удуртукчу акылар катчып келген. Христианнар ол шынчы эр улустуң айтыышкыннарын күүседип турда, чыыштарның «бүзүрели быжыгып, улузу хүн санай немежип турган» (Аж.-ч. 16:4, 5). Ол ышкаш бо хүнде чедиишкиннеривис Иегованың организациязынга дыңнангырывыстан хамааржыр. Бис дээш сагыш човап турар акыларывысты дыңнавас болзувусса, Иегова чүнү миннир? Бо айтырыгның харыызын израильчилер Аазаттынган черже бар чыдырда чүү болганын сайгаргаш, көрүптээлиңер.

11. Моисейге хүндүткел көргүспээн израильчилер-биле чүү болган? (Чурукту база көрүңер.)

¹¹ Аазаттынган черже бар чыткаш, чамдык хүндүткелдиг эр улус Моисейниң чонну баштаар эргезин: «[Чүгле Моисей эвес], бүгү израиль чон... ыдыктыг болгай, [Иегова]... оларның аразында» деп маргышкан (Сан. 16:1—3). Ийе, Бурган бүгү чонну ыдыктыг деп санаан, а чонну удуртур ажылды Моисейге дааскан (Сан. 16:28). Үймээнчилер баштыңчызын шүгүмчүлээш, херек кырында Иегованы шүгүмчүлээн. Олар Бурганның эвес, а боттарының күзелинче, эрге-чагырга, ат-алдар алырынче, чүткээн. Иегова үймээнниң баштыңчылары биле муң-муң талалакчыларын узуткаан (Сан. 16:30—35, 41, 49). Бо хүннерде база чүү-даа өскерилбээн: кандыг-бир кижи Бурганның организациязында айтыышкыннарны тоовас болза, ол таарзынмас.

12. Иегованың организациязынга чүге чигзинмес бис?

¹² Иегованың организациязынга чигзинмейн барып болур бис. Библейжи билиглеривиске азы Чагырганың ажыл-херээнге кандыг-бир чүүлдү өскертир апарза, Удуртукчу чөвүлелде акылар ол-ла дораан хөделип турарлар (У. ч. 4:18). Чүге дизе оларга эң-не кол чүүл — Иегованың күзээни-биле кылыры. Оон ыңай олар шупту шиитпирлерин Библияга үндезилеп турары биске үлегер-чижек.

13. «Шынныг өөредигниң үлегери» деп чүл, оон туттунары чүге чугула?

 ¹³ «Шынныг өөредигниң үлегеринден» туттунуңар (2 Тим. 1:13). «Шынныг өөредигниң үлегери» дээрге Библияның христиан өөредиглери (Ин. 17:17). Бистиң бүгү бүзүреливис аңаа үндезилеттинген. Иегованың организациязы ол үлегерден туттунарынга өөредип турар. Ол ёзугаар алдынар болзувусса, биске камгалал болур.

14. Бирги векте чамдык христианнар «шынныг өөредигниң үлегеринден» канчаар салдыныпкан?

¹⁴ «Шынныг өөредигниң үлегеринден» өскээр баар болзувусса, чүү болур? Чижектен көрүптээлиңер. Бирги векте христиан чыышка Иегованың хүнү чедип келген деп медээ тарай берген. Ооң чылдагааны Павел элчинниң адындан меге чагаа чадавас. Фессалоникада чамдык христианнар фактыларны хынап албайн, ол информацияга бүзүрей бергеш, ону улуска безин дамчыдып турганнар. Бир эвес олар Павелдиң канчаар өөреткенин сагынган болза, мегелетпес ийик (2 Фес. 2:1—5). Ынчангаш ол ха-дуңмазын бүзүрээчел болбазынче оттурган. Шынны мегеден ылгап билиринге дузалаар дээш, фессалоникчилерге чагаазын ол: «Бодумнуң холум-биле бижип олур мен: Павелден байыр. Ол чагаа мээңии-дир деп көргүзер дээш, чагааларымның шуптузун ынчаар демдектеп тур мен» — деп сөстер-биле дооскан (2 Фес. 3:17).

15. Шын кылдыр көргүскен мегеден канчаар камгаланып ап болур бис? Чижекти чугаалаңар. (Чурукту база көрүңер.)

¹⁵ Павел элчинниң фессалоникчилерге чагаазындан чүнү өөренип ап болур? Бис база кандыг-бир кайгамчык медээ азы библейжи алыс шынга дүүшпес чүүл дыңнаар чадавас бис. Ындыг байдалда кичээнгейлиг болуру кончуг чугула. Бир катап Совет Эвилелинге акылар кол башкарылга черинден чоруткан деп чагаа алган. Ында бот башкарылгалыг аңгы организация тургузарын бижээн болган. Көөрге шын ышкаш чагааны дайзыннарывыс бижээн. Шынчы акыларывыс мегелеттирбээн. Ол чагаа организацияның бүгү өөредип келген чүүлдеринден  ылгалып турарын олар билип каан. Амгы үеде алыс шынның удурланыкчылары бисти будаар база аравыска маргыш үндүрер дээш, амгы үениң аргаларын ажыглап болур. Ынчангаш бодамча чок, далаш түңнелдер кылбас бис. Бодун камгалаар дизе, номчуп, дыңнап турар чүүлдеривис алыс шынга дүгжүп турар бе деп кичээнгейлиг боданыры чугула (2 Фес. 2:2; 1 Ин. 4:1).

16. Римчилерге 16:17, 18-тен алырга, чыышка бир кижи алыс шынга дүүшпес бодалдар нептередип эгелээрге, чүнү кылыр ужурлуг бис?

¹⁶ Иеговага шынчы улус-биле демниг болуңар. Бурган бүгү чонун демниг бараалгаарын күзээр. Чүгле алыс шындан быжыг туттунар болзувусса, демниг чорук болдунар. Бир-ле кижи алыс шынга дүүшпес бодалдар нептередип эгелээр болза, чыышка аңгылажыышкын тургустунуп кээр. Ол чылдагаан-биле Бурган бисти: «Ындыг улус-биле харылзашпаңар» — дээн. Оон башка мегеге бүзүреп, Иеговага шынчы чоруувусту үреп болур бис. (Номчуптуңар: Римчилерге 16:17, 18.)

17. Алыс шынның кайдазын билири, оон быжыг туттунары чүге чугула?

¹⁷ Алыс шынның кайдазын билир база оон ойталавас болзувусса, Бурган-биле найыралывыс быжыг, бүзүреливис күштүг болур (Эф. 4:15, 16). Ынчалдыр меге өөредиглерден, Эрликтиң суртаалындан камгаланыр бис. Коргунчуг хилинчек үезинде Иегованың дузазынга идегеп болур бис. Алыс шындан быжыг туттунуңар, ынчан тайбыңның Бурганы силер-биле кады болур! (Флп. 4:8, 9).