1. Бистиң шуптувуска Иегова чүнү кылган?

ИЕГОВА бисти шуптувусту Бодунче хаара тудуп алган (Ин. 6:44). Ооң утказын боданып көрүңер даан. Иегова миллиард-миллиард кижилерниң аразындан барып-барып силерни шилип алган. Чүге дизе Ол силерде бир-ле үнелиг чүүл барын эскерген — Аңаа ынак бооп шыдаар чүрээңерни (1 Чыл. 28:9). Иегова силерни дыка эки билир, чүнү бодап турарыңарны көрүп турар база силерге аажок ынак. Ону миннири кайы-хире кайгамчык-тыр!

2. Иегова бараалгакчы бүрүзүнге эрге-чассыг хамаарылгалыг деп чүүлдү Иисус канчаар көргүскен?

² Иегова акы-угбаларывыска, биске дег, эрге-чассыг хамаарылганы көргүзүп турар. Иегованың ынакшылын Иисус мындыг чижекке көргүскен. Кадарчы кижи чүс хоюнуң бирээзи аза бээрге, тозан тозун даглар эдээнге каапкаш, чаңгыс хоюн дилеп чоруптар. А кажан оозун тып алгаш, ажынып-хорадавас, а харын-даа хөлчок өөрүүр. Оон чүнү өөренип ап болур бис? Иегова Бодунуң бараалгакчы бүрүзүн үнелеп турар. «Дээрде Адаңар база шак ындыг: бо бичии уругларның чаңгызы-даа чиде бээрин Ол күзевейн турар» — деп, Иисус чугаалаан (Мф. 18:12—14).

3. Бо статьяга чүнү сайгарар бис?

³ Бистер чыышта акы-угбаларга аарышкылыг чүүлдер кылыксавас бис. Ынчалза-даа оларны хомудатпас дээш, чүнү канчаар болза эки? Азы бисти хомудадыпкан болза канчаар алдынар ужурлуг бис? Бо айтырыгларның харыызын көөрүнүң бетинде, Матфейниң 18 дугаар эгезинде «бичии уруглар» дээн сөстүң утказын билип алыылыңар.

4. Иисус кымнарны «бичии уруглар» дээнил?

⁴ «Бичии уруглар» дээрге Иисустуң шупту өөреникчилери-дир. Олар каш-даа харлыг болза, бичии уруглар дег, Иисустан өөрениринге белен (Мф. 18:3). Олар аңгы-аңгы чурттардан, кижизидилгези өске, аажы-чаңы болгаш боданыры аңгы-даа бол,  Христоска бүзүрелди илередип турарлар. А ол оларга аажок ынак (Мф. 18:6; Ин. 1:12).

5. Бараалгакчыларының кайы бирээзин улус хомудадырга, Иегова чүнү миннип турар?

⁵ Ол «бичии уругларның» шуптузу Иеговага дыка үнелиг. Иегованың минниишкиннерин эки билип алыр дээш, боттарывыстың бичии уругларга хамаарылгавысты бодаптаалыңар. Ажы-төл бистиң аажок үнелиг эртине-байлаавыс болганда, оларны кезээде карактап камгалаар бис, чүге дизе олар бичии болгаш бүзүрээчел. Улуг кижиге безин улус чөптүг эвес хамаарылга көргүзерге, ону көргеш, таарзынмас бис. А кажан бичии уругларны дорамчылап, бак көөрге, оон-даа күштүг минниишкиннерни миннип, кара баарывыс ажый бээр. Иегова база бараалгакчыларын, бичии уруглар дег, камгалап турар. Кажан Ооң бараалгакчыларын улус хомудадырга, Ол сеткилиниң ханызындан таарзынмайн турар. Оон артык, Ол килеңнеп турар (Иса. 63:9; Мк. 9:42).

6. 1 Коринфичилерге 1:26—29-тан алырга, бо делегейде кижилер Иисустуң өөреникчилеринге кандыг хамаарылгалыг?

⁶ Иисустуң өөреникчилери оон ыңай бичии уругларга чүзү-биле дөмейил? Боданып көрээлиңер. Бо делегей колдуунда кандыг улустарны хүндүлээр ийик? Бай-шыдалдыг, ат-алдарлыг база сураглыг улустарны. А Иисустуң өөреникчилери оларның караанга, чүзү-биле-даа онзаланмайн турар, бөдүүн улус кылдыр көстүр. (Номчуптуңар: 1 Коринфичилерге 1:26—29.) Ынчалза-даа Иегованың көрүжү сыр өске.

7. Иегова акы-угбаларга кандыг хамаарылгалыг болурувусту күзеп турар?

⁷ Шагда-ла азы чоокта чаа-даа сугга суктуруп алган бараалгакчыларынга Иегова дөгерезинге дыка ынак. Ол бараалгакчыларының шуптузун үнелеп турар болганда, бистер база акы-угбаларывыстың шуптузунга ынак боор ужурлуг бис. Библияда: «Бүзүрээн ха-дуңмаңарга ынак болуңар» дээн болгай, чүгле каш санныг кижиге эвес (1 Пет. 2:17). Бүзүрели чаңгыс акы-угбаларывыска ынак бооп, олар дээш сагыш-човаар ужурлуг бис. Бир кижи биске хомудай берген болза, чүү-даа болбаан ышкаш алдынып, «бодунуң шорузу-дур, хомудаачал болганы» база «ол боду мени өршээр ужурлуг» деп бодавас ужурлуг бис. Чүге улус хомудаачал бооп болур? Ол кижиниң өзүп келген байдалы бодун чөгенчиг кылдыр минниринче салдар чедирип турар чадавас. Чок болза, чоокта чаа сугга суктуруп алган болгаш, шупту тергиин эвес бис, ынчангаш бот-боттарывысты өршээжир ужурлуг бис деп чүүлдү чедир билбейн турар. Чогум кымның хомудадыпканы-даа ынча дыка чугула эвес. Эң-не кол чүүл — амыр-тайбыңны катап тургузуп алыры-дыр! А хөлүн эрттир хомудаачал кижи ону четпес талам-дыр деп билип база өскерлир ужурлуг мен деп чүүлдү миннир болза эки. Ол өскерлип алыр болза, боду-даа аас-кежиктиг апаар база өске-даа улуска ооң-биле эдержири чиик апаар.

8. Иисустуң өөреникчилеринге кандыг үзел-бодал салдар чедирип турган?

⁸ Иисустуң өөреникчилери «Дээрниң Чагыргазында кым эң чугулал?» — деп айтырыгны салырга, ол бичии уругларга хамаарыштыр чижекти чугаалаан (Мф. 18:1). Ол үеде чурттап чораан еврейлерниң хөй кезиинге, улус мурнунга туруш-байдал чугула турган. Безин бир эртемдээн мынча деп тайылбырлаан: «Олар ат-алдар чедип алыр дээш база кижилерниң хүндүткелин чаалап алыр дээш, амыдырап чурттап, безин амы-тынындан чарлып турганнар».

9. Иисустуң өөреникчилери чүнү канчаар ужурлуг турган?

⁹ Адааннажыр хөөнден адырлып алыры өөреникчилеринге дыка берге боор деп, Иисус билип турган. Чүге дизе ол үеде чурттап чораан еврейлерниң хөй кезии адааннажыр хөөннүг турган. Ол оларга: «Силерниң араңарда эң улууңар эң бичеңер дег болзун, а башкарып  турарыңар — бараан болган чалчаңар дег болзун» — дээн (Лк. 22:26). Бир эвес боттарывысты биче кылдыр санаар болзувусса, өскелерни бодувустан бедик кылдыр көөр бис (Флп. 2:3). Шак ындыг хөөннүг боор болзувусса, кымны-даа хомудатпас бис.

10. Павелдиң кайы сөстериниң дугайында шыңгыы боданыр болзувусса эки?

¹⁰ Акы-угбаларывыс кандыг бир талага бистерден дээре бооп болур. Бир эвес оларның чүгле эки шынарларынче кичээнгей салыр болзувусса, ынчаар бодаары бистерге белен боор. Павелдиң бо сөстериниң дугайында шыңгыы боданыр болзувусса эки: «Кым сени онзагай кижи кылып турарыл? Бургандан белек кылдыр албааның, бодуңнуу боор чүң барыл? Сен бүгү чүүлдү алган болзуңза, чүге ону халас албаан дег мактаныр сен?» (1 Кор. 4:7). «Өскелерден дээре мен» деп боттарывысче хөй кичээнгей салып, көскүлеңнээр күзелден оваарныр ужурлуг бис. Бир акывыс эки илеткел чугаалаар азы бир угбавыс библейжи кичээлди белени-биле эгелеп аар салым-чаяанныг болза, олар чедиишкинниг ажыл-херээ дээш, Иеговага алдар-хүндүнү көргүзери чогуур.

11. Иисустуң хаан болгаш чалча дугайында чугаалаан чижээниң утказы кандыгыл?

¹¹ Бот-боттарын хомудатпазының дугайында тайылбырлаар дээш, Иисус өөреникчилеринге хаан биле чалчаның дугайында чижек чугаалаан. Хаан бодунуң чалчазынга бүдүн чуртталгазында безин төлеп шыдавас хөй өрезин өршээп каан. А сөөлүнде ол чалча оон эвээш өрелиг өске чалчаны өршээвээн. Ол дээш хаан ол каржы чалчаны кара бажыңнап каан. Бо угаадыглыг чугаадан чүнү өөренип ап болур бис? Иисус мынча дээн: «Шуптуңар эш-өөрүңерни сеткилиңер ханызындан өршээвес болзуңарза, Дээрде Адам силерни база ынчалдыр аажылаар» (Мф. 18:21—35).

12. Хомудадыпкан кижини өршээвес күзел чүү чүвеге чедирип болурул?

¹² Ол чалчаның кылган ажыл-херээ аңаа бодуңга-даа, өскелерге-даа багай салдарлыг болган. Бирээде, ол бодунуң эжин «өрезин эгитпеже кара-бажыңче каржызы-биле суп каан». Ийиде, ол байдалды долгандыр көрүп турган кижилерни хомудаткан: «Ону көрүп турган чалчалар аажок муңгарап турганнар». Шак ынчаар бистиң кылып турар ажыл-херээвис долгандыр улуска база салдарлыг бооп болур. Чижээ, бир кижи биске багай хамаарылга көргүскен болза, а бис ону өршээвейн турар болзувусса, ол чүүл чүү чүвеге чедирип болурул? Бирээде, ол кижини өршээриниң орнунга, аңаа соок хамаарылгалыг боорувуска, ооң сагыш-сеткилинге аарышкылыг бооп болур. А ийиде, чыышта улус бистиң акывыс-биле азы угбавыс-биле багай хамаарылгавысты эскергеш, хөөнү баксырап болур.

13. Бир угбавыстың чижээнден чүнү өөренип ап болур бис?

¹³ Бир эвес өскелерни өршээр болзувусса, боттарывыска-даа база долгандыр турар улуска-даа ажыктыг боор. Шак ындыг байдалга Кристал дээр доктаамал эгелекчи угбавыс таварышкан. Чыыш иштинде бир угбавыс аңаа чөптүг эвес хамаарылганы бо-ла көргүзер турган. Кристал мынча дээн: «Хылыш ышкаш балыглаптар сөстерни ол бо-ла меңээ чугаалаптар турган. Ооң-биле кады чаңгыс бөлүкке суртаалдаар күзелим безин чиде берген. Сөөлүнде ынча дыка суртаалдаксавас апарган мен, ынчангаш ооң мурнунда ышкаш, бараалгалдан өөрүшкүнү албастап калган мен». Ооң угбазынче хорадаар чылдагааннары хөй турган-даа болза, Кристал бодун кээргеп, улустарже хомудал шыгжап турбас деп шиитпирлеп алган. Аңаа чүү дузалаан? 1999 чылдың октябрь 15-те үндүрген «Таңныыл суургазында» «Прости от сердца» деп статьяда сүмелерни ол биче сеткилдии-биле ажыглаан. Ынчан Кристал кады бүзүрээн угбазын өршээпкен. Оон улаштыр ол  мынча дээн: «Кижи бүрүзү чаа бүдүштү кедип алыр дээш, күжениишкиннерни үндүрүп, бодун өскертирин кызып турар база Иегова бистерни хүн бүрүде өршээп турар деп билип каан мен. Ынчан мээң сагыш-сеткилим ажый берген. Оон суртаал ажылындан катап өөрүшкүнү ап эгелээн мен».

14. а) Матфей 18:21, 22-ден алырга, Пётр элчинге чүнү кылыры берге турган? б) Өске улусту өршээринге чүү дузалаар?

¹⁴ Улустарны өршээри дээрге бистиң хүлээлгевис-тир база ынчаар кылыры шын деп билир бис. Ынчалза-даа чамдыкта ону кылыры берге. Пётр элчинге өске улусту өршээри база берге турган чадавас. (Номчуптуңар: Матфей 18:21, 22.) Бистерге чүү дузалап болур? Бирээде, Иегова өршээчел деп черле утпас болзувусса эки (Мф. 18:32, 33). Бис өршээлге төлеп чок-даа болзувусса, Ол бисти дөмей-ле катап-катап өршээп турар (Ыд. ыр. 102:8—10). Оон аңгыда, «бис база бот-боттарывыска ынак болур ужурлуг бис» (1 Ин. 4:11). Ынчангаш өршээр чоор бе азы өршээвес чоор бе деп боданмас ужурлуг бис. Акы-угбаларны өршээри дээрге бистиң хүлээлгевис-тир. Ийиде, өскелерни өршээгеш, чүнү чедип алырывыстың дугайында боданыңар. Шак ынчаар бисти хомудадыпкан кижиге дузалажыр бис, чыыш иштинге амыр-тайбыңны тургузар бис, Иегова-биле найыралывыс үрелбес боор база сагыш-сеткиливисте өйүп турар чүүлдер турбас (2 Кор. 2:7; Кол. 3:14). Үште, Иеговадан дузаны дилеңер. Чүге дизе Ол бисти өршээчел болурувусту дилеп турар болгай. Ынчангаш акы-угбаңар-биле найыралыңарны үрээрин Эрликке черле чөпшээревеңер (Эф. 4:26, 27). Эрлик чыышта амыр-тайбыңны болгаш чаңгыс аай чорукту үрээрин кызып турар. Ынчангаш биске Иегованың дузазы дыка херек.

15. Чыышта кандыг-бир кижи силерни чаза хомудадыпкан болза, чүнү канчаар болза эки? (Колосчуларга 3:13).

¹⁵ Силерни чыышта акыңар азы угбаңар хомудадыптарга, ол дээш муңгарап туруп берген  болзуңарза, канчаарыл? Араңарда амыр-тайбың хамаарылгалыг болур дээш, кызыңар. Иеговага сеткилиңерни тө каап бериңер. Силерни хомудадыпкан кижи дээш мөргүп: «Сээң ол кижиде үнелеп турарың чараш шынарларын меңээ база көргүзүп берем, Бурганым!» деп Иеговадан дилеңер (Лк. 6:28). А бир эвес өршээп чадап турар болзуңарза, эки белеткенип алгаш, ол кижи-биле чугаалажыңар. Ол силерни өжегерээн хомудадыпкан деп черле бодаваңар (Мф. 5:23, 24; 1 Кор. 13:7). Чугула чүүл, силерни хомудаткан кижи-биле буруудадыр сеткилдиг чугаалашпаңар. А бир эвес ол кижи эптежир күзел чок болза канчаар? Амыр-тайбыңны тургузар дээш, катап-катап оралдажыңар. (Номчуптуңар: Колосчуларга 3:13.) Эң-не кол чүүл, силерниң сеткилиңерге ол кижиге хамаарыштыр көөр хөөн чок чорук тыптып келбес кылдыр, кызыңар. Оон башка Иегова-биле найыралыңар баксырап болур. Бо сүмелерни ажыглаар болзуңарза, Иегова-биле найыралды чүүден артык үнелеп турарыңарны көргүзер силер (Ыд. ыр. 118:165).

16. Кижи бүрүзүнде кандыг харыысалга бар?

¹⁶ «Чаңгыс кадарчылыг чаңгыс кодан» дег, акы-угбаларывыс-биле демниг, катай бараалгап болур аргавыс дээш, Иеговага өөрүп четтирер-дир бис (Ин. 10:16). «Организованы, чтобы исполнять волю Иеговы» деп номнуң 165 дугаар арнында мынча деп турар: «Ам сен [чыышка амыр-тайбыңны тудар] харыысалгалыг апарган сен». Ынчангаш «бистер акы-угбаларывысче кижиниң көрүжү-биле эвес, а Бурганның көрүжү-биле көрүп өөренир болзувусса эки». Иегова биске эрге-чассыг ажы-төлүнге дег хамаарылгалыг. Силер кады бүзүрээн акы-угбаларыңарга шак ындыг хамаарылгалыг силер бе? Иегова силерниң оларга кылып турар чүүлдериңерни эскерип база аажок үнелеп турар (Мф. 10:42).

17. Бо статья силерни чүнү кылырынче оттурду?

¹⁷ Бис акы-угбаларга ынак болгаш, оларны кажан-даа хомудадыксавас бис. Оон ыңай оларны боттарывыстан өрү көрүп, чүрээвистиң ханызындан өршээп турар бис. Хомудал шыгжап чорааш, Иегова-биле найыралывысты үреп алырын күзевес болгай бис. «Ынчангаш биске амыр-тайбыңны база удур-дедир деткимчени эккээр чүүлдерже» бар шаавыс-биле чүткүүлүңер! (Рим. 14:19).