1. Пётр элчин Иерусалимге чыглып келген хөй чонга чүү дээнил?

ИЕРУСАЛИМЧЕ аңгы-аңгы чурттардан келген янзы-бүрү дылдарга чугааланыр улус кайгамчык чүүлдү көргеннер. Бөдүүн, эртем-билиг чок еврейлер оларның дылынга чугааланы берген! Чигзиниг чок, ол болуушкун оларны кайгадыпкан, ынчалза-даа Иисустуң өөреникчилеринден дыңнаан сөстери оларның чүрээнге мырыңай дээштиг болган. Камгалалды алыр дизе, Иисус Христоска бүзүрелди илередири чугула деп, Пётр элчин чонга тайылбырлаан. Улус ону дыңнааш, сагыжы ыстап аарып, Пётрдан: «Бис ам чүнү кылыылы?» — деп айтырганнар. Пётр оларга: «Силерниң кижи бүрүзү... сугга суктуруп... алзын» — деп харыылаан (Аж.-ч. 2:37, 38).

2. Бо статьяга чүнү сайгарар бис? (Журналдың даштында чурукту көрүңер.)

² Ол-ла хүн 3 000 хире кижи сугга суктуруп алгаш, Христостуң өөреникчилери апарган! Иисустуң эдерикчилеринге дагзып кааны өөреникчилер белеткээр ажыл шак ынчаар эгелээн. Ол ажыл бо хүнге чедир уламчылавышаан хевээр. Ынчалза-даа амгы үеде кандыг-бир кижини сугга суктурарынга белеткээр дизе, анаа 2 шак чедишпес. Элээн каш ай, 1 чыл азы оон-даа хөй үе негеттинип болур. Өөреникчилерни белеткээри ындыг кончуг белен эвес деп, библейжи кичээлдер эрттирип турар улус дыка эки билир. Бо статьяга Библия өөренип турар кижиге Христостуң сугга суктуруп алган өөреникчизи апаарынга канчаар дузалап болурувусту сайгарып көөр бис.

3. Матфей 28:19, 20-ден алырга, сугга суктурар дээн Библия өөренип турар кижи чүнү канчаар ужурлуг?

³ Библия өөренип турар кижи сугга суктуруп алыр дизе, билип алган билиглерин ажыглаар ужурлуг. (Номчуптуңар:  Матфей 28:19, 20.) Шак ынчаар кылып тургаш, ол «черни ханыладыр каскаш, таваан даш кырынга салып алган тудугжуга дөмей боор» деп, Иисус чугаалаан (Лк. 6:47, 48; Мф. 7:24, 25). Бис өөреникчивиске Библиядан билиглерни ажыглаарынга канчаар дузалап болур бис? Үш сүмени сайгарыптаалыңар.

4. Библия өөренип турар кижиге сугга суктуруп алырынга канчаар дузалап болур бис? (« Сорулгаларны салырынга база ону чедип алырынга дузалажыңар» деп көзенекти көрүңер».)

⁴ Аңаа сорулгаларны салырынга дузалажыңар. Ону кылыры чүге чугула? Бир чижекти көрүптээлиңер. Аян-чорукка белеткенип турар дижик силер. Чедер дээн маршрудуңарны тургузуп тургаш, орук ара чедип болур чараш черлерни демдеглеп ап турар силер. Ооң ачызында узун орук ынча дыка шыланчыг болбас. Шак ол ышкаш, Библия өөренип турар кижи бичии-бичии сорулгаларны чедип ап тургаш, сугга суктурар дээн улуг сорулгадан кортпас боор. Аңаа «Аас-кежиктиг мөңге чуртта!» деп номда «Сорулгалар» дээн көзенектер дузалаар. Кичээл төнчүзүнде ол көзенекте сорулга билип алган чүүлүн шиңгээдип алырынга канчаар дузалаарын өөредип турар кижиңер-биле кады сайгарыңар. Бир эвес аңаа оон-даа өске талаларга өскерлир болза эки деп санап турар болзуңарза, «Оон өске» деп каан черге ону кады демдеглеп алыңар. Библия өөренип турар кижиге бичии-даа, улуг-даа сорулгаларны салгаш, чедип алырынга дузалаар дээш, ол көзенекти ажыглаңар.

5. Иисус бай кижиге чүү дээнил база чүге? (Марк 10:17—22).

⁵ Аңаа чуртталгазын өскертип алырынга дузалаңар. (Номчуптуңар: Марк 10:17—22.) Бир катап Иисус бай кижиге өнчү-хөреңгизин садыпкаш, ядыыларга үлептерин чугаалаан (Мк. 10:23). Өскерлиишкиннерни кылыры аңаа берге боор деп, Иисус билир турган-даа болза, ооң дугайында дорт чугаалаан. Иисусту ону кылырынче ынакшыл оттурган.  Өөредип турар киживиске өскерлиишкиннер кылыры арай элек деп бодааш, ону өскерлиринче далаштырбайн барып болур бис. Ийе, кижиге эрги чаңчылдардан адырлып алырынга база чаа бүдүштү кедип алырынга үе херек (Кол. 3:9, 10). Ынчалза-даа бис өөренип турар кижини эки талазынче өскерлиринче эрте дээре деткиир болзувусса, ол база эрте өскерлип эгелээр. Шак ынчаар кылып тургаш, бис ол кижи дээш сагыш човап турарывысты көргүзер бис (Ыд. ыр. 140:5; У. ч. 27:17).

6. Үзел-бодал талазы-биле айтырыгларны салыры чүге чугула?

⁶ Библейжи кичээл үезинде өөренип турар кижиниң үзел-бодалын билип алыры дыка чугула. Ынчангаш ол теманы эки шиңгээдип алган бе база ооң чүү чүвеге бүзүреп турарын билип алыр дээш, айтырыгларны салыңар. Бир эвес ол кижи айтырыгларга үргүлчү харыылаар чаңчылды сайзырадып алыр болза, келир үеде ооң-биле чүнүң-даа дугайында чугаалажып болур силер. «Аас-кежиктиг мөңге чуртта!» деп номда кижиниң үзел-бодалын билип алырынга дузалаар айтырыглар бар. Чижээ, 4-кү кичээлде «Чүү деп бодаар силер, улус Ооң адын адаарга, Иегова чүнү миннип турар?» база 9-ку кичээлде «Чүнүң дугайында мөргүксээр-дир силер?» деп айтырыглар бар. Эгезинде өөренип турар кижиге ындыг айтырыгларга харыылаары берге бооп болур, ынчангаш кичээлде бердинген библейжи шүлүктерже болгаш чуруктарже ооң кичээнгейин салып болур силер.

7. Өөренип турар улуска чуртталгадан чижектер канчаар дузалап болур?

⁷ Өөредип турар кижиниң өскерлир күзели тыптып кээр кылдыр, аңаа чуртталгадан чижектерни чугаалап болур силер. Чижээ, ол чыыштарже чамдыкта келбейн турар дижик. Ынчан аңаа 14 дугаар кичээлде, «Немелде» деп көзенекте «Иегова заботился обо мне» деп видеороликти көргүзүп болур. Шак ындыг роликтер өске-даа кичээлдерде бар. Ону «Ханы шинчилеңер» * деп көзенектен база тып ап болур силер. Оон ыңай өөреникчиңерни өскелерге деңневеңер база «ол кижи шыдаан болганда, сен база шыдаар сен» деп чугаалаваңар. Кижи боду ындыг түңнелге кээр ужурлуг. Ону кылырда видеороликте кол бодалдарже ооң кичээнгейин салыңар. Чижээ, ында бердинген библейжи шүлүктерже, чок болза роликтиң кол маадыры билип алган билиглерин канчаар ажыглап турганын база Иегова аңаа кандыг дуза көргүскенин сайгарып болур силер.

8. Өөредип турар киживисти Иеговага ынак апаарынга канчаар дузалап болур бис?

⁸ Иеговага ынак апаарынга аңаа дузалажыңар. Эптиг арга тыптып кээрге-ле, Иегованың чараш шынарларынче ооң кичээнгейин салыңар. Иегова Аңаа ынак улусту деткип чоруур, аас-кежиктиг Бурган-дыр деп чүүлдү билип алырынга дузалаңар (1 Тим. 1:11; Евр. 11:6). Ол библейжи дүрүмнерни ажыглаар болза, бодуңга-ла эки боор деп чүүлдү база тайылбырлап бериңер. Ынчаар кылыр болза, ол Иегованың ынакшылын миннир (Иса. 48:17, 18). Кижиниң Иеговага ынакшылы өскен тудум, чуртталгазын эки талаже өскертир күзели дам күштелир боор (1 Ин. 5:3).

9. Марк 10:29, 30-де сөстер өөренип турар кижиге сугга суктурар дээш кылыр ужурлуг өскерлиишкиннерден кортпазынга канчаар дузалап болур?

⁹ Өөренип турар кижи сугга суктурарының мурнунда хөй өскерлиишкиннерни кылыр ужурлуг. Чамдык улус, Иисус-биле чугаалажып турган бай кижи ышкаш, акша-хөреңгиге  хамаарыштыр шилилгени кылыр апаар. Чижээ, оларның ажылы библейжи дүрүмнерге таарышпас болза, ону солуур апаар чадавас. А хөй улус Иеговага ынак эвес эштери-биле аралажырын соксадыр апаар. А чамдык улус Иегованың Херечилеринге хөңнү чок төрелдериниң удурланыышкыннарга таваржып болур. Ындыг улуг өскерлиишкиннерни кылыры берге боор деп, Иисус билир турган. Ынчалза-даа ону эдерген улус кажан-даа хараадавас деп, Иисус аазаан. Олар Бурганның чонунуң аразындан ынакшылдыг өг-бүлени тып алыр. (Номчуптуңар: Марк 10:29, 30.) А бис Библия өөренип турар улуска чүнү кылып болур бис?

10. Мануэльдиң чижээнден чүнү өөренип ап болур бис?

¹⁰ Ооң өңнүү болуңар. Библия өөренип турар кижиниң дугайында сагыш човап, бодаары аажок чугула. Мексикада чурттап турар Мануэль дээр акывыс мынча дээн: «Мени өөредип турган акый кичээл мурнунда мээң кайы хире чоруп турарымны сонуургап айтырар турган. Ооң ачызында мен бодумну хостуг кылдыр миннип, ооң-биле чүнүң-даа дугайында чугаалажыр турган мен. Ол мээң дугайымда, шынап-ла, сагыш човап турар деп эскерген мен».

11. Өөредип турар улузувус-биле кады үени эрттирери чүге ажыктыг?

¹¹ Иисус бодунуң өөреникчилери-биле үени канчаар эрттирип турганы дег, силер база Библия өөренип турар улус-биле үени ынчаар эрттириңер (Ин. 3:22). Бир эвес ооң Бурган-биле найыралы өзүп орар болза, ону бажыңывысче чалап алгаш, кады шайлап азы JW Broadcasting^®-тен кайы-бир үндүрүлгени чүге көрүп болбас деп? Ылаңгыя байырлалдар үезинде ол чааскаанзыравас кылдыр, аңаа кичээнгей көргүзер болзувусса, ол аажок өөрүүр. «Мени өөредип турган акый-биле хостуг үени кады эрттирип тургаш, Иегованың дугайында, кичээлдерде ышкаш, хөйнү билип алган мен. Иегованың чону кайы хире аас-кежиктиг база Бурган оларның дугайында канчаар сагыш човап турганын көрген мен. Шак  ындыг чуртталганы дилеп турдум!» — деп, Угандадан Казибве үлешкен.

12. Библейжи кичээлдерже аңгы-аңгы акы-угбаларны чалаары чүге чугула?

¹² Библейжи кичээлдерже аңгы-аңгы акы-угбаларны чалаңар. Бодаарга, библейжи кичээлдерни чааскаан азы чаңгыс ол-ла кижи-биле дугуржуп алгаш, эрттирери белен ышкаш. Ынчалза-даа аңгы-аңгы акы-угбаларны чалаар болзуңарза, дыка эки боор. Молдовадан Дмитрийниң сөстери ону бадыткап турар: «Суртаалчы бүрүзү бодунга чоок чижектерни чугаалап, материалды бир тускай тайылбырлаар турган. Ооң ачызында сайгарган теманы аңгы-аңгы талаларындан көөр апарган мен. Оон ыңай чыышта акы-угбаларның хөй кезиин таныыр болгаш, ужуражылгаже бир дугаар келгеш, ынча дыка девидевээн мен».

13. Өөренип турар кижини чыыштарже баар кылдыр деткиири чүге чугула?

¹³ Ону чыыштарже баар кылдыр деткиңер. Бо чүүл чүге чугула? Чүге дизе Иегова Бодунуң бараалгакчыларынга кады чыглырын дааскан. Бистиң ужуражылгаларывыс — Бурганга мөгейиишкинивистиң чугула кезээ-дир (Евр. 10:24, 25). Оон аңгыда, чыышта акы-угбаларывыс биске чоок дөргүл-төрелдеривис-биле дөмей. Бис ужуражылгаларга келгеш, шайлап олурар чаңгыс өг-бүле ышкаш бис. Библия өөренип турар кижини чыыштарже баар кылдыр деткип турар болзуңарза, аңаа сугга суктурар дээн чугула базымны кылырынга дузалап турар боор силер. Ынчалза-даа чамдык улуска ону кылыры берге. Аңаа хамаарыштыр «Аас-кежиктиг мөңге чуртта!» деп ном канчаар дузалап болур?

14. Өөредип турар киживисти чыыштарже баар кылдыр, канчаар деткип болур бис?

¹⁴ Чыыштарже баарының кайы хире чугулазын 10 дугаар кичээлде сайгарып каан. Ол номну үндүрериниң бетинде, дуржулгалыг суртаалчылар 10-гу кичээлде сүмелерни чедиишкинниг ажыглаан. Чогум кижини чыыштарже чалаарда, албан 10 дугаар кичээлди манаан херээ чок. Ону эрте дээре кылып, катап-катап чалаарын кызыңар. Кижи бүрүзүнүң бергелери аңгы-аңгы бооп болур. Ынчангаш өөредип турар кижиңерге чыыштарже баарынга чүү шаптыктап турарыл база аңаа канчаар дузалап болуруңарны боданыңар. Бир эвес ол чыыштарже келбес болза, холуңар сула салбайн, шыдамык болуңар.

15. Библия өөренип турар улус чүүден коргуп болур?

¹⁵ Библия өөренип турган үеңерни сактып келиңер даан. Ынчан силер «Иегованың Херечизи апаргаш, суртаалдаар апаар мен» деп коргуп турган чадавас силер. Чок болза төрелдериңер азы эш-өөрүңер силерниң кылган шиитпириңерге удур боор деп дүвүреп турган чадавас силер. Шак ынчаар боданып турган болзуңарза, өөредип турар кижиңерниң минниишкиннерин эки билир боор силер. Ооң өөреникчилери база коргушка алзып болур деп, Иисус билир турган. Ынчалзажок Иеговага бараалгавайн баар хире коргушка алыспас кылдыр, ол оларны деткээн (Мф. 10:16, 17, 27, 28). Иисус өөреникчилеринге коргушту ажып эртеринге канчаар дузалаан база ооң чижээнден чүнү өөренип ап болур бис?

16. Библия өөренип турар кижини бодунуң бүзүрели-биле үлежир кылдыр, канчаар өөредип болур бис?

¹⁶ Бодунуң бүзүрели-биле үлежир кылдыр ону өөредиңер. Кажан Иисус өөреникчилерин бир дугаар суртаалдап чоргузуптарга, олар дүвүреп турган чадавас. Ынчалза-даа Иисус оларга кайнаар баарын база чүнү чугаалаарын тайылбырлап берген (Мф. 10:5—7). Иисусту канчаар өттүнүп болур бис? Библия өөренип турар кижиңерге кымга суртаалдап болурун айтып бериңер. Чижээ, кандыг-бир библейжи өөредигни ооң-биле кады сайгаргаш, ооң таныыр улузунуң аразындан кымга ол өөредигниң ажыктыг бооп болурун айтырыңар.  Ооң соонда ол өөредигни бөдүүнү-биле канчаар тайылбырлап болурун көргүзүңер. Ол чугааны кады катаптап, «Аас-кежиктиг мөңге чуртта!» деп номда «Чамдык улус мынча деп болур» база «Бир кижи мынча деп айтырып болур» деп көзенектерни ажыглаңар. Оон аңгыда, харыылап тургаш, Библияны ажыглаары чугула база бөдүүн болгаш эвилең-ээлдек чугааланыр болза эки деп аңаа тайылбырлаңар.

17. Библия өөренип турар кижини Иеговага бүзүрелди сайзырадырынга канчаар дузалап болур бис? (Матфей 10:19, 20, 29—31).

¹⁷ Ону Иеговага ынаныр кылдыр өөредиңер. Иегова силерге дыка ынак болгаш, албан дузалажыр деп, Иисус бодунуң өөреникчилерин бүзүреткен. (Номчуптуңар: Матфей 10:19, 20, 29—31.) Иегова ону база кагбас деп Библия өөренип турар кижиге сагындырыңар. Кады мөргүп турган үеңерде ооң сорулгаларын Иеговага чугаалаңар. Ынчан аңаа Иеговага ынанып өөренири белен боор. Польшадан Францишек дээр акывыс мынчаар үлешкен: «Иегова меңээ салган сорулгаларымны чедип алырынга дузалаар кылдыр, мени өөредип турган акый бо-ла мөргүүр турган. Бурган ооң мөргүлдеринге харыылап турар деп көргеш, бодум база Аңаа мөргүп эгелээн мен. Чыыштарже болгаш шуулганнарже баар деп баргаш, ажылымдан айтыртынарымга, мени салыптар турган. Ол дээрге Иегованың деткимчези-дир деп билип турган мен».

18. Өөреникчилер белеткээр ажылды көргеш, Иегова чүнү миннип турар?

¹⁸ Библия өөренип турар улус дээш Иегова аажок сагыш човап турар. Ооң бараалгакчылары өөредип турар улузунга быжыг бүзүрелдиг апаарынга дузалап, улуг күштү үндүрүп турар деп, Иегова дыка эки билир. Ынчангаш Иегова ол кызымаккай башкыларга ынак (Иса. 52:7). Библейжи кичээливис бар-чок-даа болза, бо статьяда сүмелерни ажыглаалыңар. Шак ынчаар бис улуска Иеговага чоокшулаарынга дузалажып, оларны сугга суктуруп алырынга белеткээр бис.