Павел элчин: «Ыдыктыг хоойлу мени „өлүрүп каан“, Бурган дээш амыдыраары-биле ыдыктыг хоойлуга хамаарыштыр „өлген мен“» — деп бижээн (Гал. 2:19).

Ол сөстерниң утказын билип алыр дизе, Павел элчинниң Римде Галатия дээр черде чыышта акы-угбаларга чугаалаксаан кол бодалды кичээнгейге алыр болза эки. Аңаа чурттап турган христианнарның чамдыызы меге башкыларның салдарынга алзыпкаш, камгалалды алыр дээн кижи Моисейниң хоойлузун сагыыр ужурлуг, чижээ, кыртыжап демдектедири албан деп бүзүреп турганнар. Ынчалза-даа Бурган ону негевейн барган деп, Павел билир турган. Ол бодунуң чагаазында бадыткалдар дузазы-биле меге өөредиглерни сойгалааш, Иисус Христостуң бачыттан хостаар өргүлүнге акы-угбаларның бүзүрелин быжыктырган (Гал. 2:4; 5:2).

Кижи өлген соонда, чок апаар база чүге-даа чагыртпас боор деп, Библия өөредип турар (Эккл. 9:5). Ынчаарга, «ыдыктыг хоойлуга хамаарыштыр «өлген мен» деп чугаалааны-биле, Павел Моисейниң хоойлузунга моон соңгаар чагыртпас апарганын тайылбырлаан. Ынчанмыже Павел Иисустуң төлевиринге бүзүрелиниң ачызында Бурган дээш амыдыраарынга, азы «дирлип» келгенинге, чигзинмейн турган.

Павел Иисустуң берген төлевиринге «ыдыктыг хоойлунуң» ачызында бүзүрээн деп чүге чугаалап болур? Ооң мурнунда шүлүктерде: «Кымның-даа ыдыктыг хоойлуну сагып турары дээш эвес, а чүгле Иисус Христоска бүзүрээни дээш, Бурганның мурнунга актыг боорун билир бис» — деп, ол чугаалаан (Гал. 2:16). Моисейниң хоойлузу дыка чугула рольду ойнаан. Павел элчин: «А ыдыктыг хоойлунуң сорулгазы чүдел? Ону аазаашкында айыткан Салгакчы чедип келгижеге чедир, улустуң кем-буруулуун көргүзери-биле немей киирген» — дээн (Гал. 3:19). Хоойлунуң ачызында чүү билдингир апарган? Бачыттыг улус Бурганның негелделеринге долузу-биле дүгжүп шыдавас база тергиин өргүл чокта оларның бачыттары өршээттинмес. Ынчаарга Хоойлу улусту «Салгакчыга», азы Христоска, хүлээринге белеткээн. Бурган моон соңгаар Иисус Христоска бүзүреп турар улусту актыг деп санаар апарган (Гал. 3:24). Павел шак ындыг улустуң бирээзи турган. Хоойлуну эки билип турганының ачызында Павел Иисусту Мессия кылдыр хүлээп алгаш, аңаа бүзүрелди илереткен. Түңнелинде Павел «ыдыктыг хоойлуга хамаарыштыр өлген-даа» болза, «Бурган дээш» амыдыраары-биле дирлип келген. Моон соңгаар ол Моисейниң хоойлузунга эвес, а Бурганга чагырты берген.

Шак ындыг бодалды Павел Римчилерге чагаазынга бижээн: «Силер-биле база ындыг боор, ха-дуңма. ...Христостуң мага-бодунуң кезик-чамдыызы апарып, ыдыктыг хоойлуга хамаарыштыр өлген силер. А ам ыдыктыг хоойлудан хосталган бис, чүге дээрге бисти салбайн, тудуп турган бүгү чүүлдерге хамаарыштыр өлген бис» (Рим. 7:4, 6). Бо шүлүктерде-даа, Галатчыларга 2-ги эгениң 19-ку шүлүүнде-даа Моисейниң хоойлузун сагывайн барганындан өлүмнүң дугайында Павел чугаалаваан. Мында Павел боду болгаш өске-даа христианнар Моисейниң Хоойлузундан хосталганының дугайында чугаалаан. Ол чүүл Иисус Христостуң берген өргүлүнге бүзүрээниниң ачызында болдунган.