1. Экклесиаст 7:20-де кандыг алыс шынны бижээн?

 СОЛОМОН хаан: «Бачыт кылбайн, чүгле буян кылып чоруур чөптүг-шынныг кижи чер кырында чок» — деп бижээн (Эккл. 7:20). Ол, шынап-ла, ындыг! Шуптувус бачыттыг болганывыста, биске Бурганның болгаш өске кижилерниң өршээлин алыры дыка херек (1 Ин. 1:8).

2. Чоок эживис бисти өршээп каарга, чүнү миннир бис?

² Чоок эжин хомудатпаан кижи кайыын турар боор. Ооң-биле эптежип алыр дээш, буруувусту миннип, шын сеткиливистен өршээлди дилеп турган бис. А эживис бисти өршээп каарга, чүнү миннинген бис? Сеткиливис чиигеп келген, а чүрээвисти өөрүшкү бүргей апкан чадавас.

3. Бо статьяга чүнү сайгарар бис?

³ Иегова бистиң эң-не чоок Өңнүүвүс боор кылдыр күзээр бис. Ынчалза-даа чамдыкта Ону хомудадыптар бир-ле чүүлдү чугаалаптар азы кылыптар бис. Иегова бисти өршээрин күзеп турар деп чүге чигзинмес болзувусса эки? Иегованың өршээли бистиинден чүзү-биле ылгалып турар? Ол кымны өршээп турар?

4. Иегова өршээринге белен деп, кайыын билир бис?

⁴ Иегова бисти өршээринге белен деп, Библиядан көскү. Синай даанга Бодунуң алдарын көргүзүп тургаш, Ол дээрниң төлээзи таварыштыр Моисейге: «Дээрги-Чаяакчы мен — килеңнээчел эвес, кээргээчел, ээ көрнүүчел, өндүр улуг энерелдиг болгаш бүзүрелдиг Бурган мен! Мен Бодумнуң энерелимни муң-даа дугаар салгалга көргүзүп, улустуң кем-буруузун, кемниг херектерин, бачыттарын өршээп турар мен» — деп чугаалаан (Хост. 34:6, 7). Шынап-ла, Иегова — чымчак сеткилдиг болгаш өндүр улуг энерелдиг Бурган-дыр. Ол буруузун миннип турар бачыттыг кижини  өршээринге кезээде белен (Неем. 9:17; Ыд. ыр. 85:15).

5. Бистиң дугайында билиглер Иегованы чүүже оттуруп турар? (Ырлар 102:13, 14).

⁵ Иегова бисти чаяап каан болганда, Ол бисти дыка эки билир. Чүгле бодап көрүңер даан, Бурган чер кырында кижи бүрүзүн бирден бирээ чокка билир! (Ыд. ыр. 138:15—17). Ынчангаш Ада́мдан салгап алган бачыттыг бүдүжүвүстү Ол эки көрүп турар. Оон ыңай бистиң аажы-чаңывысче чуртталганың кандыг болуушкуннары салдар чедиргенин Иегова дыка эки билир. Бо бүгү Ону чүүже оттуруп турар? Бистерге энерелди көргүзеринче (Ыд. ыр. 77:39; номчуптуңар: Ырлар 102:13, 14).

6. Иегова өршээринге беленин канчаар бадыткаан?

⁶ Иегова бисти өршээринге беленин канчаар бадыткаан? Бир дугаар кижиниң, Ада́мның, хайындан шупту улус бачыттыг апаргаш, өлүп турар деп, Иегова билир (Рим. 5:12). Бис ол каргыштан боттарывыс хосталып шыдавас боорувуска, Иегова бисти кээргеп, камгалаар дээш сагыш човаан (Ыд. ыр. 48:8—10). Канчаар? Иоанн 3:16-да Иегова «Бодунуң эр чаңгыс Оглун [бис дээш] берипкен» дээн (Мф. 20:28; Рим. 5:19). Ажыы-биле чугаалаарга, Иисус кеземчени бодунга ап, бис дээш өлген (Евр. 2:9). Ынчангаш аңаа бүзүрээр кижи бүрүзү бачыттан болгаш өлүмден хосталып болур. Иеговага Оглунуң хинчектенип турарын көөрү кайы хире аарышкылыын сагыштаалаары безин берге. Иисус куду көрдүрүп, хинчектенип өлген. Бир эвес Иегова бисти өршээр хөңнү чок турган болза, Ол Оглунуң өлүмүн кажан-даа чөпшээревес ийик.

7. Иегова сеткилинден өршээп турар деп, кандыг библейжи чижектер көргүзүп турар?

⁷ Иегованың энерелдии-биле өршээгени улузунуң чижектери Библияда эвээш эвес (Эф. 4:32). Силерниң бажыңарга кым кирип кээр-дир? Манассия хаан чадавас. Ол каржы кижи калчаарап, Иеговага удур бузут үүлгедип турган. Ол меге бурганнарга чүдүп, бодунуң албатыларын ону кылырынче оттуруп турган. Безин ол дүрзү-бурганнарга өргүл бээр дээш, бодунуң оолдарын өлүрүп каапкан. Иегованың ыдыктыг өргээзинге ол дүрзү-бурганнарны салып каан. Библияда: «Ол Дээрги-Чаяакчының мурнунга хөй бузутту үүлгедип, Ооң килеңин кыптыктырып  турган» — деп бижээн (2 Чыл. 33:2—7). Ынчалза-даа Манассия шын сеткилинден буруузун миннирге, Иегова ону сеткилинден өршээп каан. Безин Бурган «ону Иерусалимче, дүжүлгезинче эгидип каан» (2 Чыл. 33:12, 13). Давид хаанны база сактып кээр чадавас силер. Ол база-ла аар бачыттарны кылып чораан. Чижээ, ол кадайынга өскерлип, бир кижини база өлүрген. Давид бодунуң частырыгларын билип кааш, шын сеткили-биле буруузун миннирге, Иегова ону өршээп каан (2 Хаан. 12:9, 10, 13, 14). Иегова өршээринге белен деп, бо чижектер көргүзүп турар. Ооң өршээли кижилерниң өршээлинге канчап-даа деңнешпес. Ону тода сайгарыптаалыңар.

8. Иегова ышкаш, кым-даа өршээп шыдавас деп чүге чугаалап болур?

⁸ Иегова — «Бүгү черниң Шииткекчизи» (Э. д. 18:25). Шииткекчилер хоойлуларны эки сайгарып билир боор ужурлуг. Чугаажок, бистиң Бурганывыс хоойлуларны дыка эки билир. Чүге дээрге Ол чүгле Шииткекчи эвес, а Хоойлу Берикчизи база бооп турар (Иса. 33:22). Эки-бактың негелделерин Иеговадан өске кым-даа эки билбес. Эртем-билиглиг шииткекчи оон ыңай кандыг боор ужурлуг? Шииткел үндүрериниң мурнунда ол шупту барымдааларны эки хынап көөр ужурлуг. Аңаа хамаарыштыр чаңгыс-даа шииткекчи Иеговага деңнешпес.

9. Иегова кижини өршээр-өршээвезин шиитпирлеп тургаш, чүнү кичээнгейге ап турарыл?

⁹ Черде шииткекчилерге бодаарга, Иеговага сайгарып турар херекке хамаарышкан шупту фактылар билдингир (Э. д. 18:20, 21; Ыд. ыр. 89:8). Ол кижилерниң көрүп азы дыңнап турарындан артык хөйнү билир. Чижээ, кижиниң кылдыныгларынче ооң генетиказы, кижизидилгези, долгандыр кижилер болгаш сагыш-сеткилиниң байдалы улуг салдар чедирип турар деп, Бурган эки билир. Оон аңгыда, Ол улустуң чүрээн өттүр көрүп турар. Иегова кижиниң хөөнүн болгаш күзелдерин долузу-биле билип турар. Бургандан чүнү-даа чажырары болдунмас (Евр. 4:13). Ынчап кээрге, Иегова кижини өршээр-өршээвезин шиитпирлеп тургаш, шупту барымдааларны кичээнгейге ап турар.

10. Иегованың шиитпирлери кезээде чөптүг болгаш шынныг деп кайыын билир бис? (Ыдыктыг хоойлуну катаптааны 32:4).

¹⁰ Дээди Шииткекчивис Иегованың шиитпирлери кезээде чөптүг-шынныг. Ол улусту кажан-даа ылгай көрбес. Бурганга кижиниң дүрзү-хевири, бай-шыдалы, ниитилелге туруш-байдалы болгаш салым-чаяаны чугула эвес (1 Хаан. 16:7; Иак. 2:1—4). Иегованы хээли-биле садып ап, Ооң шиитпирлеринче кым-даа базыышкын кылып шыдавас (2 Чыл. 19:7). Сагыш-сеткили хайныккан үелерде Ол шиитпирлерни бодамча чок хүлээвес (Хост. 34:7). Ынчап кээрге, Иегова эң-не чөптүг болгаш шынныг Шииткекчи-дир, чүге дизе Ол шупту чүвени көрүп, билип турар. (Номчуптуңар: Ыдыктыг хоойлуну катаптааны 32:4.)

11. Иегованың өршээли кижилерниң өршээлинден чүзү-биле ылгалып турар?

¹¹ Иегованың өршээли кижилерниң өршээлинден ушчок ылгалдыг. Ол чүүл Еврей Бижилгелерде эки көстүп турар. Бир библейжи справочниктен алырга, чамдыкта ында Бурганның бачыттыг кижини өршээп турарының дугайында бижип турда, тускай сөстү ажыглап турар. Ол-ла справочникте улаштыр мынча дээн: «Улус бот-боттарын өршээп турда, ол сөстү ажыглавайн турар. Чүге дээрге Бурганның өршээли кижилерниң өршээлинге канчап-даа деңнешпес» *. Буруузун  миннип турар бачыттыг кижини долузу-биле өршээр эрге чүгле Иеговада бар. Ол өршээп турда, түңнели кандыг боор?

12, 13. а) Иегованың өршээлин алган кижи чүнү миннип турар? б) Иегованың өршээли кайы хире өндүр улуг?

¹² Иегова бисти өршээрге, чүнү миннир-дир бис? Сагыш-сеткиливис оожургап, арын-нүүрүвүс бисти хинчектевес апаар. Шак ындыг аянныг минниишкиннерни Иегова бисти Боду өршээрге, миннир бис (Аж.-ч. 3:19). Чүге дээрге Иегова бисче катап ээ көрнүп, өршээп, бисти кажан-даа бачыт кылбаан кылдыр көрүп, Ооң биле катап чоок хамаарылгалыг болурунга биске чөпшээреп турар.

¹³ Иегова бачыдывысты өршээп каан болза, Ол моон соңгаар ол дээш бисти шиитпес азы кезетпес (Иса. 43:25; Иер. 31:34). Библияда: «Чөөн чүктүң барыын чүктен ырак турары дег, бузуттарывысты Ол бистен ырадып каапты» — деп дорт чугаалаан (Ыд. ыр. 102:12) *. Иегованың сеткилиниң кайы хире чымчаан бодап кээривиске, ишти-хөңнүвүс дойлуп кээр (Ыд. ыр. 129:4). Ынчалза-даа Ооң өршээлинге кым идегеп болур?

14. Иегованың канчаар өршээп турарының дугайында чүнү билип алдывыс?

¹⁴ Иегова кижини өршээр-өршээвезин шиитпирлеп турда, Аңаа кижиниң кылган бачыдының кайы хире аары чугула эвес деп көрдүвүс. Оон ыңай Иегова ол шиитпирни хүлээп тургаш, Чаяакчы, Хоойлу Берикчизи болгаш Шииткекчи ышкаш, шупту чүвени билип турар. Ынчалза-даа Иегова кижини өршээр-өршээвезин шиитпирлеп тургаш, чүнү кичээнгейге ап турар?

15. Иегова кижини өршээр-өршээвезин шиитпирлеп тургаш, чүнү херекке ап турар? (Лука 12:47, 48).

¹⁵ Иегова бир дугаарында чүүже кичээнгейни салып турар? Бачыт үүлгеткен кижи шын эвес алдынып чоруурун медереп турган бе? Иисус ооң дугайында Лука 12:47, 48-те тода чугаалаан (номчуптуңар). Бир эвес кижи Иегованың хоойлузун биле тура-ла үреп турар болза, ол дыка аар бачытты кылганы ол. Чүге дээрге ындыг кижи Бурганга удур чүүлдү кылып турарын долузу-биле миннип турган. Иегова ону өршээвейн барып  болур (Мк. 3:29; Ин. 9:41). Ынчалза-даа бис чамдыкта Иеговага таарымча чок чүүлдерни кылыптар бис. Ынчаарга Ол бисти өршээвес дээни ол бе? Албан эвес. Ам Иегованың херекке ап турар ийи дугаар чүүлдү көрүптээлиңер.

16. Бачыдын миннири дээрге чүү дээни ол? Ол чокка Иегованың өршээлин алыры чүге болдунмас?

¹⁶ Ийиде, Бурган бачыт кылган кижиниң кайы хире буруузунуп турарынче кичээнгейни салып турар. Ынчалза-даа бачыдын миннири дээрге чүү дээни ол? Ол дээрге бачытка хамаарылгазын, угаан-бодалын болгаш хөөнүн өскертири-дир. Бачыдын миннип турар кижи кылган частырыглары дээш аажок муңчулуп турар. Ону чүгле кылган частырыглары эвес, а аңаа чедирген чүүл — Бурган-биле найыралының кошкай бергени муңгарадып турар. Манассия-даа, Давид-даа аар бачыттарны кылып чораан. Ынчалза-даа олар сеткилинден бачыдын миннинген боорга, Иегова оларны өршээп каан (3 Хаан. 14:8). Ынчаарга Иегованың өршээлин алыр деп бодаар болзувусса, бүгү сеткиливистен бачыдывысты миннир ужурлуг бис. Ынчалза-даа чаңгыс ол чүүл чедишпес. Иегова бистен хөделиривисти манап турар *. Ол дээрге Ооң кичээнгейге ап турар база бир чугула чүүлү-дүр.

17. Чуртталгавыска чүнү өскертир ужурлуг бис база частырыгларывысты катаптавазынга ол чүүл канчаар дузалаар? (Исайя 55:7).

¹⁷ Үште, Иеговага кижиниң өскерлип алганы чугула. Өскээр чугаалаарга, Бурган бачыт үүлгеткен кижиден бузуттуг оруун каггаш, шын орукче эглип кээрин манап турар. (Номчуптуңар: Исайя 55:7.) Кижи угаан-бодалын өскертип алгаш, бүгү чүүлче Иегованың көрүжү-биле көрүп өөренир ужурлуг (Рим. 12:2; Эф. 4:23). Оон ыңай ол Бурганга таарымча чок бодалдардан болгаш ажыл-херектерден шиитпирлиг ойталаар ужурлуг (Кол. 3:7—10). Ынчалза-даа бо бүгү Христостуң бачыттан хостаар өргүлү чокка болдунмас. Чүгле төлевирниң ачызында Иегова бисти өршээп, бачыттарывысты арыглап турар. Бир эвес бис чуртталгавысты өскертир  дээш, шупту чүвени кылып турар болзувусса, Иегова ол өргүлге даянып, бисти албан өршээр (1 Ин. 1:7).

18. Иегованың канчаар өршээп турарының дугайында чүнү билип алдывыс?

¹⁸ Бо статьяга көрген чүүлүвүстү кысказы-биле сактып кээлиңер. Октаргайда Иегова ышкаш, сеткилинден өршээп билир чаңгыс-даа хуу-бот чок. Ону кайыын билир бис? Бирээде, Ол кезээде күзелдии-биле өршээр. Ийиде, Иегова бисти бирден бирээ чокка билир болгаш, кайы хире буруузунуп турарывысты өттүр көрүп турар. Үште, Бурган бачыттарывысты өршээп каан болза, ону катап-катап сактып, коптарып чытпас. Ол арын-нүүрүвүстү, кандыг-даа бачыт турбаан ышкаш, арыглап берип турар. Ооң ачызында чүрээвиске тамчык-дышты миннип, Ол биске долузу-биле чүүлзүнүп турар деп чигзинмес бис.

19. Тергиин эвес болгаш, бачыттарны дөмей-ле кылыр-даа болзувусса, чүге муңгараан ажыы чок?

¹⁹ Бис тергиин эвес болгаш, бачыттарны дөмей-ле кылыр бис. Ынчалза-даа «Понимание Писания» деп дептерден сөстер бисти сорук киирип болур: «Иегова, энерелдиг Бурган, Бодунуң бараалгакчыларының кошкак талаларын эки билир. Ындыг болганда, оларга бачыттыг бүдүжүнүң хайындан кылган частырыглары дээш бодун үргүлчү чемелеп, хилинчектээн ажыы чок (Ыд. ыр. 102:8—14; 129:3). Бурганның дүрүмнери-биле чурттаар дээн күжениишкиннер оларга өөрүшкүнү эккээр ужурлуг (Флп. 4:4—6; 1 Ин. 3:19—22)» («Раскаяние» деп статья, 7-ги абзац). Бо чүүл бистиң сагыш-сеткиливисти дыка-ла чылдыр-дыр!

20. Дараазында статьяга чүнү сайгарар бис?

²⁰ Бачыттарывыс дээш сеткиливистен хараадаарывыска, Иегова бисти күзелдии-биле өршээп турар. Ол дээш Аңаа өөрүп четтирер-дир бис. Бурганывысты канчаар өттүнүп болур бис? Иегованың өршээли бистиң өршээп турарывыстан чүзү-биле ылгалдыг база чүзү-биле дөмейил? Ону билип алыры чүге чугула? Бо айтырыгларны дараазында статьяга көөр бис.