«ЧЫЛЫГ-ЧЫМЧАК хамаарылгазы-биле олар мени, чылыг хүн караа дег, чылыдыпканнар!» — деп Лайза *, Иегованың Херечилери-биле канчаар таныжып алганын чугаалап ора, үлешкен. Ол ышкаш минниишкиннерни Анна база миннинген: «Мени Херечилерниң буянныг чоруу библейжи өөредиглерден артык сонуургаткан». Ийе, бо угбалар Библияны номчуурунга, ханы боданырынга дыка ынак, ынчалза-даа, бирги ээлчегде, оларның чүрээнге буянныг чорук дээштиг болган.

Бисти долгандыр турар улуска ачы-буянны көргүзүксээр бис. Ону сөс кырынга болгаш ажыл-херээвис-биле канчаар кылып болурувусту сайгарыптаалыңар. Ооң соонда кымнарга энерелдиг болур ужурлуувусту сайгарып көөр бис.

Өгнүң эки херээжен ээзиниң дугайында Чугаалар 31:26-да мынча дээн: «Ооң... дылындан — энерелдиг өөредиг үнер». («Чаа делегей» очулгазында «энерелдиг» деп сөс «буянныг» деп очулдуртунган). Ол өөредиг ооң чүнү база канчаар чугаалап турарынче салдар чедирер. Чугаажок, «энерелдиг өөредиг» адаларның дылындан база үнер ужурлуг. Кадыг-дошкун чугаа-сөс ажы-төлге багай салдар чедирер дээрзин ада-иелерниң хөй кезии дыка эки билир. Бир эвес ада-иези төлүн ужур-утка чок шүгүмчүлеп, ооң-биле доңгун кылдыр чугаалажыр болза, ажы-төл ада-иезинге чоок бооп шыдавас. Ада-иелер ажы-төлү-биле чылыг-чымчак, эптиг-чөптүг чугаалажыр болза, оларга дыңнангыр болуру белен боор.

Ажы-төлүвүс бар-чок-даа болза, чылыг-чымчак чугааланып өөренир ужурлуг бис. Канчаар? Чугаалар 31:26-да: «Ооң аксындан — мерген угаанныг сөстер... үнер» — дээн. Ынчаарга, чугаалаар сөстерни таптыг шилип, кандыг аян-биле чугааланып турарывысты херекке алыр болзувусса эки. Чижээ, кижи бодундан мынча деп айтырып болур: «Мээң ам чугаалаар деп турар сөстерим байдалды чавырылдырыптар бе азы дам-на өөскүдүптер бе?» (У. ч. 15:1). «Шугум чазаарда, шыгаар, шуугаар бетинде, боданыр» деп үлегер домак ону чиге сөглээн.

Оон өске угаадыглыг чугаада мынча дээн: «Хоозун чугаа хылыш ышкаш балыглап боор» (У. ч. 12:18). Бистиң сөстеривис болгаш кандыг аян-биле чугааланганывыс улустуң сеткилинге дээштиг бооп болур деп утпас болзувусса, аксывысты тыртып ап чоруур бис. Шынап-ла, бир эвес бистиң дылывыста «энерелдиг өөредиг» бар болза, кадыг-доңгун чугаа-сөстен ойталаар бис (Эф. 4:31, 32). Ынчангаш кезээде чүгле эки хөөннүг болгаш чылыг-чымчак чугааланыылыңар. Маңаа хамаарыштыр Иеговадан хөйнү өөренип ап болур бис. Аажок корткан медээчизин, Илияны, Ол канчаар деткээнил? Иегованың төлээзи «оожум үн-биле» чугааланып турган (3 Хаан. 19:12). Ёзулуг буянныг кижи чүгле аксы-сөзү-биле эвес, а херектери-биле буянны көргүзер.

Иегованы өттүнүп турар болзувусса, улус-биле чылыг-чымчак чугааланырындан аңгыда, буянныг ажыл-херектерни кылыр бис (Эф. 4:32; 5:1, 2). Лайза сактып чугаалаан: «Хенертен  көжер ужурга таварышкан бис. Ынчан чыыштан ийи өг-бүле ажылындан айтыртынып алгаш, биске чыгдынып алырывыска дузалаан. А мен ол үеде Библияны безин өөренмейн турган мен!» Ол Херечилерниң буянныг ажыл-херээн көргеш, Лайза Библияны сонуургап эгелээн.

Иегованың Херечилериниң аңаа көргүскен буянныг чоруу дээш, Анна өөрүп четтиргенин илередип чоруур. Ол мынча дээн: «Бо делегейниң каржызын көргеш, кижилерге бүзүрээри меңээ берге турган. Ынчангаш Иегованың Херечилеринден эгезинде сестип турган мен. «Чүге мени сонуургап турар улус боор?» — деп бодап турдум. Ынчалза-даа мени өөредип турган угбай дыка ажык сеткилдиг болгаш чылыг-чымчак хамаарылгалыг боорга, аңаа бүзүреп эгелээн мен». Улаштыр чүү болган? «Сөөлзүредир Библиядан билип ап турар билиглеримге шыңгыы хамаарылгалыг апарган мен» — деп, Анна чугаалаан.

Лайза биле Аннага акы-угбаларывыстың көргүскен буянныг ажыл-херээ күштүг салдар чедирген деп эскердиңер бе? Ынчангаш ол херээжен улус Библияны шыңгыы өөренип эгелээннер. Оларга көргүскен буянның  ачызында Лайза биле Анна Иеговага болгаш Ооң бараалгакчыларынга бүзүреп эгелээннер.

Чамдык улус төрүмелинден чазык болгаш экииргек боор. Кижизидилгезиниң ачызында азы аажы-чаңы эки болганындан эвилең-ээлдек, чымчак сеткилдиг улусту көөрге, дыка-ла аянныг. Ынчалза-даа Бурганның буянын өттүнер дизивиссе, чүгле ол чүүл чедишпес. (Деңнеңер: Ажыл-чорудулга 28:2.)

Ёзулуг буянныг чорук — ыдыктыг сүлдениң үре-түңнелиниң кезии-дир (Гал. 5:22, 23). Ынчангаш ол шынарны сайзырадып алырын күзээр болзувусса, Бурганның сүлдезинге угаан-бодалывысче болгаш ажыл-херээвисче салдар чедирерин чөпшээрээр ужурлуг бис. Шак ындыг буянныг чорукту илередип тургаш, Иегованы болгаш Иисусту өттүнүп турар бис. Чүге дизе Бурганга ынак болгай бис база Иисус ышкаш кижилерни кээргээр бис. Түңнелинде буянныг чоруувус күштелип, чанывыста улус дээш сагыш човап эгелээр бис.

Биске эки хамаарылгалыг улуска азы өңнүктеривиске буян көргүзери белен (2 Хаан. 2:6). Чижээ, оларның биске кылган эки ажыл-херээ дээш четтиргенивисти илередири биске өөрүнчүг (Кол. 3:15). А бир эвес кандыг-бир кижини буян көргүзеринге төлеп чок деп бодап турар болзувусса, канчаар?

Мону сактып кээлиңер. Авыралды көргүзеринге хамаарыштыр Иегова биске кайгамчык үлегерни берип турар. Христиан Грек Бижилгелерде «авырал» деп сөс хөй катап таваржып турар. Бурган биске авыралын канчаар көргүзүп чоруур?

Амыдыралга бүгү-ле херек чүүлдерни Иеговадан ап турар миллиард-миллиард кижилерниң дугайында бодап көрүңер (Мф. 5:45). Херек кырында Ол биске ачы-буянын шагда-ла, Ону билбес чораан үевисте-ле, көргүскен (Эф. 2:4, 5, 8). Чижээ, кижи төрелгетени дээш Бодунуң эң-не үнелиг, эргим, кара чаңгыс Оглун берген. Иегова элбекшилдиг авыралдыг болгаш, төлевирни төлээн деп, Павел элчин бижээн (Эф. 1:7). Оон аңгыда, бис бачыт үүлгедип, дээрде Адавыс болур Бурганны хомудадып турар-даа болзувусса, Ол бисти улаштыр-ла өөредип, уштап-баштап чоруур. Ооң айтыышкыннары болгаш өөредиглери биске «дымыргай чаъс» дег (Ы. х. к. 32:2). Иегованың биске көргүскен буянының орнун эгидип шыдаар бис бе? Ооң авыралы эвес болза, келир үеже идегеливис-даа чок болур. (Деңнеңер: 1 Пётр 1:13.)

Чигзиниг чок, Иегованың буяны сеткиливисти чылыдар база бисти шак ынчаар алдынарынче оттуруп турар. Ынчангаш кымга буян көргүзер-көргүспезин шиливейн турар бис. Иеговага дөмей боор дээш кызып, ол кайгамчык чараш шынарны ала-чайгаар илередирин дыка күзээр бис (1 Фес. 5:15). Бир эвес чылыг-чымчак, буянныг боор болзувусса, улус, соок хүнде чылыг одаг чанынче дег, бисче чүткүүр боор. Чоок улузувустуң, чыышта акы-угбаларывыстың, кады ажылдап турар улузувустуң, чаңгысклассчыларывыстың болгаш кожаларывыстың сеткил-чүрээн чылыдып шыдаар бис.

Чылыг-чымчак чугаа-сөзүңер болгаш ажыл-херээңер-биле кымны деткип болур силер? Төрелиңерниң азы чыышта бир акыйның бажың-балгадында азы огородунга кылчып бээр ажылы бар бе? Азы бир угбайга садыгдан бир-ле чүүлдү садып эккеп бээри херек бе? А суртаал үезинде дуза хереглеп турар кижиге ужуражы берген болзуңарза, аңаа бир-ле чүүлдү кылып шыдаар силер бе?

Иегованы өттүнүп, чугаавыс болгаш ажыл-херээвис-биле «энерелдиг өөредиг» ёзугаар чурттаалыңар.