1, 2. Христианнарның амгы үеде бергелери Лоттуң байдалынга чүзү-биле дөмей?

 АМГЫ үениң ниитилели улам баксыраан, ону көргеш, шынчы Лот дег минниишкиннерлиг бис, а ол дээрде Адавыс бужар херектерге хөңнү чогун билир болгаш, «улустуң бужар аажызындан баш муңгаш хинчектенген» (2 Пет. 2:7, 8). Лотка ол үениң кижилери ышкаш кудуку деңнелче батпазынга Бурганга ынакшыл болгаш оон коргар чорук дузалаан. Бис база Иегованың дүрүмнерин билбес, ону сагывас кижилерниң аразында чурттап турар бис. Ынчалза-даа Бурганга ынакшылдыг болгаш хүндүткелдиг коргушту сайзырадыр болзувусса, мөзү-шынар талазы-биле арыг артып болур бис (У. ч. 14:2).

² Иегова биске шын алдынарынга дуза кылдыр Чугаалар номун берген. Эр-херээжен-даа, кырган-чалыы-даа христианнарга ол номнуң мерген угаанныг сүмелериниң дугайында боданыры ажыктыг.

3. Чугаалар 17:3-тен алырга, чүрээвисти камгалаары чүге чугула? (Ол ышкаш чурукту көрүңер.)

³ Доора уткалыг чүрээвисти камнаар ужурлуг бис, чүге дизе Иегова ооң эң-не чажыт черлерин безин шинчилеп турар. Ынчап кээрге, кижилерниң көрбес чүүлүн ол көрүп турар болганда, бис аңаа адыш иштинде-биле дөмей бис. (Номчуптуңар: Чугаалар 17:3.) Угаанывысты чуртталганы берип турар Бургандан мерген угаан-биле долдурар болзувусса, Иегова аңаа таарзынар (Ин. 4:14). Ынчангаш Эрликтиң болгаш бо делегейниң куду мөзүлүг дүрүмнерин база меге өөредиглериниң хоран ышкаш салдарын чүрээвисче киирбес  ужурлуг бис (1 Ин. 5:18, 19). Иеговаже чоокшулаан тудум, аңаа ынакшылывыс болгаш хүндүткеливис улам өзер. Дээрде Адавыстың сеткил-чүрээн хомудадыксавас бис. Ынчангаш бачыт үүлгедир бодал безин биске чүдек-бужар. Бир эвес шын эвес алдынар күткүлге тыптып келзе, бодуңдан мынча деп айтыр: «Таанда меңээ ындыг ынак Бурганга канчап өжегерээн аарышкыны чедирерин күзээр мен?» (1 Ин. 4:9, 10).

4. Бир угбавыска шын эвес күзелге алыспазынга Иеговадан коргуш канчаар дузалааныл?

⁴ Хорватиядан Марта b дээр угбавыс мөзү-шынар чок алдынар күткүлгеге таварышкан. «Ол үеде шын боданыры дыка берге турган. Бачыт мени магнит-биле дөмей тыртып турар боорга, аңаа удурланыр харыым чок ышкаш болган. Ынчалза-даа Иеговадан коргуш мени камгалаан» — деп, ол бижээн. Бургандан коргуш аңаа канчаар дузалаан? «Хензиг када таалалга алзыптар болзумза, түңнели кандыг болур?» деп, Марта боданып турган. Ол биске дыка эки үлегер. Бачыттың эң-не коргунчуг уржуу — Иегованы хомудадыры база аңаа мөңгеде бараалгаар аргазын чидирери-дир (Э. д. 6:5, 6).

5. Леонуң төөгүзү силерни чүге өөредип турарыл?

⁵ Бир эвес Иеговадан коргар болзувусса, багай эш-өөр-биле эдеришпес бис. Конгодан Лео дээр акывыс ооң кайы хире чугулазын бодунуң чуртталгазынга көрген. Сугга суктурган соонда дөрт чыл эрткенде, ол багай компания-биле холбажы берген. Лео боду багай чүве кылбас болза-ла, Иеговага удур бачыт кылбайн турар деп бодап турган. Ынчалза-даа багай эш-өөрнүң салдары арагалаашкынга болгаш самыыралга чедирген. Ынчан ол христиан ада-иезиниң чүнү өөреткенин база Иегова-биле турда, чуртталгазы кайы хире аас-кежиктиг турганын сактып келген. Ооң ачызында  боданып келгеш, удуртукчуларның дузазы-биле Бурганче эглип келген. Амгы үеде Лео удуртукчу база тускай эгелекчи кылдыр бараалгап турар.

6. Кандыг ийи херээжен дугайында чугаалажыр бис?

⁶ Чугаалар номунда 9-ку эгени сайгарып көрээлиңер. Ында мерген угаан биле мелегей чорукту ийи херээжен кижиниң овур-хевири-биле көргүскен. (Деңнеңер: Римчилерге 5:14; Галатчыларга 4:24.) Оларның кайызы-даа дуржулга чок, азы угаан чок, улусту: «Бээр келиңер, мээң аъш-чемимни чооглаңар!» — деп чалап турар (У. ч. 9:1, 5, 6, 13, 15—17). Оларның чалалгалары дөмей-даа болза, түңнели көңгүс аңгы. Эрликке чагырткан улус эр-херээжен чорукка болгаш порнографияга алзып, карак-кулаа көзүлбес апарган (Эф. 4:19). Ынчангаш биске Бургандан коргушту сайзырадыры база каржыдан ойталаары дыка чугула (У. ч. 16:6). Ынчап кээрге, эр-даа, херээжен-даа улуска Чугаалар номунда 9-ку эгени сайгарары ажыктыг.

7. Чугаалар 9:13—18-тен алырга, мелегей херээженниң чалалгазын хүлээп алган улусту чүү манап турарыл? (Ол ышкаш чурукту көрүңер.)

⁷ Чанындан эрткен хамык улусту мелегей херээжен кайнаар кыйгырып турарынче кичээнгейни салып көрээлиңер. (Номчуптуңар: Чугаалар 9:13—18.) Ол херээжен угаан чок улусту бодунче чемненири-биле кыйгырып, олар-биле чүү болурун кончуг эки билир. Ооң бажыңынче келген кижини өлүм манап турар. Чугаалар номунуң өске-даа эгелеринде аңаа дөмейлешкек чечен дылды сактып кээр чадавас силер. Библия бисти самыын-садар херээженден оваарындырып: «Ол херээженниң бажыңы — өлүмнүң какпазы-дыр» деп турар (У. ч. 2:11—19). Чугаалар 5:3—10-да «буттары өлүмче дүжүп бар чыдар» база бир херээженниң дугайында чугаалаан.

8. Кандыг шилилге кылыр апаар чадавас бис?

⁸ Мелегей херээженниң чалалгазын дыңнаан улус чөпшээрежир-чөпшээрешпезин боттары шиитпирлээр ужурлуг. Бис база ындыг шилилгеге таваржып болур бис. Бир эвес мөзү-шынар чок күткүлге тыптып кээр болза, канчаар алдынар бис? Хенертен телевизорга азы смартфонувуска чүдек-бужар чуруктар көстүп кээр болза, чүнү канчаар бис?

9, 10. Мөзү-шынар чок алдынарындан ойталаары чүге чугула?

⁹ Мөзү-шынар чок чоруктан ойталаар чугула чылдагааннарывыс бар. Мелегей херээжен мынча деп турар: «Оорлап алган  сугну ижерге — амданныг». «Оорлап алган суг» дээрге чүл? Библияда ашак-кадай улустуң аразында эр-херээжен харылзааны күш киирер арыг сугга деңнээн (У. ч. 5:15—18). Бадылгалыг ашак-кадай улус ындыг таалал алыр эргелиг. Ол харылзаа чүгле арыг болгаш төлептиг болур ужурлуг. «Оорлап алган суг», азы бадылга чокка эр-херээжен харылзаа, оон улуг ылгалдыг. Колдуунда бужар харылзааны, кым-даа, чүү-даа билип албазын дээш, бүдүү кылыр. Ылаңгыя «оорлап алган суунга» сеткил ханып чоруурлар ындыг чүүлдер билдиртпейн эрте бээр деп бодаар. Кайы хире айыылдыг будулуушкун-дур! Иегова шупту чүвени көрүп турар болгай. Ооң ээ-көрүүшкүнүн чидирип аарындан коргунчуг чүве чок. Кажан кижи Бурганның ээ көрүүшкүнүн чидирип аарга, ында «амданныг» чүве чок (1 Кор. 6:9, 10).

¹⁰ Оон аңгыда ашаа, кадайындан өске эр-херээжен харылзаа кылырга, ыядынчыг боор база кижи бодунга хүндүткелди чидирип алыр. Ооң түңнели: күзел чок иштелиишкин база өг-бүлелерниң чарлыры. Мелегей херээженниң бажыңын оюп эрте бээри, хүндүлеп чемгерер дээн көгүдүүшкүнге алыспазы эң мерген угаанныг эвес-тир бе! Ынаар барган улус Бурган-биле харылзаазын чидирип алыр. Мөзү-шынар чок дыка хөй улус эрте дээре өлүмге чедирер шээр аарыгларны чыпшырып ап турар (У. ч. 7:22—23, 26). 9-ку эгениң 18 дугаар шүлүүнде: «Ооң аалчылары алдыы оранның ханызында» — дээн. Ынчаарга чүге улус мелегей херээженниң чалалгазын хүлээп, ооң какпазынче кирип турарлар? (У. ч. 9:13—18).

11. Порнография көөрү чүге эң хоралыг?

¹¹ Бөгүн порнография дыка нептерээн. Чамдык улус ону кажар какпа деп билбес, кем чок оюн-тоглаа деп санаар. Ынчалза-даа порнография хоралыг, кижиниң эки талазын сы базып, бужар күзээшкиннерин оттуруп, какпалап алыр улуг күштүг. Көрген чуруктар угаанга таңмаланып, балалбайн артып каар. Оон аңгыда, порнография шын эвес күзелдерни өлүглендирер хамаанчок, өөскүдүп турар (Кол. 3:5; Иак. 1:14, 15). Ийе, порнографияны көрүп турар улустуң хөй кезии ону өттүнүп кылып эгелээр.

12. Эр-херээжен харылзаа кылыр күзелди оттуруп болур чуруктарга оваарымчалыг хамаарылганы канчаар көргүзүп болур бис?

¹² Христианнар болганывыста, электроннуг херекселивиске порнография көстүп кээрге, чүнү канчап болур бис? Ону көрбейн, дүрген өжүрүп, шиитпирлиг хөделир ужурлуг бис. Биске чүү дузалаар? Иегова-биле найырал — биске эң-не үнелиг деп утпазы чугула. Порнография кылдыр санаттынмас чуруктар безин, эр-херээжен харылзаа кылыр күзелди оттуруп болур. Христианнар чүге ындыг чүүлдерни көрбес ужурлуг? Чүге дизе бачыттың талазынче бичии-даа базымны кылырын, ашак-кадай улустуң шынчы чоруун чүрээвиске безин үрээрин күзевес бис (Мф. 5:28, 29). Таиландыдан Дэвид дээр удуртукчу акывыс мынча дээн: «Мен кезээде бодумга мындыг айтырыгны салыр мен: „Порнография эвес-даа чүүлче көөрүмге, Иеговага анчыг болбас бе?“ Ындыг бодалдар меңээ мерген угаанныг алдынарынга дузалап турар».

13. Мерген угаанныг болурунга биске чүү дузалаарыл?

¹³ Иегованы муңгарадыптар коргушту сайзырадыр болзувусса, мерген угаанныг алдынып шыдаар бис. Бурганның мурнунга шын коргуш дээрге-ле «мерген угаанның үнер дөзү» (У. ч. 9:10). Ол чүүл, Чугаалар номунуң 9-ку эгезиниң баштайгы сөстеринден көскү. Ында алыс шын мерген угаан деп адаткан ийи дугаар доора уткалыг херээжен дугайында чугаалап турар.

14. Чугаалар 9:1—6-да кандыг чалалганың дугайында чугаалааныл?

¹⁴ Номчуптуңар: Чугаалар 9:1—6. Бо шүлүктерде ёзулуг мерген угаанның үнер Дөзү болур Иегова Чаяакчывыстан үнген чалалганың дугайында номчуп турар бис (У. ч. 2:6; Рим. 16:27). Мында чеди адагаштыг улуг бажыңның дугайында бижээн. Иегова беримчелиг база ооң мерген угаанын ажыглаксап турар улустуң шуптузун өөрүшкүлүг хүлээп турар деп ол овур-хевирден көскү.

15. Бурган бисти чүнү кылырынче оттуруп турарыл?

¹⁵ Иегова биске шупту чүвени элбээ-биле берип турар. Ол беримчелиг болгаш сагыш човангыр Бурган. Чугаалар 9-ку эгеде ёзулуг мерген угаан деп адаткан херээжен кижи шак ындыг шынарларны илередип турар. Ол доора уткалыг херээжен эът-чемин, чаагай амданныг арагазын белеткеп, столунга делгей салып алган (У. ч. 9:2). Улаштыр 3—5 дугаар шүлүктерде мынча дээн: «Кенен улус, меңээ кире дүжүңер!» Ёзулуг мерген угаан-биле долган бажыңче кирип, ында делгеп каан чемни чүү дээш чиир херек? Иегова ажы-төлүн мерген угаанныг болзун база оларның-биле багай чүве болбазын деп күзеп турар. Бис бодувустуң частырыгларывыска өөренип, херекчок чүүлдерге хинчектенип, оон ол дээш хараадаарын ол күзевес. Ынчангаш «Бурган эки мөзүлүг улуска тиилелгени белеткеп берген» (У. ч. 2:7). Иегованың мурнунга шын коргуш бисти ооң сеткилинге кирер кылдыр алдынарынче оттурар. Ооң мерген угаанныг сургаалын дыңнап, өөрүшкүлүг ажыглап турар бис (Иак. 1:25).

16. Бургандан коргуш Аланга мерген угаанныг шиитпирни хүлээринге канчаар дузалаан база түңнели кандыг болган?

¹⁶ Бургандан коргуш А́лан деп хуралдың удуртукчузунга мерген угаанныг шиитпирни хүлээринге канчаар дузалааныл? Ол школада башкылап турар. Алан мынча дээн: «Мээң коллегаларымның хөй кезии порнографиялыг фильмнерни, эр-херээжен чорук талазы-биле мергежиир дээш көөр херек деп санаар». Алан оларның-биле чөпшээрешпээн. Ол мынча дээн: «Бургандан коргар болгаш, ындыг фильмнерни көөрүнден шуут ойталап, коллегаларымга ооң чылдагаанын үргүлчү тайылбырлаар турган мен». «[Мерген] угаанның оруу-биле чоруур силер» — деп, сүмени Алан эдерип турган (У. ч. 9:6). Аланның үзел-бодалы чамдык башкыларны кайгадыпкан. Ам олар Библияны өөренип, христиан чыыштарже барып турар апарган.

17, 18. Ёзулуг мерген угаанның чалалгазын хүлээп алган улус кандыг арганы алыр база оларның келир үези кандыг? (Ол ышкаш чурукту көрүңер.)

 ¹⁷ Ол ийи херээжен улустуң овур-хевири-биле Иегова биске аас-кежиктиг, ханы уткалыг чуртталганы канчаар чорударын айтып берип турар. Шуугаазынныг мелегей херээженниң чалалгазын хүлээп турар улустуң чуртталгазы «амданныг», бүдүү таалал-биле долган. Олар келир үениң дугайында көңгүс боданмайн, чаңгыс хүнү-биле чурттап чоруур. Ынчалза-даа оларны өлүм манап турар (У. ч. 9:13, 17, 18).

¹⁸ Ёзулуг мерген угаанның чалалгазын хүлээп турар улустан олар кайы хире ылгалдыг-дыр! Ооң аалчылары амдыгааштан тура амданныг, чаагай чемнер делгеп каан доора уткалыг стол артында чемненип орар (Иса. 65:13). Исайя медээчини таварыштыр Иегова мынча дээн: «Мени топтап дыңнаңар, ынчан эки аъш-чем чиир силер, чаагай чемге сеткилиңер ханар» (Иса. 55:1, 2). Иегованың ынак чүүлүнге ынак бооп, а көөр хөңнү чок чүүлүн көөр хөөн чок боорунга өөренип турар бис (Ыд. ыр. 96:10). Бис өске улусту ёзулуг мерген угаанның бажыңынче чалаарынга ынак бис. Хоорайның бедик черлеринге туруп алгаш: «Кенен улус, меңээ кире дүжүңер!» деп чарлап турар улуска дөмей бис. Бис боттарывыс-даа, ол чалалганы хүлээп турар улус-даа, ам-даа, келир-даа үеде ол дээш кажан-даа хараадавас. Бис төнчү чок чурттап, мерген угаанның оруу-биле кезээде чоруп болур бис! (У. ч. 9:3—4, 6).

19. Экклесиаст 12:13, 14-те сөстер бисти кандыг хөөннү сайзырадырын сүмелеп турар? ( «Бургандан коргуш чүзү-биле ажыктыг?» деп көзенекти база көрүңер.)

¹⁹ Номчуптуңар: Экклесиаст 12:13, 14. Самыырал-биле долган делегейде чурттап турар болганывыста, Бургандан коргуш чүрээвисти кадагалап, мөзү-шынар талазы-биле арыг артарынга дузалап чорзунам. Ол ажыктыг коргуш моон-даа соңгаар алыс шын мерген угаандан өөрениринче шупту улусту чалаарынче бисти оттуруп турар.