1. Иегованың хүнүнде дириг артар дизе, чүнү канчаар ужурлуг бис?

 ИЕГОВАНЫҢ хүнү дээрге чүл ол? Күчүлүг Бурган дайзыннарын узуткап, бараалгакчыларын камгалаар үе-дир деп Библияда көргүскен. Бурунгу үеде Иегова чамдык чоннарны база кезедип турган (Иса. 13:1, 6; Иез. 13:5; Соф. 1:8). Бистиң үевисте Иегованың хүнү Өндүр улуг Вавилонче халдаашкындан эгелээш, Армагеддон дайыны-биле төнер. Иегованың хүнүнде дириг артар дизе, амдыгааштан эгелеп, аңаа белеткенир болзувусса эки. Бис коргунчуг хилинчекке белен болур ужурлуг бис деп, Иисус өөредип турган болгай (Мф. 24:21; Лк. 12:40).

2. 1 Фессалоникчилерге чагааны шинчилээри чүге ажыктыг?

² Павел элчин Иегованың өндүр улуг шииткел хүнүнге белен болурунга дузалаар дээш, элээн каш чижекти 1 Фессалоникчилерге чагаазында ажыглаан. Иегованың хүнү элээн үе эрткенде кээр деп, ол билир турган (2 Фес. 2:1—3). Ындыг турбуже, ол кады бүзүрээн ха-дуңмазын баш удур белеткенип, ол хүн даарта дүжер ышкаш кылдыр бодаарынче оттурган. Бис база Павелдиң сүмезин ажыглап болур бис. Ам бо үш чүүлдү сайгарып көрээлиңер: 1) Иегованың хүнү кажан кээрил, 2) ол хүн кым камгаланып шыдавас, 3) аңаа канчаар белеткенип ап болур бис?

3. Иегованың хүнүн чүге оорга дөмейлеп болур? (Ол ышкаш чурукту көрүңер.)

³ «Дүне када оор дег» (1 Фес. 5:2). Иегованың хүнүн көргүскен үш чижектиң бирээзи-дир. Оорлар бажың ээзи көңгүс манавайн турда, караңгыда далаштыг оорланыр. Кижилерниң хөй кезиинге Иегованың хүнү шак-ла ынчаар кээр. Алыс шын христианнар безин болуушкуннарның ындыг дүрген болурун  көргеш, кайгап каар чадавас. Ынчалза-даа, каржы улус дег, узуткаттырбас бис.

4. Иегованың хүнүн чүге божуур кижиниң эъдиниң аарыынга деңнеп болур?

⁴ «Сааттыг херээженниң эъди аарый бээри дег» (1 Фес. 5:3). Иштиг херээжен кижи эъди кажан аарый бээрин билбес. Ынчалза-даа ол божуптарынга чигзинмес. Колдуунда кижиниң эъди хенертен аарый бээр болгаш, ону соксадыры болдунмас. Шак ол ышкаш Иегованың хүнү кажан болурунуң ай-хүнүн, шагын бистер ылаптыы-биле билбес бис. Ынчалза-даа каржы кижилерни шиидер Бурганның хүнү албан кээр база хенертен болур, ону соксадыры болдунмас деп бис ыяк бүзүрээр бис.

5. Коргунчуг хилинчекти чүге даң хаяазынга деңнеп болур?

⁵ Даң хаяазы ышкаш. Үш дугаар чижээнде Павел дүнеки оорларны база катап чугаалаан. Бо удаада ол Иегованың хүнүн даң хаяазы-биле деңнээн (1 Фес. 5:4). Оорлар чазыйлааш, үениң эрткенин эскербейн барып болур. Даң хаяазы адып кээрге, оларны шупту улус хенертен көрүп каар. Ол чижекте оорлар дег, коргунчуг хилинчек үезинде «караңгының үре-түңнел чок үүле-херээнге киржип» турар улус «илереп кээр». Оларга бодаарга, бис Иегованы хомудадыптар ажыл-херектерден ойталап, «буянныг херектерже, чөптүг-шынныг чорукче болгаш алыс шынче» чүткүп, Иегованың хүнүнге белеткенип ап болур бис (Эф. 5:8—12). Улаштыр Павел ийи чижектиң дузазы-биле Иегованың хүнүнде кым камгаланып шыдавазын көргүскен.

6. Кижилерниң хөй кезии кандыг уткалыг удуп чыдар? (1 Фессалоникчилерге 5:6, 7).

⁶ «Уйгужу улус». (Номчуптуңар: 1 Фессалоникчилерге 5:6, 7.) Иегованың хүнүнде  камгаланып шыдавас улусту Павел удаан улус-биле деңнээн. Олар долгандыр чүү болуп турарын билбес база кайы хире үениң эрткенин эскербес боор. Ынчангаш чугула болуушкуннар үезинде олар серемчилелдиг болуп шыдавас. Амгы үеде кижилерниң хөй кезии доора уткалыг ханы уйгуда (Рим. 11:8). «Сөөлгү хүннерде» чурттап турарывысты база удавас коргунчуг хилинчек эгелээр деп бадыткалдарны олар тоовайн турар. Делегейде бир-ле чугула болуушкуннар үезинде олар түр када оттуп келгеш, Чагырга дугайында медээге сонуургалды илередир. Ынчалза-даа оларның хөй кезии серемчилелдиг артарының орнунга, катап удуй бээр. Оларның чамдыызы шииткел хүнү чедип кээр деп бүзүреп турза-даа, ооң келири ам-даа элек деп бодаар (2 Пет. 3:3, 4). Ынчалзажок Иегованың хүнү чоокшулаан тудум, серемчилелдиг артары дыка чугула деп билип турар бис.

7. Бурганның узуткаар дээн улузун чүге эзириктерге дөмейлеп болур?

⁷ «Арагачылар». Павел Бурганга узуткадыр улусту арагачыларга деңнээн. Эзирик улустуң угааны ээдергей боор, ынчангаш олар боданып шыдавас. Шак ындыг чүвени каржы кижилерниң дугайында чугаалап болур. Олар Бурганның сагындырыгларын тоовайн турар. Ындыг улус өлүмге чедирер орукче туруп алган. Ынчалза-даа Бурганның Сөзү христианнарны бодамчалыг артып, серемчилелдиг болурунче оттуруп турар (1 Фес. 5:6). Бир Библия эртемдениниң сөстери-биле алырга, серемчилелдиг азы элээр кижи дүвүрелге алыспайн, бодамчалыг артып турар. Ол тода боданып, шын шиитпирлерни хүлээп турар. Бо делегейниң херектеринче дүлнү бербес дээш, дүвүрелге алыспайн, бодамчалыг артар ужурлуг бис. Чүге дээрге хамык улус бисти политиктиг болгаш хөй-ниити айтырыгларынга кандыг-бир таланы ээлээринче албадап болур. Иегованың хүнү чоокшулаан тудум, ындыг базыышкын дам күштелир. Ындыг-даа болза, чүнү харыылаарының дугайында сагыш човавас ужурлуг бис. Бурганның сүлдези биске дүвүревейн, бодамчалыг болуп, мерген угаанныг шиитпирлерни хүлээринге дузалаар (Лк. 12:11, 12).

8. 1 Фессалоникчилерге 5:8-те серемчилелдиг болгаш бодамчалыг болурунга дузалаар шынарларны чүнүң-биле деңнээн? (Ол ышкаш чурукту көрүңер.)

⁸ «Куяк хепти... [база] куяк бөрттү... кедип аалы». Павел бисти бүрүнү-биле чепсегленген серемчилелдиг дайынчыларга деңнээн. (Номчуптуңар: 1 Фессалоникчилерге 5:8.) Дайынчы кижи кайы-даа үеде тулчурунга белен боор. Бистиң дугайывыста база ынча деп болур. Бир эвес бүзүрелдиң болгаш ынакшылдың куяк хевин база идегелдиң куяк бөргүн кедип алыр болзувусса, Иегованың хүнүнге белен боор бис. Бүзүрел, ынакшыл болгаш идегел — бо үш шынар — биске эргежок чугула.

9. Бүзүрел бисти канчаар камгалап турар?

⁹ Куяк хеп дайынчының чүрээн камгалап турганы дег, бүзүрел болгаш ынакшыл бистиң доора уткалыг чүрээвисти камгалап турар. Ол шынарлар үргүлчү Бурганга бараалгап, Иисустуң үлегерин эдереринге дузалаар. Бүзүреливис бар болза, бүгү чүрээвистен олче чүткүп чоруурувус дээш Иегова бисти шаңнаар деп чигзинмес бис (Евр. 11:6). Бергелерге таварышкаш-даа, Баштыңывыс Иисуска бердинген артарынче бүзүрел бисти оттурар. Амыдыралдың бергелерин ажып эртеринге база-ла бүзүрел биске дузалаар. Истеп сүрүүшкүннерге база акша-төгерик бергелеринге таварышкаш-даа, Бурганга бердинген арткан акы-угбаларның чижээнге өөренип болур бис. Оон аңгыда, быжыг бүзүрел акша-төгерикке хандыкшылдан  камгалаар. Ону кылыр дизе, Бурганның Чагыргазын бирги черге салыр дээш, чуртталгазын бөдүүнчүдүп алган акы-угбалардан үлегерни алыр болзувусса эки b.

10. Бурганга база чанывыста улуска ынакшыл туруштуу-биле суртаалдаарынга биске канчаар дузалап турар?

¹⁰ Серемчилелдиг болгаш бодамчалыг артар дизе, ынакшыл база эң чугула (Мф. 22:37—39). Янзы-бүрү бергелер турза-даа, Бурганга ынакшыл туруштуу-биле суртаалдаарынга биске дузалап турар (2 Тим. 1:7, 8). Чүдүлгевиске бүзүревес улуска ынак болгаш, бажыңнарны кезип, телефон дамчыштыр суртаалдап, чагааларны бижиирин уламчылап турар бис. Бир-ле хүн чанывыста улус база Бурганга бараалгап эгелээринге идегеп чоруур бис (Иез. 18:27, 28).

11. Акы-угбаларга ынакшыл биске канчаар дузалап турар? (1 Фессалоникчилерге 5:11).

¹¹ Кады бүзүрээн ха-дуңмавыс база чанывыста кижилерге хамааржыр. Бис Павелдиң «бот-боттарыңарны моон-даа соңгаар аргалаңар база быжыглаңар» деп кыйгызын эдерип, оларга ынакшылды көргүзүп турар бис. (Номчуптуңар: 1 Фессалоникчилерге 5:11.) Дайынчылар эгин кожа тулчуп, бот-боттарынга кезээде дузалажырынга белен турган. Бис база бот-боттарывысты деткижип чоруур бис. Тулчуушкун үезинде дайынчы бодунуң эжин билбейн балыглап болур, ынчалза-даа ол ону кажан-даа өжегерээн кылбас. Бис база акы-угбаларны кара сагыштыы-биле хомудадып, чедирген хора дээш, хора-биле харыылавас бис (1 Фес. 5:13, 15). Оон ыңай бисти удуртуп турар акыларны хүндүлеп турарывыс-биле ынакшылды көргүзер бис (1 Фес. 5:12). Павел Фессалоникаже чагаазын бижип турда, чыыштың тургустунганындан бээр бир чыл безин четпээн турган. Ынчангаш хуралдың удуртукчулары дуржулга чок болгаш, частырыгларны кылып чораан. Ындыг турбуже, олар дөмей-ле хүндүткелге төлептиг турган. Коргунчуг хилинчек чоокшулап кел чыдар. Ынчангаш келир үеде тус черниң удуртукчуларының айтыышкыннарындан оон-даа хамааржыр апаар бис. Кол башкарылга чери-биле азы  салбыр-биле харылзаа үстүп болур. Амдыгааштан тура эргим удуртукчу акыларывысты хүндүлеп, оларга ынакшылды илередип өөрениилиңер! Чүү-даа болу берзе, бодамчалыг артып, ол акыларның четпес талаларынче кичээнгей салбайн, ол шынчы эр улусту Иегова Христосту таварыштыр башкарып турар деп утпаалыңар.

12. Идегеливис угаан-бодалывысты канчаар камгалап турар?

¹² Куяк бөрттүң дайынчыны камгалаары дег, бистиң идегеливис угаан-бодалывысты камгалаар. Быжыг бүзүрелдиң ачызында бо делегей биске кандыг-даа үнелиг чүүл бербес деп билир бис (Флп. 3:8). Идегелдиң ачызында кандыг-даа берге байдалга чайгылбайн, дүвүрел чок артып турар бис. Африкада бараалгап турар Уо́ллис биле Лори́нда аңаа шынзыккан. Үш неделя иштинде Уоллис ачазын, а Лоринда авазын чидирип алган. Хамчык аарыгның уржуундан олар төрелдеринче чанып кээп шыдавааннар. Уоллис мынча деп бижээн: «Чок апарган улузумнуң сөөлгү хүннерин эвес, а оларның чаа делегейге баштайгы хүннерин бодаар кылдыр, диргизиишкинге идегел мени оттуруп турар. Муңгарал хөме ап кээр үелерде идегел мени оожургадып турар».

13. Ыдыктыг сүлдени алыр дээш, чүнү кылып болур бис?

¹³ «Ыдыктыг Сүлдениң одун өжүрбеңер» (1 Фес. 5:19). Павел ыдыктыг сүлдени иштивистен кыптыгып турар отка деңнээн. Бурганның сүлдезиниң ачызында шын алдынар чүткүл-соруувус кыптыгып, Иеговага бараалгаар күжүвүс бар (Рим. 12:11). Ынчаарга ыдыктыг сүлдени канчаар ап болур бис? Ооң дугайында мөргүп, Бурганның сүлдезинге бүргеткен Библияны шинчилеп, Бурганның сүлдези башкарткан организация-биле сырый ажылдажыр болзувусса эки. Ынчан ыдыктыг сүлдениң үре-түңнелин илередип шыдаар бис (Гал. 5:22, 23).

14. Бурганның сүлдезин улаштыр алыр дээш, чүден ойталаар ужурлуг бис? (Ол ышкаш чурукту көрүңер.)

¹⁴ Бургандан ыдыктыг сүлдени алгаш, ооң одун өжүрбес ужурлуг бис. Бурган ыдыктыг сүлдени бодун шын алдынып, угаан-бодалын  хирлендирбейн турар улуска бээр. Бир эвес чүдек-бужар чүүлдер дугайында боданып, ол бодалдарга алзыр болзувусса, Иегова биске ыдыктыг сүлдезин бербес (1 Фес. 4:7, 8). Ыдыктыг сүлдени алыр дизивиссе, «өттүр билген медеглелдерни куду көрбеңер» дээн айтыышкынны эдерери чугула (1 Фес. 5:20). Мында «өттүр билген медеглелдер» дээрге Бурганның сүлдези таварыштыр дамчыдып турар медээлер-дир. Ынаар Иегованың хүнүнүң болгаш чурттап турарывыс тускай үениң дугайында медээлер база хамааржыр. Бис Иегованың хүнүн соңгаарладып, Армагеддонга чедир чурттай албас бис деп боданмайн турар бис. Харын-даа ол хүннүң кээрин дүргедедип, ол мыя бо келген деп үргүлчү сактып чоруур бис. Ол чүден көскү? Бис шын алдынып, Бурганның ажыл-херээнге идепкейлиг киржип чоруур бис (2 Пет. 3:11, 12).

15. Меге информация биле буктарның пропагандазынга канчаар алыспазыл? (1 Фессалоникчилерге 5:21).

¹⁵ Удавас Бурганның удурланыкчылары: «Кайда-даа амыр-тайбың-дыр, айыыл чок-тур» — деп чарлаар (1 Фес. 5:3). Чер кыры буктарның меге пропагандазы-биле дола бээрге, кижилерниң хөй кезии мегеледип алыр (Ажыд. 16:13, 14). Ынчалза-даа бис Павел элчинниң: «Шуптузун хынап чаңчыгыңар» — дээн сөстерин эдерер болзувусса, мегеледип албас бис. (Номчуптуңар: 1 Фессалоникчилерге 5:21.) «Хынап чаңчыгыңар» кылдыр очулдурган грек сөстү үнелиг металлдарның шынарын хынаарда ажыглаар турган. Ынчап кээрге, номчуп, дыңнап турар чүүлүвүстүң ылаптыын хынаар ужурлуг бис. Фессалоникада акы-угбаларга ону кылыры дыка чугула турган. Чоокку келир үеде ону кылыры оон-даа чугула апаар, чүге дээрге коргунчуг хилинчек чоокшулап кел чыдар. Улустуң чугаа-сөзүнге бүзүрээриниң орнунга, бодамчалыг болуру чугула. Номчаан, дыңнаан чүүлүвүстү Библия болгаш Иегованың организациязының чүү дээни-биле деңнээр ужурлуг бис. Ынчан буктарның пропагандазынга алыспас бис (У. ч. 14:15; 1 Тим. 4:1).

16. Чүү чүвеге идегээр бис база ол бисти чүүже оттуруп турар?

¹⁶ Бурганның чону коргунчуг хилинчекти ажып эртиптер. Бистиң кижи бүрүзүнге хамаарыштыр чүү болурун билбес бис (Иак. 4:14). Ынчалза-даа, Бурганга шынчы арткаш, Армагеддон бетинде өлүп каар-даа болзувусса, мөңге чуртталганы алырынга быжыг бүзүрээр бис. Чагдырган христианнар Иисус-биле кады дээрлерге, а өске хойлар черге сесерликке чурттаар. Ынчангаш кайгамчык идегеливистен салдынмайн, Иегованың хүнүнге белен болуулу!