Библия ол айтырыгга харыы бербээн. Ынчалза-даа оларның шиитпирин тайылбырлаан солун бодалдар ында бар.

Дээрниң төлээзи Марияга ол иштелип-сааттангаш, оол божуп алырын чугаалаан. Ол үеде Мария биле Иосиф Галилеяга Назаретке чурттап турганнар (Лк. 1:26—30; 2:4—5). Олар Египетке үр эвес чурттааш, дедир чанып келгеннер. Иисус ол хоорайга өскен болгаш, назорей апарган (Мф. 2:19—23). Ынчангаш Иисустуң, Иосифтиң, Марияның дугайында чугаалап тургаш, Назаретти сактып кээр бис.

Марияның Иудеяда Елисавета дээр төрели чурттап турган. Ол Захария бараалгакчының өөнүң ишти база Иоанн Медеглекчиниң авазы чораан (Лк. 1:5, 9, 13, 35). Мария Елисаветага төрелдеп, Иудеяга 3 хире ай чурттааш, Назаретче дедир чанып келген (Лк. 1:38, 39, 56). Ынчап кээрге, ол Иудеяның девискээрин шору билир турган.

Удаваанда чизе эрттирер деп чарлык үнерге, Иосиф Назареттен «Давидтиң хоорайы» Вифлеемче чорупкан. Өттүр билген медеглел аайы-биле, Мессия Вифлеем хоорайга төрүттүнер ужурлуг турган (Лк. 2:3, 4—5; 1 Хаан. 17:15; 20:6; Мих. 5:2). Мария Иисусту аңаа божаан. Иосиф чаа божаан кадайын узун орукка түретпес дээш, Назаретче дораан чорбайн, Вифлеемге артып калган. Ол хоорай Иерусалимден 9 хире километр ыракка турган. Ынчангаш дун оглу-биле өргээже, хоойлу аайы-биле өргүл эккээри оларга эптиг турган (Лев. 12:2, 6—8; Лк. 2:22—24).

Иисустуң төрүттүнериниң мурнунда-ла, дээрниң төлээзи Марияга ооң оглу «Давидтиң дүжүлгезин» салгап, Хаан апаарын чугаалаан. Иисус Давидтиң хоорайынга төрүттүнеринче Иосиф биле Мария улуг кичээнгейни салган чадавас (Лк. 1:31, 32; 2:11, 17). Ол хоорайга артып, Бургандан айтыышкыннарны манаары шын деп бодап турганнар боор.

Чурагачыларның кээринге чедир, Вифлеемге оларның кайы хире үе чурттааны билдинмес. Ол үеде оглу шору өзе берген, а олар бажыңга чурттап турганнар (Мф. 2:11). Оон алырга, чизениң соонда олар Назаретче чанмайн, Вифлеемге турумчуп чурттай бергеннер.

«Вифлеемде... ийи харлыг болгаш оон бичии эр хиндиктиг чаштарны дөгерезин өлүрерин» Ирод дужааган (Мф. 2:16). Бурган ону Иосифке чугаалаарга, ол Мария биле Иисусту ап алгаш, Египетче дезипкен. Аңаа Иродтуң өлүмүнге чедир турганнар. Соонда Иосиф өг-бүлези-биле Назаретче көже берген. Олар Вифлеемче чүге чанмаан? Чүге дээрге Иудеяны чагырып турган каржы Иродтуң оглу Архелайдан сезингеннер. Оон аңгыда, Иосиф Бургандан сагындырыг алган. Назаретке Бурганның хоойлулары ёзугаар Иисусту айыыл чок байдалга кижизидип, өстүрүп болур турган (Мф. 2:19—22; 13:55; Лк. 2:39, 52).

Иисус өске улуска дээрге чурттаар орукту ажыдарының бетинде-ле, Иосиф чок апарганы чугаажок. Ынчап кээрге, Иосиф чер кырынга дирлип кээр. Иисус төрүттүнүп кээрге, ооң өг-бүлези Вифлеемге чүге артып каанын, Иосифтен ол үеде хууда ужурашкаш, тодаргайы-биле билип ап болур.