ӨӨРЕНИР СТАТЬЯ 23
ЫРЫ 28 Иегованың өңнүү бол
Иегова бисти аалчылары болурунче чалап турар
«Мээң чурттаар өргээм оларның аразынга турар. Мен оларның Бурганы болур мен» (ИЕЗ. 37:27).
КОЛ БОДАЛ
Бо статьядан Иегова өргээ-майгынынче кымны чалап турарын, аалчыларындан чүнү манаарын база олар дээш канчаар сагыш човаарын билип алыр бис.
1, 2. Иегованың шынчы бараалгакчылары кандыг хүндүткелге төлептиг?
ИЕГОВА силерге кымыл? «Ол мээң Адам, Бурганым болгаш Эжим» — деп харыылаар боор силер. Чугаажок, Иегова-биле хамаарылгаңар дугайында оон-даа хөйнү үлежир силер. Ону аалчыларга экииргек бажың Ээзи кылдыр сагыштаалаар-дыр силер бе?
2 Давид хаан Иегованы бажың ээзинге, а шынчы бараалгакчыларны аалчыларга деңнээш, Бургандан айтырган: «[Иегова]! Кым Сээң өргээ-майгыныңга чурттап шыдаарыл? Кым Сээң ыдыктыг дааңга турумчуп чурттаарыл?» (Ыд. ыр. 14:1). Бо сөстерден алырга, кижи Иегованың өңнүү — ооң аалчызы апарып болур. Ол алдар-хүндүнү бодап кээрге, кижиниң хей-аъды көдүрлүп кээр!
ИЕГОВА ААЛЧЫЛАРГА ЫНАК
3. а) Иегованың бир дугаар аалчызы кым? б) Иегова биле бир дугаар аалчы бот-боттарынга кандыг хамаарылгалыг турган?
3 Эгезинде Иегова чааскаан турган. Оон бир дугаар Оглун чаяагаш, өргээ-майгынынче чалаан. Иеговага бодун бажың Ээзи кылдыр миннири дыка аянныг болган. Библиядан көөрге, Иегова Оглу-биле үени эрттиреринге ынак турган, оглунга база Ачазы-биле кады турары дыка-ла өөрүнчүг (У. ч. 8:30).
4. Иегова өргээ-майгынынче оон ыңай кымны чалаан?
4 Иегова өске дээрниң төлээлерин чаяагаш, өргээ-майгынынче база чалаан. «Бурганның бүгү оолдары» ооң чанынга өөрүшкүлүг турганнар (Иов 38:7; Дан. 7:10). Баштай Иегованың аалчылары чүгле дээрде чаяалгалар болган. Оон кижилерни чаяагаш, бодунуң өргээ-майгынынче база чалаан. Иегованың аалчыларының аразынга чижээ, Енох, Ной, Авраам, Иов турган. Бурганның күзел-соруу ёзугаар чурттап чорааш, олар ооң өңнүктери кылдыр санаттырган (Э. д. 5:24; 6:9; Иов 29:4; Иса. 41:8).
5. Иезекиил 37:26, 27-де медеглелде чүнү бижээн?
5 Чүс-чүс чылдар дургузунда Иегова чаа-чаа өңнүктерни чалап турар. (Номчуптуңар: Иезекиил 37:26, 27.) Иезекиилдиң медеглелинден алырга, Бурган бердинген бараалгакчылары-биле чоок, чылыг-чымчак харылзаалыг боорун күзээр. Бурган оларга «эп-найырал керээзи» чарып алырын аазаан. Дээрге-даа, черге-даа чурттаар улус «чаңгыс кодан» апарып, ооң өргээ-майгынынга, келир үеде кады чурттаарынче Иезекиилдиң медеглели айыткан (Ин. 10:16). Ол үе ам-на келген!
БУРГАН ШУПТУ ААЛЧЫЛАРЫ ДЭЭШ САГЫШ ЧОВАП ТУРАР
6. Кажан кижи Иегованың аалчызы апаар, ооң өргээ-майгыны кайда?
6 Библейжи үелерде майгын хат-чаъстан чаглактаныр, дыштаныр чер турган. Майгын ээзи аалчыларга эки хамаарылгалыг турган. Иеговага чуртталгавысты бараалгадырывыска, ооң өргээ-майгынынга аалчылар боор бис (Ыд. ыр. 60:5). Ында аъш-чем элбек, аңаа өске аалчылар-биле үени эки эрттирер бис. Иегованың өргээ-майгыны — аңгылаттынган тускай чер эвес. Ооң бараалгакчылары кайда, өргээ-майгын ында (Ажыд. 21:3). Өске чуртче тускай шуулганче барган болзуңарза, силер ышкаш Иеговага бараалгап турар акы-угбаларны көрген боор силер. Олар база Бурганның өргээ-майгынында аалчылар.
7. Чок апарган бараалгакчыларны чүге Иегованың өргээ-майгынында деп болур? (Чурукту база көрүңер.)
7 Иегованың чок апарган бараалгакчылары ам-даа өргээ-майгында аалчылар хевээр бе? Ийе. Чүге ынча деп болур? Олар Иеговага дириг деп, Иисустуң сөстеринден көскү: «Моисей хып турар чадаң ыяшка [Иеговага]... таваржы бергеш, Ону Авраамның... Исаактың... Иаковтуң Бурганы деп адааш, өлген улустуң катап дирлири ылаптыг дээрзин... көргүскен болгай. Бурган — өлүглерниң эвес, а дириглерниң Бурганы-дыр! Бурганга хамааржыр бүгү улус дириг-дир!» (Лк. 20:37, 38).
Иегованың шынчы бараалгакчылары чок апаргаш безин, ооң майгынында аалчылар (абзац 7).
ИЕГОВАДАН ЙӨРЭЭЛДЕР БОЛГАШ ХАРЫЫСАЛГАЛАР
8. Иегованың өргээ-майгынында улустуң камгалалы кандыг?
8 Дорт уткалыг майгынга дыштаныр, хат-чаъстан чаштынар. А Иегованың өргээ-майгынында улустуң Бурган-биле найыралы болгаш идегели камгалалдыг. Иегова-биле болзувусса, Эрлик биске эттинмес хораны чедирип шыдавас (Ыд. ыр. 30:24; 1 Ин. 3:8). А чаа делегейге Иегова шынчы өңнүктерин доора уткалыг айыылдан аңгыда, өлүмден база камгалаар (Ажыд. 21:4).
9. Иегова аалчыларындан чүнү манаар?
9 Мөңгеде Иегованың өңнүү, аалчызы болуру — дыка улуг хүндүткел. Бурганга буяны дээш, кижи канчаар өөрүп четтирип болур? Аалчы кижи дүрүмнер тургуспас болгай. Идик уштур болза, ону кылыр. Ооң-биле дөмей аалчыларындан Бурган чүнү күзээрин билип алыры чугула. Бис Иеговага ынак болгаш, «бүгү чүүлге ооң сеткилин өөртүр[үн]» күзээр бис (Кол. 1:10, Чаа делегей). Иегова бистиң Өңнүүвүс, Бурганывыс, Адавыс болганда, ол хүндүткелге төлептиг (Ыд. ыр. 24:14). Ону сактыр болзувусса, аңаа чогуур хүндүткелди көргүзүп, шын алдынып, ажыл-херээвис-биле ону куду көрбес бис. Чүге дизе бистиң сорулгавыс — Бурганывыстың мурнунга биче сеткилдиг амыдырап-чурттаары (Мих. 6:8).
ИЕГОВА УЛУСТУ ЫЛГАЙ КӨРБЕС. БУРУНГУ ҮЕДЕ ЧИЖЕК
10, 11. Синай ховузунга израильчилерге Иегованың хамаарылгазы кандыг турган?
10 Иегованың кымны-даа ылгай көрбези, Синай ховузунга израильчилер-биле ооң хамаарылгазындан көскү (Рим. 2:11).
11 Египеттиң кулданыындан израильчилерни хостааш, Иегова оларга ыдыктыг өргээ-майгынны туттургаш, аңаа бараалгакчылар биле левиттерни томуйлаан. Өргээ-майгынның ажылчыннары болгаш чоогунда чурттап турган улус дээре байдалдыг турган бе? Иегова олар дээш чондан артык сагыш човаар болган бе? Чок. Ол кымны-даа ылгай көрбес.
12. Иегова чонунда кымны-даа ылгавас турганы кайыын көскү? (Хосталыышкын 40:38). (Чурукту база көрүңер.)
12 Турлагның кайы-даа талазында майгынныг, кандыг-даа хүлээлгелиг кижи Иегова-биле өңнүктежир аргалыг турган. Чижээ, өргээ-майгында булут чагы биле оттуг чагы бүгү чонга көскү кылдыр Бурган сагыш човап каан. (Номчуптуңар: Хосталыышкын 40:38.) Кажан булут көдүрлүрге, көжер үе келген деп турлагның кыдыында майгынныг улус безин ону көрүп кааш, чыдып калбайн, чыгдынып алыр турган (Сан. 9:15—23). Орукче үнер үе келгенин дыңнадыр ийи мөңгүн трубаның ыыткыр даажы шупту улуска чедип турган (Сан. 10:2). Ыдыктыг майгынның чоогунда кижиниң Иегова-биле найыралы өске улуска бодаарга чоок деп болбас. Ол чаа чонда кижи бүрүзү Бурган ону камгалаар, аалчызы кылдыр чалаар деп чигзинмес турган. Бо хүн бис база каяа-даа чурттаар болзувусса, ынакшылдыг Бурганывыс биске удуртулганы бээр, камгалаар деп чигзинмес бис.
Өргээ-майгынның тургузуу Бурганның кымны-даа ылгавазын көргүскен (абзац 12).
ИЕГОВА УЛУСТУ ЫЛГАЙ КӨРБЕС. АМГЫ ҮЕДЕ ЧИЖЕК
13. Амгы үеде Иегованың чөптүү кайыын көскү?
13 Амгы үеде Иегованың Херечилериниң кол башкарылга чери азы салбыр чанында чурттап турар акы-угбалар бар. Чамдыызы ында бараалгап турар. Ынчангаш олар салбырның килдистеринге дузалажып, харыысалгалыг акылар-биле аралажып болур. Эргий кезиир ажылда азы долу бараалгалдың тускай хевирлеринде улус база бар. Хөй кезии акы-угбалар ышкаш, силерде база ынчаар бараалгаар арга чок болза, муңгараваңар. Эң-не кол чүүл, Иегованың аалчылары силер, а ол шупту аалчыларынга ынак. Бурган чонунда кижи бүрүзүнге хууда кичээнгейни көргүзүп, бүзүрелди быжыктырар ном-дептерни, удуртулганы болгаш камгалалды берип турар (1 Пет. 5:7).
14. Иегованың шупту улуска чөптүг хамаарылгазының база бир чижээн чугаалап көрүңер.
14 Иегова шупту улуска дөмей хамаарылгазын бадыткап турар. Амгы үеде делегейниң аңгы-аңгы булуңнарында улус Библияны номчуур аргалыг. Баштай ол еврей, арамей, грек дылдарга бижиттинген. Ынчалза-даа Библияны баштайгы дылынга номчуп шыдаар улус, ол дылдарны билбес улуска бодаарга, Иегова-биле чоок хамаарылгалыг дээри шын эвес (Мф. 11:25).
15. Иегова янзы-бүрү кижилер-биле найыралдажып алыксаары чүден көскү? (Чурукту база көрүңер.)
15 Бурунгу дылдарны билбес база дээди эртем чок-даа болзувусса, Иегованың өңнүктери болур аргалыг бис. Библияны билип алырда профессор болуру албан эвес. Ону муң-муң дылдарга очулдурар кылдыр Иегова сагыш човаан. Ынчангаш бүгү делегейде кижилер Бурганны эки билип ап, ооң мерген угаанныг сүмелерин ажыглап болур (2 Тим. 3:16, 17).
Амгы үеде бүгү делегейде кижилер Библияны номчуп болуру, Иегованы улус ылгавас Бурган деп көргүзүп турар (абзац 15).
ИЕГОВАНЫҢ ӨРГЭЭ-МАЙГЫНЫНГА АРТЫҢАР
16. Ажыл-чорудулга 10:34, 35-тен алырга, Иегова аалчыларындан чүнү манаар?
16 Өргээ-майгынынче чалап алганы дээш, Иеговага дыка-ла өөрүп четтирер бис. Ол эң-не буянныг, эң-не ынакшылдыг, аалчыларга экииргек, кымны-даа ылгай көрбес бажың ээзи. Иегова аңгы-аңгы кижилерни чурттап турар черин, эртем билиин, ук-ызыгуурун, язы-сөөгүн, назы харын болгаш эр-кызын барымдаалавайн чалап турар. Ындыг-даа бол, чүгле дыңнангыр улусту аалчылар кылдыр хүлээр. (Номчуптуңар: Ажыл-чорудулга 10:34, 35.)
17. Дараазында статьяга чүнү сайгарар бис?
17 Ырлар 14:1-де Давид Иеговадан: «Кым Сээң өргээ-майгыныңга чурттап шыдаарыл? Кым Сээң ыдыктыг дааңга турумчуп чурттаарыл?» — деп айтырган. Давид ыдыктыг сүлдеге башкартып, айтырыгларынга харыызын улаштыр бижип каан. Дараазында статьяга ол Ырыны тодаргай сайгаргаш, Иегова аалчыларындан чүнү манап турарын билип алыр бис.
ЫРЫ 32 Иегованың чанынга туруп ал!
