1. Бергелерге торулбайн, Иеговага улаштыр бараалгаарынга биске чүү дузалап турар?

 БИСТИҢ үевисти Библияда аар-берге деп бижээн (2 Тим. 3:1). Шупту улустуң бергелеринден аңгыда, Иегованың чону удурланыышкыннарга, истеп сүрүүшкүннерге таваржып турар. Иегова — «дириг Бурган» деп чуртталгавыска шынзыкканывыс, бергелерге торулбайн, улаштыр бараалгаарынга дузалап турар (Иер. 10:10; 2 Тим. 1:12).

2. Иегованы дириг Бурган деп сактыры чүге чугула?

² Иегова — херек кырында бар. Ол шупту бергелеривисти билир база бисти кезээде деткиир арганы тып алыр (2 Чыл. 16:9; Ыд. ыр. 22:4). Иегова — «дириг Бурган» деп сактыр болзувусса, кандыг-даа бергелерни шиитпирлеп шыдаар бис. Ону Давид хаанның чижээнге көрээлиңер.

3. Иегованы дириг Бурган дээни-биле Давид чүнү илереткен?

³ Давид Иегованы билир болгаш, аңаа ынанып чораан. Саул хаандан болгаш өске-даа дайзыннардан куй иштинге чаштынып тура, ол Иеговадан дузаны дилеп турган (Ыд. ыр. 17:7). Давидтиң мөргүлүнге харыылап, камгалап каарга, Бурганны ол: «[Иегова] дириг!» деп алгап-мактаан (Ыд. ыр. 17:47). Ол сөстер-биле Давид чүнү чугаалаксааныл? Иегованы «бодунуң чонунуң ажыы дээш, кажан-даа хөделип чоруур дириг бурган» дээрзинге Давид чигзиниг чогун илереткенин, бир эртем ажылында демдеглээн. Ийе, ооң Бурганы дириг деп, Давид бодунуң чуртталгазында шынзыккан. Ол Иеговага бараалгаарынга база улаштыр ону алдаржыдарынга быжыг хөөннүг турган (Ыд. ыр. 17:29, 30, 50).

4. Иегованы дириг Бурган деп билиривис биске кандыг салдарлыг?

 ⁴ Иегова — дириг Бурган деп быжыг бүзүреливис аңаа чүткүлдүг бараалгаарынга дузалаар. Ынчангаш шенелделерни шыдажып база аңаа моон-даа соңгаар бараалгаар күжүвүс турар. Иеговадан бисти ырадырын чүге-даа чөпшээревес бис.

ДИРИГ БУРГАН СИЛЕРГЕ КҮШТҮ БЭЭР

5. Шенелделерден кортпазы чүге чугула? (Филипчилерге 4:13).

⁵ Дириг Бурганывыс биске дузалаарынга кезээде белен деп сактыр болзувусса, янзы-бүрү бергелерни ажып шыдаар бис. Чүге дизе кандыг-даа шаптараазыннар аңаа моондак болбас. Ол Күчүлүг Бурган болгаш, бергелерни ажып эртеринге күштү бээр. (Номчуптуңар: Филипчилерге 4:13.) Ынчангаш шенелделерден кортпазынга бүгү үндезин бар. Бичии-даа бергелеривиске Иегова бисти деткип турарын көргеш, улуг шенелделерге-даа бисти кагбас деп бүзүреливис оон-даа быжыгар.

6. Давид-биле болган ийи таварылга, ооң Иеговага бүзүрелин канчаар быжыктырган?

⁶ Давидтиң Иеговага бүзүрелин быжыктырган ийи таварылганы сактып кээлиңер. Элээди үезинде ол ачазының хоюн кадарып турган. Бир катап арзылаң хой алгаш барган, а өске таварылгада коданче адыг халдап келген. Ол ийи таварылгада Давид араатаннардан хойларын коргуш чок камгалап алган. Араатаннарны тиилеп алырынга Иегова дузалаанын ол билип турган (1 Хаан. 17:34—37). Иегованың канчаар дузалаанын Давид кажан-даа утпаан. Ооң дугайында боданып тургаш, дириг Бурган аңаа келир үеде база күштү бээр деп ол шынзыккан.

7. Давид чүже кол кичээнгей салганыл, база аңаа Голиафты тиилээринге чүү дузалаан?

⁷ Сөөлзүредир Давид израильчилерниң шериинде акыларынга ужуражып келген. Ынчан ол 20 хар безин четпээн турган. Давид көөрге, «Израильдиң шериин» кыжырган медээжок улуг Голиафтан дайынчылар корга берген болган (1 Хаан. 17:10, 11). Шериглер ооң улуг дурт-сынынче, турамык сөстеринче кичээнгей салгаш, коргушка алзыпканнар (1 Хаан. 17:24, 25). А Давид көңгүс өскээр боданган. Голиаф анаа-ла шеригни эвес, а «дириг Бурганның аг-шериин» базынчактаанын ол билир болгаш, Иегованы бодаан (1 Хаан. 17:26). Кадарчылап чораан үезинде дузалаан болганда, бо байдалда база Бурган ону кагбас деп ол бүзүрелдиг турган. Иегованың деткимчезинге Давид чигзинмээн, ынчангаш Голиафты тиилеп үнгенин билир бис! (1 Хаан. 17:45—51).

8. Иегова кандыг-даа шенелделер үезинде чанывыста деп бүзүреливисти канчаар быжыктырар бис? (Чурукту база көрүңер.)

⁸ Дириг Бурганывыс дузалаарынга кезээде белен деп сактыр болзувусса, бис база шенелделерни эртип шыдаар бис (Ыд. ыр. 117:6). Ындыг бүзүрелди канчаар сайзырадып болурул? Иегова эрткен үеде бараалгакчыларын канчаар камгалап турганын Библиядан номчуңар (Иса. 37:17, 33—37). Амгы үеде Бурган бараалгакчыларын канчаар деткип турарын jw.org сайтывыстан тып ап болур. Иегова берге байдалда хууда силерге канчаар дузалаанын база сактып келиңер. Арзылаң, адыг-биле демисежири ышкаш бергелерге таварышпаан болзуңарза, муңгараваңар. Чуртталгаңарда Иегованың киржилгези чугула! Ол силерни өңнүү болурунче чалаан  (Ин. 6:44). Бурган алыс шынга артарыңарны күзеп, ам безин силерни деткип турар. Мөргүлдериңерге харыылаанын, эң-не херек үеде дузалажып турганын, берге апаарга ол кагбаанын сагындырып бээр кылдыр Иеговадан чүге дилеп болбазыл? Ооң дугайында боданыры Бурган силерни кажан-даа чааскаан арттырбас деп бүзүрелиңерни быжыктырар.

9. Шенелделер үезинде чүнү сактыры чугула? (Чугаалар 27:11).

⁹ Иегова — дириг Бурган деп сактыры, шенелделерге шын хамаарылгалыг болурунга дузалаар. Амыр эвес байдалда канчаар алдынарывыс Иегованың сеткилинге дээштиг. Эрлик бисти бергелерге таваржы бергеш, Бургандан хая көрнү бээр деп турар (Иов 1:10, 11; номчуптуңар: Чугаалар 27:11). Ынчалза-даа бердингенивис-биле Иеговага ынакшылывысты база Эрликтиң мегезин көргүзер бис. Амгы үеде хууда кандыг бергелерлиг силер? Эрге-чагырганың удурланыышкыннары, акша-төгерик чедишпези, чоннуң суртаалга сонуургал чогу азы өске чүүл бе? Чүү-даа болза, Иегованың сеткилин бодаңар. Силерниң байдалыңар ооң чүрээн өөртүр арганы берип турарын утпаңар. Ажып эртери болдунмас шенелделер турбас деп сактыры чугула (1 Кор. 10:13). Шупту бергелерни шыдажыптар күштү Иегова бээр.

ДИРИГ БУРГАН БИСТИ ШАҢНААР

10. Дириг Бурган бараалгакчыларын канчаар шаңнаар?

¹⁰ Иегова бараалгакчыларын кезээде шаңнаар (Евр. 11:6). Амгы үеде ол биске тайбыңны берип, бисти аас-кежиктиг кылып турар. А келир үеде мөңге чуртталганы белекке бээр. Бурган аазаашкыннарын күүседир деп чигзинмес бис, чүге дизе ону кылырда ооң күзели-даа, күжү-даа бар. Ол бодал бисти Бурганга сеткиливистен бараалгаарынче, аңаа эң-не дээре чүүлдү өргүүрүнче оттуруп турар. Чижээ, Тимофей  ышкаш, эрткен үениң шынчы бараалгакчылары шак-ла ынчаар алдынып чораан (Евр. 6:10—12).

11. Тимофей христиан чыышка чүге кызымаккай ажылдап турган? (1 Тимофейге 4:10).

¹¹ Номчуптуңар: 1 Тимофейге 4:10. Тимофей дириг Бурганга идегеп чораан, ынчангаш чыышка кызымаккай ажылдап турган. Ол чүү дээш харыылаар турган? Павел элчинниң сүмези-биле ол өөредир болгаш илеткелчи арга-мергежилин экижидип турган. Тимофей элээди-даа, улгады берген-даа акы-угбаларга эки үлегерни база көргүскен. Херек апарганда, частырыг кылган кижини шыңгыы, ынакшылдыы-биле сургаар дээн ышкаш ооң дыка нарын харыысалгазы турган (1 Тим. 4:11—16; 2 Тим. 4:1—5). Ажыл-херээн улус чамдыкта эскербес-даа болза, Иегова албан шаңнаар деп Тимофей чигзинмээн (Рим. 2:6, 7).

12. Хуралдың удуртукчуларын акы-угбалар дээш ажылдаарынче чүү оттуруп турар? (Чурукту база көрүңер.)

¹² Хуралдың эргим удуртукчулары: бодуңарны хайыралавас ажыл-херээңерни Иегова аажок үнелээр. Кадарчы, башкы, суртаалчы ажылыңардан аңгыда, тудугларга киржип, айыыл-халап болган черлерде дуза кадып турар болгай силер. Чамдыыңар аарыг улуска баар бөлүктерде азы эмчилер-биле харылзажыр комитеттерде бараалгап турар. Чыыш кижилерге эвес, а Иеговага хамааржыр деп удуртукчулар билир. Ынчангаш Бурган шаңнаар деп чигзинмейн, олар бүгү сеткилинден хүлээлгелерин күүседип чоруурлар (Кол. 3:23, 24).

13. Бараалгалга күжүңерни Иегова үнелээр бе? Тайылбырлаптыңар.

¹³ Шупту улус удуртукчу болуп шыдавас, ынчалза-даа кижи бүрүзүнде Иеговага бараалгаар аргалар хөй. Шыдаар-ла чүүлдү  кылыр болзувусса, ол бисти дыка үнелээр. Чагырганың ажыл-херээн деткиир дээн эвээш-даа өргүлүвүстү Бурган эскерип турар. Ыядып-даа тургаш, чыышка хол көдүрүп, харыылаарывысты көргеш, ол аянзынар. Хомудаарынче далашпайн, өршээривисти көргеш, Иегова дыка өөрүүр. Хөйнү кылыксаан күзелиңер болдунмас-даа болза, ол силерни үнелээр деп утпаңар. Ол силерге ынак база албан шаңнаар (Лк. 21:1—4).

ДИРИГ БУРГАНДАН ЫРАВАҢАР

14. Иегова-биле чоок хамаарылга аңаа шынчы артарынга канчаар дузалап турар? (Чурукту база көрүңер.)

¹⁴ Иегова бар деп бүзүрелдиг болзувусса, аңаа шынчы артары белен. Ону Иосифтиң таварылгазындан көрүп болур. Мөзү-шынар талазы-биле шын эвес алдынарындан ол шуут ойталаан. Чүге дизе Иосиф Иегованың сеткилин бодап, ону муңгарадырын күзевээн (Э. д. 39:9). Иегова шын бар деп билиринге, мөргүлче база ооң Сөзүн өөрениринче үени үндүрери чугула. Иосифке ышкаш, Иегова-биле хамаарылга биске үнелиг болза, ол найыралды чидириптеринден оваарныр бис (Иак. 4:8).

15. Кургаг ховуга израильчилерниң төөгүзүнде биске кандыг өөредиг бар? (Еврейлерге 3:12).

¹⁵ Иегованы — дириг Бурган деп уттуптар улуска оон ыраары белен. Ховуга израильчилер-биле чүү болганын сактып кээлиңер. Иегова бар деп билир-даа болза, Бурган олар дээш сагыш човап шыдаарынга чигзинип эгелээш, чон безин: «[Иегова] бистиң аравыста бар бе азы чок бе?» — деп айтырып турган (Хост. 17:2, 7). Түңнелинде олар Бурганга удурланганнар. Ол төөгү бисти чазыглардан чайладыр. Бис израильчилерниң үймээнчи хөөнүн өттүнерин канчап-даа күзевес бис! (Номчуптуңар: Еврейлерге 3:12.)

16. Бүзүреливистиң быжыын чүү шылгап болур?

¹⁶ Бисти Иеговадан ырадыр дээш, бо делегей чүнү-даа кылып турар. Хөй улус  Бурган бар деп бодалдан ойталааш, ону тоовас. Оларны көөрге, аас-кежиктиг ышкаш. Ол бүгү чүүл, бүзүреливистиң быжыын шылгап болур. Бурган бар деп бүзүреп тургаш-даа, берге үелерде ол бисти тоовас деп бодай бээр бис. 72-ги Ырының автору-биле ындыг төөгү болган. Бурганның дүрүмнерин көңгүс бодавайн, таалап чурттаарынга долгандыр кижилерге чүү-даа шаптыктавазын ыраажы көрген. Түңнелинде, Иеговага улаштыр бараалгаан херээ бар бе деп ол чигзинип эгелээн (Ыд. ыр. 72:11—13).

17. Иеговадан ыравазынга чүү дузалаар?

¹⁷ Ыр күүседикчизинге бодалын өскертиринге чүү дузалаан? Иеговадан ырай берген улус-биле чүү болурун ол боданып келген (Ыд. ыр. 72:18, 19, 27). А шынчы улуста бар эки чүүлдерни база ол бодаан (Ыд. ыр. 72:24). Бис база Иегованың берген йөрээлдерин болгаш ол чокка чуртталгавыс кандыг болур турганын боданыр болзувусса эки. Ынчаар боданыры Бурганны кажан-даа кагбайн, шынчы артарынга дузалаар. Ынчангаш ыр күүседикчизи ышкаш: «Меңээ — Бурганче чоокшулаары ачылыг» дээр бис (Ыд. ыр. 72:28).

18. Бисте келир үеден коргар чылдагаан чүге чок?

¹⁸ Бо сөөлгү хүннерде кандыг бергелерге таваржырывыс билдинмес-даа болза, «алыс шын дириг Бурганга» бараалгап чоруур болгаш, ону ажып эртип шыдаар бис (1 Фес. 1:9). Бурганывыс бараалгакчыларынга ынак, кезээде дузалаар. Эрткен болгаш амгы-даа үеде ол өскерилбээн. Удавас делегейде болуп көрбээн эң улуг коргунчуг хилинчек эгелээр. Ынчан Иегова бис-биле кады болур (Иса. 41:10). Ынчангаш бүзүрелдии-биле: «Иегова — мээң дузалакчым, кортпас мен» деп чугаалаар бис (Евр. 13:5, 6, Чаа делегей).