1. Ырлар 17:47-де Давид Иегованы чүге деңнээн?

 ДЕЛЕГЕЙДЕ байдал доктаамал эвес. Манаваанывыс болуушкуннар чуртталгавыстың аай-чурумунга дыка улуг өскерлиишкиннерни киирип болур. Өөрүнчүг чүүл, чааскаанзыргай эвес бис — Бурганывыс кезээде бистиң чанывыста. Эрткен статьяга Иегованы дуза кадарынга белен дириг Бурган деп көрген бис. (Номчуптуңар: Ырлар 17:47.) Солун чүүл, Давид Иегованы дириг Бурган дээн соонда, дириг эвес чүүлге — хаяга дөмейлээн. Чүге?

2. Бо статьяга чүнү сайгарар бис?

² Бо статьяга Иегованы чүге хаяга дөмейлээнин база ол деңнелге Бурганның дугайында чүнү ажыдып турарын сайгарган. Оон аңгыда, Бурган биске канчаар хая апарып болурун билип алыр бис. Түңнелинде Иегованың үлегерин канчаар эдерип болурун көөр бис.

ИЕГОВАНЫ ЧҮГЕ ХАЯГА ДӨМЕЙЛЭЭН?

3. Кайы шүлүктерде Иегованы хаяга дөмейлээн база чүге? (Чурукту көрүңер.)

³ Иегованың бараалгакчылары ону алгап-мактаарда бо-ла хаяга дөмейлээр турган. Библияда ол овур-хевирни чүге ажыглаан? Ол чижек Иегованың чамдык кайгамчыктыг шынарларынче кичээнгей салырынга дузалыг. Бурганны эге баштай Хоойлуну катаптааны 32:4-те «Хаяга» деңнээн. Аннаның мөргүлүнде мындыг сөстер бар: «Бурганывыс дег өске Хая чок» (1 Хаан. 2:2). Аввакум медээчи Иегованы: «Мээң Хаям» — дээн (Авв. 1:12). 72-ги Ырының автору Бурганны: «Чүрээмниң быжыгланыр күжү» деп ырлаан (Ыд. ыр. 72:26). Иегова бодун «Хая» деп база адаан (Иса.  44:8). Бурганның шынарларының үш талазын сайгарып көрээлиңер. Ооң чүге хаяга дөмейин база канчаар ол «бистиң Хаявыс» апарып болурун билип алыылыңар (Ы. х. к. 32:31).

4. Иегованы чүге чаглакка деңнеп болур? (Ырлар 93:22).

⁴ Иегова — бистиң чаглаавыс. Улуг шуурган үезинде хая камгалал болур. Шак ол ышкаш айыыл диргелип кээрге, Иегова бисти камгалап турар. (Номчуптуңар: Ырлар 93:22.) Кым-даа, чүү-даа биске эттинмес хора чедирип шыдавас деп бүзүредип, ооң-биле найыралды кадагалаарынга Бурган дузалап турар. А келир үеде Иегова биске оон-даа хөйнү кылыр — тайбың байдалывысты үреп, хилинчек-човалаң эккеп турар чүүлдү шуптузун соксадыптар (Иез. 34:25, 26).

5. Иегова биске канчаар чаглак апарып болур?

⁵ Мөргүл таварыштыр Иегованы канчаар чаглаавыс кылып ап болур бис? Мөргүүрүвүске Иегова чүрээвисти, угаанывысты камгалаар тайбыңны бээр (Флп. 4:6, 7). Артёмнуң чижээн көрээлиңер. Ону Бурганга бүзүрели дээш шагдаалар тудуп апарган. Байысаар бетинде-ле, истекчи ону куду көрүп, сыындырар боорга, ол девидеп-дүвүрээр турган. Артём ынчан чүнү кылганын чугаалаан: «Мен Иеговага мөргүп, чүрээмге тайбыңны болгаш мерген угаанны дилээр турган мен». Истекчиниң кажар аргазы түңнел чок болганын көргеш, Артём аажок өөрээн. Ол мынча дээн: «Иегова-биле даш хана артында дег болган мен».

6. Иеговага чүге кажан-даа идегеп болур бис? (Исайя 26:3, 4).

⁶ Иегова — бүзүрелдиг. Хая туружунга кезээде артары дег, Иегова бистиң чанывыска кезээде турар, кажан-даа бистиң чуртталгавыстан читпес. Ол «мөңге Хая» болганда, аңаа идегеп болур бис. (Номчуптуңар: Исайя 26:3, 4.) Иегова кезээ мөңгеде турар. А ынчаарга, ол мөргүлдеривисти үргүлчү дыңнаар, биске дузалажыр, шупту аазаашкыннарын күүседип шыдаар. Иеговага бүзүрээр база бир чылдагаан дээрге — ол бараалгакчыларынга бердинген (2 Хаан. 22:26). Ол кажан-даа буянныг ажыл-херээвисти утпас, шаңнал чок арттырбас (Евр. 6:10; 11:6).

7. Иеговага идегээр болзувусса, түңнели кандыг? (Чурукту база көрүңер.)

⁷ Иеговага долузу-биле идегээр болзувусса, ол бистиң хаявыс болур. Ооң шупту сүмелери ажыктыг деп бүзүрээр болгаш, берге үелерде безин аңаа дыңнангыр боор бис (Иса. 48:17, 18). Ооң деткимчезин көргеш, оон-даа артык аңаа идегеп эгелээр бис. Ынчан чүгле Иегова-биле эртер шенелделерге белеткенип ап болур бис. Кайыын-даа дуза келбес байдалда Иегованың кайы хире бүзүрелдиин көрүп, чүгле аңаа идегеп болурун билип каар бис. Кара-бажыңга олурган үезин Владимир мынчаар сактып чугаалаан: «Ол үеде  Иегова-биле хамаарылгам эң-не эки турганын бүзүрелдиг чугаалап болур мен. Байдалга чааскаан арткаш, ону өскертир харыың чокта, Иеговага оон-даа артык идегеп өөренип алыр сен».

8. а) Иегова оон ыңай хаяга кандыг уткалыг дөмей? б) Бурган бистиң хаявыс боорга, чүге өөрүнчүг? (Ырлар 61:7, 8).

⁸ Иегова чайгылыш чок. Дыка улуг даш хаяны сагыштаалап көрүңерем. Агаар-бойдустуң, үениң салдарындан хая өскерилбес. Ол ышкаш Иегованың аажы-чаңы, күзел-соруу турум база хенертен өскерилбес (Мал. 3:6). Адам биле Еваның Эдем садынга тура халыышкыны Иегованың кижи төрелгетенге хамаарыштыр күзел-бодалынга канчап-даа салдар чедирбээн. Павел элчин Иегованы «Бодунга Боду өскерлир эвес» деп бижээн (2 Тим. 2:13). Ооң утказы мындыг: чүү-даа болуп турда, өске улус канчаар-даа алдынарда, Иегова бодунга бүзүрелдиг, күзел-соруунга болгаш негелделеринге карышкак чүүл кылбас. Шак бо дүшкүүрлүг, чайгылчак үелерде Иеговага долузу-биле идегеп болур бис. Ол камгалалывыс болгаш чөлеңгииживис. (Номчуптуңар: Ырлар 61:7, 8.)

9. Татьянаның төөгүзү чүзү-биле өөредиглиг?

⁹ Иегованың күзел-бодалынче, шынарларынче угаанывысты угландырар болзувусса, ол бистиң хаявыс болур. Бо берге үелерде сеткил-сагыжывыска турум болурунга ол дузалаар (Ыд. ыр. 15:8). Бурганга бүзүрели дээш, бажыңындан үнмес кеземче алган Татьяна аңаа шынзыккан. «Мен ёзулуг чааскаан арткан мен. Баштай бергедеп, бо-ла муңгарап турган мен» — деп, ол чугаалаан. Оожургалды катап минниринге аңаа чүү дузалаан? Угбавыс Иеговаже, ооң күзел-соруунче кичээнгей салган. Татьяна улаштыр мынча дээн: «Мээң-биле ындыг чүүл чүге болганын билип кааш, Иегова дээш хилинчектенип турарымны көрүп каан мен. Чүгле бодумну бодавазынга, ол чүүл дузалаан».

10. Иегова бистиң хаявыс болурунга амгы үеде чүнү кылыры чугула?

¹⁰ Бисти аар-берге үелер манап турар. Ынчан кажангызындан артык Бурганга идегээри чугула. Кандыг-даа байдалда шынчы артарынга Иегова биске дузалаар деп бүзүреливисти быжыглаар үе бо. Чүнү кылыры чугула? Бурган бодунуң бараалгакчыларынга библейжи-даа, амгы-даа үеде канчаар дузалап турганын номчуңар. Бурган оларга канчаар чаглак, чөленгииш болганын боданыңар. Ынчан Иегова силерниң база хаяңар апаар.

ИЕГОВА ЫШКАШ БОЛУҢАР

11. Иегованың кандыг талазын үлегер кылдыр алыры чугула? ( «Аныяк акыларга сорулга» деп көзенекти база көрүңер.)

¹¹ Иегованы чүге хаяга дөмейлээнин билип алдывыс. Ам ооң үлегерин канчаар  эдерип болурун чугаалажыр бис. Ол тала-биле чедиишкинниг болган тудум, акы-угбаларны оон-даа эки деткиир бис. Чижээ, Иисус Симонга «хая дажы» деп уткалыг Кифа деп ат тывыскан (грек дылда Пётр) (Ин. 1:42). Пётр акы-угбаларын оожургадып, бүзүрелин быжыктырарынга дузалаарын ол ат айыткан. Хуралды камгалап турар боорга, удуртукчуларны Бижилгеде «улуг хая хөлегези» деп адаан (Иса. 32:2). Чүгле удуртукчулар эвес, а бис шупту Иегованы өттүнүп, бот-боттарывыска хая болурувус чугула (Эф. 5:1).

12. Акы-угбаларга канчаар чаглак болур бис?

¹² Чаглак болуңар. Чамдыкта акы-угбалар бойдус халавы, ниитилелге үймээн азы дайыннар хайындан бажыңнарын каар ужурга таваржыр. Ынчан оларны хүлээп алырывыска бажыңывыс оларга чаглак апаар. Бо «сөөлгү хүннерде» делегейде байдал баксырап бар-ла чыдар (2 Тим. 3:1). Ынчангаш бот-боттарывыска дуза бо-ла херек апаар. Оон аңгыда, акы-угбаларның сагыш-сеткил хереглелдерин хандырып, Бурган-биле найыралын деткип болур бис. Чижээ, Хурал залынга өг-бүледе ышкаш чылыг-чымчак байдалды тудуп, кижи бүрүзү ону манап турар деп миннир кылдыр кызар бис. Кижилер үргүлчү стресстен муңчулуп чоруур каржы-хажагай делегейде чурттап турар бис. Ынчангаш чыыштарывыс акы-угбаларывыска күш кирип алыр оожум ортулукчугаш болурун күзээр бис.

13. Хуралдың удуртукчулары акы-угбаларга канчаар чаглак болур? (Чурукту база көрүңер.)

¹³ Хуралдың удуртукчулары акы-угбаларга дорт азы доора-даа уткалыг шуурган үезинде чаглак. Кажан бойдус халавы болу бээрге азы бир-ле кижиге дүрген эмчи дузазы херек апарганда, удуртукчулар ол дораан хөделип кириптер. Акы-угбаларны  Библияның дузазы-биле сорук киирип, оожургадыр. Удуртукчу акый ха-дуңмазын кээргеп дыңнаар, билип алырын кызар база чылыг-чымчак чугаалажыры көскү болза, оон дуза дилээри белен болур. Удуртукчулар биске ынак деп билир болзувусса, олардан библейжи сүме хүлээп алыры чиик (1 Фес. 2:6—8, 11).

14. Бүзүрелдиг кижи деп атты канчаар чедип алырыл?

¹⁴ Бүзүрелдиг болуңар. Берге үелерде-даа акы-угбаларга чөленгииш болурун күзээр бис (У. ч. 17:17). Бүзүрелдиг кижиниң адын канчаар чедип алырыл? Христиан шынарларны ында-хаая эвес, а үргүлчү илередири чугула. Чижээ, аазаашкыннарывысты күүседир база дугурушкаш озалдавас бис (Мф. 5:37). Бир кижиге дуза херек апаарга, киржилге чок артпас болза эки. А кандыг-бир даалга алгаш, айтыышкыннарга, удуртулгага дүүштүр кылыр бис.

15. Бүзүрелдиг удуртукчуларын чыыш чүү дээш үнелээр?

¹⁵ Хуралдың бүзүрелдиг удуртукчулары — ёзулуг белектер-дир. Чүге ынча деп болур? Акы-угбаларга сагыш човангыр удуртукчудан (чижээ, бараалгал бөлүү дээш харыылаар акыйдан) дуза дилээри белен болур. Удуртукчузунуң дузааргаан көргеш, акызы оларга ынак деп акы-угбалар миннир. Сүмезин удуртукчулар бодунуң үзел-бодалынга эвес, а Библияга болгаш шынчы чалчаның ном-дептеринге үндезилээр болза, оларга бүзүрээри чиик. Удуртукчуларны аксының быжыы болгаш сөзүн ээлеп чорууру дээш үнелээр бис.

16. Иеговага шынчы артарывыска бодувуска-даа, өске улуска-даа кандыг ажыктыг?

¹⁶ Иеговага шынчы болуңар. Бүгү талазы-биле Иеговага шынчы болуп, шиитпир хүлээрде ооң Сөзүнге даяныр болзувусса,  эки чижек көргүзер бис. Библияны өөренип, Иеговага бүзүреливисти быжыктырбышаан, аңаа база ооң негелделеринге шынчы артып шыдаар бис. Меге өөредиглерге, бо делегейниң үзел-бодалдарынга алыспайн, шиитпир чок, чайгылчак болбас бис (Эф. 4:14; Иак. 1:6—8). Иеговага база ооң аазаашкыннарынга бүзүрээр болзувусса, багай медээлерден кортпас болгаш чайгылыш чок болур бис (Ыд. ыр. 111:7, 8). Оон аңгыда, амыдыралдың ажыг-шүжүүнге, түрегделдерге таварышкан улуска деткимче болур бис (1 Фес. 3:2, 3).

17. Удуртукчулар чыышты канчаар быжыктырып турар?

¹⁷ Удуртукчулар бүгүдеге өй-тавын билир, мерген угаанныг, чурум-аайлыг, бодамчалыг болурун Иегова манап турар. Олар «алыс шынныг өөредигден» быжыг туттунары-биле чыышка тайбың байдалды тургузуп, акы-угбаларны быжыктырып турар (Тит. 1:9; 1 Тим. 3:1—3). Ол сагыш човангыр кадарчылар чыыштарже баары, суртаалга киржири, хууда шинчилел кылыры кайы хире чугулазын акы-угбаларга сагындырып турар. Ол бүгүдеге олар боттары эки үлегер. А кажан кады бүзүрээн ха-дуңма аңгы-аңгы бергелерге таваржырга, удуртукчулар оларга эң-не кол чүүл — Иеговадан, ооң аазаашкыннарындан чандыр баспазынга дузалаар.

18. Иегованы алдаржыдып, ооң-биле найыралды быжыглаарынче бисти чүү оттуруп турар? ( «Иегова-биле найыралыңарны быжыглаңар» деп көзенекти база көрүңер.)

¹⁸ Бурганывыстың өске талаларын оон-даа эки билип алырынга бо статья дузалаан. Бурганывысты оон-даа артык магадап, Давид хаанның: «[Иеговага] алдар! Ол — чалым-хаям» дээн сөстеринге бүгү сеткиливистен каттыжар бис (Ыд. ыр. 143:1). Иегова эрткен-даа, амгы-даа, келир-даа үеде бүзүрелдиг Бурган. Ол кезээде чанывыска чоруур, ынчангаш бүгү назынывыста ооң-биле найыралдыг болуксаар бис. Кайы хире-даа назылыг болзувусса: «[Иегова] мээң чалым-хаям» деп болур бис (Ыд. ыр. 91:15, 16).