Иегованы өөртүр дизе, бүзүрел херек. Ынчалза-даа Библияда: «Чамдык улус... бүзүревес» деп бижээн (2 Фес. 3:2). Павел элчин ону бодун истеп сүрүп турган айыылдыг, «бузуттуг-бак улуска» хамаарыштыр чугаалаан. Амгы үеде бүгү чүүлдү Бурган чаяаган деп бүзүревес улусту ол сөстер-биле тайылбырлап болур (Рим. 1:20). Өскелери дээди күш бар деп бүзүрээр-даа болза, ындыг бүзүрел Иеговага өөрүнчүг эвес.

Иегова бар база быжыг бүзүрелдиг улусту шаңнаар деп чигзинмес ужурлуг бис (Евр. 11:6). Бүзүрел — ыдыктыг сүлдениң үре-түңнелиниң кезии. А сүлдени Иеговадан дилээр бис (Лк. 11:9, 10, 13). Бурганның сүлдезин алыр дээш, ооң хей-аът киирген Сөзүн номчуур болза эки. Оон номчаан чүүлүвүстү боданып, билип алган билиглеривисти кызып ажыглаары чугула. Ынчан Иегованың сүлдези чуртталгавыска салдарны чедирер, Бурганга таарымчалыг бүзүрелди сайзырадырынга дузалаар.