Номчукчуларның айтырыглары
Чамдык улус чүге Ырлар 11:8-ти 7-ги шүлүкте «[Иегованың] сөстеринге», а «Чаа делегей очулгазында» 6-гы шүлүкте «түреңги... улуска» хамаарыштырар?
Ниити утказында ол шүлүк кижилерге хамааржыр.
Ырлар 11:2—5-ти номчуурга, бүзүрелге төлептиг улус артпаан. Улаштыр 6, 7, 8 дугаар шүлүктерде мынча дээн:
«[Иегова]: “Мен ам түреңги улуска —
човалаңы дээш,
базындырган улуска —
уё-човууру дээш болчур мен,
Мээң камгалалым алыксаан кижиниң
идегелин боттандырып бээр мен” —
деп турар.
[Иегованың]... сөстери — арыг сөстер-дир;
олар — чеди катап арыглаан,
хайылдырар суугуга
довурактан аңгылай эзилдирген мөңгүн дег-дир.
[Иегова]... Бодуңнуң улузуңну кадагалаар сен,
оларны шак ындыг авыяас улустан
кезээ мөңгеде камгалаар сен».
6 дугаар шүлүкте Бурган «түреңги улусту» камгалаарын чугаалаан.
7 дугаар шүлүкте Иегованың сөстерин эзилдирип арыглаан мөңгүн ышкаш арыг деп немээн. Шупту христианнар аңаа долузу-биле чөпшээрежир (Ыд. ыр. 17:31; 118:140).
А 8 дугаар шүлүкте: «[Иегова], Бодуңнуң улузуңну кадагалаар сен, оларны шак ындыг авыяас улустан кезээ мөңгеде камгалаар сен» дээн. Хөй очулгаларда улузуңну деп сөстү «оларны» деп дамчыткан. Ынчангаш олар дээрге кымнар деп айтырыг бар.
Мурнунда шүлүкте Иегованың сөстериниң дугайында чугаалаан болганда, Бурган сөстерин камгалаан деп бодал кирер. Иегова херек кырында Библияны камгалап турганын билир бис. Удурланыкчылар ол номну хоруп, узуткааш-даа чадап каан (Иса. 40:8; 1 Пет. 1:25).
Ынчалза-даа Иегова 6 дугаар шүлүкте түреңги, базындырган улусту камгалап турары база шын (Иов 36:15; Ыд. ыр. 6:5; 30:2, 3; 53:9; 144:20).
8-ки шүлүкте «оларны» деп сөс кымга азы чүү чүвеге хамааржырын канчаар билип алыр?
Ол Ырыны долузу-биле кичээнгейлиг көөр болза, «оларны» деп сөс кижилерге хамааржыры илдең.
Эгезинде Давид шынчы улус кайда-даа нептерээн нүгүл-мегеден хилинчектенип турарын чугаалаан. Улаштыр Иегова аксы-сөзү-биле өске улуска хора чедирер улусту кезедирин аазап турар. Бо ырыны долузу-биле алырга, Иегова бараалгакчыларының ажыы дээш хөделир. Ооң сөстери арыг дээрзин билир болгаш, аңаа бүзүрээр бис.
Ынчангаш 8-ки шүлүкте базындырган улусту бачыттыг улустуң аксындан база ажыл-херээнден камгалаарын Бурган аазаан.
Еврей масорет сөзүглелде ол шүлүкте «оларны» деп ат орну бар. Грек Септуагинтада «сен бисти камгалаар сен», «сен бисти кезээде камгалаар сен» деп сөстер ажыглаанындан алырга, базындырган бараалгакчылар деп уткалыг. Оон аңгыда, 8-ки шүлүкте Иегова «оларны» «эң бак чүүл үнел[ээр]» «авыяас улустан» камгалаарын чугаалаан (Ыд. ыр. 11:8, 9). Арамей таргумнарда ол шүлүк мындыг: «О, Дээргим, чөптүг-шынныг улусту кадагалаар сен. Оларны каржы салгалдан кезээде камгалаар сен. Кайда-даа бачыттыглар көвүдээн. Олар пиявкалар дег кижилерниң ханын соруп чоруур». Оон алырга, Ырлар 11:8-те Бурганның сөстерин эвес, а кижилерни чугаалаан.
Ол шүлүк биске Иегова шынчы улуска кажанда-даа болчур деп идегелди берип турар.
