1, 2. Иегованың бараалгакчылары кандыг бергелерге таваржып чоруур?

ПАВЕЛ элчин Тимофейни бараан болуушкунун эчизинге чедир күүседиринче оттурган (2 Тим. 4:5). Ооң сөстери биске база хамааржыр болганда, ону күүседир дээш, бүгү күжениишкиннерни үндүрүп турар бис. Ынчалза-даа ол ындыг-ла амыр эвес. Чамдык акы-угбаларга эрес-дидим чорук дыка херек, чүге дизе олар ажыл-чорудулгавысты кызыгаарлаан азы хоругдап каан чурттарда чурттап чоруур (2 Тим. 4:2). Олар суртаал дээш хосталгазын безин чидирип ап болур!

² Иегованың бараалгакчылары янзы-бүрү бергелерге таваржып чоруур. Ынчангаш олар муңгаралга алзып болур. Чижээ, акы-угбалар өг-бүлезин хандырар дээш, хөй ажылдап турар. Олар хөй бараалгаксаар, ынчалза-даа неделя төнчүзүнде могап-шылап калган боор. Чамдык улус хоочураан аарыглыг азы назы-хары улгады берген болгаш, дыка эвээш бараалгап турар. Чамдыктары бажыңындан безин үнүп шыдавас. Бурганның бараалгакчыларының аразында боттарын чөгенчиг кылдыр миннир улус база бар. Чөөн чүкте чурттап турар Мария * дээр угбавыс мынча дээн: «Үргүлчү шын эвес бодалдар-биле туржур дээш, могап-шылап, сагыш-сеткилим хоозурай бээр-дир. Бурганга бараалгаар үем-даа, күжүм-даа чок каарга, бодумну буруудадып эгелээр-дир мен».

3. Бо статьяга чүнү сайгарар бис?

³ Иегова биске кандыг-даа бергелерни ажып эртер база бодувустуң байдалывыста улаштыр бараалгаар күштү берип шыдаар. Ооң биске канчаар дузалап турарын көөрүнүң бетинде, Ол Павел биле Тимофейге, бергелерге торулбайн, чедиишкинниг бараалгаарынга канчаар дузалаанын көрүптээлиңер.

4. Павел кандыг шенелделерге таваржып чораан?

⁴ Павел аңгы-аңгы шенелделерге таваржып чораан. Ону эттеп-соп, кара-бажыңнап, безин өлүрер деп турган. Шак ындыг үелерде аңаа күш ылаңгыя херек турган (2 Кор. 11:23—25). Оон ол бодунуң шын эвес бодалдары-биле туржуп турарын чажырбайн, ажыы-биле чугаалап турган (Рим. 7:18, 19, 24). Ол ышкаш Павел бир-ле аарыгдан хинчектенип чораан. Ынчангаш Иегова ооң аарыын, азы «тенни ап каапсын дээш», Павел чаннып дилеп турган (2 Кор. 12:7, 8).

5. Шенелделер турза-даа, Павел чүнү кылып шыдаан?

⁵ Бергелер турза-даа, улаштыр бараалгаар күштү Павелге Иегова берип турган. Ол Римге хоругдалга тургаш, эң алдар-хүндүлүг болгаш эрге-дужаалы бедик даргаларга суртаалдап турган (Аж.-ч. 28:17; Флп. 4:21, 22). Павел оон ыңай аңаа ужуражып кээп турган кижи бүрүзүнге база императорнуң ордузунуң бүгү таңныыл шериглеринге суртаалдап турган (Аж.-ч. 28:30, 31; Флп. 1:13). Амгы үениң христианнарынга ажыктыг чагааларны ол ынчан бижээн. Римде акы-угбалар Павелдиң чижээн көргеш, «Бурганның медээзин оон-даа ажык болгаш дидим суртаалдап эгелээннер» (Флп. 1:14). Чамдыкта Павелдиң суртаалдаар арга-шинээ кызыгаарлыг турган-даа болза, ол шыдаар-ла чүүлүн кылып чораан. Ынчангаш ооң байдалы «Буянныг Медээниң нептерээринге дузалаан» (Флп. 1:12).

6. Бурганның ажыл-херээн күүседиринге Павелге чүү дузалап турган? (2 Коринфичилерге 12:9, 10).

⁶ Бурганга бараалгалды Павел бодунуң күжү-биле эвес, а Иегованың күжү-биле күүседип турган деп чүүлдү ол эки билип турган. Бурганның күжү кижиниң кошкаа дамчыштыр илерээр деп, ол хүлээп көрүп турган. (Номчуптуңар: 2 Коринфичилерге 12:9, 10.) Истеп сүрүүшкүннер, кара-бажыңда хоругдал база оон-даа өске шенелделер турда безин, Павел Бурганның ажыл-херээн күүседир кылдыр, Иегова аңаа сүлдезин берип турган.

7. Бараалгап тургаш, Тимофей кандыг бергелерни ажып эрткенил?

⁷ Павелдиң шынчы эжи Тимофей база Бурганга ынаныр ужурлуг турган. Павел миссионер аян-чорук кылып турда, Тимофей ооң-биле кады чораан. Оон ыңай Павел  чыыштарны кезиир база деткиир даалганы аңаа берип турган (1 Кор. 4:17). Тимофей ону кылып шыдавас мен деп бодап турган хөңнү, ынчалзажок Павел аңаа: «Аныяк бооруңга, кым-даа сени херекке албайн барбазын» — деп бижээн (1 Тим. 4:12). Оон аңгыда, Тимофей болганчок аарыыр турган (1 Тим. 5:23). Ынчалза-даа Иегова ыдыктыг сүлдезин аңаа берип, буянныг медээни суртаалдаарынга болгаш акы-угбаларга дузалаарынга херек күштү бээр деп, Тимофей ыяк бүзүреп турган (2 Тим. 1:7).

8. Иегова Бодунуң бараалгакчыларын канчаар быжыктырып турар?

⁸ Иегова Бодунуң бараалгакчыларынга Аңаа улаштыр шынчы бараалгаар кылдыр, дээди күжүн берип турар (2 Кор. 4:7). Иегова бисти шынчы артсын дээш, мөргүл таварыштыр, Библия, акы-угбалар болгаш суртаал таварыштыр канчаар быжыктырып турарын ам сайгарыптаалыңар.

9. Мөргүл биске канчаар дузалап турар?

⁹ Мөргүл. Павел Эфесчилерге 6:18-те бисти кандыг-даа берге үеде Бургандан дуза дилеп, мөргүңер деп деткээн. Ынчаар кылыр болзувусса, Иегова биске херек күштү бээр. Боливияда Джонни дээр акывыс хөй бергелерге таварышкаш, мөргүүрүнүң кайы хире чугулазын бодунуң кежинге көрген. Ооң кадайы биле ада-иези хары угда аар аарый берген. Джонниге оларның шуптузун ажаап-карактаары берге турган. Муңгаранчыг чүүл, ооң авазы чок апарган. А ачазы биле кадайы үр үе ишти сегип келген. «Мырыңай берге апаарга, дилег-човаамны Иеговага ажыдып берип, мөргүүрүмге, сеткилим чиик апаар турган» — деп, Джонни ол үени сактып чугаалаан. Иегова Джонниге ол аар-бергени ажып эртип алырынга күштү берген. Боливиядан Роналд дээр удуртукчу акывыс авазының рак аарындан аарый бергенин билип каан. Бир ай эрткенде, ооң авазы шыдашпайн барган. Ажыг-шүжүгнү ажып эртеринге аңаа чүү дузалаан? Ол мынча дээн: «Мен Иеговага мөргүп, сагыш-сеткилим-биле чажыт чокка үлежип турган мен. Иегова мени бодумдан артык эки билир». Чамдыкта аар-берге шенелделерге таварышкаш, чүнүң дугайында мөргүүрүн билбейн баар бис. Ынчалза-даа ишти-хөңнүвүстү үндүр чугаалаары берге-даа болза, Иегова Аңаа мөргүүрүвүстү күзеп турар (Рим. 8:26, 27).

10. Еврейлерге 4:12-ден алырга, Библияны номчууру болгаш ооң дугайында боданыры чүге чугула?

¹⁰ Библия. Бис база Павел дег, Ыдыктыг Бижилгеден аргалалды болгаш күштү ап болур бис (Рим. 15:4). Бурганның Сөзүн номчуп, ооң дугайында ханы боданыр болзувусса, Иегова ыдыктыг сүлдезин биске берип, ол үзүндүнү боттарывыстың байдалывыска канчаар ажыглаарын айтып бээр. (Номчуптуңар: Еврейлерге 4:12.) «Кежээниң-не Библияны номчуур чаңчылды сайзырадып алганымга өөрүүр-дүр мен. Мен Иегованың шынарларының дугайында база Ооң бараалгакчыларынга кайы хире ынаан бодап кээримге, улаштыр чурттаар күжүм тыпты бээр» — деп, Роналд чугаалаан.

11. Ашаан чидирген угбавыска Бурганның Сөзү канчаар дузалаан?

¹¹ Бурганның Сөзүнүң дугайында боданыр болзувусса, таваржып турар бергелеривиске шын хамаарылгалыг болур бис. Чоокта чаа ашаан чидирген бир угбавыска Библия канчаар дузалаанын көрүптээлиңер. Бир удуртукчу акывыс угбавыска ажыг-шүжүгнү ажып эртеринге дузалаар дээш, Иов номун номчуурун сүмелээн.  Угбавыс эгезинде Иовту шүгүмчүлеп: «Чүге чүгле багай чүүлдерни эскерер сен, Иов?» деп бодаар турган. Ынчалза-даа эскерерге, ол боду Иовка дөмей болган. Ооң чуртталгазында эки чүүлдер база бар деп, ол билип каан. Ынчангаш угбавыс Иегованың дугайында база келир үеде идегелиниң дугайында хөй боданып эгелээн. Ооң ачызында ажыг-шүжүгнү ол ажып эрте берген.

12. Акы-угбалар таварыштыр Иегова бисти канчаар быжыктырып турар?

¹² Акы-угбалар. Оон ыңай Иегова бисти акы-угбаларывыс таварыштыр быжыктырып турар. Павел кады бүзүрээн ха-дуңмазынга мынча деп бижээн: «Ниити бүзүреливис-биле... удур-дедир деткижеривис дээш, силерге ужуражыксадым» (Рим. 1:11, 12). Кырында чугаалашканывыс Мария кады бүзүрээн акы-угбалары-биле аралажырынга ынак. «Иегова меңээ акы-угбалар таварыштыр дузалап турар. Олар мээң бергелеримни билбес-даа болза, деткимче хереглеп турган үелеримде чылыг-чымчак сөстери-биле азы открытка-биле меңээ ынакшылын каш-даа катап көргүскен. Оон аңгыда, мээң ышкаш бергелерге таварышкан акы-угбаларымдан арга-сүмени айтырар чордум. „Акы-угбалар сени дыка үнелээр“ деп, хуралдың удуртукчулары меңээ бо-ла чугаалаар» — деп, Мария үлешкен.

13. Ужуражылгалар үезинде бот-боттарывысты канчаар деткижип болур бис?

¹³ Ужуражылгалар үезинде бот-боттарывысты деткижип, сорук киирип болур бис. Чыыштың эгезинде азы соонда ха-дуңмаңарга кайы хире ынааңарны база оларны кайы хире үнелээриңерни чүге чугаалап болбас деп? Бир катап Питер дээр удуртукчузу акывыс Иеговага бүзүревес ашактыг угбавыска мынча дээн: «Сени болгаш ажы-төлүңнү чыышка көөрү кайы хире өөрүнчүг деп бодаар сен! Сээң алды ажы-төлүң арыг-силиг кылдыр кеттинген, чыыштарга дыка эки белеткенип алган боор». Өөрээнинден угбавыстың карааның чажы бүлдеңейни берген. Ол өөрүп четтирип, «Бөгүн меңээ бо сөстер дыка херек турган!» — деп чугаалаан.

14. Суртаал ажылы биске канчаар дузалап турар?

¹⁴ Суртаал ажылы. Улус бисти дыңнаар-дыңнавас-даа болза, суртаал ажылы биске күштү берип турар (У. ч. 11:25). Ол чүүлдү Стейси дээр угбавыс бодунга көрген. Кажан ооң төрелин чыыштан үндүрүптерге, ол муңгарап, бодундан мынча деп айтырып турган: «Аңаа дузалаар дээш, ылап кыскан мен бе ынчаш?» Стейси ооң дугайында боданып туруп берген. Ол байдалда аңаа чүү дузалаан? Суртаал! Суртаалдап тургаш, ол бодунуң дугайында эвес, а өске улустуң дугайында боданып эгелээн. Стейси мынча дээн: «Ол үеде Бурганны сонуургап турган херээжен кижи-биле Библия өөренип эгелээн мен. Шынап-ла, ол Иеговадан белек болган. Суртаал ажылы эвес болза, та канчаар турган мен!»

15. Марияның чижээнден чүнү өөренип ап болур бис?

¹⁵ Чамдык акы-угбалар байдалының аайы-биле хөй бараалгап шыдавайн турар болгаш, муңгарап турар. Силер база ынча деп боданып турар болзуңарза, Иегова силерниң күжениишкиниңерни үнелеп турар деп утпаңар. Марияның чижээнче эглип кээлиңер. Ол өске дылдыг девискээрже көжүп келгеш, суртаал ажылынга бодун ажык чок кылдыр бодап эгелээн. «Эге дээрезинде суртаал үезинде мен чүгле каш сөс чугаалап, Библиядан шүлүк номчуп азы буклет сунуп бээр турган мен» — деп, Мария үлешкен. Дылды эки билбес болгаш, Мария бодундан чөгенип эгелээн. Ынчалза-даа чоорту ол ынчаар бодавайн барган. Ол дылды  эки билбес-даа болза, Иегова ону ажыглап, биче сеткилдиг улуска дузалап шыдаар деп, Мария билип каан. «Бурганның Сөзүнде алыс шын дыка бөдүүн. Улус ону билип алгаш, чуртталгазын өскертип ап турар» — деп, ол немээн.

16. Бажыңындан үнүп шыдавас акы-угбаларны чүү сорук киирип болур?

¹⁶ Кадыывыстың кошкаандан бажыңывыстан үнүп шыдавас-даа болзувусса, Иегова бистиң Аңаа кайы хире бараалгаксап турарывысты көргеш, өөрүп турар. Чижээ, Иегова социал ажылчыннарга болгаш эмчилерге суртаалдаар аргаларны биске ажыдып берип болур. Эрткен үеде болгаш амгы үеде кайы хире суртаалдап турарывысты деңнээр болзувусса, ундаралче кире берип болур бис. Ынчалза-даа Иегованың дузазын эскерер болзувусса, кандыг-даа шенелделерни ажып эртер күштүг апарып, өөрүшкүвүстү чидирбес бис.

17. Экклесиаст 11:6-дан алырга, суртаал ажылынга киржип тургаш, холдарывыска амыр-дышты чүге бербес болзувусса эки?

¹⁷ Бистиң тарып чоруурувус алыс шынның үрезиннериниң кайызы дазылданып, өзүп эгелээрин билбес бис. (Номчуптуңар: Экклесиаст 11:6.) Ол чүүл 80 ажыг харлыг Барбара дээр угбавыстың чижээнден дыка эки көскү. Ол болза колдуунда телефон таварыштыр азы чагаалар бижип суртаалдап турар. Бир катап ол боду безин билбейн, чыыштан 27 чыл бурунгаар үндүрткен ашак-кадай улуска чагааны чоргузупкан. Угбавыс конверт иштинче «Что для вас сделал Бог» деп статьялыг, 2014 чылдың март 1-ниң «Таңныыл суургазын» суп каан. Ол өг-бүле алган журналын катап-катап номчуп-ла турган. Ашаа бодаарга, Иегова хууда аңаа статьяны бижээн ышкаш болган. Түңнелинде олар чыыштарже барып эгелээш, Иеговага катап бараалгап эгелээннер. Ооң чоргускан чагаазының кандыг дуза чедиргенин билип кааш, Барбара кайы хире өөрээн деп!

18. Иегова бисти быжыктырар кылдыр чүнү канчаар болзувусса эки?

¹⁸ Бо статьядан көргенивис дег, Иегова бисти мөргүл, Библия, акы-угбалар болгаш суртаал таварыштыр быжыктырып турар. Иегованың дузазын хүлээп турар болзувусса, Ол бисти быжыктырып шыдаар дээрзинге чигзинмейн турарывысты көргүзүп турар боор бис. «Аңаа чүрээнден бүрүнү-биле бердинген улусту» быжыглап турар дээрде Адавыска улаштыр ынанып чоруулуңар (2 Чыл. 16:9).