1, 2. Бир социолог кижи кандыг түңнел үндүрген база бо статьяга чүнү сайгарар бис?

АМГЫ үеде миллион-миллион улус Иисуска бүзүреп турар бис дээр, ынчалза-даа олар ооң өөредиглери ёзугаар чурттавайн турар (2 Тим. 4:3, 4). Аңаа хамаарыштыр бир социолог кижи мынча дээн: «Амгы үеде „чаа“ Иисус келгеш, бирги векте ышкаш Иисустуң өөредиин тарадып эгелээр болза, бис ону 2 000 чыл бурунгаар Иисусту дег, хүлээвес ийик бис».

² Бирги векте улус Иисустуң хуулгаазыннарын көрүп тургаш безин, аңаа бүзүревээн. Ооң дөрт чылдагаанын эрткен статьяга сайгардывыс. Бо статьяга база ооң өске дөрт чылдагаанын көөр бис. Ол ышкаш амгы үеде улус Иисустуң эдерикчилерин чүге дыңнавайн турарын база бүзүреливисти канчаар быжыктырарывысты билип алыр бис.

3. Чамдык улус Иисуска чүге бүзүревейн турган?

³ Черге чурттап чорааш, Иисус кандыг-даа улус-биле чугаалажып турган. Ол бай, ат-сураглыг улус-биле кады чемненип турган-даа болза, ядыы, ундараан улуска база хөй үени үндүрүп чораан. Ол кижилерниң бачыттыг деп санаар улузун база кээргээр турган. Ооң ужундан улуургак улус Иисуска бүзүревес чораан. Бир катап олар ооң өөреникчилеринден айтырган: «Силер чүге үндүрүг хавырыкчылары болгаш бачыттыг кижилер-биле кады ижип-чип турарыңар ол?» Иисус ону дыңнааш, мындыг харыы берген:  «Эмчи кадык эвес, а аарыг улуска херек болгай. „Актыг, бачыт чок бис“ дээр улусту эвес, а бачыттыг улусту бачыттарын миннип, Бурганче эглиринче кыйгырар дээш келген мен!» (Лк. 5:29—32).

4. Еврейлер Исайяның өттүр билген медеглелинден Мессияның дугайында чүнү билир ужурлуг турган?

⁴ Библияда чүү дээнил? Исайя медээчи Мессияны улус тогбас боор деп ооң черже кээриниң мурнунда-ла хөй чылдар бурунгаар баш удур бижээн: «Ону улус хүлээп албаан, бак көрген... Ындыг кижини улус өскелээр — бис ону бак көрүп, чүү деп-даа санавайн турган бис» (Иса. 53:3). Бирги векте еврейлер Мессияны улус хүлээвес боор деп билир турган. Ынчангаш улус Иисуска бүзүревеске, олар кайгавас ужурлуг турган.

5. Амгы үеде Иисустуң эдерикчилеринге хөй улус кандыг хамаарылгалыг?

⁵ Амгы үеде шак ындыг чүүл болуп турар бе? Ийе. Амгы үеде шажын башкарыкчылары хүрээзинче бай, ат-сураглыг, бедик эртем-билиглиг улусту хүлээп ап турар. Ынчалза-даа ол улустуң хөй кезии Бурганның негелделери ёзугаар чурттавайн турар. А Иеговага сеткилинден бараалгап чоруур, бедик мөзү-шынарлыг улуска ол шажын башкарыкчылары хөңнү чок. Чүге дээрге Иегованың бараалгакчыларын олар кижилер деп санавас. Павел элчинниң чугаалааны дег, Бурган бак көрдүрткен улусту шилип алган (1 Кор. 1:26—29). Улус оларга кандыг-даа хамаарылга көргүссе, Иегова бараалгакчыларын үнелеп чоруур.

6. Матфей 11:25, 26-да сөстер Иисусту эдереринге биске канчаар дузалаар?

⁶ Бүзүреливисти чидирбезинге чүү дузалаар? (Номчуптуңар: Матфей 11:25, 26.) Бурганның бараалгакчыларынче бо делегейниң көрүжү биске салдар чедирбес ужурлуг. Иегова күзел-соруун чүгле биче сеткилдиг улуска дагзыр деп утпаалыңар (Ыд. ыр. 137:6). Бо делегейниң мерген угаан чок, мелегей деп санап чоруур улузунуң ачызында Ол кайы хире хөйнү кылган ийик!

7. Иисус фарисейлерни чүге ийи арынныг дээн? Оларның хамаарылгазы кандыг болган?

⁷ Иисус Иеговага таарышпас ёзу-чаңчылдарны сагыыр улусту ажыы-биле сойгалап турган. Чижээ, ол хол чуур ёзулалды ада-иезин хүндүлээр хоойлудан бедик кылдыр санаар фарисейлерни ийи арынныг деп сойгалаан (Мф. 15:1—11). Ону дыңнааш, Иисустуң өөреникчилери оон айтырган: «Силерниң сөстериңер фарисейлерни хорададыпканын билир силер бе?» Иисус оларга: «Кандыг-даа тарымал үнүштү, ону Дээрде Адам тарып олуртпаан-на болза, дазылы-биле тура соп кааптар. Оларже сагыш салбаңар. Олар дээрге согурларны чедип чоруур согурлар ышкажыл. А согурну согур кижи чедер болза, олар ийилээ оңгарже кээп дүжер» — деп харыылаан (Мф. 15:12—14). Иисус шынын чугаалаарга, фарисейлер килеңнеп турза-даа, ол суртаалдаарын уламчылаан.

8. Шажынчы өөредиглерниң шуптузу Бурганга тааржыр деп, Иисус чугаалаан бе?

⁸ Оон аңгыда, Иисус меге өөредиглерни сойгалап турган. Ол шупту шажынчы өөредиглерни Бурганга тааржыр деп кажан-даа чугаалаваан. Харын-даа өлүмге чедирер делгем орук-биле хөй улус бар чыдар, чүгле эвээш санныг улус амыдыралга чедирер кызаа орукта бар чыдар деп, ол чугаалаан (Мф. 7:13, 14). Бурганга бараалгап чоруур мен дээр кижи бүрүзү Бурганның бараалгакчызы болбас деп, Иисус тода  көргүскен. «Меге медээчилерден кичээниңер. Олар силерже хой кежи эштип алган чедип кээр, а херек кырында араатан бөрүлер боор. Оларны кылган ажылының үре-түңнелинден танып аар силер» — деп, ол сагындырган (Мф. 7:15—20).

9. Иисустуң сойгалап турган өөредиглериниң чамдыызын чугаалаңар.

⁹ Библияда чүү дээнил? Мессияның хөөнүн өттүр билген медеглелде баш удур мынчаар бижээн: «Сээң [Иегованың] өргээңге дендии күштүг ынакшылым сеткилимни оя чип чор» (Ыд. ыр. 68:10; Ин. 2:14—17). Ындыг ынакшыл Иисусту меге өөредиглерни болгаш ёзу-чаңчылдарны сойгалаарынче оттуруп турган. Чижээ, кижи бүрүзү өлүм чок сүнезинниг деп, фарисейлер бүзүреп чораан, а Иисус өлүмнү уйгуга деңнээн (Ин. 11:11). Саддукейлер диргизиишкин чок деп турда, Иисус бодунуң өңнүүн Лазарны диргизипкен (Ин. 11:43, 44; Аж.-ч. 23:8). Фарисейлер Бурган кижиниң чуртталгазын баш удур шиитпирлеп каан азы кижи салымныг боор деп өөредип турда, Иисус кижи Бурганга бараалгаар-бараалгавазын боду шиитпирлээр деп өөредип турган (Мф. 11:28).

10. Бистиң өөредиглеривис хөй улуска чүге моондак бооп турар?

¹⁰ Амгы үеде шак ындыг чүүл болуп турар бе? Ийе. Библияның дузазы-биле шажыннарның меге өөредиглерин сойгалаар боорувуска, хөй-ле улус бисти дыңнавас. Чамдык шажын башкарыкчылары Бурган бузуттуг улусту алдыы оранда хинчектеп турар деп өөредии-биле чонну коргудуп алган. А бис Бурган кижилерге ынак деп өөредип турар бис. Оон аңгыда, кижи бүрүзү өлүм чок сүнезинниг боор деп, олар өөредип турар. А бис ол өөредигни дүрзү-бурганнарга чүдүлгеден укталган деп сойгалап турар бис. Ол өөредиг ылап шын чүве болза, диргизиишкинниң херээ чок турган. Оон ыңай шажын башкарыкчылары кижилерниң салымын баш удур бодап каан деп өөредип турар. Бурган улуска хостуг эргени берген, Аңаа бараалгаар-бараалгавазын кижи бүрүзү боду билир деп бүзүрээр бис. Бо бүгүнү  шажын башкарыкчылары дыңнааш, килеңнеп турар.

11. Бурган бараалгакчыларындан чүнү негеп турар? (Иоанн 8:45—47).

¹¹ Бүзүреливисти чидирбезинге чүү дузалаар? Алыс шынга ынак болзувусса, Бурганның сөстеринге бүзүреп, Ону дыңнаар бис. (Номчуптуңар: Иоанн 8:45—47.) Эрликке бодаарга, бис алыс шындан быжыг туттунуп алган бис. Ол ышкаш Иегованы хомудадыптар хире чүү-даа кылбас бис (Ин. 8:44). Бурган бараалгакчыларындан: «Бузутту көөр хөөн чок, буянга бердинген болуңар» деп негеп турар (Рим. 12:9). Иисус шак ынчаар кылып чораан (Евр. 1:9).

12. Иисустуң шаажылатканын көргеш, чамдык еврейлер чүге ону хүлээвээн?

¹² Еврейлер оон ыңай Иисусту Мессия деп чүге хүлээвээнил? Павел элчин: «Бис Христостуң белдир-ыяшка өлүмүн суртаалдап турар бис. Ол медээ иудейлерге — ажып эрттинмес моондак боор» — дээн (1 Кор. 1:23). Иисус чагыга шаажыладып өлүрткен боорга, хөй еврейлер ону хүлээвээн. Чүге? Иисус Мессия турган болза, ол кем-херек үүлгедикчизи болгаш бачыттыг кижи дег, өлбес ийик деп бодап турганнар (Ы. х. к. 21:22, 23).

13. Иисусту Мессия деп хүлээвээн еврейлер чүү чүвеге бүзүревээн?

¹³ Иисусту Мессия деп хүлээвээн улус ооң буруу чогунга, аңаа удур буруудадыышкыннар шын эвес база ол ындыг хамаарылгага төлеп чок деп чүүлге бүзүрээринден ойталаан. Олар чөптүг шииткел үндүрген улус дег алдынып турган. Херек кырында дээди иудей Чөвүлел чыылгаш, шупту хоойлу-дүрүмнү хажыдып тургаш, Иисусту шииткен (Лк. 22:54; Ин. 18:24). Херечилерниң өчүүн, буруудадыышкыннарын дыңнаарының орнунга, шииткекчилер «Иисуска удур меге херечилелдер тыварын оралдашкан». Ол чүүл болдунмас боорга, Иисус бодунга хамаарыштыр меге өчүк чугаалаптар кылдыр дээди бараалгакчы албадап, чөптүг шииткелдиң дүрүмнерин үрээн (Мф. 26:59; Мк. 14:55—64). А кажан Иисус дирлип кээрге, меге шииткекчилер Иисусту орнукшуткан  куйну кадарып турган рим шериглерни көгүдүп алган. Олар ооң мөчү-сөөгүнүң канчап чиде бергениниң дугайында меге чугааны таратсын дээш, хөй акша берген (Мф. 28:11—15).

14. Ыдыктыг Бижилгеде Мессияның өлүмүнүң дугайында чүү дээнил?

¹⁴ Библияда чүү дээнил? Дыка хөй еврейлер Мессияның өлүмүнүң дугайында боданмаан. Ынчалза-даа өттүр билген медеглелде мынча дээн: «Ол бодун өлүмге боду хүлээдип, кем-херек үүлгедикчизи деп санаттырган болгаш, хөй улустуң бачыдын боду чүктеп, кем-херек үүлгедикчилери дээш ээрежип дилээн-дир» (Иса. 53:12). Ынчангаш Иисусту кем-херек үүлгедикчизи дег өлүрүп каарга, еврейлерниң ону Мессия деп хүлээвес чылдагааны чок турган.

15. Кандыг буруудадыышкыннар дээш чамдык улус Иегованың Херечилеринге бүзүревес?

¹⁵ Амгы үеде шак ындыг чүүл болуп турар бе? Ынчанмайн канчаар! Иисусту нүгүлдээш, чөптүг эвес шииткен, Иегованың Херечилери база-ла ындыг чүүлге таваржып чоруур. Каш чижектен көрүптээлиңер. 1930—40 чылдарда Американың Каттышкан Штаттарынга Бурганга чүдүүр эргевисти камгалаар дээш, аңгы-аңгы судтарже барып турган бис. Ынчалза-даа чамдык шииткекчилер биске чөптүг эвес хамаарылгалыг болган. Канадада Квебек хоорайда католик шажынның башкарыкчылары эрге-чагырга улузу-биле, ажыл-чорудулгавысты соксадыр дээш, катчып алганнар. Акы-угбаларны Бурганның Чагыргазының дугайында улус-биле чугаалашканы дээш, кара-бажыңнап турган. Нацист Германияга хөй аныяк акыларны өлүмге шииткен. А сөөлгү чылдарда Россияда Иегованың Херечилерин улус-биле Библия дугайында чугаалажырга, кара-бажыңнап турар. Ындыг чугааларны экстремист ажыл-херек дээрлер. Олар безин орус дылда үнген «Ыдыктыг Бижилгени — Чаа делегейниң очулгазын», ында Бурганның Иегова деп хууда ады бар боорга, экстремист материал кылдыр санааш, хоруп каан.

16. 1 Иоанн 4:1-ден алырга, Иегованың Херечилериниң дугайында хоп чугаалар бисти чүге будалдырбас ужурлуг?

¹⁶ Бүзүреливисти чидирбезинге чүү дузалаар? Фактыларны билип алыңар. Иисус даг кырынга суртаалынга ооң эдерикчилериниң дугайында бужар-бак хоп-нүгүлдү тарадыр деп сагындырган (Мф. 5:11). Ооң артында Эрлик турар. Бистиң дугайывыста хоп-мегени тарадыр кылдыр, Эрлик дайзыннарывысты ыдалап турар (Ажыд. 12:9, 10). Ындыг хоп-мегеден ойталаар болзувусса эки. Оон башка бүзүреливис кошкап, коргуп эгелээр бис. (Номчуптуңар: 1 Иоанн 4:1.)

17. Иисустуң өлүрүнүң бетинде болуушкуннар чамдык улуска кандыг салдар чедирген чадавас?

¹⁷ Иисустуң өлүрүнүң бетинде 12 элчиннерниң бирээзи ону садыпкан. А өскези оон үш катап ойталаан. Өлүрүп шииттирериниң мурнунда олар шупту ону каапкаш барганнар (Мф. 26:14—16, 47, 56, 75). Иисуска ол чүүл кайгамчык болбаан. Ол ону безин баш удур чугаалап турган (Ин. 6:64; 13:21, 26, 38; 16:32). Чамдык улуска ол болуушкуннар моондак болган чадавас. Олар: «Иисустуң элчиннери безин ынчаар алдынып турда, мен оларга катчыр хөңнүм чок!» деп бодап болур турган.

18. Иисустуң өлүрүнүң бетинде кандыг өттүр билген медеглелдер күүсеттинген?

¹⁸ Библияда чүү дээнил? Чүс-чүс чылдар бурунгаар Иегова Бодунуң Сөзүнге Мессияны «үжен шекел мөңгүнге» садыптар деп  бижидип каан (Зах. 11:12, 13). Оон ыңай саттыныкчы кижи Иисустуң чоок эжи боор деп, Ол өттүр билип медеглээн (Ыд. ыр. 40:10). Ол ышкаш Захария медээчи: «Кадарчыны соп каарыңга, хойлар тарай маңнажы бээр!» — деп бижээн (Зах. 13:7). Бо өттүр билген медеглелдерниң Иисуска бүдүп турарын көргеш, биче сеткилдиг улус ону каар хамаанчок, бүзүрели быжыгар ужурлуг турган.

19. Биче сеткилдиг улус чүнү билип турар?

¹⁹ Амгы үеде шак ындыг чүүл болуп турар бе? Ийе. Бурганның чонунуң аразынга билдингир чораан кезек Иегованың Херечилери ойталакчылар апаргаш, акы-угбаларны боттарының аайынче киирип алыр дээш кызып оралдашканнар. Олар массалыг информация чепсектери болгаш интернет таварыштыр Иегованың Херечилериниң дугайында нүгүл-хопту, шынны меге-биле холуп азы ажыы-биле мегени тарадып турарлар. Ынчалза-даа биче сеткилдиг улуска ол моондак болбас. Чүге дизе олар өттүр билген медеглелдерниң күүсеттинип турарын көрүп турарлар (Мф. 24:24; 2 Пет. 2:18—22).

20. Алыс шынны каапкан улустуң хайындан бүзүреливис кошкавас кылдыр, чүнү канчаар ужурлуг бис? (2 Тимофейге 4:4, 5).

²⁰ Бүзүреливисти чидирбезинге чүү дузалаар? Библияны үргүлчү шинчилеп, мөргүп база Иегованың берген ажылынга идепкейлиг киржир болзувусса эки. (Номчуптуңар: 2 Тимофейге 4:4, 5.) Бүзүреливис быжыг боор болза, Иегованың Херечилериниң дугайында тарадып турар нүгүл-хоптан кортпас боор бис (Иса. 28:16). Иеговага, Ооң Сөзүнге база акы-угбаларга ынак боор болзувусса, алыс шынны каапкан улус дээш бүзүреливис кошкавас.

21. Улустуң хөй кезии буянныг медээни дыңнавас-даа болза, чүү чүвеге чигзинмес бис?

²¹ Бирги векте Иисусту хөй улус хүлээвээн-даа болза, аңаа бүзүрей берген улус база турган. Оларның аразынга дээди иудей Чөвүлелдиң бир кежигүнү болгаш өргээ бараалгакчылары турган (Аж.-ч. 6:7; Мф. 27:57—60; Мк. 15:43). Бөгүн база миллион-миллион кижилер Иисусту эдерерин шиитпирлээн. Чүге дизе олар Библиядан алыс шынны билир база аңаа ынак. Ырлар 118:165-те мынча дээн: «Сээң хоойлуңга ынак улуска өндүр улуг-чаагай чорук доктаар, оларга чүү-даа чүве моондак болбас».