1, 2. Чаа байдалдар кижиниң таныыры библейжи дүрүмнерже көрүштү канчаар өскертип болур?

 ДЫКА үр манап келгениңер хүн чедип келген. Каас кылдыр кеттинген душтук оол биле чаражын магадап ханмас душтук кыс кудазында илеткелди кичээнгейлиг дыңнап турар. Ол илеткелде бодалдарны олар кажан-даа дыңнаваан деп болбас. Ынчалза-даа ол хүнден эгелээш, ол бодалдар оларга тускай ханы уткалыг апаар. Чүге? Чүге дизе олар ам ашак-кадай апарган, оларның аас-кежии ол сүмелерни ажыглаар-ажыглавазындан хамааржыр.

² Шак ындыг чүүл ашак-кадай улус өпеязының төрүттүнерин манап турда база болур. Олар ажы-төлдү кижизидеринге хамаарышкан библейжи илеткелдерни чыышка хөй чылдар дургузунда дыңнап келген. Ам олар ада-ие апарган, ынчангаш ол дүрүмнер оларга дорт хамааржыр. Ада-ие болуру — дыка улуг харыысалга-дыр! Амыдыралынга чаа байдалдар тургустунуп кээрге, оларның таныыр библейжи шүлүктеринче көрүжү өскерли бээр. Ынчангаш Бурганның бараалгакчыларынга Ыдыктыг Бижилгени номчуп, ооң дугайында «бүгү назынында» ханы боданыры чугула (Ы. х. к. 17:19).

3. Бо статьяга чүнү сайгарар бис?

³ Ада-иелер, ажы-төлүңерни Иегова-биле таныштырар улуг алдар-хүндүнү силерге бүзүредип каан. Силерниң даалгаңар — оларга Бурганның дугайында анаа-ла чугаалаары эвес, а оларның чүректеринге Бурганга ёзулуг ынакшылды  өстүрери-дир. Ону кылырынга силерге чүү дузалап болур? Хөй христиан ада-иелер дөрт библейжи дүрүмнүң ажыктыынга шынзыккан (2 Тим. 3:16). Ам оларны сайгарыптаалыңар.

4. Төлүнүң чүрээнге Иеговага ынакшылды өстүреринге ада-иелерге кандыг дүрүм дузалаар? (Иаков 1:5).

⁴ Бирги дүрүм. Иегова-биле сүмележиңер. Боттарыңарның күжүңер-биле ажы-төлүңерге Бурганга ынакшылды өстүрүп шыдавас силер. Ынчангаш Оон мерген угаандан дилеңер. (Номчуптуңар: Иаков 1:5.) Бургандан өске ада-иелерге кым-даа эки сүме кадып шыдавас. Ооң чылдагааны эңдерик, оларның чүгле ийизин көрүптээлиңер. Бирээде, Иегова ажы-төл кижизидер улуг арга-дуржулгалыг (Ыд. ыр. 35:10). Ийиде, Ооң сүмелери биске кезээде ажыктыг (Иса. 48:17).

5. а) Иегованың организациязы ада-иелерге канчаар дузалап турар? б) Видеода Абилью биле Ула Аморимнерниң ажы-төлүн кижизидип турганындан чүнү демдеглеп алдыңар? (Тайылбырны көрүңер.)

⁵ Иегова ажы-төлүвүстүң Аңаа ынак болурун күзеп турар. Ынчангаш Ол Бодунуң Сөзүн белекке берген. А Ооң организациязы ону эки билип алырынга дузалап, хөй дептерлерни болгаш видеороликтерни үндүрүп турар (Мф. 24:45). Чижээ, «Өг-бүлелерге дуза» деп рубрика хөй чылдар дургузунда «Оттуп келиңер» деп журналга парлаттынып турган. Ам ол jw.org деп сайтыда үнүп турар. Ол ышкаш ында ажы-төл кижизидерде Иегованың сүмелерин канчаар ажыглаарын көргүскен видеоинтервьюлар болгаш өске-даа роликтер бар * (У. ч. 2:4—6).

6. Бир өг-бүле Иегованың организациязының берип турар дузазының дугайында чүү дээн?

⁶ Хөй адалар болгаш иелер Иегованың организациязы таварыштыр кадып турар дузазы дээш өөрүп четтирип турар. Джо дээр акый мынча дээн: «Үш ажы-төлдүг бис. Оларга быжыг бүзүрелди өстүрери ындыг кончуг белен эвес. Ынчангаш кадайым-биле үргүлчү мөргүүр бис. Солун чүүл, бергелер тургустунуп кээри билек, ол-ла дораан аңаа тааржыр статья азы видео үнүп кээр. Иегова биске амы-тын камгалаар дээрбек  октап берип турары-биле дөмей». Ажы-төлүнүң бүзүрелин быжыктырарынга дузалап турар Бурганга Джо биле ооң кадайы өөрүп четтирип турарлар.

7. Ада-иелер ажы-төлүнге чүге эки үлегер көргүзер ужурлуг? (Римчилерге 2:21).

⁷ Ийиги дүрүм. Боттарыңарның үлегериңер-биле өөредиңер. Ажы-төл ада-иезинче көөр болгаш, колдуунда оларны өттүнер. Ийе, ачазы-даа, авазы-даа тергиин эвес (Рим. 3:23). Ынчалза-даа олар дөмей-ле ажы-төлүнге эки үлегер боор ужурлуг. (Номчуптуңар: Римчилерге 2:21.) Аңаа хамаарыштыр бир ада мынча дээн: «Ажы-төл шупту чүвени боттарынче сиңирип алыр. Бир эвес мээң ажыл-херээм чугаа-сөзүмге дүүшпейн баар болза, олар ону албан чугаалаар чорду». Ынчап кээрге, ажы-төлүңер Иеговага ынак боорун күзээр болзуңарза, силер боттарыңар Аңаа күштүг ынак боор ужурлуг силер.

8, 9. Эндрю биле Эмманың чугаазындан чүнү өөренип алдыңар?

⁸ Ада-иезиниң үлегери ажы-төлге кандыг салдарлыг боорун сайгарып көрээлиңер. 17 харлыг Эндрюга сөстен берээлиңер: «Ачам, авам Иегова-биле чугаалажырының кайы хире чугулазын бо-ла сагындырар турган. Мен чеже-даа бодум мөргүп алган болзумза, ачам мээң-биле кады кежээниң-не мөргүүр турган. Ада-иевис биске болганчок сагындырар турган: „Кайы хире күзээр силер, ол хире үе ишти Иегова-биле чугаалажып болур силер“. Ооң ачызында Иегованы ынакшылдыг Адам кылдыр көрүп, Ооң-биле чугаалажырынга ынак мен». Ада-иелер силерниң Иеговага ынакшылыңар ажы-төлүңерге кайы хире улуг салдар чедирип болурун утпаңар.

⁹ А бо Эмма дээр угбавыстың төөгүзү-дүр. Ол бичии турда-ла, ачазы өг-бүлезин каггаш, авазын хөй өре-ширелиг арттырып каан. Эмма үлешкен: «Акшага болганчок чединмейн баар турган бис. Ынчалза-даа авам үргүлчү „Иегова бараалгакчыларын кажан-даа кагбас“ дээр турган. Ол боду аңаа быжыг бүзүреп турган. Авам алыс шынны суртаалдаарындан аңгыда, ол ёзугаар чурттап чораан». Аар-берге байдалда безин ада-иелер боттарының үлегери-биле ажы-төлүн өөредип болур деп, Эмманың сөстери бадыткап турар (Гал. 6:9).

10. Израильге ада-иелерниң ажы-төлү-биле чугаалажыр кандыг аргалары турган? (Ыдыктыг хоойлуну катаптааны 6:6, 7).

¹⁰ Үшкү дүрүм. Ажы-төлүңер-биле үргүлчү чугаалажыңар. Иегова израильчилерге берген хоойлузунга ону дорт чугаалаан. (Номчуптуңар: Ыдыктыг хоойлуну катаптааны 6:6, 7.) Ол шагда ада-иелер ажы-төлү-биле хөй үени эрттирер турган. Чижээ, оолдар ачазы-биле шөлге шак-шагы-биле ажылдап, а уруглар авазы-биле бажың ажылын кылыр турган. Ажыл үезинде олар чугаалажып турган болбайн канчаар. Ынчангаш ада-иелерге ажы-төлүнүң чүрээнге Иеговага ынакшылды өстүрер аргалар болганчок тыптып кээр турган. Чижээ, Бурган оларның өг-бүлезинге кайы хире дузалап, ачы-буянын көргүзүп чоруурун олар демдеглеп болур турган.

11. Ада-иелерде ажы-төлү-биле чугаалажыр кандыг арга бар?

¹¹ Ам үе көңгүс өскерилген. Хөй чурттарда ада-иелер ажылынче, а ажы-төлү школаже барып турар болгаш, үени кады эрттирбес апарган. Ынчангаш ада-иелер ажы-төлү-биле чугаалажыр үени тып аар ужурлуг (Эф. 5:15, 16; Флп. 1:10). Ону кылыр дыка эки арга дээрге өг-бүле мөгейиишкини-дир. Алекс дээр элээди дуңмавыс үлешкен: «Ачамга өг-бүле мөгейиишкини эргежок чугула. Ооң ажыл-херээ чеже-даа хөй болза, ол ону неделя  санында эрттирип турар. А ооң соонда, бис өг-бүлевис-биле чүнүң-даа дугайында чугаалажыр чордувус».

12. Адалар өг-бүле мөгейиишкининге хамаарыштыр чүнү сактыр ужурлуг?

¹² Ачазы ажы-төлүнге өг-бүле мөгейиишкинин канчаар солун кылдыр эрттирип болур? Бисте «Аас-кежиктиг мөңге чуртта!» деп кайгамчык ном бар. Библия дугайында хөөрежип, солун чугаалар чорударынга ол дыка дузалыг. Бүдүн өг-бүлеңер-биле ону өөренирин шенеп көрүңер даан. Ажы-төлүңер минниишкиннерин болгаш дүвүрелдерин ажыы-биле чугаалаарын күзээр болгай силер. Ынчангаш өг-бүле мөгейиишкининиң үезинде оларны кончуп, сургаал номчувайн көрүңер. Бир эвес олар Библияга удур чүве чугаалаар болза, изигленип хорадаваңар. Харын-даа амыраңар, чүге дизе олар чүнү бодап турарын чажырбайн турар ышкажыл. Оон ыңай оларга бодунуң онал-саналын хостуг илередир байдалдан тургузуңар. Бир эвес төлүң херек кырында чүнү миннип турарын билбес болзуңза, аңаа дузалаары болдунар бе?

13. Ада-иелер ажы-төлүнге Иеговаже чоокшулаарынга оон ыңай канчаар дузалап болур?

¹³ Ада-иелер, ажы-төлүңер Иеговага чоок апарзын дээш, кандыг-даа аргаларны ажыглаңар. Төлүңерге Бурган дугайында чугаалаар дээш, ооң-биле Библия өөренир азы өг-бүле мөгейиишкинин эрттирер үени манаан херээ чок. Бир кыс уруглуг, үш оолдуг Лиза дээр угбавыс мынча дээн: «Ажы-төлүвүс Иегованы эки билип алзын дээш, чаяалгаларже оларның кичээнгейин салып турган бис. Чижээ, олар ыдывыстың тенек аажы-чаңын көргеш, бо-ла чаптап каттыржыр турган. Бистиң Чаяакчывыс, бис ышкаш, баштак база чуртталгага ынак деп бодалды ажы-төлүвүске чедирер дээш, үргүлчү ыдывысты чижекке ап турган бис».

14. Ада-иелер ажы-төлүнге эш-өөрнү шилип алырынга чүге дузалаар ужурлуг? (Чугаалар 13:20).

¹⁴ Дөрткү дүрүм. Ажы-төлүңерге төлептиг эш-өөрнү тып алырынга дузалаңар. Бурганның Сөзү тода чугаалап турар: эш-өөрүвүс бисче бир болза эки, бир болза багай салдар чедирер. (Номчуптуңар: Чугаалар 13:20.) Эргим ада-иелер, ажы-төлүңер  кымнар-биле харылзажып турарын билир силер бе? Оларның эштери-биле хууда ужурашкан силер бе? Олар-биле кады үе эрттирген силер бе? Ажы-төлүңер Иеговага ынак улус-биле өңнүктежир кылдыр, чүнү кылып болур силер? (1 Кор. 15:33). Чижээ, акы-угбаларны өг-бүлеңер-биле үе эрттирер кылдыр чалаңар (Ыд. ыр. 118:63).

15. Ада-иелер ажы-төлүнге төлептиг эш-өөрнү тып алырынга канчаар дузалап болур?

¹⁵ Энтони үш кыстыг болгаш ийи оолдуг. Ол кадайы-биле ажы-төлүнге эки эш-өөрнү тып алырынга дузалаан. Энтони үлешкен: «Чыышта аңгы-аңгы назы-харлыг, Иеговага ынак база Аңаа өөрүшкүлүг бараалгап чоруур улус эвээш эвес. Ажы-төлүвүс бичии турда, кадайым-биле ындыг акы-угбаларны үргүлчү бажыңывысче чалаар турган бис. Чүгле кежээки чемче эвес, а өг-бүле мөгейиишкининче база чалап турган бис. Ол дээрге найыралдажып алыр эң-не эки арга-дыр. Оон ыңай бис бажыңывыска кожуун хайгааракчыларын, миссионерлерни болгаш өске-даа акы-угбаларны чурттадып турган бис. Оларның-биле аралажыышкын ажы-төлүвүске дыка эки салдарны чедирген. Ажы-төлүвүс ол акы-угбаларның бир-ле чүүлден ойталаарынга беленин база бараалгал дугайында кайы хире соруктуг хөөреп турарын көргеш, Иеговага ынак апарган». Ада-иелер, силерниң дузаңар чокта ажы-төлүңерге эш-өөрнү тып аары берге болур. Ынчангаш оларга дузалаарын кызыңар.

16. Төлүңер Иеговага бараалгаксавайн турар болза, чүнүң дугайында боданыры чугула?

¹⁶ Силерден хамааржыр бүгү чүүлдү кылып турар-даа болзуңарза, ажы-төлүңерниң кайы-бирээзи Иеговага бараалгавайн барып болур. Ол дээш бодуңарны буруудатпаңар. Иегова шупту кижилерге, ооң санында силерниң төлүңерге, хостуг шилиир эргени берген. Ынчангаш кижи бүрүзү Бурганга чүдүүр-чүдүвезин боду шиитпирлээр. Төлүңер Иеговага бараалгавайн барган болза, ол кажан-бир эглип кээр деп чүүлге идегелиңер ышкынмаңар. «Чидип чорааш... тыптып келген» оолдуң дугайында Иисустуң угаадыглыг чугаазы силерниң чүрээңерни чылдып  чорзун (Лк. 15:11—19, 22—24). Ол аныяк оол үй-балай чүүлдер кылып чорааш, соонда барып миннип келген. «Ол дээрге анаа чараш тоол ышкажыл, а чуртталгага ындыг болбас» деп, чамдык улус бодап болур. Ынчалза-даа ол ындыг эвес. Эли дээр аныяк эр кижиниң төөгүзү ону бадыткап турар.

17. Элиниң төөгүзү силерни чүү чүвеге бүзүредир-дир?

¹⁷ Эли мынча дээн: «Мээң ада-ием — Иегованың Херечилери. Чүрээмге Иеговага болгаш Ооң Сөзүнге ынакшылды өстүрер дээш, олар шыдаар шаа-биле кыскан. Ынчалзажок элээди үелеримде чугаа дыңнавас апарган мен». Эли ийи арынныг чуртталга тудуп эгелээн. Ооң ада-иези оглун орталаныр кылдыр дузазын кадып турган, ынчалза-даа ол оларны дыңнаар безин хөңнү чок болган. Эли бажыңындан чорупкаш, мырыңай дорайтап каан. Ындыг турбуже, ол чамдыкта эштериниң бирээзинге суртаалдаар турган. Ол улаштырган: «Иегованың дугайында эжимге хөй чугаалаан тудум, бодум Ооң дугайында хөй бодаар апарган мен. Ада-иемниң тарып каан алыс шынның үрезиннери, оожум-даа бол, өзүп эгелээн». Үе эрткенде, Эли чыышче дедир эглип келген. Ада-иезиниң ол дээш кайы хире өөрээнин сагыштаалап көрүңер даан! Олар оглун чажындан тура Иеговага ынак апаар кылдыр өөредип келген болгай (2 Тим. 3:14, 15). Шынап-ла, оларның күжениишкиннери хилис барбаан *.

18. Ажы-төлүн Иеговага ынак апаар кылдыр өөредип чоруур ада-иелерге чүнү чугаалаарын күзээр силер?

¹⁸ Ада-иелер, силер Иегованың бараалгакчыларының «келир салгалын» өстүрер алдар-хүндүге төлептиг болган силер! (Ыд. ыр. 77:4—6). Ол ындыг-ла амыр эвес. Ону кызымаккай күүседип турарыңар дээш сеткиливистиң ханызындан силерни мактаар-дыр бис! Моон-даа улаштыр ажы-төлүңерни «Дээрги-Чаяакчының чурумун болгаш өөредиин ёзугаар өстүрүп-кижизидиңер база сургаңар» (Эф. 6:4). Ынчаар кылгаш, дээрде ынакшылдыг Адавыстың сеткилин өөртүр силер!