1, 2. Ажыдыышкын ному биске чүге ылаңгыя солун?

 БИР кижиниң фотоальбомун көрүп олурар дижик силер. Ооң арыннарын ажыдып, ында танывазыңар улустарның чуруктарын көрүп олурар силер. Хенертен бир чурук силерниң кичээнгейиңерни хаара тудупкан. Чүге? Чүге дизе ол чурукта бодуңарны көрүп каан силер. Оон ол чурукту кажан база каяа тырттырганын, чаныңарда улустуң аттарын сактып кээрин кызып турар силер. Бүгү альбомдан ол чурук сагыжыңарга артып каар деп чөпшээрежир боор силер.

² Ажыдыышкын номун шак ындыг чурук-биле дөмейлеп болур. Чүге? Бирээде, ол ном биске бижиттинген. Ону мындыг сөстер-биле эгелээн: «Удавайн болур бүгү чүүлдү Бодунуң чалчаларынга көргүссүн дээш, Бурган Иисус Христоска ажыдыышкын берген» (Ажыд. 1:1). Моон алырга, Ажыдыышкын ному шупту улуска эвес, а биске — чуртталгазын Бурганга бараалгаткан улуска — хамааржыр. Ынчангаш бистиң ол номда бижээн өттүр билген медеглелдерде киржип турарывыс кайгамчык эвес. Өскээр чугаалаарга, бис ол «чурукта» бодувусту танып каан бис.

3, 4. Ажыдыышкын номунда өттүр билген медеглелдер кажан күүсеттинип эгелээн база ол бисти чүнү кылырынче оттурар ужурлуг?

³ Ажыдыышкын номунда өттүр билген медеглелдерниң биске солун ийи дугаар чылдагааны — оларның күүсеттинип турар үези. Назыны дөгүй берген Иоанн элчин ол болуушкуннар «Дээргиниң хүнүнде» болуп турар дээн (Ажыд. 1:10). Иоанн ол номну «Дээргиниң хүнүнүң» ушчок бетинде, б. э. 96 чылда, бижээн (Мф. 25:14, 19; Лк. 19:12). Библейжи чыл санаашкыны-биле алырга, ол хүн 1914 чылда, кажан Иисус дээрде Чагырганың Хааны апаарга, эгелээн. Ынчан Бурганның чонунга хамааржыр Ажыдыышкын номунда өттүр билген медеглелдер күүсеттинип эгелээн. Бодап көрүңер  даан, «Дээргиниң хүнүнде» чурттап турар бис!

⁴ Төөгүнүң ол хире кайгамчык үезинде чурттап турар болганывыста, Ажыдыышкын 1:3-те сөстерге ылаңгыя кичээнгейлиг боор ужурлуг бис. Ында: «Өттүр билген бо медеглелди дыңналдыр номчуп турар кижи база ону дыңнап, ында бижээн чүвени сагып турар улус амыр-чыргалдыг. Чүге дээрге медеглелдиң боттаныр үе-шагы чоокшулаан-дыр» — дээн. Эскерип көрүңер, ол өттүр билген медеглелдиң сөстерин дыңналдыр номчуп, ону дыңнап, ында бижээн чүвени сагыыр болза эки. Ынчангаш ам оларны тодаргай сайгарыптаалыңар.

5. Иеговага канчаар бараалгап турарывыс Аңаа хамаан чок эвес деп, Ажыдыышкын ному канчаар көргүзүп турар?

⁵ Ажыдыышкын 1-ги эгеден көөр болза, Бурганның чонунда чүү болуп турарын Иисус дыка эки билир (Ажыд. 1:12—16, 20; 2:1). Ол чүүл Асияда чеди чыышка ооң чугаалаан сөстеринден көскү. Ында христианнарга Иисус, оларның мөгейиишкинин Иегова хүлээп алзын дизе, чүнү канчаарын тода айыткан. Бо чүүл амгы үеде Бурганның бараалгакчыларынга база хамааржыр. Моон чүнү өөренип ап болур бис? Баштыңчывыс Иисус Христос бистиң Бурган-биле хамаарылгавысты дыка эки билир. Ол бисти удуртуп база камгалап турар. Оон чүнү-даа чажырары болдунмас. Бурганның ээ көрүүшкүнүн чидирбес дизе, чүнү канчаарывысты база ол дыка эки билир. Ажыдыышкын номунда Иисустуң каш айтыышкынын көрүптээлиңер.

6. а) Ажыдыышкын 2:3, 4-те Иисус эфес христианнарның кандыг четпес талазынче айытканыл? б) Иисустуң сөстеринден чүнү өөренип ап болур бис?

⁶ Номчуптуңар: Ажыдыышкын 2:3, 4. Иеговага баштайгы ынакшылывысты чидирбес ужурлуг бис. Иисустуң сөстеринден алырга, Эфесте христианнар быжыг туруштуг бооп, янзы-бүрү бергелерге торулбайн, Бурганга улаштыр бараалгап турган. Ынчалза-даа олар Бурганга баштайгы ынакшылын чидирип алган. Ынчангаш олар ону катап кыптыктырар ужурлуг турган. Оон башка Иегова оларның бараалгалын хүлээвейн баар ийик. Моон чүнү өөренип ап болур бис? Биске быжыг туруштуг болуру чугула, ынчалза-даа чаңгыс ол чедишпес. Бисти быжыг туруштуг болурунче чүү оттуруп турары база чугула. Чүге дээрге Бурган бистиң чүгле ажыл-херектеривисче эвес, а хөөнүвүсче база улуг кичээнгейни салып турар. Бисти Аңаа бараалгаарынче өөрүп четтирген хөөн болгаш сеткиливистен ынакшыл оттурзун деп, Ол күзеп турар (У. ч. 16:2; Мк. 12:29, 30).

7. а) Иисус Сардисте чыыштың кандыг четпес талазынче айытканыл? (Ажыдыышкын 3:1—3). б) Сардисте христианнарның частырыын катаптавас дизе, чүнү канчаар бис?

⁷ Номчуптуңар: Ажыдыышкын 3:1—3. Моон-даа соңгаар одуг-сергек боор ужурлуг бис. Сардисте христианнарның четпес талазы бир өске турган. Оларның Бурганга бараалгалы чүткүл чок апарган. Ынчангаш Иисус оларны оваарындырып, одуг-сергек болурунче кыйгырган. Моон чүнү өөренип ап болур бис? Чугаажок, «кылган ажыл-херээңерни» Бурган уттур хире эвес (Евр. 6:10). Ындыг-даа бол, бараалгалга чедип алган чедиишкиннеривисти ол-ла деп санавайн, оожумнавас ужурлуг бис. Бистиң оруувуска шаптараазыннар көвүдезе-даа, «Дээрги-Чаяакчының даандырган ажыл-херээнге» бүгү бодувусту бараалгадып, эчизинге чедир одуг-сергек артар ужурлуг бис (1 Кор. 15:58; Мф. 24:13; Мк. 13:33).

8. Иисустуң Лаодикияда христианнарга чугаалаан сөстеринден чүнү өөренип ап болур бис? (Ажыдыышкын 3:15—17).

 ⁸ Номчуптуңар: Ажыдыышкын 3:15—17. Изиг күзелдиг бараалгаар ужурлуг бис. Лаодикияда христианнар база четпес талалыг турган. Олар Иеговага бараалгалынга изиг-даа, соок-даа эвес, а чылбай апарган деп, Иисус чугаалаан. Олар Бурганга бараалгалын херекке албас боорга, Иисус оларны кежик чок, чөгенчиг улус дээн. Ынчангаш олар Иеговага катап изиг күзелдиг бараалгап эгелээр ужурлуг турган (Ажыд. 3:19). Моон чүнү өөренип ап болур бис? Бир эвес кижи бараалгалга чүткүл чок апарган болза, ооң Иеговага өөрүп четтиргени чедишпейн турар деп болур. Ынчангаш Иегованың болгаш Ооң организациязының биске кылып турар бүгү чүүлүн боттарывыска сагындырып чоруулуңар (Ажыд. 3:18). Эки чуртталга сүрер дээш, Бурганга бараалгалывыс ийиги черге апаарын канчап-даа болдурбаалыңар.

9. Пергамда болгаш Фиатирада чыыштарга Иисустуң чугаалаан кандыг айыылындан оваарныр ужурлуг бис?

⁹ Ойталакчыларның өөредиглеринден ойталаар ужурлуг бис. Пергамда аңгылажыышкын үндүрүп, оспак бөлүктерниң өөредиглерин эдерип чоруур чамдык христианнарны Иисус сойгалаан (Ажыд. 2:14—16). Оон ол Фиатирада чамдык христианнарны «эрликтиң ханы чажыттары дижир» өөредиглерден ойталааны дээш, мактап, алыс шындан быжыг туттунарынче оттурган (Ажыд. 2:24—28). А ойталакчыларның хоранынга алзыпкан, бүзүрели кошкак христианнарны ол буруузун минниринче кыйгырган. Моон чүнү өөренип ап болур бис? Иегованың үзел-бодалынга чөрүшкек шупту өөредиглерден ойталаар ужурлуг бис. Ойталакчылар Бурганга бердинген бооп көстүп турар, а херек кырында оларның ажыл-херээ көңгүс өске (2 Тим. 3:5). Оларның какпазынче канчаар кирбезил? Библияны ханы шинчилеп турар кижиге меге өөредиглерни аңгылаары белен боор (2 Тим. 3:14—17; Иуда 3, 4).

10. Пергам биле Фиатирада чыыштарга Иисустуң чугаалаан сөстеринден оон ыңай чүнү өөренип ап болур бис?

¹⁰ Самыын чоруктуң кандыг-даа хевирлеринден дезер ужурлуг бис. Пергам биле Фиатирага база бир айыыл тургустуна берген. Чамдык акы-угбалар самыын чорукту көңгүс анаа чүүл кылдыр көрүп турар боорга, Иисус оларже хорадай берген (Ажыд. 2:14, 20). Моон чүнү өөренип ап болур бис? Самыырап,  ону деткип азы ону көңгүс анаа чүүл кылдыр санавас ужурлуг бис. Бодун мөзү-шынар чок алдынып турар кижиден Иегова харыыны негээр. Ол чыышка харыысалгалыг даалгаларны күүседип азы хөй чылдар дургузунда бараалгап турар боорга, Бурган ону кээргеп каар деп бодаары мелегей чорук-тур (1 Хаан. 15:22; 1 Пет. 2:16). Улустуң мөзү-шынары чеже-даа кудулаан болза, Иегова бисти Ооң бедик мөзү-шынар негелделерин сагыырын күзеп турар (Эф. 6:11—13).

11. Статьяның бо кезээнден чүнү билип алдывыс? ( «Биске кичээлдер» деп көзенекти көрүңер.)

¹¹ Статьяның бо кезээн түңнептээлиңер. Иеговага, Ооң күзээни дег, бараалгаары дээрге бистиң хүлээлгевис деп билип алдывыс. А бир эвес бир чүүлдү шын эвес кылып турар болзувусса, ону соңгаарлатпайн, эдип алыр ужурлуг бис (Ажыд. 2:5, 16; 3:3, 16). Асияда христианнарга Иисустуң чугаалаан сөстеринде оон-даа ажыктыг бодалдар бар.

12. Иисустуң Смирна биле Филадельфияда чыыштарга чугаалаан сөстери биске чүзү-биле ажыктыг? (Ажыдыышкын 2:10).

¹² Ам Иисустуң Смирна биле Филадельфияда чыыштарга чүнү чугаалаанын көрүптээлиңер. Иисус ол христианнарны истеп сүрүүшкүннерден кортпас кылдыр бүзүреткен. Чүге дизе Бурган оларны шынчы чоруу дээш шаңнаар болгай. (Номчуптуңар: Ажыдыышкын 2:10; 3:10). Моон чүнү өөренип ап болур бис? Бис дөмей-ле истеп сүрдүрер бис, ынчангаш аңаа белен боор ужурлуг бис (Мф. 24:9, 13; 2 Кор. 12:10). Бо үеде ол сагындырыг биске ылаңгыя ажыктыг.

13, 14. Ажыдыышкын 12-ги эгеде бижээн болуушкуннар Бурганның чонунга кандыг салдар чедирген?

¹³ Бурганның чону «Дээргиниң хүнүнде», азы бистиң хүннеривисте, истеп сүрдүрер деп, Иоанн элчин баш удур чугаалаан. Бурганның Чагыргазы чагырып эгелээри билек, дээрге дайын үнген деп Ажыдыышкын 12-ги эгеде бижээн. Михаилдиң (ол дээрге Иисус Христостуң өске ады) аг-шерии Эрлик болгаш ооң буктары-биле демисежип турган (Ажыд. 12:7, 8). Түңнелинде Бурганның дайзыннары аштыргаш, черже дүжүр октаттырыпкан (Ажыд. 12:9). Оларның хайындан бүгү делегей дүмбей караңгыже дүлнүп, хилинчек-човалаңга хөме алзыпкан (Ажыд. 12:12). Ол болуушкун Бурганның чонунга кандыг салдар чедирген?

¹⁴ Ажыдыышкын ному ол айтырыгга база харыылап турар. Эрлик дээрже дедир эглип шыдавас апарган болгаш, бүгү килеңин черде чурттап чоруур шилип чагдырганнарже угландырыпкан. А чүге оларже? Чүге дээрге олар — «Иисусту шынныы-биле херечилээн» Бурганның Чагыргазының «элчилери-дир» (2 Кор. 5:20; Ажыд. 12:17;  Эф. 6:19, 20). Эрлик шилип чагдырганнарга удур кандыг арганы ажыглаан?

15. Ажыдыышкын 11-ги эгеде ийи херечи кымнарны илередип турар база олар-биле чүү болган?

¹⁵ Чагырга ажылын удуртуп турган акыларже халдаар кылдыр, Эрлик шивишкиннерин ыдыпкан. 1918 чылда удуртулга ап турган сес акыйны меге буруудаткаш, кара-бажыңга хөй чылдар ишти олуртуп каан. Ажыдыышкын номунда ол акыларны өлүртүп алган «ийи херечи» кылдыр көргүскен (Ажыд. 11:3, 7—11) *. Кижи бодаарга, оларның ажыл-херээ буурап калган ышкаш.

16. 1919 чылда байдал хенертен канчаар өскерли берген база ол үеден тура Эрлик чүнү канчап турар?

¹⁶ Ажыдыышкын 11-ги эгеде улаштыр «ийи херечи» дирлип келир деп бижээн. Ол өттүр билген медеглел канчаар күүсеттинген? Байдал хенертен өскерли берген. Чыл безин четпээнде, 1919 чылдың мартта, демги акыларны хостапкан. Соонда оларны долузу-биле агарткан. Оон ол акылар суртаалдаар болгаш өөредир ажылын удуртуп кирипкен. Ынчаарга Эрлик дүжүп берипкени ол бе? Чок. Ол Бурганның шупту бараалгакчыларын истеп сүрүүшкүннер «чууй шаап аппарзын дээш, аксындан сугну хемгилештир үндүр бүлгүрүп[кен]» (Ажыд. 12:15). Ынчангаш бистиң кижи бүрүзүнден «шыдамык чорук болгаш бүзүрел негеттинер» (Ажыд. 13:10).

17. Эрлик соксаал чок халдап турза-даа, Бурганның чонунга дуза кайыын кээп турар?

¹⁷ Ажыдыышкын 12-ги эгеден алырга, Бурганның чону дузаны алыр, арта манавааны черден. Өскээр чугаалаарга, «чер» истеп сүрүүшкүннерниң «суун» ажырыптар (Ажыд. 12:16). Ол өттүр билген медеглел канчаар күүсеттинип турар? «Черге» бо делегейниң чамдык тургузугларын, чижээ, суд тургузуун, хамаарыштырып болур. Кижи бодаарга, ол Эрликтиң сонуургалдарын камгалаар ужурлуг. Ынчалза-даа, үе-үе болгаш, судтар Бурганның чонунуң талазын ээлеп турар. Иегованың Херечилери хөй санныг юридиктиг херектерни ойнап алган. Ооң ачызында олар хостуг суртаалдап чоруур. Олар ол хосталганы шын ажыглап, Иеговага бүгү күжү-биле бараалгаар дээш кызып турар (1 Кор. 16:9). Ол кайыын көскү?

18. Сөөлгү хүннерде биске кандыг ажыл эң чугула?

 ¹⁸ Иисустуң баш удур чугаалааны дег, бо делегейниң төнчүзү келбээнде, ооң эдерикчилери «Дээрниң Чагыргазының дугайында... Буянныг Медээни» бүгү делегейге медеглээр (Мф. 24:14). Ажыдыышкын 14:6-да «чер кырында чурттаан бүгү улуска: янзы-бүрү дылдарлыг сөөк-язы, аймак-чон бүгүдезинге медеглээр дээни мөңге Буянныг Медээлиг» төлээниң дугайында чугаалаан. Ынчап кээрге, биске суртаал ажылынга дээрниң төлээлери дузалажып турар.

19. Иеговага ынак улус буянныг медээден аңгыда, кандыг медээни чарлаар?

¹⁹ Бурганның бараалгакчылары чүгле буянныг медээни суртаалдавас. Оон ыңай олар Ажыдыышкын 8-тен 10-га чедир эгелерде бижээн дээрниң төлээлериниң ажылынга база дузалажыр ужурлуг. Ол дээрниң төлээлери Бурганның дайзыннарын чүү манап турарын чарлап турар. Ынчангаш Иегованың Херечилери Эрликтиң делегейиниң аңгы-аңгы кезектеринге удур шииткел медээзин чедирип турар. Ол медээни «долу болгаш отка» дөмейлээн (Ажыд. 8:7, 13). Кижилер төнчү үе келген деп билип каар ужурлуг. Чүгле ынчан олар чуртталгазын бүрүнү-биле өскерткеш, «Дээрги-Чаяакчының килеңиниң хүнүнде» камгалалды алыр (Соф. 2:1—3). Ынчалза-даа ол медээни улус дыңнаксавас болганда, эрес-дидим болур ужурлуг бис. А коргунчуг хилинчек үезинде шииткел медээзи оон-даа диңмиттиг болгаш дорт кылдыр дыңналыр (Ажыд. 16:21).

20. Дараазында ийи статьяга чүнү сайгарар бис?

²⁰ Ажыдыышкын номундан «өттүр билген бо медеглел» бистиң кичээнгейивиске төлептиг, чүге дээрге бис аңаа дорт киржип турар бис (Ажыд. 1:3). Шенелделерге туруштуг артып, Бурганның медээзин эрес-дидим чугаалаары ындыг кончуг белен эвес. Ынчалза-даа Ажыдыышкын номун улаштыр сайгарар болзувусса, хей-аъдывыс көдүрлүр. Бис дараазында ийи статьядан: 1) Бурганның дайзыннарын чүү манап турарын, 2) Иеговага шынчы арткан улусту Ооң канчаар шаңнаарын билип алыр бис.