1. Бистиң кижи бүрүзү кандыг шыңгыы шиитпир хүлээр ужурлуг?

 БИСТИҢ кижи бүрүзү шыңгыы шиитпир үндүрер ужурлуг: Октаргайның Чаяакчызы Иегованың талазын ээлеп аар азы Ооң каржы дайзыны Эрликтиң талазынга туруп аар. Мында оон өске шилилге чок. Ол шиитпиривистен бистиң мөңге чурттаар-чурттавазывыс хамааржыр (Мф. 25:31—33, 46). «Коргунчуг хилинчек» үезинде Бурганның шынчы бараалгакчылары камгалал алыры-биле демдектеттирген боор (Ажыд. 7:14; Иез. 9:4, 6). А араатанның таңмазы-биле демдектеттирген улус узуткаттырар (Ажыд 14:9—11).

2. а) Еврейлерге 10:35—39-та сөстер бисти чүнү кылырынче оттуруп турар? б) Ажыдыышкын ному биске канчаар дузалап болур?

² Номчуптуңар: Еврейлерге 10:35—39. Бир эвес Иегованың талазын шилип алган болзуңарза, ол эң мерген угаанныг шиитпир-дир. Ийе, өске улус база ындыг шиитпирни хүлээп алзын деп күзеп, оларга дузалажыксап турар силер. Силерге аңаа Ажыдыышкын ному кайгамчык дуза боор. Ында Иегованың башкарылгазын бүрүнү-биле деткип турар улусту кандыг кайгамчык шаңнал манап турарын база Ооң дайзыннары-биле чүү болурун бижээн. Бо чугула медээден кижиниң амы-тыны хамааржыр. Ынчангаш Иеговага бараалгаар дээн хууда шиитпиривисти быжыктырар дээш база хөй-ле улуска ындыг шилилгени кылып алырынга дузалаар дээш, ону сайгарыптаалыңар.

3. Бо статьяга чүнү сайгарар бис?

³ Бо статьяга ийи айтырыг сайгарар бис: 1) Бурган Ооң башкарылгазын деткип турар улуска кандыг келир үени белеткээн база 2) Ажыдыышкын номунда кызыл араатанның талазын ээлеп алыр улусту чүү манап турар?

4. Иоанн көөрге, Иисус дээрде кымнар-биле кады турган?

⁴ Иоанн элчин көстүүшкүнүнге Иегованың талазын ээлеп, мөңге амыдыралды шаңнал кылдыр ап турар ийи бөлүк улусту көрген. Бирги бөлүк — Иисус-биле кады дээрге чагырар 144 000 кижи-дир. Оларны черден шилип алган (Ажыд. 7:4; 14:3, 4). Олар Иисус-биле кады дээрлерде Сион даанда турар (Ажыд. 14:1). Ол Чагырга черни чагырар (Ажыд. 5:9, 10).

5. 144 000 кижиниң арткан улузу-биле чүү болур?

⁵ Сөөлгү чүс чылдар дургузунда Иегова муң-муң христианнарны ыдыктыг сүлдези-биле шилип чаап каан (Лк. 12:32; Рим. 8:17). Өлүмүнге чедир Иеговага шынчы арткан улус ам дээрлерде. Иоанн элчинниң сөстеринден алырга, сөөлгү хүннерде 144 000 шилип чагдырганнарның черге чүгле кажы артып каар (Ажыд. 12:17). Коргунчуг хилинчек эгелээриниң бетинде ол христианнар «дириг Бурганның таңмазы-биле» демдектеттирер (Ажыд. 7:2, 3). Оон коргунчуг хилинчектиң бир кезек үезинде оларны дээрже аппаарга, олар аңаа Иисус-биле кады чагырар (Мф. 24:31; Ажыд. 5:9, 10).

6, 7. а) Иоанн оон ыңай кандыг бөлүктү көрүп каан база оларның дугайында чүнү билир бис? б) Ажыдыышкын 7-ги эге шилип чагдырганнарга-даа, мөөң чонга-даа чүзү-биле солун?

⁶ Оон Иоанн өске бөлүктү көрүп каан. Ол оларны «мөөң чон» деп адаан. 144 000 кижиге бодаарга, оларның саны эңмежок (Ажыд. 7:9, 10). Оларның дугайында чүнү билир бис? Иоанн мынча дээн: «Бо дээрге коргунчуг хилинчекти көрүп эрткен улус-тур. Олар боттарының хевин Хураганның ханынга чуггаш, агартыр арыглап алган» (Ажыд. 7:14). Ол «мөөң чон» чер кырынга сөс-биле дамчыдып болбас, кайгамчык дээн байдалга чурттаар (Ыд. ыр. 36:9—11, 27—29; У. ч. 2:21, 22; Ажыд. 7: 16, 17).

⁷ Ажыдыышкын 7-ги эгеде дээрге хааннар апаар база черге мөңге чурттаар улустуң дугайында бижээн. Силер оларның аразында бодуңарны көрүп тур силер бе? Ону сагыштаалаарын кызыңар. Үезинде Иегованың талазын ээлеп алган ол ийи бөлүктүң кайы хире аас-кежик миннип турарын дамчыдары болдунмас! Ажыдыышкын номунда коргунчуг хилинчектиң дугайында оон ыңай чүнү бижээн? (Мф. 24:21).

8. Коргунчуг хилинчек канчаар эгелээр база хөй улус аңаа кандыг хамаарылгалыг боор?

⁸ Эрткен статьяга сайгарганывыс дег, эрге-чагыргалар Өндүр улуг Вавилонче, делегей чергелиг меге шажыннарже, халдай бээр (Ажыд. 17:16, 17). Шак ынчаар коргунчуг хилинчек эгелээр. А түңнели кандыг боор? Кижилер мөөңү-биле Иегованың Херечилериниң чыыштарынче халчып келир бе? Ажыдыышкын 6-гы эгеден көөрге, ол ындыг болбас. Төөгүнүң ол эң берге үезинде Иеговага бараалгавас улус камгалалды бо делегейниң эрге-чагыргаларындан, садыг-саарылга организацияларындан дилеп эгелээр. Оларның караанга олар, даглар дег, узуткаттынмас ышкаш болур. Бурганның Чагыргазының талазын ээлевээн боорга, Иегова ол улусту Бодунуң дайзыннары кылдыр санаар (Лк. 11:23; Ажыд. 6:15—17).

9. Коргунчуг хилинчек үезинде Иегованың бараалгакчылары чүге өскелерден оранчок ылгалдыг боор база ооң түңнели кандыг болур?

⁹ Коргунчуг хилинчек үезинде Иегованың бараалгакчылары өске улустан оранчок ылгалдыг боор. Олар чүгле Иегова Бурганга бараалгап, «араатанны» деткивейн турар черде чаңгыс бөлүк болур (Ажыд.  13:14—17). Ону көргеш, Иегованың дайзыннарының килеңи кыптыгып үнер. Ынчан чоннар каттыжыышкыны бүгү делегейде Бурганның бараалгакчыларынче халдап кириптер. Оларның шак ындыг угаан чок килеңин Библияда Магогтан Гогтуң халдаашкыны деп адаан (Иез. 38:14—16).

10. Чонунче халдаашкынга Иегова кандыг хамаарылгалыг боор? (Ажыдыышкын 19:19—21).

¹⁰ Аңаа Иегова кандыг хамаарылгалыг боор? Библияда Ооң килеңи кыптыгар дээн (Иез. 38:18, 21—23). Улаштыр чүү болурун Ажыдыышкын 19-ку эгеде тодаргай бижип каан. Гогтуң халдаашкынынче удур харыы доп-дораан кээр. Иегова чонун камгалап, дайзыннарын узуткаар дээш, Иисусту чоргузуптар. Ооң талазынга «дээрниң аг-шерии», Бурганга шынчы дээрниң төлээлери болгаш 144 000 шилип чагдырганнар, турар (Ажыд. 17:14; 19:11—15). Ол дайынның түңнели кандыг боор? Иеговага удурланып турган организациялар болгаш кижилер черниң кырындан кыргыдып-хыдыдар! (Номчуптуңар: Ажыдыышкын 19:19—21.)

11. Ажыдыышкын номунда болуушкуннар кандыг байырлал-биле төнер?

¹¹ «Бис Армагеддонну ажып эртип алдывыс!» «Иегова шупту дайзыннарын канчаар узуткап турарын ийи караам-биле көрдүм!» Бурганның шынчы бараалгакчылары ол сөстерни кайы хире өөрүшкүлүг чугаалап турарын сагыштаалап көрүңер. А ол үеде дээрге чүү болур? Өндүр улуг Вавилоннуң узуткаашкынын байырлаарындан аңгыда, аңаа тускай байырлал болур (Ажыд. 19:1—3). Ажыдыышкын номунда болуушкуннарның төнчүзү Хураганның кудазы-биле төнер (Ажыд. 19:6—9).

12. Хураганның кудазы кажан болур? (Ажыдыышкын 21:1, 2).

¹² Ол куда кажан болур? 144 000 шилип чагдырганнар Армагеддон дайынының мурнунда шупту дээрге чыглып кээр. Чугаажок, ол куда эрттиреринге таарымча чок үе-дир. (Номчуптуңар: Ажыдыышкын 21:1, 2.) Ынчап кээрге, Хураганның кудазы Армагеддон соонда, Бурганның шупту дайзыннары узуткаттырып алырга, болур (Ыд. ыр. 44:4, 5, 14—18).

13. Хураганның кудазының утказы кандыгыл?

¹³ Ол куданың утказы кандыгыл? Аныяктар өгленген соонда чаңгыс мага-бот апаар. Ооң-биле дөмей, ол доора уткалыг кудада Иисус Христос хаан болгаш ооң «кадайы», 144 000 шилип чагдырган кижи, чаңгыс эвилелди тургузар. Ол кайгамчык болуушкуннуң түңнелинде чаа чагырга чер кырын 1000 чыл ишти чагырып кириптер (Ажыд. 20:6).

14, 15. Ажыдыышкын 21-ги эгеде 144 000 кижини чүү чүвеге дөмейлээн? (Журналдың даштында чурукту көрүңер.)

¹⁴ Ажыдыышкын 21-ги эгеде 144 000 кижиниң дугайында кайгамчык чараш кылдыр каастаан Чаа Иерусалим хоорай деп бижээн (Ажыд. 21:2, 9). Ол хоорайны «он ийи даш тавак кырында туткан база Хураганның он ийи элчининиң аттарын даш санай бижээн» (Ажыд. 21:10—14; Эф. 2:20). Иоанн ол даштарны кайы хире топтап көрүп турган деп бодаар силер?! Чүге дизе ол даштарның бирээзинде ооң ады бар болгай. Ол дээрге эң улуг алдар-хүндү-дүр!

¹⁵ Чаа Иерусалимниң өндүр чаагайы-биле кандыг-даа хоорай деңнешпес. Ону «дөрбелчинней туткан, а ооң дооразы узунунга кезе дең». Ооң кол кудумчузун долузу-биле  арыг алдындан туткан. А 12 хаалга бүрүзүн «борбак ак шуру-биле» кылган. Ол хоорайның ханаларын болгаш таваан «янзы-бүрү үнелиг эртине даштар-биле каастаан» (Ажыд. 21:15—21). Иоанн элчин көөрге, ол хоорайда Бурганның өргээзи чок болган. Ол шын, чүге дизе Чаа Иерусалимче кирип турар улус Иегованың чанынга турар болгай (Евр. 7:27; Ажыд. 22:3, 4). Ону Иоанн мынчаар бижээн: «Бурганның өргээзи — Бүрүн Күчүлүг Дээрги-Бурган-Чаяакчы биле Хураган олар боттары болур. Хоорайга хүннүң-даа, айның-даа херээ чок, ону Бурганның өндүр чайынналчаа чырыдып турар, а Хураган — ооң чырыткызы-дыр» (Ажыд. 21:22, 23).

16. Бурганның Чагыргазының Муң чыл башкарылгазында кижилерни чүү манап турар?

¹⁶ Шилип чагдырганнар Чаа Иерусалимниң дугайында боданырга, оларның чүректеринге дыка аянныг минниишкиннер оттуп кээр. Ол хоорайның дугайында өттүр билген медеглел черге чурттаар идегелдиг улустуң сеткил-чүрээн база чылдып чоруур. Чүге дизе Бурганның Чагыргазының Муң чыл башкарылгазында Чаа Иерусалим чер кырынга кайгамчык өскерлиишкиннерни кылыр. Иоанн ол йөрээлдерниң хөйүн көргеш, ону «амыдырал хайырлаар суглуг хем» кылдыр бижээн. Ол хемниң ийи эриинде бүрүлери «бүгү чоннарның кадыкшылын эгидеринге хереглээр» «амыдыралдың ыяштары» үнүп турар (Ажыд. 22:1, 2). Ол үеде черге чурттаар кижилер Бурганның Чагыргазының элбек йөрээлдерин алыр. Чоорту Бурганга шынчы кижи бүрүзү тергиин апаар. Моон соңгаар чуртталгавыска аарыг-даа, ажыг-шүжүг-даа, аарышкы-даа турбас (Ажыд. 21:3—5).

17. Чагырганың Муң чыл башкарылгазының үезинде черге кымнар чурттаар? (Ажыдыышкын 20:11—13).

¹⁷ Чагырганың Муң чыл башкарылгазының үезинде черге кымнар чурттаар? Армагеддонну ажып эрткен улус болгаш чаа делегейге төрүттүнер ажы-төл. Оон аңгыда, Ажыдыышкын 20-ги эгеде өлген улус дирлип кээр дээн. (Номчуптуңар: Ажыдыышкын 20:11—13.) Кымнар дирлип кээр? «Шынчы улус» (Бурганның чок апарган бараалгакчылары) болгаш «шынчы эвес улус» (дириг тургаш, Иегованың дугайында билир аргазы чок турган кижилер) (Аж.-ч. 24:15; Ин. 5:28, 29). Оон ыңай Муң чыл башкарылганың үезинде шупту-ла улус дирилбес.  Үезинде өрү көрдүнүп, Иеговага бараалгаарындан ойталаан улусту Бурган диргиспес. Оларның дыка эки аргазы турган-даа болза, ону ажыглавааннар. Ынчап кээрге, олар черге мөңге чурттаарынга төлеп чок (Мф. 25:46; 2 Фес. 1:9; Ажыд. 17:8; 20:15).

18. 1000 чылдың төнчүзүнде чүү боор?

¹⁸ 1000 чылдың төнчүзүнде кижилер шупту тергиин апаар. Ада́мның кылган бачыдының салдары бүрүнү-биле чиде бээр (Рим. 5:12). Ол үеде кижилер долузу-биле тергиин апаар болганда, Библияда оларга амы-тынны эгидип бээр деп бижээн (Ажыд. 20:5).

19. Сөөлгү шенелдениң сорулгазы кандыгыл?

¹⁹ Иеговадан хая көрнү берзин дээш, Эрликтиң кылып турган шупту халдаашкыннарын Иисус шыдажып эртипкен. Ол кандыг-даа шенелдеге таварышкаш, Бурганга шынчы арткан. Ам Христостуң Муң чыл башкарылгазының төнчүзүнде чүү боорун көрүптээлиңер. Силер тергиин апарган силер. А Эрликти тамыдан хостаптарга, ол кижилерни сөөлгү катап шенээр деп турар (Ажыд. 20:7). Чүү деп бодаар силер, Иисус ышкаш, ол шенелдени ажып эртип шыдаар силер бе? Ынчан кижи бүрүзүнүң ол айтырыгга харыылаар аргазы турар. Ол шенелдеге Бурганга шынчы артар улус мөңге амыдыралды ап, бүрүн хосталганы чедип алыр (Рим. 8:21). А Иеговага удурланыр улус Эрлик болгаш ооң буктары-биле кады кезээ-мөңгеде узуткаттырар (Ажыд. 20:8—10).

20. Ажыдыышкын номунда өттүр билген медеглелдерни сайгаргаш, чүнү миннир-дир силер?

²⁰ Ажыдыышкын деп аттыг «чурукту» сайгарары силерге кайы хире солун болду? Аңаа бодуңарны топтап көөрү аянныг болду бе? Ийе, өске улус база Иегованың талазын ээлеп алзын деп күзээр бис. Ынчан олар бистиң-биле кады Библияның сөөлгү номунда бижиттинген кайгамчык дээн өттүр билген медеглелдерге киржир аргалыг боор (Ажыд. 22:17). Бо статьяларның ачызында бис келир үеде болур болуушкуннарны баш удур көрдүвүс. Ынчангаш Иоанн элчин ышкаш: «Аминь! Дээрги Иисус, чедип келем!» — деп чугаалап тур бис (Ажыд. 22:20).