1. Мерген угаанны чүге чедип алыр ужурлуг бис? (Чугаалар 4:7).

 ҮЕ-ҮЕ болгаш-ла, шыңгыы шиитпирлерни хүлээр апаар бис. Ындыг үелерде Иеговадан мерген угаанны дилээр бис, ол чокта чүү-даа бүтпес (Иак. 1:5). Ынчангаш Соломон: «Мерген угаан эң чугула» — деп бижээн. (Номчуптуңар: Чугаалар 4:7.) Соломон мында анаа мерген угаанны эвес, а Иегованың хайырлаар мерген угаанын чугаалаан (У. ч. 2:6). Ооң сөстери ам-даа ажыглаттынгыр хевээр бе? Амгы үеде бергелеривисти шиитпирлээринге Бургандан мерген угаан биске дузалаар бе? Ынчанмайн канчаар. Аңаа шынзыгып көрээлиңер.

2. Ёзулуг мерген угаанныг апаарынга биске чүү дузалаар?

² Бурунгу үеде ийи эр кижи мерген угааны-биле алдаржаан турган. Оларның дугайында хөйнү билип алыр дээш, үени үндүрер болзувусса, бис база мерген угаанныг апаар бис. Оларның бирээзи — Соломон хаан-дыр. Библияда: «Бурган Соломонга мерген угаанны, чүве эндевес ханы угаанны... хайырлаан» — дээн (3 Хаан. 4:29). Ийи дугаары — Иисус Христос. Ооң мерген угаанының дугайында төнчү чок чугаалап болур (Мф. 12:42). Иисустуң дугайында безин мындыг өттүр билген медеглел бижиттинген: «Дээрги-Чаяакчының Сүлдези — мерген угаан биле угаан-сарыыл бээр Сүлде... Ону бүргей аптар» (Иса. 11:2).

3. Бо статьяга чүнү сайгарар бис?

³ Бурганның мерген угаанының ачызында Соломон биле Иисус амгы үениң чугула айтырыгларынга хамаарыштыр ажыктыг сүмелерни берген. Бо статьяга оларның үжүн сайгарар бис: акшага, ажыл-агыйга болгаш бодувуска кандыг хамаарылгалыг болур ужурлуг бис?

4. Соломон биле Иисустуң чуртталгазы чүзү-биле ылгалып турган?

⁴ Соломон эмгежок өнчү-хөреңгилиг, каас-коя амыдыралдыг кижи чораан (3 Хаан. 10:7, 14, 15). А Иисустуң дугайында ынча деп болбас: ооң чурттаар бажыңы-даа, хөй идик-хеви-даа чок турган (Мф. 8:20). Ынчалза-даа оларның кайызы-даа акша-хөреңгиге шын хамаарылгалыг чораан. Чүге дизе оларның мерген угаанының дөзү — Иегова турган.

5. Соломон акша-мөңгүнге кандыг хамаарылгалыг чораан?

⁵ Акша-мөңгүн кижини камгалаар деп, Соломон чугаалаан (Эккл. 7:12). Ийе, акша-биле кижи бодунуң херек чарыгдалдарын дуглап, күзээн чүвезин садып ап болур. Соломон бай-даа турган болза, акшадан артык чугула чүүлдер бар деп билип чораан. Чижээ, ол: «Эки ат-сураг байлакшылдан күзенчиг» — деп бижээн (У. ч. 22:1). Оон ыңай акшага ынак улус бар чүүлүнге сеткили ханмас деп, Соломон демдеглээн (Эккл. 5:9, 11). Оон аңгыда, ол байлакшылга идегээри шуут бодамча чок дээн. Чүге дизе ол кажан-даа болза чиде берип болур (У. ч. 23:4, 5).

6. Иисустуң акша-мөңгүнге хамаарылгазы кандыг турган? (Матфей 6:31—33).

⁶ Иисус база акша-мөңгүнге шын хамаарылгалыг турган. Чижээ, ол чаагай аъш-чемге, суксунга ынак чораан (Лк. 19:2, 6, 7). Ооң бир дугаар хуулгаазынын сактыр-дыр силер бе? Ол сугну дыка аар өртектиг кызыл арага кылдыр хуулдурупкан (Ин. 2:10, 11). А өлүмүнүң хүнүнде Иисус аар өртектиг хептиг турган (Ин. 19:23, 24). Ынчалза-даа ооң чуртталгазынга акша-мөңгүн кол турбаан. Ол өөреникчилеринге мынча дээн: «Кым-даа ийи дээргиге хары угда бараан бооп шыдавас... Силер база Бурганга болгаш акша-мөңгүнге хары угда бараан болуп шыдавас силер» (Мф. 6:24). Иисустуң тайылбырлаанындан алырга, Бурганның Чагыргазы чуртталгавыста кол черни ээлеп турар болза, Иегова хереглелдеривис дээш сагыш човаар. (Номчуптуңар: Матфей 6:31—33.)

7. Акшага шын көрүш Дэниелге кандыг салдарлыг болган?

 ⁷ Акшага шын көрүштүг болурунга дыка хөй акы-угбаларга библейжи дүрүмнер дузалаан. Дэниел дээр бот акывыстың чижээн көрүптээлиңер. Ол мынча дээн: «Элээди тургаш-ла, Бурганга бараалгалды бирги черге салыр деп шиитпирлеп алган мен». Дэниел бөдүүн амыдырап турган болгаш, Иеговага хөйнү кылып шыдаан. Безин ол Вефилге бараалгап турган. Ол улаштырган: «Бо орукту шилип алганымга бичии-даа хараадавас-тыр мен. Бир эвес акша-төгерик меңээ чүден артык чугула турган болза, эңдерик акшаны ажылдап ап болур турган мен. Ынчалза-даа кижи бо үе дургузунда тып алган эш-өөрүн акшага канчап солуур боор? Иеговага бараалгалдан ап турар өөрүшкүмнү акша-биле садып алыры болдунар деп бе? Иегованың меңээ төнчү чок берип турар белектерин акша-биле деңнээри канчап-даа болдунмас». Шынап-ла, кижиниң чуртталгазынга акша эвес, а Бурганга бараалгал кол черни ээлээр ужурлуг деп тода көскү.

8. Соломон ажыл-агыйга шын хамаарылгалыг турган деп чүүден көскү? (Экклесиаст 5:17, 18).

⁸ Ажыл-ижинге өөрүүр арганы Соломон хаан «Бурган хайыразы-дыр» дээн. (Номчуптуңар: Экклесиаст 5:17, 18.) «Карак кызыл ажылдан кезээде орулга кээр» — деп, ол бижээн (У. ч. 14:23). Ол дээрге анаа-ла сөстер эвес-тир. Соломон боду база ажыл-агыйга ынак чораан: ол бажыңнар тудуп, чараш сесерликтерни өстүрүп, виноград шөлдерин тарып турган. Оон ыңай Соломон хоорайларны тудуп турган (3 Хаан. 9:19; Эккл. 2:4—6). Ол ажылды кылырынга дыка улуг күш херек. Чигзиниг чок, Соломонга күжениишкиннериниң түңнелдерин көөрү өөрүнчүг турган. Ынчалза-даа ол аас-кежиктиг болурунга бо бүгү чедишпес деп билип турган болгаш, сеткилиниң ханызындан Иегованың ажыл-херээн кылып чораан. Чижээ, Соломон чеди чыл дургузунда Иерусалимге өндүр-улуг өргээниң тудуун удуртуп турган (3 Хаан. 6:38; 9:1). Ынчап кээрге, ол хаан хүлээлгелерин-даа, Бурганның ажыл-херээн-даа чедиишкинниг күүседип чораан. Ынчалза-даа Иеговага бараалгал өске кандыг-даа ажыл-херектен эргежок чугула деп, ол түңнээн: «Бүгү чугаа төнген, түңнели бо-дур: Бургандан коргуп, Ооң айтыышкыннарын сагып чор» (Эккл. 12:13).

9. Иисуска бызаңчы ажыл чугула черни ээлевейн турган деп чүге чугаалап болур?

⁹ Иисус база кызымаккай ажылдап чораан. Бичиизинден тура ол бызаңчы мергежилди шиңгээдип эгелээн (Мк. 6:3). Ол хөй ажы-төлдүг өг-бүлеге өскен. Ынчангаш өг-бүлезин хандырар дээш ооң киирип турган үлүүн ада-иези үнелеп турганы магатчок. Иисус тергиин кижи болганда, ооң кылган эт-севи дыка бедик шынарлыг турган. Ынчангаш улустуң чагыглары үзүлбес турган. Иисуска база ажылдаары солун турган. Ындыг-даа бол, Иисус Бижилгени шинчилээр үени аңгылап алыр чораан (Ин. 7:15). Иисус суртаал ажылынга бүрүнү-биле киржип эгелээш, улуска мынча дээн: «Эстип-хайлы бээр аъш-чем дээш сагышсыравайн, мөңге амыдыралды берип шыдаар аъш-чем алыр дээш, кызып-кылайыңар» (Ин. 6:27). А Даг кырынга суртаалынга ол: «Эртине-байлааңарны дээрге чыып алыңар» — дээн (Мф. 6:20).

10. Даргаларының сеткилинге кирер дээш, чамдык акы-угбалар чүнү кылып болур?

¹⁰ Иегова ажыл-агыйга шын хамаарылгалыг боорунга биске дузалап турар. Бис  христианнар болганывыста, кызыл күжүвүс-биле амыдырап чоруур бис (Эф. 4:28). Даргалар бистиң кызымак ажылдап турарывысты бо-ла демдеглээр. Иегованың Херечилериниң дугайында улус оон-даа эки бодазын дээш, чамдык акы-угбалар орайга чедир ажылдап турар. Ынчан оларның өг-бүлезинге кичээнгей көргүзер база чыыштың ажыл-херээнге киржир үези-даа каяа артар деп. Ынчангаш ону канчап-даа болдурбаалыңар. Иегова-биле найыралывыс болгаш ажыл-агыйывыс чогуур үелиг боор ужурлуг.

11. Уильям ажылга хамаарыштыр кандыг чугула чүүлдү билген?

¹¹ Ажылга хамаарыштыр кижи өй-тавын билир боор ужурлуг. Уильям дээр аныяк акывыс аңаа боду шынзыккан. Аңаа кайгамчык үлегерни бир удуртукчу акывыс көргүскен. Ол ооң мурнунда Уильямның даргазы чораан. Уильям ол удуртукчунуң дугайында мынча дээн: «Ол кызымак болгаш, ажылын дыка шынарлыг кылыр. Ынчангаш ол клиентилери-биле эки хамаарылгалыг. Ынчалза-даа ажыл шагы төнерге, ол үезин өг-бүлезинче болгаш Бурганга бараалгалче үндүрүп турар. Ол — мээң билирим эң-не аас-кежиктиг улустуң бирээзи-дир!» *

12. Соломон эгезинде бодунче шын көрүштүг турган деп чүге чугаалап болурул? Сөөлзүредир ол кандыг дузакче кире берген?

¹² Соломон Иеговага шынчы бараалгап чорааш, бодунче шын көрүштүг турган. Чагырып эгелеп турган чылдарында ол биче сеткилдии-биле бодунуң дуржулга чогун миннип, Иеговадан дузаны дилеп турган (3 Хаан. 3:7—9). Бодун өрү көрдүнери мелегей чорук деп, Соломон билип турган. Ол мынчаар бижээн: «Буураашкынны — адыыргаары, а аштырыышкынны — улуг тура мурнаар» (У. ч. 16:18). Муңгаранчыг чүүл, сөөлзүредир Соломон боду-ла ол дузакче кире берген: ол бодун эмин эрттир өрү көрдүнүп, Бурганның негелделерин улай-улай үреп  эгелээн. Чижээ, хоойлуда: «Сагыш-хөңнүн дуурайлатпас дизе, хаан кижи эңмежок кадай албазын» — деп тода чугаалаан (Ы. х. к. 17:17). Соломон ол чүүл меңээ хамаарышпас деп бодаан хевирлиг. «Ол 700 даңгына кадайлыг база 300 кул-кадайлыг турган», оларның хөй кезии хары бурганнарның мөгейикчилери турган! (3 Хаан. 11:1—3). Ол мээң-биле чүү-даа болбас деп бодун бүзүредип турган чадавас. Ынчалза-даа Соломон дөмей-ле Иеговага дыңнангыр эвес чоруунуң багай түңнелдерин көрген (3 Хаан. 11:9—13).

13. Иисустуң биче сеткилдииниң дугайында боданыры чүге ажыктыг?

¹³ Иисус биче сеткилдиг болгаш, бодун бичии-даа өрү көрдүнмес турган. Ол черже кээриниң мурнунда Иегова-биле кады хөй-ле кайгамчык улуг ажыл-херектерни кылган. Библияда ооң дугайында мынча дээн: «Дээрде-даа, черде-даа турар... бүгү чүвени... Христосту дамчыштыр чаяаган» (Кол. 1:16). Иисус Адазының чанынга тургаш, чүнү кылып турганын сугга суктуруп турган үезинде сактып келген чадавас (Мф. 3:16; Ин. 17:5). Ынчалза-даа ол аңаа менээргенмээн. Харын-даа ол бодун өскелерден кажан-даа өрү көрдүнмес чораан. Иисус черже «улус Аңаа бараан болзун дээш эвес, харын Боду бараан боору-биле база Бодунуң амы-тынының өртээ-биле хөй улусту хостап аар дээш келген болгай» (Мф. 20:28). Оон ыңай ол бодунуу-биле чүнү-даа кылбас турган (Ин. 5:19). Иисустуң шак ындыг биче сеткилдии — биске кайгамчык үлегер!

14. Иисустуң сөстери боттарывыска шын хамаарылгалыг болурунга канчаар дузалап турар?

¹⁴ Иисус эдерикчилерин боттарынга шын хамаарылгалыг болурунга өөредип турган. Бир катап ол өөреникчилерин: «А силерниң бажыңар дүгүн безин санап каан болдур ийин!» — деп бүзүреткен (Мф. 10:30). Шак ол сөстер боттарын чөгенчиг кылдыр миннир акы-угбаларга ылаңгыя херек. Ынчаар дээрде Адавыс биске улуг кичээнгейни көргүзүп, бистиң кижи бүрүзүн аажок үнелеп чоруур. Иегованың үнелелин чигзиниг адаанга салыр хире кымнар бис бис, акы-угбалар?!  Ол бисти Ооң бараалгакчылары боорунга база чаа делегейге мөңге амыдыралды алырынга төлептиг деп санап турар.

15. а) «Таңныыл суургазының» бир үндүрүлгезинге кандыг сүме турган? б) 24-кү арында чуруктарны көрүңер. Чүгле бодун бодаар кижи чүнү чидирип ап турар?

¹⁵ Бир катап «Таңныыл суургазынга» мындыг сүме турган: «Бис боттарывысты өскелерден дээре бис деп санап, өрү көрдүнмес бис. Ындыг-даа бол, бодувусту өөдежок деп санап, черже киир таптай баспас ужурлуг бис. Боттарывыстың күштүг-даа, кошкак-даа талаларывыска шын көрүштүг болур дээш кызар болзувусса эки. Ооң дугайында бир угбавыс мынча дээн: „Мен ындыг кончуг эки эвес-даа болзумза, каржы-бактың үнер дөзү эвес-тир мен. Менде, шупту улуста дег, багай-даа, эки-даа чаңнар бар“» *. Кижи бодунга шак мындыг хамаарылганы сайзырадып алыр болза, кайы хире ажыктыг-дыр, эскердиңер бе?

16. Иегова чүге мерген угаанын бистиң-биле үлежип турар?

¹⁶ Иегова Библия таварыштыр мерген угаанын бистиң-биле үлежип турар. Ол биске ынак болгаш, аас-кежиктиг болурувусту күзеп турар (Иса. 48:17, 18). Аас-кежикке чедирер эң-не мерген угаанныг орук дээрге Иегованың күзел-соруун бирги черге салыры-дыр. Шак ынчаар кылыр болзувусса, акшага, ажыл-агыйга болгаш бодувуска шын эвес хамаарылганың ужундан тыптыр частырыгларны кылбас бис. Чугаалар 23:15-те Иегова бистиң кижи бүрүзүнге чугаалап турар: «Оглум! Бир эвес чүрээңде мерген угаан бар болза, чүрээмни өөрүшкү ээлээр». Ынчангаш Ооң сеткилин хомудатпаалыңар!