1. Хөй кезиивис кандыг бергелерге таваржып турар?

 БАРААЛГАЛГА сорулганы b салып алгаш, чедип ап шыдавайн барган чүүлүңер турган бе? Мындыг байдал хөй улуска таныш. Чижээ, Фи́лип хөй мөргүүр сорулга салып алган. Оон ыңай ол мөргүлдерин ханы уткалыг болзун деп күзеп турган. Ынчалза-даа мөргүүр үени ол арай деп тып аар турган. Э́рика суртаалга белеткээр ужуражылгаларже озалдавас сорулганы салып алган. Ынчалза-даа ол дөмей-ле озалдаар турган. То́маш Библияны бүдүнү-биле номчуурун каш-даа катап оралдашкан. Ол мынча деп чугаалаан: «Меңээ Библияны номчууру солун эвес турган. Ону төндүр номчуур дээш, үш катап кыскан мен, ынчалза-даа Левит номунга четкеш, соксап каар турган мен».

2. Бараалгалга сорулгаңарны чедип ап шыдавайн турар болзуңарза, чүге муңгараан херээ чок?

² Бир эвес салган сорулгаңарны чедип ап шыдавайн турар болзуңарза, кыскан херээ чок дээни ол бе? Чогум бөдүүн сорулгалар безин хөй үени болгаш күжениишкиннерни негээр. Салган сорулгаларыңарны чедип алырын кызып турарыңар дээрге-ле — Иегова-биле найыралыңарны үнелеп, аңаа эң-не экини бериксеп турарыңар ол-дур. Иегова силерниң күжениишкиннериңерни аажок үнелеп турар. Ол силерден кылып шыдавас чүүлүңерни манавас (Ыд. ыр. 102:14; Мих. 6:8). Ынчангаш чедип ап шыдаар сорулгадан салып алыңар. Бир эвес  силерде ындыг сорулга бар болза, ону чедип алырынга чүү дузалаар? Каш сүмени сайгарыптаалыңар.

3. Сорулганы чедип алыр күзелди сайзырадыры чүге чугула?

³ Бараалгалга сорулганы чедип алыр дизе, күштүг күзелдиг болуру чугула. Күштүг күзелдиг кижи сорулгазын чедип аар дээш, бар шаа-биле кызар. Шак ындыг күзелди парустуг хемени шимчедиринге дузалап турар хатка дөмейлеп болур. Хат үргүлчү хадып турар болза, аян-чорукчу чедер черинге чедиишкинниг чедип алыр. Хат күштүг боор болза, ол аңаа оон-даа дурген чеде бээр. Изиг күзелдиң дугайында база ынча деп болур. Сорулганы чедип алыр дээн күзеливис күштүг-ле боор болза, ону чедип алыры магатчок. Сальвадордан Давид мынча дээн: «Изиг күзелдиг-ле болзуңза, оон-даа артык кызар сен. Сеңээ чүү-даа шаптыктап шыдавас». Сорулганы чедип алыр күзелди сайзырадып алырынга чүү дузалаар?

4. Чүнүң дугайында мөргүп болур бис? (Филипчилерге 2:13). (Ол ышкаш чурукту көрүңер.)

⁴ Сорулганы чедип алыр күзелиңер оон-даа күштүг боор кылдыр мөргүңер. Ындыг күзелди Иегова силерге ыдыктыг сүлдези таварыштыр берип шыдаар. (Номчуптуңар: Филипчилерге 2:13.) Чамдыкта бис бир-ле чүүлдү кылыр ужурлуг деп билип турар болгаш, ону сорулга кылдыр салып алыр бис. Ындыг хөөн макталга төлептиг. Ынчалза-даа ону кылыр күштүг күзелиңер чок болза канчаар? Угандадан Нори́на-биле шак ындыг болган. Ооң өөредир арга-мергежили чедишпес деп бодааш, библейжи кичээлдер эрттирер күштүг күзели чок турган. Ынчалза-даа ол библейжи кичээлдер эрттирер сорулганы салып алган. Аңаа чүү дузалаан? Норина үлешкен: «Иегова меңээ изиг күзелди бээр кылдыр, хүннүң-не мөргүп турган мен. Анаа-ла мөргүвейн, дуржулгалыг башкы боор дээш кызып турган мен. Каш ай эртерге, библейжи кичээл эрттирер күштүг күзелдиг апарган мен. А чыл четпээнде ийи кижи-биле Библияны өөренип эгелээн мен».

5. Бараалгалга сорулганы чедип алыр күштүг күзелдиг болур дээш, чүнүң дугайында боданыр болза эки?

⁵ Иегованың силерге кылып турар чүүлдериниң дугайында ханы боданыңар (Ыд. ыр. 142:5). Павел элчин Бурганның авыралының дугайында ханы бодангаш, аңаа оон-даа хөйнү кылыксап турган (1 Кор. 15:9, 10; 1 Тим. 1:12—14). Иегованың биске кылып турар чүүлдериниң дугайында хөй боданган тудум, сорулгавысты чедип алыр күзеливис улам күштелир (Ыд. ыр. 115:3). Гондурастан бир угбавыс доктаамал эгелекчи болуксап турган. Ол мынча дээн: «Иегованың меңээ кайы хире күштүг ынааның дугайында хөй боданып турган мен. Ол мени бодунуң өг-бүлезинче чалап алган. Ол мени камгалап, мен дээш сагыш човап чоруур. Иеговага ынакшылым оон-даа кыптыга бээрге, доктаамал эгелекчи болур күзелим күштелген».

6. Сорулгаже чүткүүр күзеливисти оон ыңай чүү күштелдирер?

 ⁶ Сорулгаңарны чедип алгаш, кандыг йөрээлдер алырыңарны боданыңар. Кырында чугаалашканывыс Эрикага чүү дузалаанын эскерип көрүңер. Ол мынча дээн: «Суртаалга белеткээр ужуражылгаларже озалдап тургаш, дыка хөй чүүлден чыдып каар турган мен. Бир эвес эртежик кээп турган болзумза, акы-угбалар-биле аралажып, бараалгалдан хөй өөрүшкү ап, суртаалдаар арга-мергежилимни экижидер хөй ажыктыг сүмелерни дыңнап болур турган мен». Эрика үе-шаанда кээри кайы хире ажыктыг болурун бодангаш, сорулгазын чедип алган. Сорулгаңарны чедип алыр чылдагааннарыңарны чүге бижип ап болбас деп? Бир эвес сорулгаңар Библияның номчулгазы азы мөргүл-биле холбашкан болза, Иегова-биле найыралыңар кайы хире быжыг апаарын боданыңар (Ыд. ыр. 144:18, 19). А бир эвес кандыг-бир шынарны сайзырадып алыксап турар болзуңарза, өске улус-биле хамаарылгаңар кайы хире экижип болурун боданыңар (Кол. 3:14). Сорулганы чедип алыксап турар шупту чылдагааннарыңарны саазынга чүге тодаргай бижип ап болбас деп? Ынаар үргүлчү бакылап туруңар. Кырында чугаалашканывыс Томаш мынча дээн: «Сорулгамны чедип алыр чылдагааннарым хөй болган тудум, олче оон-даа кызымаккай чүткүүр чордум».

7. Хулио биле ооң кадайынга сорулгазын чедип алырынга чүү дузалаан?

⁷ Силерни деткиптер улус-биле аралажыңар (У. ч. 13:20). Ху́лио кадайы-биле кады бараалгалын алгыдар сорулганы салып алганнар. Ону чедип алырынга оларга чүү дузалаан? «Бисти сорулгавысче чүткүүрүнче деткиир, кады ооң дугайында чугаалажып болур улус-биле эдержип турган бис. Оларның хөй кезии шак ындыг сорулгаларны чедип алган. Ынчангаш олар биске ажыктыг сүмелерни кадып болур турган. Олар чедиишкиннеривисти сонуургап, бисти сорук киирип турганнар» — деп, Хулио үлешкен.

8. Сорулгаже чүгле күштүг күзелдиг тургаш чүткүүр болзувусса, түңнели кандыг болур? (Ол ышкаш чурукту көрүңер.)

⁸ Ынчалза-даа шыны херек, бистиң шуптувустуң сорулгаже чүткүүр хөңнүвүс чок үелер турар. Ынчаарга олче чүткүп шыдавас бис бе? Чок. Чижээвисче эглип кээлиңер. Бир эвес хат күштүг болза, парустуг хеме дүрген эжиндирер. А бир эвес хат кошкак болза, далайга шуут ыржым-шыпшың апаар. Ынчаарга аян-чорукчу чедер дээн черинге кажан-даа чедип шыдавас дээни ол бе? Албан эвес. Чамдык хемелерде мотор биле эшкииштер бар. Оларның дузазы-биле аян-чорукчу оруун уламчылап болур. Бистиң күзеливис база хатка дөмей. Чамдыкта күзеливис күштүг апаар, а чамдыкта кошкай бээр. А өске хүннерде сорулгавыс дугайында сактыр-бодаар хөңнүвүс безин чок боор. Ынчангаш сорулгавысче чүгле күзеливис тыптып кээр  үеде чүткүүр болзувусса, ону кажан-даа чедип ап шыдавас бис. Аян-чорукчу-биле дөмей, бис база бурунгаар чүткүүр дээш, чеже-даа күзеливис чок болза, өске аргаларны ажыглап болур бис. Ындыг үелерде бот-сагылга чуруму херек апаар, ынчалза-даа түңнели бисти чөгендирбес. Ол аргаларны көөрүнүң мурнунда, баштай бир айтырыгга харыылаптаалыңар.

9. Бараалгалга сорулгаже чүткүүр дээш бодун албадаары чугула бе? Тайылбырлаптыңар.

⁹ Иегова бисти аңаа өөрүшкүлүг болгаш сеткиливис ханызындан бараалгаарывысты күзеп турар (Ыд. ыр. 99:2; 2 Кор. 9:7). Ол дээрге бараалгалга сорулгаларны салыр күзеливис чок болза, ону салган ажыы чок дээни ол бе? Павел элчинниң чижээн көрүптээлиңер. Ол мынча дээн: «Мага-бодумну „чула шаап“, ону бодумга чагыртып чор мен» (1 Кор. 9:25—27). Павел бодунуң күзелинге чагыртпайн, шын чүүлдү кылыр дээш, бодун албадап турган. Иегова ооң бараалгалынга чүүлзүнген бе? Ийе! Ол ону кызымак чоруу дээш шаңнаан (2 Тим. 4:7, 8).

10. Күзеливис чок-даа болза, сорулганы чедип аар дээш кызары чүге чугула?

¹⁰ Павел элчинниң ышкаш, күзеливис чок-даа болза, сорулганы чедип аар дээш кызар болзувусса, Иегова өөрүүр. Кылып турар ажыл-херээвиске ынакшыл эвес, а Бурганга ынакшыл турар болза, Иегова өөрүүр. Павел элчинни йөрээгени дег, Иегова бистиң күжениишкиннеривисти база йөрээр (Ыд. ыр. 125:5). Ол йөрээлдерни көргеш, сорулганы чедип аар дээн күзеливис улам күштелир. Польшадан Люци́на мынча дээн: «Чамдыкта мен, ылаңгыя шылап калгаш, суртаалче барыксавас мен. Ынчалза-даа ынаар баргаш, дыка хөй өөрүшкүнү алыр чордум!» Ам сорулганы чедип аар дээн күзеливис күштүг эвес-даа болза, чүнү кылып болурувусту сайгарыптаалыңар.

11. Бодун туттунуп билир чорукту сайзырадырынга Иегова канчаар дузалаар?

¹¹ Бодун туттунуп билир чорук дугайында мөргүңер. Бодун туттунуп билири дээрге бодалдарын тудуп, шын алдынып билир арга-шинек-тир. Бодун туттунуп билир деп сөс каттыжыышкынын дыңнааш, каржы-бактан дезер кижиниң дугайында бодап кээр бис. Ынчалза-даа ол шынар эки чүүлдер кылырда, ону кылыр күзел чокта база эки херектер кылыры берге турда чугула. Бодун туттунуп билири дээрге ыдыктыг сүлдениң үре-түңнели деп утпаңар. Ынчангаш ол чугула шынарны сайзырадып алырынга дузалаар кылдыр, Иеговадан ыдыктыг сүлдени дилеңер (Лк. 11:13; Гал. 5:22, 23). Кырында чугаалашканывыс Давид мөргүлдүң аңаа канчаар дузалаанын чугаалаан. Ол хууда шинчилелди ында-хаая эвес, а доктаамал эрттириксеп турган. Аңаа чүү дузалаан? «Бодун туттунуп билир чорукту сайзырадырынга меңээ дузалаар кылдыр, Иеговадан дилеп турдум. Ол меңээ дузалаан. Ам хууда шинчилелди доктаамал, дыка эки кылдыр эрттирип турар апарган мен» — деп, Давид үлешкен.

12. Экклесиаст 11:4-те дүрүм сорулгаларга канчаар хамааржып турар?

¹² Таарымчалыг байдалдарны манаваңар. Бо делегейде ындыг байдалдар турбас боор. Оларны манаар болзувусса, сорулгавысты кажан-даа чедип ап шыдавас бис. (Номчуптуңар: Экклесиаст 11:4.) «Таарымчалыг байдалдар турбас. Бис бир-ле чүвени кылып эгелээш, эки байдалды тургузуп ап турар бис» — деп, Дэ́ниел демдеглээн. А Угандадан Пол ажыл-херекти соңгаарлатпас база бир чылдагаанны чугаалаан: «Бергелерге бастыртпайн, шимченип кириптер болзувусса, Иеговага йөрээр чылдагааннарны бээр бис» (Мал. 3:10).

13. Бичии-бичии сорулгалар салыры чүге ажыктыг?

¹³ Бичии чүведен эгелеп алыңар. Сорулгавысты  чедип аары дыка берге ышкаш болза, күзеливис кошкай берип болур. Силерниң байдалыңарда база ындыг болза, сорулгаңарны бичии-бичии кезектерге чүге чарып ап болбас деп? Бир эвес кандыг-бир шынарны сайзырадып алыксап турар болзуңарза, ону бичиилеп илередиңер. А бүдүн Библияны номчуур сорулгалыг болзуңарза, эге дээреде бичиилеп-бичиилеп чүге номчуп болбас деп? Статьяның эгезинде чугаалашканывыс Томаш Библияны бир чыл дургузунда номчуп шыдаваан. Ол мынча дээн: «Мээң сорулгам угдунмас болган деп билип каан мен. Ынчангаш ону чедип аар дээш, бо удаада хүннүң-не чүгле каш абзацты номчуп, оларның дугайында ханы боданып эгелээн мен. Ынчан Библияның номчулгазы меңээ дыка тааланчыг апарган». Чоорту Томаш номчулгаже оон-даа хөй үени үндүрүп эгелээн. Түңнелинде ол Библияны эгезинден төнчүзүнге чедир номчупкан c.

14. Сорулганы чедип алырынга чүү шаптыктап болур?

¹⁴ Муңгаранчыг чүүл, күзеливис чеже-даа күштүг бол база бодувусту чеже-даа албадап турар болзувусса, шупту чүве дең-дески болбас. Чижээ, чамдыкта бистен хамаарышпас байдалдардан сорулганы чедип алыр үевис чок бооп болур (Эккл. 9:11). Чок болза кандыг-бир бергеге таваржы бергеш, холувус сула салдынып, күжүвүс эвээжеп каап болур (У. ч. 24:10). Ол ышкаш тергиин эвес болгаш, сорулгавысты чедип алырынга шаптыктаар частырыгларны кылып азы анаа могап-шылап болур бис (Рим. 7:23, Мф. 26:43). Бо бүгү бергелерни ажып эртеринге биске чүү дузалаар?

15. Сорулгаже чүткүүрү берге апарза, дүжүп берген ажыы бар бе? Тайылбырлаптыңар (Ырлар 144:14).

¹⁵ Болдунмас-даа болза, чедиишкинниг бооп болур силер. Сорулгавыс чедип ап тургаш, бергелерге таваржырывысты Библияда бижээн. Ынчалза-даа ында оларны Иегованың ачызы-биле ажып эртип шыдаар силер дээн. (Номчуптуңар: Ырлар 144:14.)  Кырында көргенивис Филип чедиишкинин мынчаар тайылбырлап турар: «Мээң чедиишкиним каш катап кээп дүшкенимден хамаарышпас. Харын-даа мен туруп келгеш, улаштыр сорулгамче чүткүп турарымче кичээнгей салыр чордум». Кырында чугаалашканывыс Давид мынча деп үлешкен: «Сорулгаларымны чедип шыдавайн баргаш, ону моондак кылдыр эвес, а Иеговага кайы хире ынаамны көргүзер арга кылдыр көөр чордум». Ындыг-даа бол, дөмей-ле бурунгаар чүткүүр болзуңарза, Иегованы өөртүксеп турарыңарны көргүзер силер. А сорулгаңарже чүткүп орарыңарны көргеш, Иегова кайы хире өөрүп турар дер бодаар силер!

16. Аштырыышкындан чүнү өөренип ап болур бис?

¹⁶ Бүтпээн сорулгадан бир-ле ажыктыг чүүлдү өөренип алырын кызыңар. Ооң чүге болдунмайн барганын боданып, бодуңардан айтырыңар: «Дараазында ындыг чүүл турбас кылдыр, чүнү өскертип болур мен?» (У. ч. 27:12). Чамдыкта аштырыышкын шыдавас сорулгавысты салып алганывысты көргүзүп болур. Бир эвес силерниң-биле ындыг болган болза, сорулгаңарның дугайында катап боданыңар. Ынчан ону чедип шыдаар-шыдавазыңарны билип каар силер d. Арга-шинээңерге дүүшпес сорулганы чедип албас болзуңарза, Иегова силерден хая көрүнмес (2 Кор. 8:12).

17. Чедиишкиннеривистиң дугайында боданыры чүге чугула?

¹⁷ Чүнү чедип алганыңарның дугайында боданыңар. Библияда: «Бурган чөптүг, ынчангаш... кылып чоруур ажыл-херээңерни... утпас» — дээн (Евр. 6:10, Чаа делегей). Ынчап кээрге, бараалгалга чүнү чедип алганыңарны утпас болза эки. Чижээ, силер Иегова-биле найыралды сайзырадып, ооң дугайында өскелерге чугаалап азы сугга суктуруп алган силер. Эрткен үеде бараалгалга сорулгаларже канчаар чүткүп, оларны чедип ап турганыңар дег, ам-даа ону кылырын уламчылаңар (Флп. 3:16).

18. Сорулгаже чүткүп тургаш, чүнүң дугайында сактыр болза эки? (Ол ышкаш чурукту көрүңер.)

¹⁸ Аян-чорукчу чедер дээн черинге чедиишкинниг чедип аары ышкаш, Иегованың дузазы-биле бараалгалга сорулгаларны чедип ап шыдаар силер. Ынчалза-даа аян-чорук дыка солун боор деп утпаңар. Ынчангаш сорулгаңарже чүткүп туруңарда, Иегованың силерни канчаар йөрээп, деткип турарын эскерерин кызыңар. Ол силерге улуг өөрүшкүнү албан эккээр (2 Кор. 4:7). Дүжүп бербес болзуңарза, Иегова силерже оон-даа хөй йөрээлдерни кудар (Гал. 6:9).