1, 2. Мөргүлдеривис дугайында боданып турувуста, бажывыска кандыг айтырыг тургустунуп болур?

 «ИЕГОВА мээң мөргүлдеримге харыылап турар бе?» деп кажан-бир боданган силер бе? Хөй акы-угбалар ылаңгыя бергелерге таваржы бергеш, ынчаар боданып турганын үлешкен. Аар-берге байдалга тургаш, мөргүлдеривиске Иегованың канчаар харыылап турарын эскерери биске берге апарып болур.

² Иегова бараалгакчыларының мөргүлдеринге харыылап турар деп чүге чигзинмес бис? Ону көрүптээлиңер (1 Ин. 5:15). Оон ыңай бо айтырыгларны сайгарар бис: мөргүлдеривис чамдыкта чүге харыы чок артып турар ышкаш? Иегова бөгүн мөргүлдеривиске канчаар харыылап турар?

3. Аңаа мөргүүрүвүстү Бурган чүге күзеп турар?

³ Иегова биске дыка ынак база аңаа үнелиг бис деп, Библия бисти бүзүредип турар (Агг. 2:7; 1 Ин. 4:10). Ынчангаш бис Бургандан дузаны дилеп турар бис (1 Пет. 5:6, 7). Бурган биске ооң-биле найыралды кадагалап, бергелерни чедиишкинниг эртеринге дузалажыксап турар.

4. Бараалгакчыларының мөргүлдеринге Иегова харыылап турар деп кайыын билир бис? (Ол ышкаш чурукту көрүңер.)

⁴ Иегова бараалгакчыларының мөргүлдеринге харыылап турган деп Библиядан бо-ла номчуур бис. Кандыг-бир чижекти сактып кээп шыдаар силер бе? Бажыңарга дораан Давид хаан кирип келген чадавас. Ол дыка хөй дайзыннарлыг турган болгаш, Иеговадан үргүлчү дуза дилеп чораан. Бир катап Давид: «[Иегова], мөргүлүмнү дыңна, чалынган үнүмнү кичээнгейге ал, шынчың база чөптүүң ёзугаар меңээ харыыла» — деп дилеп, чаннып турган (Ыд. ыр. 142:1).  Бурган Давидтиң мөргүлдеринге харыылап, ону камгалап турган (1 Хаан. 19:10, 18—20; 2 Хаан. 5:17—25). Давид бичии-даа чигзиниг чок: «Дээрги-Чаяакчы Ону кый деп мөргүүр бүгү улуска... чоок» деп чугаалап шыдаар турган. Бис база шак ындыг быжыг бүзүрелдиг бооп болур бис (Ыд. ыр. 144:18).

5. Иегова бараалгакчыларының мөргүлдеринге кезээде, оларның күзээни дег, харыылап турган бе? Чижектен чугаалаңар. (Ол ышкаш чурукту көрүңер.)

⁵ Иегова мөргүлдеривиске кезээде бистиң күзээнивис дег харыылавас. Чижээ, Павел элчин Бургандан ооң мага-бодундан «тенни» ап кааптарын дилээн. Ооң дугайында ол үш катап тода мөргээн. Иегова ооң мөргүлүнге харыылаан бе? Ийе. Чүгле Павелдиң күзээни ышкаш эвес. Иегова ооң бергезин чайлатпайн, аңаа улаштыр-ла шынчы бараалгаар күштү берген (2 Кор. 12:7—10).

6. Иегова мөргүлдеривиске чүге харыылавайн турар ышкаш бооп болур?

⁶ Бистиң байдалывыста база Иегова чамдыкта күзээнивис дег харыылавас. Ынчалза-даа ол биске кандыг дуза эң эки боорун билир деп чигзинмес бис. Безин ол «дилеп аар азы бодап чоруур бүгү чүүлүвүстен оранчок хөйнү кылып шыдаар» болгай (Эф. 3:20). Ынчангаш күзеп турарывыс ышкаш Бурган мөргүлдеривиске чамдыкта харыылавас. Арта ол манаваанывыс үеде харыылап болур.

7. Чамдыкта чүге өске чүүлдүң дугайында мөргүүр ужурлуг бис? Чижектен чугаалаңар.

⁷ Иегованың күзел-соруун эки билип эгелээш, өске чүүлдүң дугайында мөргүүр болза эки деп көрүп каар бис. Мартин Пётцингер акывыстың чижээн көрүптээлиңер. Кудазының соонда нацисттер ону концлагерьже шөлүпкен. Эгезинде ол Иеговадан хосталганы дилеп, кадайының дугайында сагыш човаар, катап база суртаалдап эгелээр аргалыг апаар дээш мөргүп турган. Ийи неделя эртерге-даа, ол хосталга албаан. Ынчангаш: «Иегова, менден чүнү манап тур сен, көргүзүп берем» деп мөргүп эгелээн. А соонда ол хоругдалда олурар акылар чүнү ажып эртип турарының дугайында боданып эгелээн. Оларның хөй кезии кадайлары база ажы-төлү дээш аажок дүвүреп турганнар. Ынчан Пётцингер акывыс: «Четтирдим Иегова, чаа даалга дээш. Бо акыларны деткиир база быжыктырар кылдыр меңээ дузалажып көр» деп  мөргээн. Хоругдалга олурган тос чыл дургузунда Мартин Пётцингер ону-ла кылып турган!

8. Мөргүп тургаш, чүнүң дугайында сактыры чугула?

⁸ Иегованың күзел-бодалы бар база ол ону айыткан үезинде күүседиптер деп утпас болза эки. Бурган күзел-бодалынга дүүштүр кижилерге амгы үеде дыка хөй хилинчек чедирип турар шупту бергелерниң когун үзер. Ол дээрге бойдус халаптары, аарыглар болгаш өлүм. Иегова күзел-бодалын Чагыргазының дузазы-биле күүседир (Дан. 2:44; Ажыд. 21:3, 4). Амдыызында ол үе келбээнде, Бурган Эрликке делегейни чагырарын чөпшээреп турар (Ин. 12:31; Ажыд. 12:9) b. Бир эвес Иегова улустарның бергелерин амгы үеде шиитпирлеп турган болза, Эрликтиң чагыргазы чедиишкинниг ышкаш боор. Ынчангаш Иегова аазаашкыннарын күүседиринге чедир манаар ужурлуг бис. Ол дээрге Бурган биске дузалавас дивээни ол-дур. Ооң биске дузалап турар каш аргаларын көрүптээлиңер.

9. Иегова биске шиитпир хүлээринге канчаар дузалап болур? Чижектен чугаалаңар.

⁹ Иегова мерген угаанны берип турар. Ол эки шиитпирлер хүлээринге херек мерген угаанны биске бээрин аазап турар. Бургандан мерген угаан биске ылаңгыя кандыг таварылгаларда херек? Кажан бис бүгү чуртталгавысче салдар чедирер, чижээ, өгленир-өгленмес дээн ышкаш шиитпирлерни хүлээп турувуста (Иак. 1:5). Мария c дээр бот угбавыстың чижээн көрүптээлиңер. Ол доктаамал эгелекчи бараалгалынга аажок ынак чораан. Бир катап Мария бир акывыс-биле найыралдажып алган. Угбавыс үлешкен: «Найыралывыс өскен тудум, бот-боттарывысты сонуургап эгелээн бис. Мен шиитпир хүлээр ужурлуг турган мен. Ынчангаш ооң дугайында үр болгаш хөй мөргүп турдум. Иегованың удуртулгазын хереглеп турган-даа болзумза, ол мен дээш шиитпир хүлээвес деп билип турган мен». Иегова ооң мерген угаан дилээн мөргүлүнге харыылаан деп, Мария чигзинмес. Угбавыс ооң харыызын канчаар билип каан? Ол ном-дептерлеривисти ханы шинчилээш, ооң айтырыгларының шупту талаларының дугайында боданырынга дузалаар статьяларны тып алган. Оон ыңай ол Иеговага бараалгап чоруур авазының мерген угаанныг сүмезин кичээнгейге алган. Ол сүме Марияга бодунуң минниишкиннерин эки хынаарынга дузалаан. Түңнелинде ол мерген угаанныг шиитпир хүлээп алган.

10. Иегова бараалгакчыларынга канчаар дузалап турар? Чижектен чугаалаңар. (Филипчилерге 4:13). (Ол ышкаш чурукту көрүңер.)

 ¹⁰ Иегова бергелерни ажып эртер күштү берип турар. Бурган Павел элчинни кагбаан болганда, биске база шенелделерни ажып эртер күштү бээр. (Номчуптуңар: Филипчилерге 4:13, Чаа делегей.) Бе́нджамин дээр акывыска Иегованың канчаар дузалаанын көрээлиңер. Ол аныяк үезиниң хөй кезиин ада-иези болгаш кады-төрээннери-биле Африкага дескеннер турлаанга эрттирген. Ол мынча дээн: «Иеговага таарымчалыг чүүлдерни кылырынга херек күштү оон үргүлчү чаннып, дилеп турган мен. Ол мээң мөргүлдеримге харыылаан. Иегова мээң сагыш-сеткилимге оожургалды, улаштыр суртаалдаарынга эрес-дидим чорукту база быжыг бүзүрелдиг болурунга библейжи ном-дептерни берип турган. Акы-угбалар-биле болган таварылгаларны номчааш база Иегованың оларга канчаар дузалаанын билип кааш, аңаа шынчы артар шиитпирим улам быжыккан».

11, 12. Иегова акы-угбалар таварыштыр мөргүлүвүске канчаар харыылап болур? (Ол ышкаш чурукту көрүңер.)

¹¹ Иегова биске акы-угбалар таварыштыр дузалап турар. Өлүрүнүң мурнундагы дүнезинде Иисус изиг мөргүп турган. Ол Иеговадан чүнү дилеп турганыл? Ол Бурганның адын бак атка киирген кижи кылдыр буруудадырын күзевээн. Ынчалза-даа Иегова ону оон чайлатпаан. Ол Оглунга канчаар дузалашканыл? Иисустуң акыларының бирээзин, дээрниң төлээзин, ону быжыктырары-биле чоруткан (Лк. 22:42—44). Иегова чыышта акы-угбаларывыстың кайы-бирээзин бисче долгап азы кириптер кылдыр база оттуруп болур. Ынчангаш акы-угбаларга «эки сөс» чугаалаар аргаларны кижи бүрүзү дилеп болур (У. ч. 12:25).

¹² Ашаа чок апарган соонда, каш неделя эрткенде, Ми́риам-биле мындыг чүүл болган. Ол бажыңынга чааскаан оожургап чадап, ыглап-ла орган. Идегелин ышкынып, өкпе-чүрээ аарышкыдан саргып турган болгаш, Мириамга бир кижи-биле  чугаалажыры херек турган. Ол мынча деп үлешкен: «Улусче долгаар күжүм безин чок турган. Ынчангаш Иеговага анаа мөргүп турдум. Ол-ла дораан өг-бүлевистиң чоок эжи болур удуртукчу менче долгапкан». Ол акывыс өөнүң ишти-биле угбавысты оожуктурган. Олче долгаптар кылдыр, акывысты Иегова оттурган деп, Мириам бүзүреп турар.

13. Иегова аңаа бараалгавайн турар улус таварыштыр мөргүлдерге канчаар харыылап болур? Чижектен чугаалаңар.

¹³ Иегова аңаа бараалгавайн турар улус таварыштыр биске дузалап шыдаар (У. ч. 21:1). Чижээ, Артаксеркс хаан Неемияны Иерусалимче баргаш, хоорайны катап тутсун дээш салыптар кылдыр, Иегова ону сагыш алындырыпкан (Неем. 2:3—6). Амгы үеде Иегова аңаа бараалгавайн турар улус таварыштыр биске база дузалап болур.

14. Су Цин-биле болган таварылгадан чүнү сонуургадыңар? (Ол ышкаш чурукту көрүңер.)

¹⁴ Су Цин дээр угбавыска Иегова бир эмчи таварыштыр дузалаан. Ооң оглу сагыш аарыының кезек хевирлери-биле аарып турар. Кажан оглу бедик черден кээп дүшкеш, кемдей бээрге, ону ажаап-тежээр дээш, Су Цин ашаа-биле ажылындан үнер ужурга таварышкан. Оларның өг-бүлези акша-төгерик талазы-биле бергедеп эгелээн. Су Цинниң улаштыр демисежир күжү мырыңай чок калган. Ол Иеговадан дуза дилеп, аңаа сагыш-сеткилин тө каап турган. Оларның байдалын бир эмчи билип каан. Түңнелинде олар күрүнеден дузаны болгаш бичии чурттаар бажыңны алганнар. Ооң соонда Су Цин мынча дээн: «Бис Иегованың холун көрген бис. Ол шынап-ла мөргүлдерни дыңнап турар» (Ыд. ыр. 64:3).

15. Бир угбавыс Иегова ооң мөргүлдеринге харыылап турганын канчаар билип каан?

¹⁵ Иегова кезээде бистиң мөргүлдеривиске кайгамчыктыг арга-биле харыылаар деп манавас болзувусса эки. Ынчалза-даа Бурганның харыы бүрүзү биске аңаа шынчы артарынга дузалап турар. Ынчангаш ооң канчаар харыылап турарын эскерер дээш кызыңар. Йо́ко дээр угбавыска мөргүлдери харыы чок артып турар ышкаш болган. Соонда ол Иеговадан чүнү дилеп турганын бижип эгелээн. А үе эрткенде, бижип алган чүүлүн катап көрген. Ол чүнү эскерип каан? Иегова ооң уттупкан мөргүлдериниң  хөй кезиинге безин харыылаан болган. Шуптувус Иегованың мөргүлдеривиске канчаар харыылап турарының дугайында, үе-үе болгаш-ла, ханы боданыр ужурлуг бис (Ыд. ыр. 65:19, 20).

16. Бүзүреливис чүден көскү? (Еврейлерге 11:6).

¹⁶ Бүзүреливис чүгле мөргүп турувуста эвес, а мөргүлдеривистиң кандыг-даа харыызын хүлээп турарывыстан база көскү. (Номчуптуңар: Еврейлерге 11:6.) Чижээ, Майк биле ооң өөнүң ишти Крисси Вефилге бараалгаар сорулгалыг турган. Майк мынча деп үлешкен: «Бис хөй чылдар дургузунда анкетаны долдуруп, сорулгавыстың дугайында Иеговага үргүлчү мөргүп турган бис. Ынчалза-даа бисти ынаар чалаваан». Ынчалзажок Майк биле Крисси бараалгалга оларны каяа ажыглаарын Иегова эң эки билир деп чигзинмээн. Ол чүткүлдүг бараалгакчылар шыдаар шаа-биле бараалгаарын уламчылаан. Суртаалчылар чедишпес черге олар доктаамал эгелекчилеп, организациявыстың тудуг проектилеринге киржип турганнар. Бөгүн ол өг-бүле эргий кезиир бараалгалда. Майк мынча дээн: «Иегова мөргүлдеривиске чамдыкта бистиң күзээнивис дег харыылавас. Ынчалза-даа ол мөргүлдеривиске харыылап турган, безин манаваанывыс ышкаш кылдыр».

17, 18. Чүү чүвеге чигзинмес бис? (Ырлар 85:6, 7).

¹⁷ Номчуптуңар: Ырлар 85:6, 7. Иегова ооң мөргүлдерин дыңнап, оларга харыылап турар деп, ыр күүседикчизи Давид чигзинмес турган. Силер база аңаа бүзүреп болур силер. Бо статьяга сайгарган чижектеривис Иегова биске бергелерни ажып эртер күштү база мерген угаанны албан бээр деп бүзүредип турар. Ол кады бүзүрээн ха-дуңмавыс база аңаа бараалгавайн турар улус таварыштыр дузалап болур.

¹⁸ Ийе, Иегова чамдыкта мөргүлдеривиске күзээнивис дег харыылавас. Ынчалза-даа ол оларга албан харыылаар деп билир бис. Ол биске өй-шаанда херек чүүлдү бээр. Ынчангаш Иеговага бүзүрел-биле улаштыр мөргүүрүн уламчылаңар. Амгы үеде Иегова силер дээш сагыш салып чоруур база чаа делегейге бүгү амылыгларның күзээн чүвезин хандырар деп чигзинмес бис (Ыд. ыр. 144:16)