1. Иегова бараалгакчыларын чүү чүвеже оттуруп турар? (Ол ышкаш чурукту көрүңер.)

 АРГАЛАЛ, сүме херек апаарга, кымче баар ийик бис? Иеговага мөргүүр болгай бис. Ол бисти ону кылырынче боду оттуруп турар. Ол бараалгакчыларының аңаа үргүлчү мөргүүрүн күзеп турар. Библияда безин: «Соксаал чок мөргүлдеңер» — деп бижээн (1 Фес. 5:17). Бурганга кажан-даа мөргүп, чуртталгага херек удуртулганы оон дилеп болур бис (У. ч. 3:5, 6). Иегова — аажок беримчелиг Бурган болгаш, каш-даа катап мөргүүрүн чөпшээрээн.

2. Бо статьяга чүнү сайгарар бис?

² Бис мөргүүр аргавысты аажок үнелээр бис. Ындыг-даа бол, дыка чай чок болгаш, хөй кезиивиске мөргүүр үени тып алыры берге. Оон ыңай мөргүлдеривистиң шынарын экижидер болза эки деп көрүп каап болур бис. Эки чүүл, ооң дугайында хөй ажыктыг сүмелер Библияда бар. Мөргүүр үени аңгылап алырынга Иисустуң чижээ биске канчаар дузалаарын бо статьяга көөр бис. Мөргүлдеривис шынарлыг болзун дээш чүнүң дугайында мөргүп болур бис? Беш чугула мөргүүр теманы сайгарыптаалыңар.

3. Иисус мөргүл дугайында чүнү билир турган?

³ Иегова бараалгакчыларының мөргүлдерин аажок үнелээр деп, Иисус билир турган. Ол черже кээриниң мурнунда Адазының мөргүлдерге канчаар харыылап турарын көрген. Чижээ, Аннаның, Давидтиң, Илияның база өске-даа шынчы бараалгакчыларының сеткилинден мөргүлдеринге Иегова харыылап турда, Иисус ооң чанынга турган (1 Хаан. 1:10, 11, 20; 3 Хаан. 19:4—6; Ыд. ыр. 31:5). Ынчангаш  Иисус өөреникчилерин үргүлчү мөргүүрүнге база Иегова оларга албан харыылаар деп чигзинмес кылдыр өөредип чораан (Мф. 7:7—11).

4. Иисустуң чижээнден мөргүлге хамаарыштыр чүнү өөренип алыр бис?

⁴ Иисус канчаар мөргүүрүнүң чижээн өөреникчилеринге арттырып каан. Черге бараалгалының үезинде ол үргүлчү Иегова-биле чугаалажыр чораан. Мөргүлге үени аңгылап аары аңаа чугула турган. Чүге дизе ол үргүлчү хөй улус аразынга турган болгаш, ооң хостуг үези эвээш турган (Мк. 6:31, 45, 46). Иисус чааскаан артып калгаш, мөргүп алыр дээш, кара даң бажында туруп турган (Мк. 1:35). Бир катап ол чугула шиитпир хүлээр дээш, дүннү өттүр мөргүп келген (Лк. 6:12, 13). Оон аңгыда, өлүрүнүң мурнунда дүне чаңгыс удаа эвес мөргээн, чүге дээрге ооң черге бараалгалының эң-не берге үези кел чыткан (Мф. 26:39, 42, 44).

5. Иисусту канчаар өттүнүп болур бис?

⁵ Бис чеже-даа чай чок болзувусса, мөргүлче үени үндүрери чугула деп, Иисустуң чижээ бисти өөредип турар. Мөргүүр үени графигивисче киирер апаар чадавас бис. Чижээ, даң бажында эртежик туруп азы кежээ бичии орай удуп болур бис. Шак ынчаар Иегованың ол тускай белээн үнелеп турарывысты көргүзер бис. Линн дээр угбавыс мөргүлдүң үнелиин билип кааш, сагыш-сеткили дойлуп, өөрүп четтирип турган. Ол мынча деп үлешкен: «Иегова-биле кажанда-даа чугаалажып болур арга — ол мээң эң-не чоок өңнүүм деп чүүлдү көргүскен. Ынчан мен мөргүлдеримни оон-даа экижидип алыксай берген мен». Хөй кезиивис база ындыг минниишкиннерлиг. Ынчангаш мөргүп болур беш чугула теманы сайгарыптаалыңар.

6. Ажыдыышкын 4:10, 11-ден алырга, Иегова чүү чүвеге төлептиг?

⁶ Иегованы алгап-мактаңар. Иоанн элчин сүртенчиг көстүүшкүнге дээрде 24 удуртукчунуң Иегованы алгап-мактап турарын көрген. Олар: «Бурганывыс алдарга, мактал-хүндүге... төлептиг сен» — деп турган. (Номчуптуңар: Ажыдыышкын 4:10, 11.) Шынчы дээрниң төлээлериниң Иегованы алгап-мактаар чылдагааннары база хөй. Олар дээрде ооң-биле кады чурттап турар болгаш, ону дыка эки билир. Олар Бурганның канчаар алдынып  турарын база көрүп турарлар. Ынчангаш олар ону алгап-мактап чоруур (Иов 38:4—7).

7. Чүү дээш Иегованы алгап-мактап болур бис?

⁷ Бис база мөргүлдеривиске Иегованы алгап-мактаар болзувусса эки. Чижээ, аңаа чүге ынаавысты база ону чүге магадап турарывысты чугаалап болур бис. Библияны номчуп, шинчилеп тургаш, Иегованың силерге ылаңгыя чараш шынарларын эскериңер (Иов 37:23; Рим. 11:33). Оон Иеговага минниишкиннериңерни чугаалап бериңер. Оон ыңай Бурганны биске база чыышта ха-дуңмаларга дузалажып турары дээш, алгап-мактаңар. Ол бис дээш үргүлчү сагыш човап, бисти камгалап турар (1 Хаан. 1:27; 2:1, 2).

8. Иеговага чүү дээш четтиргенивис илередип болур бис? (1 Фессалоникчилерге 5:18).

⁸ Иеговага өөрүп четтириңер. Аңаа четтиргенивисти илередир чылдагааннарывыс хөй. (Номчуптуңар: 1 Фессалоникчилерге 5:18.) Бүгү бар эки чүүлдеривис дээш аңаа четтиргенивисти чугаалаалыңар. Чүге дизе кандыг-даа буянныг белектер оон кээп турар болгай (Иак. 1:17). Чижээ, чараш планетавыс дээш база өске-даа кайгамчык чаяалгалар дээш четтиргенивисти илередип болур бис. Оон аңгыда, амы-тынывыс, өг-бүлевис, эш-өөрүвүс база идегеливис дээш, аңаа «Четтирдим!» деп чугаалап болур бис. Ол ышкаш ооң-биле чоок өңнүктежир аргалыг болганывыс дээш Бурганга четтиргенивисти илередип болур бис.

9. Иеговага өөрүп четтиргенивис илередир дээш, чүге хөй күш үндүрер апаар бис?

⁹ Иеговага хууда чүү дээш четтиргенивисти илередип болурувустуң дугайында ханы боданыры чугула. Ону кылыр дээш, күш үндүрер чадавас бис. Чүге дизе бо делегейде улус чүгле алырын бодап чоруур. Хөй улус бар чүүлү дээш четтиргенин илередирин билбес. Оларны өттүнер болзувусса, бистиң мөргүлдеривис чүгле дилеглерден тургустунган апаар. Ону болдурбас дээш, Иегованың биске кылган бүгү чүүлү дээш четтиргенивисти илередиилиңер (Лк. 6:45).

10. Холун сула салбазынга бир угбавыска өөрүп четтирген хөөн канчаар дузалаан? (Ол ышкаш чурукту көрүңер.)

¹⁰ Өөрүп четтиргенин илередип билир улуска бергелерни ажып эртери белен боор. Кюнг-Сук b дээр угбавыстың чижээн көрүптээлиңер. Ол өкпезинде өөскүп турар ыжыктыг болган. Ол үлешкен: «Бо аарыг меңээ дыка аар согуг болган. Шупту чүүлдү чидирип алган ышкаш болган мен... база аажок коргуп турган мен». Угбавыска ол бергени ажып эртеринге чүү дузалаан? Кежээниң-не угбавыс бажыңының крышазынче үнгеш, ол хүнде Иегованың берген беш йөрээли дээш өөрүп четтиргенин ыыткыр  илередип турган. Ооң ачызында ол оожургап, Иеговага кайы хире ынаан чугаалаксай бээр турган. Иегова шынчы бараалгакчыларынга бергелерни ажып эртеринге дузалап турар деп, угбавыс бодунга көрген. Чуртталгавыста йөрээлдер бергелерге бодаарга хөй деп, ол билип каан. Бергелеривис төнмес-даа болза, Кюнг-Сук ышкаш, Иеговага өөрүп четтирер чылдагааннарывыс хөй. Мөргүлдеривиске Иеговага четтиргенивисти илередир болзувусса, бергелерге торулбайн, сагыш-сеткиливиске оожургалды миннир бис.

11. Иисустуң дээрже чоруй барганының соонда, ооң өөреникчилеринге чүге эрес-дидим чорук херек турган?

¹¹ Эрес-дидим суртаалдаарынга дузалаар кылдыр, Иеговадан дилеңер. Иисус дээрже чоруурунуң бетинде өөреникчилеринге олар «Иерусалимге, бүгү Иудеяга, Самарияга база чер-делегейниң кыдыынга чедир» суртаалдаар деп сагындырган (Аж.-ч. 1:8; Лк. 24:46—48). Удатпаанда иудей шажын башкарыкчылары Пётр, Иоанн элчиннерни тудуп алгаш, Синедрионче эккелген. Олар Бурганның шынчы бараалгакчыларынга суртаалдаарын хоруп, безин оларже кыжанып турган (Аж.-ч. 4:18, 21). Пётр биле Иоанн канчалган?

12. Ажыл-чорудулга 4:29, 31-ден алырга, өөреникчилер чүнү кылган?

¹² Оларның кыжаныгларынга Пётр биле Иоанн мынча дээн: «Бодап көрүңер даан, Бурганга эвес, силерге чагыртырын Ол чүүлзүнер бе? Бис көрген болгаш дыңнаан чүвевис дугайында ыыттавайн барып шыдавас бис» (Аж.-ч. 4:19, 20). Кажан Пётр биле Иоанны салыптарга, олар Иеговадан ооң күзел-соруун күүседиринге дузалаар кылдыр дилеп эгелээн. Олар мынча деп мөргүп турган: «Сээң медээңни коргуш чок суртаалдаар күштү чалчаларың биске хайырлам». Иегова оларның сеткилинден дилээн мөргүлүнге харыылаан. (Номчуптуңар: Ажыл-чорудулга 4:29, 31.)

13. Джин Хёктуң чижээ бисти чүү чүвеге өөредип турар?

¹³ Иисустуң ол өөреникчилери дег, эрге-чагыргалар суртаал ажылын хоруп-даа каан болза, суртаалдаарын соксатпас бис. Джин Хёк дээр акывыстың чижээн көрүптээлиңер. Ону христиан нейтралитет сагып турар боорга, кара-бажыңга олуртуп каан. Аңаа ол камерада чааскаан олурар хоругдаттырганнарга аъш-чем дажып турган. Ынчалза-даа олар-биле акывыс кандыг-даа теманың, ооң санында Библияның дугайында чугаалашпас ужурлуг турган. Джин Хёк, арга тыптып кээрге-ле, алыс шынның дугайында эвилең-ээлдек чугаалап болур эрес-дидим чоруктуң дугайында мөргүп турган (Аж.-ч. 5:29). Ол мынча деп үлешкен: «Иегова мээң мөргүлдеримге харыылаан база эрес-дидим чорукту, мерген угаанны берген. Мен камераның эжиинге беш минут иштинде библейжи кичээлдерни хөйү-биле эрттирип турган мен. Эртенги үеде хоругдаттырганнарга үлээр чагааларны кежээ бижип ап турдум». Джин Хёк ышкаш, Иеговага суртаалдаарынга херек эрес-дидим чорукту, мерген угаанны бээр кылдыр мөргүп болур бис.

14. Бергелерни ажып эртеринге биске чүү дузалаар? (Ырлар 36:3, 5).

¹⁴ Бергелерни ажып эртеринге дузалаар кылдыр, Иеговадан дилеңер. Бистиң хөй кезиивис багай кадыкшылдан хинчектенип азы сагыш-сеткили дүвүреп чоруур. Чамдык улус чоок кижизин чидиргеш, кажыыдап турар. А өскелер өг-бүлезинде берге байдалдыг. Чамдык улус истеп сүрдүрүп, өске-даа бергелерге таваржып чоруур.  А ол бүгү хамчык аарыгларның, дайынның, бойдус халаптарының ужундан улам берге апарган. Ынчангаш Иеговага сагыш-сеткилиңер тө каап бериңер. Чоок эжиңерге байдалыңарны чугаалап турарыңар дег, аңаа база шуптузун чугаалап бериңер. Иегова силерге дузалаар дээш хөделир деп, бичии-даа чигзинмеңер! (Номчуптуңар: Ырлар 36:3, 5.)

15. Бергелер үезинде туруштуг артарынга мөргүл биске канчаар дузалаар? Чижектен чугаалаңар.

¹⁵ Үргүлчү мөргүүр болзувусса, «аар-бергелерге таварышкаш, туруштуг» болур бис (Рим. 12:12). Иегова бараалгакчыларының чүнү ажып эртип турарын билир. Библияда Иегова «оларның дуза дилээн кыйгызын дыңнап» турар дээн болгай (Ыд. ыр. 144:18, 19). Бо сөстерге 29 харлыг доктаамал эгелекчи Кристи дээр дуңмавыс шынзыккан. Хенертен ооң кадыы аажок баксырап эгелээн. Түңнелинде ол депрессияже кире берген. А соонда ооң авазы эмнеттинмес аарыг-биле аарый берген. Кристи үлешкен: «Даң бажында-ла ол хүннү ажып эртер күштү Иеговадан дилеп турган мен. Чыыштарже барып, хууда шинчилелди кылып, эки бааралгал чурумундан кызып туттунуп турган мен. Мөргүл меңээ эң берге үеде безин холумну сула салбазынга дузалап турган. Иегова кезээде мээң чанымда деп билип турган мен. Ол бодал мени дыка-ла оожуктурган. Кадыым дораан экиживээн-даа болза, Иегова мөргүлдеримге харыылап турган. Ол сеткил чүрээмге амыр-тайбыңны болгаш оожургалды берген». Иегова «Ону хүндүлээр улусту шенелде байдалдарындан канчаар адырарын» билир деп утпаалыңар (2 Пет. 2:9).

16. Күткүлгелерни ажып эртеринге биске Иегованың дузазы чүге херек?

¹⁶ Күткүлгелерни ажып эртеринге дузалаар кылдыр, Иеговадан дилеңер. Шын кылдыр алдынар дээш, бачыттыг бүдүжүвүс-биле үргүлчү тулчуп турар бис. Эрлик  ол тулчуушкунга бисти удуп алыр дээш, шупту аргаларны ажыглап турар. Ооң бир аргазы дээрге мөзү-шынар чок оюн-тоглаа таварыштыр угаан-бодалывысты бужартадыры-дыр. Ындыг оюн-тоглаа бистиң угаанывысты хирлиг бодалдар-биле долдуруп болур. А ол бодалдар иштики бүдүжүвүстү үреп, безин аар бачытка чедирип болур (Мк. 7:21—23; Иак. 1:14, 15).

17. «Бисти күткүлгеге алыспас кылып көр» дээн дилегниң аайы-биле канчаар алдынып болур бис? (Ол ышкаш чурукту көрүңер.)

¹⁷ Иегованың дузазы чокта күткүлгени ажып эртип шыдавас бис. Иисус үлегерлиг мөргүлүнге мындыг дилегни киирген: «Бисти күткүлгеге алыспас кылып көр, ол ышкаш бузуттугдан бисти адырып көр» (Мф. 6:13). Иегова биске дуза кадарынга белен, ынчалза-даа боттарывыс ону дилээр ужурлуг бис. Оон аңгыда, мөргүлдеривис аайы-биле алдынары чугула. Бо делегейниң шын эвес үзел-бодалы биске салдар чедирбезин дээш, бүгү чүүлдү кылыылыңар (Ыд. ыр. 96:10). Ону канчаар кылып болур? Библияны номчуп, шинчилеп тургаш, угаан-бодалывысты арыг бодалдар-биле долдурар бис. Ол ышкаш чыыштарже барып, суртаалдап тургаш, угаан-бодалывысты камгалап аар бис. А Иегова силерге күш чедер шааңардан ажа бээр күткүлге эртерин чөпшээревес (1 Кор. 10:12, 13).

18. Шупту чүнү канчаар ужурлуг бис?

¹⁸ Бо берге сөөлгү хүннерде Иеговага шынчы артар дизе, кажангызындан-даа артык хөй мөргүүр болзувусса эки. Хүннүң-не сагыш-сеткилиңерни мөргүлге тө каап бээр дээш, үеден аңгылап алыңар. Сеткилиңерни аңаа ажыдып бээриңерни Иегова күзеп турар (Ыд. ыр. 61:9). Иегованы алгап-мактаңар база ооң кылган шупту чүүлү дээш өөрүп четтириңер. Суртаалга эрес-дидим болурунга база дузалаар кылдыр, оон дилеңер. Ол ышкаш бергелерге азы шенелделерге таварышкаш, Бургандан дузаны дилеңер. Иеговага мөргүүрүнге силерге кым-даа, чүү-даа шаптыктавазын. Ынчаарга Иегова мөргүлдеривиске канчаар харыылап турар? Бо чугула айтырыгны дараазында статьяга сайгарар бис.