1. Иегованың бараалгакчылары кандыг шенелделерге таваржып турарыл?

СИЛЕР амгы үеде дыка берге шенелдеге таваржып турар чадавас силер. Чыышта бир кижи силерни хомудадыпкан чадавас (Иак. 3:2). Чок болза, ажылыңарда азы школада улус силерни Иегованың Херечизи бооруңарга кыжырып турар (1 Пет. 4:3, 4). Азы чоок улузуңар силерге суртаалдаарын болгаш чыыштарже баарын хоруп турар (Мф. 10:35, 36). Ынчан силерге чаңгыс арга — Иеговага бараалгавайн баары ышкаш сагындырар. Ынчалза-даа Иегова кандыг-даа шенелделерни ажып эртер мерген угаанны база күштү бээр деп черле чигзинмеңер.

2. Римчилерге 15:4-тен алырга, Библия биске кандыг салдар чедирип болур?

² Иегова аңгы-аңгы бергелерге таваржып чораан улустуң төөгүлерин Библияда бижидип каан. Чүге? Римчилерге 15:4-тен алырга, бис ол төөгүлерден ажыктыг чүүлдерге өөренип ап болур бис (номчуптуңар). Оларны номчуп тургаш, оожургалды миннип, идегелдиг апарып турар бис. Библияны анаа-ла номчууру чедишпес. Ол угаан-бодалывысче, чүрээвисче салдар чедирер ужурлуг. Силерге берге байдалды ажып эртер сүме херек дижик. Ындыг үеде бо дөрт базымны ажыглап болур: 1) мөргүңер, 2) сагыштаалаңар, 3) ханы боданыңар, 4) ажыглаңар. Ам базым бүрүзүн сайгаргаш, Давид хаан биле Павел элчинниң чуртталгазынга болган болуушкуннарынга ол базымнарны канчаар ажыглап болурун көрүптээлиңер *.

3. Библияны номчуурда, чүнү канчаар болза эки база чүге?

 ³ 1. Мөргүңер. Библияны номчуурда, ооң ханы утказын билип алыр дээш, мөргүүр болза эки. Чижээ, кандыг-бир байдалда чүнү канчаарын билбес болзуңарза, херек сүмелерни Библиядан тып алырынга дузалаар кылдыр Иегованы дилеңер (Флп. 4:6, 7; Иак. 1:5).

4. Библейжи төөгүнү чүнүң ачызында диригжидип болур?

⁴ 2. Сагыштаалаңар. Иегова бисти хамык чүүлдү угаанывыска сагыштаалаар кылдыр чаяап каан. Ооң ачызында библейжи төөгүнү диригжидип, бодуңарны маадырның орнунга салыңар. Ол ышкаш ооң чүнү миннип турарын билип, шупту чүүлче ооң караа-биле көөрүн кызыңар.

5. Ханы боданыры дээрге чүү дээни ол? Библияның дугайында ханы боданырынга биске чүү дузалаар?

⁵ 3. Ханы боданыңар. Ханы боданыры дээрге номчаан чүүлүвүстү шүүп көрүп, биске кандыг ажык-дуза эккээрин боданыры-дыр. Ханы боданып тургаш, номчуп турар чүүлүвүсте бодалдарның бот-боттары-биле кандыг холбаалыын эскерип, ханы утказын билип ап турар бис. Библияны ханы боданмайн, номчууру дээрге-ле чыгбайн, чада салып каан пазлды көөрүнге дөмей. А ханы боданып тургаш, номчуур болза, пазлды чыггаш, ында долу чурукту көөрүнге дөмей. Номчаан чүүлүвүстүң бүгү утказын эки билип алырынга биске бо айтырыглар дузалаар: төөгүде маадыр берге байдалды ажып эртер дээш, чүнү кылганыл? Иегова аңаа канчаар дузалаан? Бо төөгү шенелделерни ажып эртеринге меңээ канчаар дузалаар база оон чүнү өөренип ап болур мен?

6. Билип алган чүүлүвүстү ажыглаары чүге чугула?

⁶ 4. Ажыглаңар. Иисус билип алган чүүлүн ажыглавас кижини бажыңын элезин кырында тудуп алган кижиге дөмейлээн. Ооң кызыл күжү болгаш үези хилис барган. Чүге? Чүге дизе «чаъс кудуп, хемнер дажып, хат-шуурган киткээш, бажыңны хөме тавараан. А бажың коргунчуг дааш-биле буступ кээп дүшкен» (Мф. 7:24—27). Ооң-биле дөмей, бис Библияны номчуурда, мөргүп алгаш, бодувусту маадырның орнунга салып, ооң дугайында ханы бодангаш, билип алган чүүлүвүстү ажыглавас болзувусса, күжүвүс база хилис баар. А кажан бергелер тургустунуп кээрге азы истеп сүрүүшкүннер эгелей бээрге, бүзүреливис буурап каар. Бир эвес билип алган билиглеривисти ажыглаар болзувусса, сагыш-сеткиливиске оожургалды миннип, шын шиитпирлер хүлээп, быжыг бүзүрелди сайзырадып алыр бис (Иса. 48:17, 18). Ам бо дөрт базымны ажыглап тургаш, Давид хаанның чуртталгазынга болуушкуннардан чүнү өөренип ап болурувусту көрүптээлиңер.

7. Ам кандыг библейжи төөгүнү сайгарар бис?

⁷ Эжиңер азы чоок кижиңер силерге багай хамаарылга көргүскен бе? Ийе болза, силерге Давид хаанның үлегери дузалаар. Оглу Авессалом ооң орнунга хаан болуксааш, ону канчаар садыпканыл, көрээлиңер (2 Хаан. 15:5—14, 31; 18:6—14).

8. Иеговадан чүнү дилеп болур бис?

⁸ 1. Мөргүңер. Бо үзүндүнү номчуурунуң мурнунда, силерни канчаар багай аажылаанын база чүнү миннип турарыңарны Иеговага ажыы-биле чугаалап бериңер (Ыд. ыр. 6:7—10). Оон берге байдалды ажып эртеринге дузалаар библейжи дүрүмнерни тып алыр кылдыр, Иеговадан дилеп мөргүңер.

9. Давид биле Авессаломнуң аразынга чүү болган?

 ⁹ 2. Сагыштаалаңар. Бо үзүндүден болуушкуннарның дугайында боданып тургаш, бодуңарны Давидтиң орнунга салыңар. Элээн каш чыл дургузунда Авессалом чоннуң ээ көрүүшкүнүн чедип алыр дээш кызып турган (2 Хаан. 15:7). А эптиг байдал тургустунуп кээрге, Авессалом Израильче улузун бүдүү чоргузупкан. Ынчаар ол хаан дүжүлгеге олурар черин белеткеп турган. Безин ол ачазының чоок эжи, сүмелекчизи Ахитофелди бодунуң талазынче көгүдүп алган. Ол үеде ачазы аар аарып чыткан хөңнү (Ыд. ыр. 40:2—10). Ынчан Авессалом бодун хаан кылдыр чарлааш, ачазын өлүрерин оралдашкан. Давид ону билип кааш, Иерусалимден дезип чорупкан. Сөөлүнде дөмей-ле Авессалом биле Давидтиң шериглериниң аразынга дайын үнген. Үймээнчилер уттуруп алган, а Авессалом өлүртүп алган.

10. Давид канчаар алдынып болур турган?

¹⁰ Давидтиң чүнү миннип турганын сагыштаалап көрүңер. Ол Авессаломга ынак турган, а Ахитофелге бүзүрээр чораан. Ынчалза-даа олар ону садыпкан. Олар ооң сагыш-сеткилин аар балыглап, безин өлүрер деп турганнар. Давид өске эштерин база Авессаломнуң талазында деп бодааш, оларга бүзүревейн, чүгле бодунга идегеп, чааскаан дезип болур турган. Азы ол ундаралче дүлнү берип болур турган. Ынчалза-даа Давидке бо бүгүнү ажып эртеринге чүү дузалаан?

11. Давид берге байдалда канчаар алдынган?

¹¹ 3. Ханы боданыңар. Бо болуушкундан чүнү өөренип ап болур бис? Баштай Давидке бо бүгүнү ажып эртеринге чүү дузалаанын билип алыылыңар. Ол коргуп девидевээн база бодал чок далаш шиитпирлер үндүрбээн. Ынчалза-даа ол шиитпирлерни хүлээрин соңгаарлатпаан. Ол Иеговадан болгаш эштеринден дузаны дилеп, үндүрген шиитпирлери ёзугаар алдынып турган. Аңаа чеже-даа аарышкылыг турган болза, ол каржыланып, кижи бүрүзүнче каразынып турбаан. Харын-даа ол Иеговага болгаш эштеринге бүзүрелин чидирбээн.

12. Иегова Давидке канчаар дузалаан?

¹² Иегова Давидке канчаар дузалаан? Ол аңаа шенелделерни ажып эртер күштү берип турган деп шинчилел үезинде билип каар силер (Ыд. ыр. 3:1—9). Оон ыңай Иегова ооң шиитпирлерин йөрээп турган. Давидти камгалаар дээш дайылдажып турган ооң шынчы эштерин база Иегова деткээн.

13. Силерни хомудадыптар болза, Давидтиң чижээ силерге канчаар дузалаар? (Матфей 18:15—17).

¹³ 4. Ажыглаңар. «Давидтиң үлегеринден чүнү өөренип ап болур мен?» деп бодуңардан айтырыңар. Нарын байдалды шиитпирлээр дээш, дүрген хөделир болза эки. Силерни хомудадыпкан кижи-биле катап эки хамаарылгалыг болур дээш, Матфей 18-те Иисустуң айтыышкынын дорту-биле сагыңар азы ооң дөзүнде дүрүмнү ажыглаңар. (Номчуптуңар: Матфей 18:15—17.) Хорадап тургаш, кажан-даа шиитпирлер хүлээвеңер. Берге байдалда шын алдынарынга херек мерген угаанны болгаш оожургалды Иеговадан дилеңер. Эштериңерге идегеп, оларның дузазындан ойталаваңар (У. ч. 17:17). А эң кол чүүл, Библияда сүмелерни ажыглаңар (У. ч. 3:5, 6).

14. 2 Тимофейге 1:12—16 биле 4:6—11, 17—22-де сөстер силерни кандыг байдалда деткип болур?

¹⁴ Чоок улузуңар Иеговага бараалгаарыңарга шаптыктап турар болза, канчаар?  Чок болза, Бурганның чонунуң ажыл-чорудулгазын кызыгаарлап каан азы шуут хоруп каан чуртта чурттап турар чадавас силер. Ындыг болза, 2 Тимофейге 1:12—16 биле 4:6—11, 17—22-де сөстер силерге күштү бээр *. Павел ону кара-бажыңга олурган үезинде бижээн.

15. Иеговадан чүнү дилеп болур силер?

¹⁵ 1. Мөргүңер. Ол шүлүктерни номчуурунуң бетинде дүвүрелдериңерни база чүнү миннип турарыңарны Иеговага ажыы-биле чугаалап бериңер. Тургустунуп келген байдалда шын алдынарынга дузалаар дүрүмнерни Павелдиң сөстеринден тып алыр дээш, Иеговадан дузаны дилеңер.

16. Павел кандыг берге байдалга таварышкан?

¹⁶ 2. Сагыштаалаңар. Бодуңарны Павелдиң орнунга кылдыр сагыштаалаңар. Павел илчирбеледип алгаш, кара-бажыңга олурган. Ол ооң мурнунда база хосталгазын казыттырып чораан, ынчалза-даа бо удаада өлүмден чайлап шыдавазын билип турган. Ооң кадында чамдык акылар оон хая көрнү берген, а ооң харык-шинээ-даа сулараан (2 Тим. 1:15).

17. Павел берге байдалда канчаар алдынып болур турган?

¹⁷ Павел эрткен үезинче көрүп, «өске шиитпир үндүрүп алган болзумза, кара-бажыңга-даа олурбас мен» деп бодап болур турган. Асияда акылар ону кааптарга, хорадап, өске эштеринге бүзүрелин чидирип ап болур турган. Ынчалза-даа ол ынчаар алдынмаан. Эштери ону сатпас база Бурган ону шаңнаар деп, Павел чүге бүзүреп турган?

18. Павел берге байдалда канчаар алдынган?

¹⁸ 3. Ханы боданыңар. Шенелделерни ажып эртер дээш, Павел чүнү канчап турган? Өлүр үези чоокшулап келген-даа болза, Иегованы алдаржыдары эң-не чугула деп, ол билип турган. Павел өске улуска дузалажыр аргаларны үргүлчү дилеп чораан. Оон ол Иеговага ынанып, мөргүүрүн соксатпаан (2 Тим. 1:3). Ону каапкан акылар дээш сагышсыраарының орнунга, ол шынчы эштеринге дузазы дээш өөрүп четтиргенин илередип турган. Оон аңгыда, ол Бурганның Сөзүн шинчилээрин уламчылаан (2 Тим. 3:16, 17; 4:13). А эң чугула чүүл, «Иегова биле Иисус мени кагбаан база меңээ ынак болгаш, шынчы бараалгалым дээш шаңнаар» деп, ол ыяк бүзүреп чораан.

19. Иегова Павелге канчаар дузалаан?

¹⁹ Иегова Павелди бүзүрели дээш истеп сүрдүрерин баш удур сагындырган (Аж.-ч. 21:11—13). Ынчаарга Ол бараалгакчызынга канчаар дузалаан? Ол ооң мөргүлдеринге харыылап, аңаа күштү берип турган (2 Тим. 4:17). Иегова Павелди чүткүп чораан шаңналын албан алыр деп бүзүреткен. Оон Ол Павелге шынчы эштери таварыштыр дузалаан.

20. Римчилерге 8:38, 39-та бижээн Павелдиң хөөнүн канчаар өттүнүп болур бис?

²⁰ 4. Ажыглаңар. «Павелди канчаар өттүнүп болур мен?» деп бодуңардан айтырыңар. Бис база, Павел ышкаш, истеп сүрдүреривисти билир бис (Мк. 10:29, 30). Ынчангаш Иеговага шынчы артар дизивиссе, Аңаа идегеп, Ооң Сөзүн үргүлчү номчуп, мөргүүр херек. А эң чугула чүүл, дээрде Адавысты алдаржыдары деп черле утпас болзувусса эки. Иегова бисти кажан-даа кагбас база Ооң ынакшылындан бисти чүү-даа чарып шыдавас. (Номчуптуңар: Римчилерге 8:38, 39; Евр. 13:5, 6.)

21. Ая биле Хекторга шенелделерни ажып эртеринге чүү дузалаан?

²¹ Библияда улустуң чижээ биске кандыг-даа байдалда дузалажып, күштү берип турар. Чижээ, Япониядан эгелекчи угбавыс Аяга хөй-ниити черлеринге кортпайн суртаалдаарынга Ионаның чижээ дузалаан. А Индонезиядан аныяк дуңмавыс Хекторга, ада-иези ооң бүзүрелин үлешпес-даа болза, Бурганның дугайында эки билип, Аңаа бараалгаарынга Руфтуң чижээ дузалаан.

22. Библейжи көргүзүглер болгаш «Подражайте их вере» деп сериядан статьялар ажыктыг боор кылдыр, чүнү канчаарыл?

²² Бүзүрелиңерни быжыктырар чижектерни кайыын тып ап болур? Бистиң видео, аудиошиилеривис, «Подражайте их вере» деп сериядан статьялар дузалаар *. Олар Библияда болуушкуннарны диригжидип турар. Оларны номчуп, дыңнап, көөрүнүң бетинде, Иегова силерге ажыктыг болур дүрүмнерни тып алырынга дузалаар кылдыр мөргүңер. Оон бодуңарны кол маадырларның орнунга сагыштаалаңар. Оларның чүнү кылып турганын база Иегова оларга канчаар дузалаанын ханы боданып, билип алган чүүлдериңерни ажыглаңар. Иегованың силерге дузалап чорууру дээш өөрүп четтириңер база өскелерни деткиир аргаларны дилеңер.

23. Исайя 41:10, 13-тен алырга, Иегова биске чүнү аазап турар?

²³ Эрликтиң делегейинге чурттаары дыка берге, безин чамдык байдалдарда канчаар алдынарын кижи билбейн баар (2 Тим. 3:1). Ынчалза-даа дүвүреп, корткан ажыы чок. Чүге дизе Иегова таваржып турар шенелделеривисти көрүп, оң талакы холу-биле бисти быжыг тударын аазап турар. (Номчуптуңар: Исайя 41:10, 13.) Библия кандыг-даа шенелделер үезинде биске күштү бээр база Иегова бисти деткиир дээрзинге ыяк бүзүрээр бис.