1. Библияны өөренириниң мурнунда чуртталгаңар кандыг турган?

 БИБЛИЯНЫ өөренип эгелээриниң мурнунда чуртталгаңар кандыг турган? Чамдык улус безин ооң дугайында сактыр хөңнү чок. Ынчан бис бо делегейде улус ышкаш алдынып, кеттинип, эки-бакты ылгап чораан бис. Силер база ындыг турган болзуңарза, «бо делегейге идегел болгаш Бурган чок амыдырап» чораан силер (Эф. 2:12). Ынчалза-даа Библияда алыс шын чуртталгаңарны бүрүнү-биле өскертипкен.

2. Библияны өөренип эгелээш, чүнү билип алган силер?

² Библияны өөренип эгелээш, дээрде ынакшылдыг Адаңар бар деп билип алган силер. Бурган-биле чоок өңнүктежип, Ооң улуг өг-бүлезиниң кежигүнү болуксай берген силер. Ынчалза-даа үзел-бодалдарыңарны, чуртталгаңарны болгаш даштыкы овур-хевириңерни өскертир болза эки деп билип каан силер. Оон аңгыда, силерге Иегованың эки-бакче көрүжүн хүлээп алгаш, Ону өттүнери чугула турган (Эф. 5:3—5).

3. Колосчуларга 3:9, 10-да Иегова биске чүү дээн база бо статьяга чүнү сайгарар бис?

³ Иегова — Чаяакчывыс болгаш дээрде Адавыс — Бодунуң өг-бүлезинге негелделер тургузар эргелиг. Ол бисти сугга суктуруп алырының мурнунда «биеэги бүдүжүңерни ооң бүгү үүлгедиглери-биле» адыра сивирип кааптыңар деп негеп турар *. (Номчуптуңар: Колосчуларга 3:9, 10.) Бо статья сугга суктуруп алыксап турар улуска үш айтырыгның харыызын билип алырынга дузалаар: 1) «Биеэги бүдүш» дээрге чүл ол? 2) Иегова чүге «биеэги бүдүжүңерни» адыра сивирип кааптыңар деп турар? 3) Ону канчаар кылып болур бис?  А сугга суктуруп алган улус биеэги аажы-чаңынче болгаш чаңчылдарынче катап ээлбес дээш, чүнү канчап болурун боданып болур.

4. «Биеэги бүдүштү» кедип алган кижи кандыг боор?

⁴ «Биеэги бүдүш» дээрге бачыттыг бүдүжүнге дүүштүр кижиниң боданып, алдынып чорууру-дур. Ону кедип алган кижи хорадаачал, өөрүп четтиргенин илеретпес, өрү көрдүнер база чүгле бодун бодаар. Ындыг кижи порнографияга, күчүлелдиг болгаш мөзү-шынары куду киноларга ынак. Чогум ооң эки шынарлары бар. Безин ол кылып турар ажыл-херээ, сөстери дээш ыядып турар чадавас. Ынчалза-даа ооң өскерлир хире ындыг кончуг улуг күзели чок (Гал. 5:19—21; 2 Тим. 3:2—5).

5. «Биеэги бүдүжүңерни» адыра сивирип кааптыңар дээн сөстер чүнү илеретпейн турар? (Ажыл-чорудулга 3:19).

⁵ Бис бачыттыг болгаш, шупту багай бодалдардан болгаш күзелдерден амдыызында бүрүнү-биле адырлып шыдавас бис. Үе-үе болгаш, соонда хараадай бээр бир-ле чүүлдү чугаалап азы кылыптар бис (Иер. 17:9; Иак. 3:2). Ынчалза-даа «биеэги бүдүжүвүстү» адыра сивирип каапкаш, моон соңгаар багай бодалдарның болгаш ажыл-херектерниң кулу болбас бис (Иса. 55:7; номчуптуңар: Ажыл-чорудулга 3:19).

6. Иегова бисти чүге багай бодалдардан болгаш чаңчылдардан адырлып алырывысты күзеп турар?

⁶ Иегова биске дыка ынак болгаш, бисти чуртталгадан өөрүшкү алзын деп күзеп чоруур. Ынчангаш Ол бисти багай бодалдардан болгаш чаңчылдардан адырлып алырынче оттуруп турар (Иса. 48:17, 18). Оон башка боттарывыска-даа, долгандыр улуска-даа чүгле хора чедиреривисти Ол билип турар. А Иегова ону күзевейн турар болгай.

7. Римчилерге 12:1, 2-ден алырга, бисте кандыг шилилге бар?

⁷ Эге баштай чуртталгавыска өскерлиишкиннерни кылып эгелээривиске, чоок улузувус болгаш эштеривис кайгап, безин бисти кыжырып турган (1 Пет. 4:3, 4). Олар биске: «Сеңээ канчаар чурттаарын кым-даа айытпас ужурлуг, ол сээң чуртталгаң-дыр!» деп турганнар. Ынчалза-даа Иеговага чагыртпас улусту херек кырында хостуг, кымдан-даа хамаарышпас деп болур бе? Чок. Олар Эрликке чагыртып, ооң салдарынга алзып чоруур.  (Номчуптуңар: Римчилерге 12:1, 2.) Ынчап кээрге, чүнү шилип аар бис: Эрликтиң быжып каан «биеэги бүдүжүн» кедип алгаш, чоруур бис бе азы Иеговага бодувусту чараш бүдүштүг кижи кылдыр эдип-чазадыр бис бе? (Иса. 64:8).

8. Багай бодалдардан, ажыл-херектерден адырлып алырынга биске чүү дузалаар?

⁸ Кижи карак чивеш аразында өскерлип шыдавас деп, Иегова дыка эки билип турар (Ыд. ыр. 102:13, 14). Ынчангаш Ол бисти деткимче чок арттырбаан. Ол Бодунуң Сөзү, ыдыктыг сүлдези, организациязы таварыштыр биске күштү берип, мерген угаанныг болурунга дузалап турар. Силер боттарыңар аңаа шынзыккан чадавас силер. «Биеэги бүдүштү» адыра сивирип, багай бодалдарны, ажыл-херектерни катап кылбазынга база сугга суктуруп алырынга кандыг базымнар дузалаарын көрүптээлиңер.

9. Бурганның Сөзү силерге канчаар дузалап болур?

⁹ Бурганның Сөзүнүң дузазы-биле бодуңарны эки хынаңар. Бурганның Сөзүн көрүнчүкке дөмейлеп болур. Ону номчааш, кижи угаан-бодалында, аажы-чаңында чүнү өскертирин тодарадып алыр (Иак. 1:22—25). Оон ыңай силерниң-биле Библия өөренип турар кижи азы бүзүрели быжыг акы-угбалар силерге бир-ле чүүлдү айтып берип болур. Чижээ, олар библейжи шүлүктер дузазы-биле кошкак болгаш күштүг талаларыңарны эскерип каарынга силерге дузалап болур. Бир эвес багай чаңчылдан адырлырын кызып турар болзуңарза, олар дептерлеривистен ажыктыг сүмелерни канчаар тып алырын айтып бээр. Оон аңгыда, Иегова силерге кандыг-даа үеде дуза кадарынга белен. Ол кымдан-даа артык силерге чүү херегин база чүрээңерде чүү барын билир (У. ч. 14:10; 15:11). Ынчангаш Бурганга мөргүүр база Библияны хүннүң-не номчуур чаңчылды сайзырадып алырын кызыңар.

10. Элиниң төөгүзүнден чүнү өөренип ап болур?

¹⁰ Иегова биске чүгле эң экини күзеп турар деп утпаңар. Иегованың шупту негелделери биске боттарывыска-ла ажыктыг. Ооң дүрүмнери ёзугаар чурттап чоруур улус боттарын хүндүлеп, ёзулуг аас-кежиктиг апарып, чуртталганың ужур-утказын тып ап турар (Ыд. ыр. 18:8—12). А Ооң үзел-бодалын херекке албас улус бачыттыг ажыл-херээниң ужундан хинчектенип чоруур. Бурганның дүрүмнерин тооп дыңнаваска, кайы хире багай боорун Эли дээр эр кижи ылап көрген. Ооң ада-иези аңаа бичиизинден тура-ла, Иеговага ынак боор кылдыр өөредип турган. Ынчалза-даа ол элээди апаргаш, багай эш-өөр-биле эдержип эгелээн. Ол наркотиктерни ажыглап, үй-балай самыырап, оорланып турган. Эли кылыктыг база дыка каржы апарган. Ол мынча дээн: «Ада-иемниң кылба деп өөредип турган чүүлдерин кылып эгелээн мен». Ынчалза-даа ооң бичии тургаш, өөренип алган чүүлдери хилис барбаан. Үе эрткенде, ол Библияны катап өөрени берген. Эли багай чаңчылдарындан адырлып, чуртталгазын долузу-биле өскертип алгаш, 2000 чылда сугга суктуруп алган. Иегованың ачызында ооң чуртталгазы канчаар эки талаже өскерли берген? Ол үлешкен: «Ам сагыш-сеткилимде амыр-тайбыңны миннип, арыг арын-нүүрлүг апарган мен» *. Иегованың дүрүмнери-биле чурттавайн барган улус чүгле бодунга хора чедирер деп бо таварылгадан көскү. Ынчалзажок Иегова ындыг улуска безин дузалаарынга белен.

11. Иегова чүнү көөр хөңнү чок?

¹¹ Иегованың хөңнү чок чүүлдеринге база  хөңнүңер чок болуңар (Ыд. ыр. 96:10). Иегова «адыыргак көрүштү, мегечи дылды, актыг кижиниң ханын төгер холдарны» көөр хөңнү чок деп Библияда бижээн (У. ч. 6:16, 17). Ол ышкаш каржы болгаш мегечи улус Ооң караанга бужар-бак (Ыд. ыр. 5:7). Ону Нойнуң үезинде болган болуушкуннар бадыткап турар: Бурган каржы кижилерни узуткап каапкан, «чүге дээрге оларның каржы-бак үүлгедиглери чер кырын долган» (Э. д. 6:13). Оон ыңай Иегованың чүү чүвеге хөңнү чогун Малахия медээчи чугаалаан. Кижи буруу чок кады чурттаан эжинге шынчы эвес бооп, ооң-биле чарлырга, Бурган килеңнеп турар. Ындыг саттыныкчының мөгейиишкинин Бурган хүлээп албас. Ынчангаш Ол оон харыыны негээр (Мал. 2:13—16; Евр. 13:4).

12. «Бузутту көөр хөөн чок... болуңар» дээн кыйгы чүнү илередип турар?

¹² Иегова биске: «Бузутту көөр хөөн чок... болуңар» — дээн (Рим. 12:9). «Көөр хөөн чок» деп сөстер кижиниң эң-не күштүг минниишкиннерин илередип турар. Бир эвес кижи бир чүүлдү көөр хөөн чок болза, аңаа ооң дугайында бодаары безин ческинчиг боор. Бис ирип-чыдып калган чемни кайыын-на чиир деп бис! Ооң-биле дөмей, Иеговага бужар чүүлдү кылыр дээн бодал безин биске чүдек-бужар, кускусуг боор ужурлуг.

13. Багай бодалдарны чүге узуткаар ужурлуг бис?

¹³ Багай бодалдарны узуткаңар. Кандыг-даа ажыл-херек бистиң бодалдарывыстың үре-түңнели-дир. Ынчангаш Иисус бисти аар бачытче чыгаптар бодалдарны бажыңарже киирбеңер дээн (Мф. 5:21, 22, 28, 29). Бистиң кижи бүрүзү Иегованы өөртүксеп турар болгай. Ынчангаш угаанывыска багай бодалдар чаа-ла тыптып кээри билек, ону ол-ла дораан узуткаар ужурлуг бис.

14. Бистиң чугаа-сөзүвүстен чүнү билип ап болур база бодувуска кандыг айтырыгларны салыр болза эки?

¹⁴ Чугаа-сөзүңерни хайгаараңар. Иисус: «Аксыңардан үнер чүве чүрээңерден кээр. Ол харын кижини бужартадыр» — дээн (Мф. 15:18). Шынап-ла, бистиң чугаалап турар сөстеривис иштики делегейивистиң кандыызын көргүзүп турар. Ынчангаш бодувуска мындыг айтырыгларны салыр болзувусса эки: «Меңээ шынын сөглээри эпчок болза, мегелээринде багай чүве чок деп бодаар мен бе? Өске хиндиктиг кижи-биле ылчыңнажыр таварылгаларым турган бе? Чамдыкта аксымдан мөзүзү куду сөстер уштуна бээр бе база кандыг-бир кижини сөглептер-дир мен бе?  Бир кижи аазаашкынын күүсетпеске, хорадай бээр мен бе?» Мооң дугайында боданыры кижи бүрүзүнге ажыктыг. Таарымча чок чугааны өөктерге дөмейлеп болур. Ындыг чугааны ажыглап тургаш, «биеэги бүдүжүвүстүң» эрги хевин уштур хамаанчок, ону өөктеп турар бис. Ону уштуп кааптар дизе, өске улусту бак сөглээн азы мөзүзү куду сөстерни кажан-даа ажыглавас ужурлуг бис.

15. Бачыттыг бүдүжүвүстү белдир-ыяшка хере шаптыртып өлүрери дээрге чүү дээни ол?

¹⁵ Шиитпирлиг хөделиңер. Чуртталгазын бүрүнү-биле өскертири кайы хире чугулазын көргүзер дээш, Павел элчин ханы уткалыг деңнелгени ажыглаан. Ол: «Бачыттыг бүдүжүвүс... белдир-ыяшка хере шаптыртып өлгенин билир бис» — дээн (Рим. 6:6). Бо сөстер Иегованың күзел-соруун күүседир дээш, Иисустуң хинчек көрүп, шаажылаттырып өлгенинче айтып турар. Бис база шак ындыг чүткүл-биле Бурганга таарымча чок ажыл-херектеривисти болгаш бодалдарывысты узуткаар ужурлуг бис. Оон башка арыг арын-нүүрлүг бооп, мөңге чуртталгаже идегелдиг болуру болдунмас (Ин. 17:3; 1 Пет. 3:21). Иегова дүрүмнерин биске-ле эптиг болзун дээш кажан-даа өскертпес. Харын-даа бис боттарывыс аңаа дүүштүр өскерлир ужурлуг бис (Иса. 1:16—18; 55:9).

16. Бачыттыг күзээшкиннер-биле чүге соксаал чок тулчур ужурлуг бис?

¹⁶ Бачыттыг күзээшкиннер-биле соксаал чок туржуңар. Ол демисел сугга суктуруп алырывыска-даа уламчылаар. Аңаа Маурисиу дээр акывыс шынзыккан. Ол аныяанда эр улус-биле холбажыр чораан. Соонда ол Иегованың Херечилери-биле Библияны өөренип эгелээн. Чуртталгазынга улуг өскерлиишкиннерни кылгаш, ол 2002 чылда сугга суктуруп алган. Маурисиу Иеговага хөй чылдар дургузунда бараалгап чоруур-даа болза, шын эвес күзелдери-биле ам-даа тулчуп турар хевээр. Аңаа дүжүп бербезинге чүү дузалап турар? Маурисиу мынча дээн: «Бачыттыг күзелдеримге алыспайн, Иегованы өөртүп турарым меңээ улаштыр демисежиринге күштү берип турар» *.

17. Набиханың чижээнден чүнү өөренип ап болур бис?

¹⁷ Иеговадан дузаны дилеп, бодуңарның эвес, а Ооң күжүнге идегеңер (Гал. 5:22; Флп. 4:6). «Биеэги бүдүжүнден» адырлып, олче катап эглип келбес дээш, кижи хөй күжениишкиннер үндүрер апаар. Аңаа хамаарыштыр Набиха угбавыстың чижээн көрээлиңер. Кажан ол 6 харлыг турда, ачазы оларны каапкаш чоруй барган. Ол сактып чугаалаан:  «Ачамның чорупканы меңээ дыка улуг согуг болган. Ооң ужундан сеткил-чүрээмге ханы балыглар артып калган». Ынчангаш Набиха дүржок, каржы кижи кылдыр өзүп келген. Ол наркотиктер садып-саарып тургаш, кара-бажыңче элээн каш чыл ишти кире берген. Кара-бажыңда улуска Иегованың Херечилери неделяда чаңгыс катап кээп турда, Набиха Библияны өөренип эгелээн. Ол чүүл ооң чуртталгазын бүрүнү-биле өскертипкен. Набиха улаштыр: «Чамдык чаңчылдарымдан адырлыры меңээ белен болган. Чижээ, наркотиктерни дораан каапкан мен. А таакпыны каары меңээ эң берге болган» — дээн. Набиха ол багай чаңчылындан адырлып алыр дээш, бир чыл ажыг ишти хинчектенип келген. Аңаа чүү дузалаан? «Таакпыны каар күштү меңээ Иеговага мөргүлдер берип турган. Иегованың сеткилинге кирер дээш, бир эвес мен өскерлип шыдапкан болзумза, ону кым-даа кылып шыдаар!» — деп, ол түңнээн *.

18. Бурганның хөй бараалгакчылары чүнү канчап шыдаан? (1 Коринфичилерге 6:9—11).

¹⁸ Ам бирги вектиң христианнарының дугайында боданып көрээлиңер. Олар сугга суктурарының мурнунда кандыг багай ажыл-херектерни кылып турган? Оларның чамдыызы самыырап, эрлер эр улус-биле, херээженнер херээжен улус-биле холбажып, а өскелери оорланып чораан. Ынчалза-даа ыдыктыг сүлдениң ачызында олар долузу-биле өскерлип шыдапканнар. Ынчангаш Иегова оларны Иисус Христос-биле чагырарынга төлептиг деп санаан. (Номчуптуңар: 1 Коринфичилерге 6:9—11.) Амгы үеде Библия база миллион-миллион кижилерге чуртталгазында улуг өскерлиишкиннерни кылырынга дузалаан *. Хөй улус ханы сиңниге берген багай чаңнарындан адырлып шыдаан. Силер база долузу-биле өскерлип, сугга суктурар негелделерге дүгжүп шыдаар силер деп, оларның чижээ бадыткап турар.

19. Дараазында статьяга чүнү сайгарар бис?

¹⁹ Ынчалза-даа сугга суктуруп алырынга чүгле «биеэги бүдүжүвүстү» адыра сивирип кааптары чедишпес. «Чаа кижиниң бүдүжүн» кедип алыр херек. Ону канчаар кылырын база өскелер биске канчаар дузалап болурун дараазында статьяга сайгарар бис.