Кижи баштай бо үзүндүнү номчааш, чөрүшкектер бар деп бодаар. Ынчалза-даа ону кичээнгейлиг номчуур болза, мында дөмей аттыг ийи аңгы кижиниң дугайында чугаа чоруп турар. Бо төөгү биске ажыктыг болур. Чүге?

Израильдиң хааны Саул, эвээш дизе-ле, чеди оолдуг, ийи кыстыг турган. Ионафан ооң дун оглу чораан. Соонда Саулга Рицпа дээр кул кадай Мемфивосфей дээр оол божуп берген. Солун чүүл, Ионафан бодунуң оглун база ынчаар адап алган. Ынчап кээрге, Саулдуң оглу биле уйнуу атташ турган.

Саул чагырып турган үезинде израильчилерниң аразынга чурттап чораан гаваончуларның шуптузун кыра шаап, узуткап эгелээн. Ол үеде дыка хөй кижи чок болган. Ол кем-херек үүлгедиишкини-дир, чүге дээрге Нуннуң оглу Иисустуң үезинде Израильдиң баштыңчылары гаваончулар-биле тайбың керээзин чарып алгаш турган болгай (Иис. 9:3—27).

Саул хааннап турда, ол керээ күштүг хевээр турган. Ынчалза-даа ол ону үрээш, Гаваоннуң шупту чурттакчыларын кыргып-хыдып кааптар часкан. «Саул болгаш ооң салгалы буруузун чүктээр ужурлуг» — деп, Иегова ажыы-биле чугаалаан (2 Хаан. 21:1). Кезек үе эрткенде, Давид Израильдиң хааны апарган. Ол кыргып-хыдыышкын дээш Иегова чонундан хая көрнү берген деп билип кааш, Давид дириг арткан гаваончулардан ол хан төгүүшкүнүн канчаар арыглап болурун айтырган. Олар кандыг-даа акша негевейн, мынча дээннер: «Израиль черге бисти чурттатпас дээш, бисти өлүрүп, шуптувусту узуткап каар деп турган кижини ам канчаар деп бис. Ооң салгалындан чеди кижиден биске бериңер, оларны шаажылаар бис». Давид оларның дилээн күүседип берген (2 Хаан. 21:2—6; Сан. 35:30, 31).

Ол үеде Саул биле Ионафан тулчуушкунга өлүп калган. А Ионафанның чажындан-на аскак оглу Мемфивосфей дириг турган. Ол кырган-ачазының үүлгедиглеринге көңгүс буруу чок чораан. Ооң мурнунда-ла Давид Ионафан-биле, ооң үре-салгалынга база хамааржып турар, найыралдың керээзин чарып алгаш турган (1 Хаан. 18:1; 20:42—43). Ынчангаш 2 Хааннар 21:7-де бижээни дег, «Давид хаан Саулдуң оглу Ионафан биле бодунуң аразында Дээрги-Чаяакчының ады-биле кылган даңгыраан бодааш, Ионафанның оглу, Саулдуң оглунуң оглу Мемфивосфейни кээргеп, гаваончуларга бербээн».

Давид гаваончуларның дилээн күүседип берген. Ол Саулдуң ийи оглун, оларның бирээзин Мемфивосфей дээр турган, база беш уйнуун шаажылалга берипкен (2 Хаан. 21:8, 9). Шак ынчаар Давид израильчилерни хан төккен буруудан арыглаан.

Ам чаа сайгарганывыс үзүндү дээрге анаа-ла төөгү эвес-тир. Бурганның айтыышкыннарының бирээзинде «ажы-төл база адазы дээш өлүртпес ужурлуг» деп дорт чугаалаан (Ы. х. к. 24:16). Саулдуң оолдары болгаш уйнуктары буруулуг эвес турган болза, Иегова оларны шаажылалга бербес ийик. Ол-ла айтыышкында «кижи бүрүзү чүгле бодунуң кем-буруузу дээш өлүртүр ужурлуг» деп бижээн. Ынчап кээрге, Гаваоннуң чурттакчыларының узуткаашкынынга бо чеди эр кижи буруулуг болгаш, боттарының үүлгедии дээш амы-тынындан чарылган.

Бир кижиниң дужаалы-биле шын эвес херектерни кылып турган мен дээш, бодун агартыры болдунмас деп, бо төөгү көргүзүп турар. Кылган ажыл-херектеривис дээш шуптувус харыы тудар бис. Ынчангаш бо мерген угаанныг сөстерни сактып чоруулуңар: «Сээң буттарың дорт оруктап чорзун, ынчан оруктарың шуптузу айыыл чок болур. Оң-даа, солагай-даа талаже эгбе, будуңну бузуттан чайлат» (У. ч. 4:24—27; Эф. 5:15).