Библияда адын биживээн Ноеминниң төрели Руфка өгленир болзумза, өнчүмнү чидирип аар мен деп чүге Воозка чугаалаан? (Руф 4:1, 6).

Библейжи үеде ажы-төлү чок кадайлыг кижи чок апаар болза, чугула айтырыглар тургустунуп кээр турган. Чижээ, ооң чери-биле чүү болур? Ооң ады олчаан уттундура бээр бе? Бо айтырыгларның харыызын Моисейниң хоойлузундан тып ап болур.

Бир эвес ол ажы-төл чок тургаш, чок апаар болза, ооң черин кым алыр турган? Ону өнчү кылдыр ооң акызы азы чоок төрели алыр турган. А бир эвес ол ядыы болгаш черин садыпкан болза, ооң чоок төрели ону катап садып ап болур турган. Ооң ачызында ол кижиниң өнчүзү өг-бүлезинге артып каар турган (Лев. 25:23—28; Сан. 27:8—11).

Чок апарган израильчи кижиниң ады уттундурбазын дээш, чүнү канчап турган? Ол кижи чок апаарга, дулгуяк арткан кадайынга ооң акызы өгленип алыр турган. А оларның төрүттүнүп келген төлү чок апарган кижиниң адын ап, ооң өнчүзүн салгап алыр турган. Ол хоойлу дулгуяк херээженни база камгалап турган (Ы. х. к. 25:5—7; Мф. 22:23—28).

Ноеминниң чижээн көрүптээлиңер. Ол Элимелехтиң кадайы чораан. Кажан Элимелех биле ооң ийи оглу чок апаарга, ону азыраар кижи артпаан (Руф 1:1—5). Ноемин Иудеяже ээп келгеш, керни Руфка Воозтан оларның черин садып алыр кылдыр дилээрин чугаалаан. Ол Элимелехтиң чоок төрели чораан (Руф 2:1—2, 19, 20; 3:1—4). Ынчалза-даа оларның оон-даа чоок төрели бар деп, Вооз билир турган. Ооң адын Библияда биживээн. Ынчангаш бир дугаар камгалакчы төрели ол эр кижи турган (Руф 3:9, 12, 13).

Эгезинде ол төрели чөпшээрежипкен (Руф 4:1—4). Чүге дээрге ол чеже-даа хөй акшаны чарыптар болза, Элимелехтиң черин салгап алыр төлдү Ноемин божуп шыдавас деп билир турган. Ынчан чер ооң өнчү-хөреңгизи апаар турган.

А кажан ол Руфка база өгленирин билип кааш, шиитпирин өскертипкен. Элимелехтиң өлүмүнүң дугайында ол мынча дээн: «Бодумнуң ажы-төлүмге өнчү чедишпейн баар ирги бе деп сезингеш, Руфту алырындан ойталап тур мен» (Руф 4:5, 6). Ол чүге ынча дээнил?

Бир эвес ол азы өске кижи Руфка өгленип алган болза, ооң божаан оглу Элимелехтиң черин салгап алыр турган. А ады бижиттинмээн израильчи өнчү-хөреңгизин канчаар чидирип ап болур турган? Библияда ооң дугайында биживээн-даа болза, каш даап бодаашкын бар.

• Бирээде, ол израильчи черни садып алган болза, хей черге акшаны чарыыр турган. Чүге дизе түңнелинде ол чер Руфтуң оглунга баар турган.

• Ийиде, ол Ноеминни-даа, Руфту-даа азыраар ужурлуг турган.

• Үште, Руф аңаа ажы-төл божуп берген болза, ол ажы-төл израильчиниң ажы-төлү-биле ооң бар-ла өнчү-хөреңгизин үлежир турган.

• Дөртте, ол израильчиниң ажы-төлү чок турган болза, Руфтан төрүттүнген оол чүгле Элимелехтиң черин эвес, а ооң черин база салгап алыр эргелиг турган. А кажан ол израильчи чок апаарга, ооң эвес, а Элимелехтиң адын эдилеп турар төл ооң черин ап аар турган. Ады билдинмес израильчи өнчү-хөреңгизин чидиреринден корткаш, Ноеминге дузалашпаан. Ол дараазында ээлчегде турган Воозка садып алыр эргени берген. Вооз канчалган? Ол чөпшээрешкен, чүге дээрге Элимелехтиң ат-сывы, өнчү-хөреңгизи өске кижиниң холунче кире бээрин күзевээн (Руф 4:10).

Ады чок израильчи бодунуң адын болгаш өнчү-хөреңгизин кадагалап аар сорулгалыг турган. Ол чүгле бодунуң думчуун бодап турган. Түңнелинде ол канчаар-даа кызарга, дөмей-ле төөгүден ооң ады ис чок читкен. Оон аңгыда, ол Мессияның, Иисус Христостуң, ада-өгбези боор кайгамчык дээн аргазын чидирип алган. Ол алдар-хүндүнү Вооз алган. Бодун бодаан израильчиниң төөгүзү улуска дузалажыр хөңнү чок кижилерни кандыг багай уржуктар манап турарын көргүскен (Мф. 1:5; Лк. 3:23, 32).