1, 2. Сугга суктурарынга белен эвес болзуңарза, чүге муңгаравас болза эки? (Журналдың даштында чурукту көрүңер.)

 СУГГА суктуруп алыксап тур силер бе? Ол дээрге тулган дээн сорулга-дыр! Бир эвес белен болзуңарза база хуралдың удуртукчулары чөпшээрешкен болза, арга тыптып кээрге-ле, сугга суктуруп алыңар. Иеговага бараалгап эгелээриңерге, чуртталгаңар аас-кежиктиг болгаш солун апаар!

² Сугга суктурарының бетинде силерге бир-ле чүүлдү өскертип алырын сүмелээн бе? Азы ону бодуңар билип турар силер бе? Ындыг болза, муңгараваңар. Каш-даа харлыг болзуңарза, өскерлип алгаш, ол чугула базымны кылып шыдаар силер.

3. Эфиоп дүжүмет Филипптен чүнү айтырган база аңаа хамаарыштыр кандыг айтырыг тургустунуп кээр? (Ажыл-чорудулга 8:36, 38).

³ Номчуптуңар: Ажыл-чорудулга 8:36, 38. Эфиопиядан дүжүмет Филипптен: «Мээң сугга суктуруп аарымга чүү шаптыктап турарыл?» — деп айтырган. Дүжүмет ол базымны кылыксап турган-даа болза, ол аңаа белен турган бе?

4. Эфиоп дүжүмет улаштыр өөрениксеп турган деп кайыын көскү?

⁴ Эфиопиядан дүжүмет «Бурганга мөгейип, Иерусалимге» чораан (Аж.-ч. 8:27). Ол иудей чүдүлгени чаа хүлээп  алгаш турган чадавас. Чугаажок, ол Иегованың дугайында Еврей Бижилгелерден билип алган. Ынчалза-даа ол оон-даа хөйнү билип алыксап турган. Кажан Филипп аңаа ужуражып кээрге, ол чүнү канчап турган ийик? Исайя медээчиниң номун номчуп чораан (Аж.-ч. 8:28). Ол кадыг «аъш-чем-дир». Дүжүмет эге билиглер чедер деп бодавайн, харын-даа улаштыр өөрениксеп турган.

5. Эфиоп дүжүмет билиглери ёзугаар канчаар алдынып турган?

⁵ Ол кижи «Эфиопияның кандакиязы дээр кадынның ызыгууртан дүжүмеди болгаш кадынның эртине-байлааның кадагалакчызы» турган (Аж.-ч. 8:27). Ол дыка чай чок турган чадавас. Ындыг-даа бол, ол Иеговага мөгеер үени аңгылап алган. Дүжүмет алыс шынны билиринден аңгыда, билиглери ёзугаар алдынып чораан. Ол Эфиопиядан Иеговага Иерусалимде өргээге мөгеер дээш, узун орукту эрткен. Ынаар ол хөй үени болгаш чарыгдалдарны үндүрген чадавас. Ынчалза-даа ол канчап-даа тургаш, Иеговага мөгеерин күзеп чораан.

6, 7. Эфиоп дүжүметтиң Иеговага ынакшылы чүге күштүг апарган база ол ону чүүже оттурган?

⁶ Эфиоп дүжүмет Филипптен чугула алыс шынны, ооң санында Мессия дээрге Иисус деп, билип алган (Аж.-ч. 8:34, 35). Ол Иисустуң аңаа кылган чүүлүн билип кааш, аажок өөрээн. Ол чүнү-даа өскертпейн, иудей чүдүлгелиг хүндүткелдиг кижи бооп болур турган. Ынчалза-даа Филипп-биле чугаалашкан соонда, ооң Иегова биле Иисуска ынакшылы улам күштүг апарган. Ол ынакшыл ону сугга суктуруп алырынче база Иисус Христостуң өөреникчизи болур чугула шиитпирни хүлээринче оттурган. Дүжүметтиң чугула базымны кылырынга беленин көргеш, Филипп ону сугга суккан.

⁷ Эфиопиядан дүжүметтиң чижээн өттүнер болзуңарза, сугга суктурарынга белен боор силер. Ынчан силер быжыг бүзүрел-биле: «Мээң сугга суктуруп аарымга чүү шаптыктап турарыл?» дээр силер. Ол дүжүмет билиглерни ап, оларның аайы-биле алдынып, Бурганга ынашкылын улаштыр өстүрүп турган. Ол-ла базымнарны канчаар кылып болур силер, көрүптээлиңер.

8. Иоанн 17:3-те сөстер силерни чүүже оттуруп турар?

⁸ Номчуптуңар: Иоанн 17:3. Бистиң хөй кезиивис Иисустуң бо сөстерин дыңнааш, Библияны өөрениксей берген чадавас. Эскериңер, бо-ла шүлүк бисти билиглерни улаштыр алырынче оттуруп турар. Чаңгыс алыс шын Бурган дугайында билиглерни  кезээ-мөңгеде ап кээр бис (Эккл. 3:11). Ону хөй билген тудум, Аңаа оон-даа чоок апаар бис (Ыд. ыр. 72:28).

9. Библейжи кол өөредиглерни билип алгаш, улаштыр чүнү канчаар ужурлуг бис?

⁹ Иегованың дугайында билиглер библейжи кол өөредиглерден эгелээр. Павел элчин Еврейлерге чагаазынга оларны «эге билиглер» дээн-даа болза, оларның үнезин кудулатпаан. Ол оларны чаш төлдү чемгерер сүтке деңнээн (Евр. 5:12; 6:1). Ынчалза-даа ол христианнарны Бурганның Сөзүнден ханы алыс шынны билип алырынче оттурган. Силер ындыг күзелди сайзырадып алган силер бе? Иегованың болгаш Ооң күзел-соруунуң дугайында билиглерни ам-даа алыксап турар силер бе?

10. Чамдык улуска өөренири чүге берге?

¹⁰ Хөй улус: «Өөренири эмин эрттир берге» деп болур. А силер чүү деп бодаар силер? Школага эки номчуттунуп, шинчилелдер кылып өөренип алган силер бе? Школачы тургаш, өөрениринге база чаа билиглер алырынга ынак турган силер бе? Азы өөредилге сонуургавас-тыр силер бе? Ийе болза, чааскаан эвес силер. Иегова силерге дузалап шыдаар. Ол — тергиин база эң-не эки Башкы-дыр.

11. Иегованы өндүр улуг Башкы деп чүге чугаалап болур?

¹¹ Иегова Бодун бистиң Башкывыс деп адап турар (Иса. 30:20, 21). Ол — шыдамык, ачы-буянныг база бодап билир өндүр улуг Башкы-дыр. Ол өөреникчилериниң эки талаларын көрүп турар (Ыд. ыр. 129:3). Иегова бистиң кылып шыдавас чүүлүвүстү кажан-даа негевес. Ол мээвисти, кайгамчык белекти, Боду тургузуп каан деп утпаңар (Ыд. ыр. 138:14). Бисте өөрениксээр күзел ала-чайгаар бар. Чаяакчывыс бисти чаа чүүлдерни мөңгеде билип база оон өөрүшкү алзын деп күзеп турар. Ынчангаш амдан эгелеп, библейжи алыс шынны билип алыксаар күзеливисти сайзырадыры мерген угаанныг болур (1 Пет. 2:2). Чедип ап шыдаар сорулгалардан салыңар база Библияны номчуур, шинчилээр графиктен туттунуңар (Иис. 1:8). Иегованың деткимчезиниң ачызында номчуттунарынга база Ооң дугайында билиглерни алырынга оон-даа ынак апаар силер.

12. Иисустуң чуртталгазының болгаш бараалгалының дугайында шинчилээри чүге чугула?

¹² Иисустуң чуртталгазының болгаш бараалгалының дугайында боданыр дээш, үени үргүлчү үндүрүп туруңар. Ылаңгыя бо берге үелерде Иеговага бараалгаар дизе, Ооң Оглунуң үлегерин кара олчаан эдерер болзувусса эки (1 Пет. 2:21). Иисус ооң эдерикчилери бергелерге таваржыр деп дорту-биле чугаалаан (Лк. 14:27, 28). Ынчалза-даа Иисус алыс шын өөреникчилери шупту бергелерни, ол дег, ажып эртиптер деп билир турган (Ин. 16:33). Иисустуң чуртталгазын эки шинчилеп, хүн бүрүде ону өттүнер сорулгадан салып алыңар.

13. Иеговадан чүнү дилээр болза эки база чүге?

¹³ Чүгле билиглер алыры чедишпес. Олар биске Иегова-биле найыралдажып, Аңаа ынакшылды болгаш бүзүрелди сайзырадырынга дузалаар (1 Кор. 8:1—3). Ынчангаш бүзүрелиңерни быжыктырарынга дузалаар кылдыр, Бургандан мөргүп дилеңер (Лк. 17:5). Ол ындыг мөргүлдерге күзелдии-биле харыылап турар. Бурганның дугайында ылап шын билиглерге үндезилеттинген ёзулуг бүзүрел билип алган чүүлдериңерни амыдыралыңарга ажыглаарынга дузалаар (Иак. 2:26).

14. Билип алган билиглери ёзугаар алдынары чугула деп, Пётр канчаар демдеглээн? (Ол ышкаш чурукту көрүңер.)

¹⁴ Пётр элчин Христостуң эдерикчилеринге билип алган билиглери ёзугаар алдынары чугула деп демдеглээн. Чижек кылдыр ол Нойну алган. Иегова суг-халавынга каржы улусту узуткаар деп турарын Нойга чугаалаан. Камгалал алыр дизе, Нойга болгаш ооң өг-бүлезинге суг-халавы боор деп билири чедишпес турган. Ной өг-бүлези-биле Бургандан билип алган билиглериниң аайы-биле алдынып, дыка улуг бажың-хемени тудуп эгелээн (Евр. 11:7; 1 Пет. 3:19—20). Соонда Пётр Нойнуң кылган ажыл-херээн «силерни камгалап турар» сугга суктуруушкун-биле деңнээн (1 Пет. 3:21). Сугга суктурарынга белеткелди Нойнуң өг-бүлезиниң бажың-хемени тудуп турганы-биле дөмейлеп болур. Сугга суктурар дизе, чүнү канчаар ужурлуг силер?

15. Сеткилинден буруузун миннири дээрге чүү дээни ол?

¹⁵ Сугга суктуруп алыр дизе, сеткилинден бачыттарын миннири чугула (Аж.-ч. 2:37, 38). Шын сеткилден буруузун миннир болза, кижи улуг өскерлиишкиннерни кылып болур. Иегованың сеткилинге кирбес багай ажыл-херектерден адырлып алган силер бе? Чижээ, мөзү-шынар чок чуртталгадан, таакпыдан азы чүдек-бужар сөстерден (1 Кор. 6:9, 10; 2 Кор. 7:1; Эф. 4:29). Бо бүгүнү кылбаан болзуңарза, ам-даа өскерлип алыр дээш кызыңар. Силерниң-биле Библия өөренип турар кижиден азы хуралдың удуртукчуларындан дузаны болгаш сүмени дилеңер. Аныяк болгаш ада-иеңер-биле чурттап турар болзуңарза, сугга суктурарынга шаптыктаар багай чаңчылдар-биле канчаар тулчурун билип алыр дээш, олардан дузаны дилеңер.

16. Эки бараалгал чурумунче чүү кирип турар?

¹⁶ Оон ыңай эки бараалгал чурумундан туттунары чугула. Ынаар чыыштарже баары база аңаа киржири кирип турар (Евр. 10:24, 25). Бир эвес чыыш-биле суртаалдап эгелээн болзуңарза, ол графигиңерниң  кезээ болзун. Хөй суртаалдаан тудум, аңаа оон-даа ынак апаар силер (2 Тим. 4:5). Аныяк болгаш ада-иеңер-биле чурттап турар болзуңарза, бодуңардан айтырыңар: «Ада-ием мени чыыштарже баарын азы суртаалдаарын үргүлчү сагындырып турар бе? Азы бодум ону кылып турар мен бе?» Чыыштарже барып, суртаалдап тургаш, Иеговага бүзүрелиңерни, ынакшылыңарны, өөрүп четтиргениңерни көргүзер силер. Бурганга бердингенин көргүскен ажыл-херээңер дээрге-ле Иеговага белектериңер-дир (Евр. 13:15; 2 Пет. 3:11). А белектерни кижи муңгаравайн, албадал чокка бээр болза, Бурганывыс өөрүүр. (Деңнеңер: 2 Коринфичилерге 9:7.) Бис бо бүгүнү Иеговага эң-не экини бээринге ынак болгаш, кылып турар бис.

17, 18. Сугга суктурарынга силерге кандыг чугула шынар дузалаар база чүге? (Чугаалар 3:3—6).

¹⁷ Сугга суктуруп алыр дээн кижи бүрүзү бергелерге таваржыр. Кандыг? Чижээ, кочу-шоотка азы безин удурланыышкыннарга (2 Тим. 3:12). Азы кандыг-бир багай чаңыңар-биле тулчуп турар силер, а ол үе-үе болгаш, үне халып кээр чадавас. Чок болза, сорулгаңар чедип алдынмас ышкаш боорга, холуңар сула салып, муңгарап турар силер. Ол бүгүнү ажып эртеринге чүү дузалаар? Иеговага ынакшыл деп чугула шынар.

¹⁸ Силерде бар эң-не аянныг шынар — Иеговага ынакшылыңар-дыр. (Номчуптуңар: Чугаалар 3:3—6.) Ол күштүг ынакшыл чуртталгада бергелерни чедиишкинниг ажып эртеринге дузалаар. Канчаар ынак болурун Иегова Боду көргүскен. Иегова бараалгакчыларынга бердинген ынакшылын илередип чоруур деп Библияда бо-ла бижээн боор. Ол дээрге Бурган оларга хандыкшып, оларны кажан-даа кагбас дээни ол (Ыд. ыр. 99:5). А силер Бурганның овур-хевири-биле чаяаттынган болганыңарда, ол ынакшылды канчаар илередип болур силер? (Э. д. 1:26).

19. Иеговага өөрүп четтирген хөөннү канчаар сайзырадып ап болур силер? (Галатчыларга 2:20).

¹⁹ Өөрүп четтирген хөөннү сайзырадырындан эгелеңер (1 Фес. 5:18). Хүн бүрүде бодуңардан: «Иегова бөгүн ынакшылын меңээ канчаар көргүскен?» деп айтырыңар. А соонда Ооң силерге кылган чүүлүн мөргүлүңерге  чугаалап, четтиргениңерни илередирин утпаңар. Павел элчинниң чижээн өттүнүп, Бурганның ажыл-херээн силерге хууда илереткен ынакшылы кылдыр көрүңер. (Номчуптуңар: Галатчыларга 2:20.) Бодуңардан айтырыңар: «Мен база Бурганга ынакшылымны көргүзүксеп турар мен бе?» Иеговага ынакшыл улаштыр-ла күткүлгелерге удурланып, шенелделерни ажып эртеринге дузалаар. Оон аңгыда, ол бараалгал чурумундан туттунарынче база хүн бүрүде дээрде Адаңарга ынакшылыңарны көргүзеринче оттурар.

20. Иеговага чуртталгазын бараалгадыр дизе, чүнү канчаарыл база ол шиитпир кайы хире чугула?

²⁰ Иеговага ынакшыл чоорту силерни тускай мөргүлге Аңаа чуртталгаңарны бараалгадырынче оттурар. Ол чугула базымны кылыптарыңарга, силерге Иегованың кезээ-мөңгеде өнчүзү болур кайгамчык арга ажыттынып кээр. Ол даңгырааңар эки-даа, багай-даа үеде күштүг боор. Ону кижи чуртталгазында чаңгыс катап бээр. Бурганга чуртталгавыс бараалгадып турарывыс дээрге-ле шыңгыы шиитпир-дир. Чуртталгавыста дыка хөй шиитпирлерни хүлээр бис, ынчалза-даа Иеговага чуртталгавыс бараалгаткан шиитпирге чүү-даа деңнешпес (Ыд. ыр. 49:14). Эрлик бисти Бурганга бердинген болбазын дээш, Аңаа ынакшылывысты кошкадырын кызар. Ынчалза-даа Эрликке черле дүжүп бербеңер! (Иов 27:5). Иеговага ханы ынакшылывыс даңгыраавыс ёзугаар амыдыраарынга база дээрде Адавыс-биле найыралды быжыктырарынга дузалаар.

21. Сугга суктурары бараалгалдың төнчүзү эвес, а чүгле эгези деп чүге чугаалап болур?

²¹ Иеговага чуртталгаңарны бараалгаткаш, хуралдың удуртукчулары-биле сугга суктурарының дугайында чугаалажыңар. Сугга суктурары дээрге Иеговага бараалгалдың төнчүзү эвес, а чүгле эгези-дир. Ол орук кезээ-мөңгеде уламчылаар. Ынчангаш дээрде Адаңарга ынакшылыңарны быжыктырыңар. Аңаа хүнден хүнче ынак апаарынга дузалаар сорулгаларны салыңар. Ынчан сугга суктурар күзелиңер оттуп кээр. Сугга суктурар хүнүңер чуртталгаңарда эң-не кайгамчык хүн болур. Ынчалза-даа ол чүгле эгези-дир. Ынчангаш Иеговага болгаш Ооң Оглунга ынакшылыңар кезээ-мөңгеде өзүп-ле турзунам!