1, 2. Улус сугга суктуруп турда, чүү боор база чүнүң дугайында боданып болур бис?

 СУГГА суктуруп турар улусту көрүп турарыңарны сагыштаалаңар. Олар илеткел чугаалап турар акыйның ийи айтырыынга быжыг бүзүрелдиг, ыыткыр «ийе!» деп харыылап турар. Оларның эштери болгаш чоок улузу олар дээш чоргаарланып турар. А кажан чаа акы-угбаларывыс сугдан үнүп кээрге, хөй улус адыш часкап, а оларның арыннары өөрүшкүден чайынналып турар. Неделя санында муң-муң улус ол базымны кылып, Иегова Бурганның сугга суктурган Херечилери апарып турар.

² А силерниң дугайыңарда чүнү чугаалап болур? Сугга суктуруксап турар болзуңарза, бо каржы делегейде «Бурганче чүткүп турар» кижи кылдыр ылгалып турар силер (Ыд. ыр. 13:1, 2). Каш-даа харлыг болзуңарза, бо статья силерге бижиттинген. А шагда-ла сугга суктуруп алган улус база Иеговага кезээ-мөңгеде бараалгаар дээн шиитпирин оон-даа быжыктырып алыксап турар. Ынчангаш Иеговага бараалгаксап чоруурувусту көргүскен үш чылдагаанны сайгарыптаалыңар.

3. Иегованың бараалгакчылары алыс шынга болгаш чөптүг-шынныг чорукка чүге ынак? (Ырлар 118:128, 163).

³ Иегова бараалгакчыларынга: «Алыс шынга... ынак болуңар» — дээн (Зах. 8:19). Иисус эдерикчилерин чөптүг-шынныг чорукче чүткүүрүн оттурган (Мф. 5:6). Ынчап кээрге, шын чүүлдү кылыксаар база Бурганның мурнунга арыг болуксаар күштүг күзелдиг болуру чугула. А силер алыс шынга болгаш чөптүг-шынныг чорукка ынак силер бе? Ийе дээрзинге чигзинмес бис. Силерге меге чорук болгаш кандыг-даа  бузут-бак ческинчиг. (Номчуптуңар: Ырлар 118:128, 163.) Мегеге ынак улус бо делегейниң чагырыкчызы Эрликти өттүнүп турар (Ин. 8:44; 12:31). Ооң бир сорулгазы — Иегованың ыдыктыг адын бак атка киирип, Ону нүгүлдээри-дир. Эрлик Эдем сесерлиинге болган үймээнден эгелээш, Бурганывыс дугайында мегени тарадып турар. Ол Иегованы кижилерден бир-ле эки чүүлдү чажырып турар, бодун бодаар, шынчы эвес чагырыкчы кылдыр көргүскен (Э. д. 3:1, 4, 5). Эрликтиң Иегова дугайында мегези амгы үеде улустуң угаан-чүрээн хораннап турар. Кижилер шынның орнунга мегени шилип алырга, Эрлик оларны аңгы-аңгы багай херектер кылырынче ыдалап турар (Рим. 1:25—31).

4. Иегова Бодун «алыс шынныг Дээрги-Бурган-Чаяакчы» деп канчаар бадыткаан? (Ол ышкаш чурукту көрүңер.)

⁴ Иегова — «алыс шынныг Дээрги-Бурган-Чаяакчы» болгаш, Аңаа ынак улустан шынны чажырбайн турар (Ыд. ыр. 30:6). Шак ынчаар Ол Эрликтиң тарадып турар мегезинден оларны камгалап чоруур. Оон аңгыда, Иегова бараалгакчыларын шынчы болгаш чөптүг-шынныг боор кылдыр өөредип турар. Ооң ачызында олар бодун хүндүлеп, чүрээнде амыр-тайбыңны миннип чоруур (У. ч. 13:5, 6). Силерниң-биле база ол чүүл болган чадавас. Библияны өөренип туруңарда, Иегова Эрликтиң мегезинче карааңарны ажыдып, сеткилиңерге амыр-дышты хайырлаан. Иегованың хоойлу-дүрүмнери шупту улуска, ооң санында силерге хууда, эң-не ажыктыг деп билип алган силер (Ыд. ыр. 76:14). Оон Бурганның чөптүг-шынныг негелделери-биле чурттаксай берген силер (Мф. 6:33). Ынчангаш алыс шынны камгалап, Иегованың дугайында мегени ойтур шавар күзелиңер тыптып келген. Ону канчаар кылырын көрүптээлиңер.

5. Алыс шынның болгаш чөптүг-шынныг чоруктуң талазын канчаар ээлеп болур силер?

⁵ «Алыс шынны деткип, Эрликтиң мегезинден ойталап тур мен. Иегова Дээди Чагырыкчым болзун база Ооң сеткилинге кирер чүүлдерни кылыксап тур мен» деп чуртталгаңар-биле көргүзүп болур силер. Канчаар? Эгезинде Иеговага чуртталгаңарны бараалгаткаш, азы тускай мөргүлге Аңаа кезээ-мөңгеде бараалгаар даңгыракты бергеш, сугга суктуруп алыр херек. Алыс шынга болгаш чөптүг-шынныг чорукка ынакшыл — силерни сугга суктурарынче оттурар эң улуг идиг-дир.

6. Ырлар 44:5-тен алырга, Иисус Христоска ынак болур кандыг чылдагааннар барыл?

⁶ Иисус Христоска чүге ынак силер? Ооң каш чылдагаанын Ырлар 44:5-тен тып ап болур (номчуптуңар). Иисус алыс шынга, биче сеткилге болгаш чөптүг-шынныг чорукка ынак. Силер база ол чүүлдерге ынак болзуңарза, Иисуска ынак силер. Христостуң алыс шынны болгаш чөптүг-шынныг чорукту канчаар эрес-дидим камгалап турганын сактып келиңер (Ин. 18:37). Оон ыңай ол бисти биче сеткилдиг боорунга өөредип турар. Канчаар?

7. Иисустуң биче сеткилдии силерге чүзү-биле кайгамчык-тыр?

⁷ Иисус бисти үлегер-чижээ-биле өөредип турар. Ол шупту ат-алдарны бодунга эвес, а Адазынга бүрүнү-биле чедирип турар (Мк. 10:17, 18; Ин. 5:19). Шак ындыг биче сеткилди көргеш, чүнү миннир-дир силер? Чугаажок, ол чараш шынар силерни Бурганның Оглунга ынак бооп, ону эдереринче деткиир. Иисус чүге биче сеткилдиг? Чүге дизе ол биче сеткилдиг Адазынга ынак болгаш, Ону бүрүнү-биле өттүнүп турар (Ыд. ыр. 17:36; Евр. 1:3). Бо бүгү силерни Иисуска чоок болурунче оттурар эвес-тир бе?

8. Хаанывыс Иисуска чүге ынак бис?

⁸ Хаанывыс Иисуска ынак бис, чүге дээрге ол четпес-дудуу чок Чагырыкчы-дыр. Иегова Боду ону өөредип, аңаа чагырар эргени берген (Иса. 50:4, 5). Оон ыңай Бурганның Оглунуң бодун хайыралавас ынакшылының дугайында боданып көрүңер (Ин. 13:1). Хааныңар Иисус силерниң ынакшылыңарга долузу-биле төлептиг. Аңаа ынак улус ооң айтыышкыннарын сагып турары-биле ынакшылын көргүзүп турар деп, ол тайылбырлаан. Иисус ындыг улусту эш-өөрүм деп адаан (Ин. 14:15; 15:14, 15). Иегованың Оглунуң өңнүү болуру дыка улуг алдар хүндү-дүр!

9. Христианнарның сугга суктурары Иисустуң сугга суктурганы-биле чүзү дөмей?

⁹ Иисус өөреникчилеринге сугга суктурар айтыышкынны берген (Мф. 28:19, 20). Ол боду база сугга суктуруп алган. Ооң сугга суктуруп алганы эдерикчилериниң сугга суктурганындан ылгалдыг. ( «Иисустуң сугга суктурганы эдерикчилеринден чүзү-биле ылгалып турар?» деп көзенекти көрүңер.) Иисус сугга суктурганы-биле Адазының күзел-соруун күүседир дээш, бүгү бодун бараалгаткан (Евр. 10:7). Ооң-биле дөмей, Христостуң эдерикчилери сугга суктуруп тургаш, улус-чон мурнунга Иегова Бурганга кезээ-мөңгеде бараалгаарын аазап турар. Олар ам бодунуң эвес, а Ооң күзел-соруун күүседир дээш чурттап эгелээр. Шак ынчаар олар Дээргизиниң үлегерин өттүнүп турар.

10. Иисуска ынак болур кандыг чылдагааннарлыг силер? Ол ынакшыл силерни чүнү кылырынче оттуруп турар?

¹⁰ Иисус — Иегованың эр чаңгыс Оглу. Бисти чагырзын дээш, Бурган ону Хаан кылдыр томуйлап каан деп чөпшээрежир силер. Иисус биче сеткилдиг база Адазының бүдүжүн бүрүнү-биле өттүнүп турар. Ол аштап-суксааннарны чемгерип, ундарааннарны аргалап, аарааннарны экиртип чораан (Мф. 14:14—21). Амгы үеде ол чыыштарны канчаар удуртуп турарын көрүп турар силер (Мф. 23:10). А келир үеде Бурганның Чагыргазының Хааны бооп, ол оон-даа хөйнү кылыр. Ынчаарга аңаа ынакшылыңарны канчаар көргүзүп болур силер? Ооң үлегерин эдерип тургаш (Ин. 14:21). Ону кылыр дизе, Иеговага чуртталганы бараалгадып, сугга суктуруп алыр херек.

11. Сугга суктурар эң чугула чылдагаан кандыгыл? Тайылбырлаптыңар.

¹¹ Сугга суктурар эң чугула чылдагаан кандыгыл? Бурганның айтыышкыннарының эң-не чугулазы — «Бодуңнуң Бурганың  Дээрги-Чаяакчыга бүгү-ле чүлдү-чүрээң-биле, бүгү-ле сеткил-сагыжың-биле, бүгү-ле угаан-сарыылың-биле, шыдаар-ла шааң-биле ынак бол» деп, Иисус чугаалаан (Мк. 12:30). Силерниң Бурганга ынакшылыңар шак ындыг бе?

12. Иеговага чүге ынак силер? (Ол ышкаш чурукту көрүңер.)

¹² Иеговага ынак болур чылдагааннар эңмежок. Чижээ, Ол «амыдырал хайырлаар суг бажы» база «кандыг-даа буянныг база болбаазыраңгай белектер» Оон кээп турар (Ыд. ыр. 35:10; Иак. 1:17). Силерде бар бүгү-ле эки чүүлдерни беримчелиг болгаш ынакшылдыг Бурган берип турар.

13. Төлевир Иегованың үнелиг белээ деп чүге чугаалап болур?

¹³ Иегованың үнелиг белектериниң бирээзи — төлевир. Чүге ынча деп болур? Иегова биле Ооң Оглунуң аразында найырал кайы хире быжыг-дыр, бодап көрүңер. Иисус мынча дээн: «Адам Меңээ ынак» мен база Адамга ынак мен (Ин. 10:17; 14:31). Миллиард-миллиард чылдар эрткен тудум, оларның аразында найырал дам быжыккан (У. ч. 8:22, 23, 30). А Иисустуң хинчектенип, өлүп турганын көөрү Бурганга кайы хире берге болган деп бодаар силер? Ынчалза-даа Иегова кижи төрелгетенге, ооң санында силерге, дыка ынак болгаш, силер база өске улус мөңге чурттазын дээш, эргим Оглун өргүлге берипкен (Ин. 3:16; Гал. 2:20). Бо дээрге Бурганга ынак болур эң-не чугула чылдагаан-дыр.

14. Кандыг сорулганы эң төлептиг деп болур?

¹⁴ Иегованы эки билген тудум, Аңаа ынакшылыңар оон-даа күштүг апарган. Аңаа  амгы-даа үеде база кезээ-мөңгеде чоок болуксап турар силер. Ону кылып шыдаар силер! Ооң чүрээн өөртүр кылдыр, Иегова силерни ынакшылдыы-биле деткип турар (У. ч. 23:15, 16). Ону чүгле чугаа-сөзүңер-биле эвес, а ажыл-херээңер-биле база көргүзүп болур силер. Чуртталгаңарны чүге тураскаадып турарыңардан Иеговага кайы хире ынааңар билдингир боор (1 Ин. 5:3). Бурганны өөртүп чурттаар дээн сорулга кижиниң салып ап болур эң төлептиг сорулгазы-дыр!

15. Иеговага ынакшылыңарны канчаар көргүзүп болур силер?

¹⁵ Иеговага ынакшылыңарны канчаар көргүзүп болур силер? Бирээде, тускай мөргүлге чуртталгаңарны Аңаа бараалгадыңар (Ыд. ыр. 39:9). Ийиде, Бурганга берген аазаашкынны өске улуска көргүзер дээш, сугга суктуруп алыңар. Чуртталгаңарда ол чугула базым силерге дыка хөй өөрүшкүнү эккээр деп көрдүвүс. Силер ам бодуңар дээш эвес, а Иегова дээш чурттап эгелээр силер (Рим. 14:8; 1 Пет. 4:1, 2). Ол дээрге дыка шыңгыы шиитпир. Ынчалза-даа сугга суктурган соонда амыдыралыңар эки талаже өскерли бээр. Чүге ынча деп болур?

16. Ырлар 40:13-тен алырга, чуртталгазын Аңаа бараалгаткан улусту Иегова канчаар шаңнаар?

¹⁶ Делегейде Иегова дег беримчелиг кым-даа чок. Аңаа чеже-даа хөйнү бээриңерге, Ол силерге чүс катап хөйнү эгидер (Мк. 10:29, 30). Ол силерге бо төнчүзү кел чыдар делегейге ам безин аас-кежиктиг болгаш ужур-уткалыг чуртталганы бээр. Ол дээрге чүгле эгези-дир. Сугга суктурганындан эгелээн аян-чорууңар кажан-даа төнмес. Дээрде ынак Адаңарга кезээ-мөңгеде бараалгап болур силер. Араңарда ынакшыл улам өзер. Силер Иегова ышкаш кезээ-мөңгеде чурттаар силер. (Номчуптуңар: Ырлар 40:13.)

17. Иеговага Ооң чок чүүлүн берип болур бе? Тайылбырлаптыңар.

¹⁷ Кижи сугга суктуруп алган соонда, дээрде Адазынга эң-не үнелиг чүүлүн бээр аргалыг апаар. Бистиң чуртталгавыста шупту эки чүүлдер база эң өөрүшкүлүг сактыышкыннарывыс чүгле Ададан. Ынчалза-даа Октаргайның Ээзинге Ооң чок чүүлүн берип болур бис. Ол дээрге арыг сеткиливистен  Аңаа бердинген бараалгалывыс-тыр (Иов 1:8; 41:3; У. ч. 27:11). Кижи чуртталгазын оон эки кылдыр канчаар ажыглап болур деп? Чугаажок, сугга суктурар эң-не эки чылдагаан дээрге Иеговага ынакшыл-дыр.

18. Бодуңарга кандыг айтырыглар салып болур силер?

¹⁸ «Сугга суктурар сен бе?» деп айтырыгга ам канчаар харыылар силер? Силерниң орнуңарга кым-даа харыылап шыдавас. Аңаа харыылаары белен боор кылдыр: «Мээң сугга суктуруп аарымга чүү шаптыктап турарыл?» деп боданыңар (Аж.-ч. 8:36). Ол чугула базымны кылыр үш чылдагаанны сактып келиңер. Бирээде: алыс шынга болгаш чөптүг-шынныг чорукка ынак силер. Бодуңардан: «Шупту улус шынны чугаалап, шын алдынар үени көрүксеп турар мен бе?» деп айтырыңар. Ийиде: Иисус Христоска ынак силер. «Бурганның Оглу мээң Хааным болурун күзеп, ооң үлегерин эдериксеп турар мен бе?» деп бодуңардан айтырыңар. Эң чугула үш дугаар чылдагаан: Иеговага ынак силер. Бодуңардан айтырыңар: «Иеговага бараалгап, Ооң чүрээн өөртүксеп турар мен бе?» Бо айтырыгларның шуптузунга «ийе» деп харыылаан болзуңарза, сугга суктурарын соңгаарлаткан ажыы бар бе? (Аж.-ч. 16:33).

19. Сугга суктурарын чүге соңгаарлаткан херээ чок? Чижекти чугаалаңар (Иоанн 4:34).

¹⁹ Сугга суктурарындан диттикпейн турар болзуңарза, Иисустуң чугаалаан чижээниң дугайында боданыңар. (Номчуптуңар: Иоанн 4:34.) Солун чүүл, ол Адазының күзел-соруун күүседирин аъш-чемге дөмейлээн. Чүге? Аъш-чем кижиге ажыктыг. Иегова бистен чүнү-даа дилээр болза, ол биске ажыктыг боор деп, Иисус билир турган. Ынчаарга Иегова сугга суктуруп алырыңарны дилеп турар бе? Ийе, ол дээрге Ооң күзел-соруу-дур (Аж.-ч. 2:38). Сугга суктуруп алыр болзуңарза, силерниң бодуңарга-ла ажыктыг боор. Тулган дээн поварның чаагай чемин амданнанып чииринден ойталаар силер бе? Ынчаарга сугга суктурар өөрүшкүнү минниринден чүге ойталап турар силер?

20. Дараазында статьяга чүнү сайгарар бис?

²⁰ Чамдык улус сугга суктурарын чүге соңгаарладып турар? Олар: «Ам-даа белен эвес мен» дээр чадавас. Шынап-ла, Иеговага чуртталганы бараалгадып, сугга суктурары чуртталгада эң-не чугула шиитпир. Ынчангаш аңаа кайы-хамаанчок хамаарылгалыг болбас болза эки. Сугга суктурарынга белеткел хөй үе болгаш күжениишкин негээр. Бир эвес сугга суктурар изиг күзелиңер бар болза, аңаа канчаар белеткенип болур силер? Дараазында статьяга ол айтырыгның харыызын билип алыр бис.