1. Чыыштарывысче бир дугаар келген улусту чүү кайгадып турар? (Ол ышкаш чурукту көрүңер.)

 ИЕГОВАНЫҢ Херечилериниң Хурал залынче бир дугаар келген ашак-кадайны сагыштаалап көрүңер. Оларны чылыг-чымчак хамаарылга болгаш ынакшыл аажок кайгаткан. Чанып бар чыда кадайы ашаанга: «Олар өске улус ышкаш эвес-тир. Меңээ аңаа дыка аянныг болду» — дээн.

2. Чамдык улус Иеговага чүге бараалгавайн барган?

² Христиан чыышта тергиидеп турар ынакшыл дыка-ла кайгамчык. Ийе, Иегованың Херечилери тергиин эвес (1 Ин. 1:8). Ынчангаш акы-угбалар-биле чоок танышкан тудум, оларның четпес талаларын бо-ла эскерер апаар бис (Рим. 3:23). Харааданчыг чүүл, чамдык улус оларның частырыгларынче хөй кичээнгей салыр дээш, Иеговага бараалгавайн барган.

3. Христостуң алыс шын эдерикчилери өскелерден чүзү-биле ылгалып турар? (Иоанн 13:34, 35).

³ Ам база катап бо статьяның кол шүлүүн көрүптээлиңер. (Номчуптуңар: Иоанн 13:34, 35.) Христостуң алыс шын эдерикчилери өскелерден чүзү-биле ылгалып турар? Тергиини-биле эвес, а бот-боттарынга ынакшылы-биле.  Эскерип көрүңер, Иисус оларга: «Силерни Мээң өөреникчилерим-дир деп делегейде хамык улус танып алыр» — дээн. Ынчаар ол чүгле ооң эдерикчилери эвес, өске-даа улус ооң алыс шын өөреникчилерин бот-боттарынга ажык сүрбес ынакшылындан билип каар деп көргүскен.

4. Чамдык улус алыс шын христианнарның дугайында чүнү билип алыксап турар?

⁴ Иеговага бараалгавайн турар улус: «Христостуң алыс шын эдерикчилерин тодарадып алырынга ынакшыл канчаар дузалап турар? Иисус элчиннеринге ынакшылын канчаар илередип турган? Ону канчаар өттүнүп болур?» деп айтырып болур. Иегованың Херечилеринге ол айтырыгларның дугайында боданыры база ажыктыг. Бо бүгү биске ха-дуңмага, ылаңгыя оларның четпес талаларын көргеш, улам-на ынакшылды илередиринге дузалаар (Эф. 5:2).

5. Иоанн 15:12, 13-те Иисустуң сөстерин тайылбырлаңар.

⁵ Иисус ооң эдерикчилери өскелерден тускай ынакшылы-биле ылгалыр деп тода көргүскен. (Номчуптуңар: Иоанн 15:12, 13.) Ол оларга: «Мээң силерге ынаам ышкаш, бот-боттарыңарга ынак болуңар» — дээн. Иисус чүнү чугаалаксаан? Ол өөреникчилерин бодун хайыралавас ынакшылды илередиринче деткээн. Шак ындыг ынакшыл, херек болза, бисти ха-дуңмавыс дээш амы-тынывысты бээринче оттурар b.

6. Бурганның Сөзү ынакшылче улуг кичээнгейни канчаар салып турар?

⁶ Бурганның Сөзү ынакшылче улуг кичээнгейни салып турар. Хөй улус бо шүлүктерни шээжилеп алган: «Бурган —  ынакшыл-дыр» (1 Ин. 4:8); «Чаныңда кижиге бодуңга бодуң дег ынак бол» (Мф. 22:39); «Ынакшыл... хөй-ле бачытты өршээп боор» (1 Пет. 4:8); «Ынакшыл кажан-даа төнүп читпес» (1 Кор. 13:8). Бижилгеде бо болгаш өске-даа шүлүктер ынакшыл деп чараш шынарны сайзырадырынче база ону илередиринче оттуруп турар.

7. Эрлик кижилерни ёзулуг ынакшыл-биле чүге хаара тудуп шыдавас?

⁷ Шупту шажыннар алыс шын бисте дээр. Ынчалза-даа Бурган дугайында олар боттарыныы-биле өөредир боорга, хөй улус кайгап турар. Ынчангаш олар алыс шын чүдүлгени канчаар тодарадып алырын билбейн турар. Эрлик кижилерни будалдырар дээш, хөй меге шажыннарны чогаадып каан. Ынчалза-даа ол бот-боттарынга ынак делегей чергелиг ха-дуңманы тургузуп шыдавас. Ону чүгле Иегова шыдаар. Чүге дизе Ол — ынакшылдың үнер Дөзү-дүр. Чүгле Иегованың ыдыктыг сүлдези, йөрээли бар улус бот-боттарынга ёзулуг ынак боор (1 Ин. 4:7). Ынчангаш Иисус ооң алыс шын эдерикчилерин ажык сүрбес ынакшылдан танып ап болур дээн.

8, 9. Иегованың Херечилериниң аразында ынакшылы өске улуска кандыг салдар чедирип турар?

⁸ Иисустуң баш удур чугаалааны дег, хөй улус ооң алыс шын эдерикчилерин ёзулуг ынакшылындан танып ап турар. Чижээ, И́ен дээр акывыс ооң бажыңының чанында стадионга болган шуулганче бир дугаар барганын сактып чугаалаан. Ол-ла стадионга шуулганның бетинде Иен маргылдаага база барган. Акывыс мынча дээн: «Ол шуулган дыка-ла ылгалдыг болган! Херечилер эвилең-ээлдек, шевергин кеттинген, а ажы-төлү дыка чурумнуг деп көрген мен. А эң кол чүүл, олар дыка аас-кежиктиг болган. Меңээ ол чүүл чедишпейн турган. Шуулганның программазындан чүнү-даа сактып албаан мен, ынчалза-даа Херечилерниң алдынып турганы мени аажок кайгаткан» c. Бис бот-боттарывыска ёзулуг ынак болгаш, ынчаар алдынып турар бис. Акы-угбаларывыска ынакшыл бисти хүндүткелдиг болгаш буянныг болурунче оттуруп турар.

⁹ Джон дээр акывыс чыыштарже барып эгелээш, база шак ындыг минниишкиннерлиг болган: «Ында улустуң кайы хире найыралдыын көргеш, аажок магадаан мен. Олар меңээ ыдыктыг ышкаш болган. Оларның ынакшылын көргеш, алыс шынны тып алганымны билип каан мен» d. Ындыг таварылгалар Иегованың бараалгакчылары — алыс шын христианнар деп бадыткап турар.

10. Ынакшылды көргүзер тускай арга биске кажан тыптып кээп болур? (Ол ышкаш немелде тайылбырны көрүңер.)

¹⁰ Эгезинде чугаалашканывыс дег, акы-угбаларывыстың аразында тергиин кижи чок. Үе-үе болгаш, олар бисти хомудадып болур (Иак. 3:2) e. Ылаңгыя ындыг байдалдарда оларга ынакшылды ажыл-херээвис болгаш аксы-сөзүвүс-биле көргүзер тускай аргавыс тыптып кээр. Аңаа хамаарыштыр  Иисустуң чижээнден чүнү өөренип ап болур бис? (Ин. 13:15).

11. Иаков биле Иоанның кандыг четпес талалары көстүп келген? (Ол ышкаш чурукту көрүңер.)

¹¹ Иисус эдерикчилеринден тергиин чорукту манавайн турган. Харын-даа олар Иегованың сеткилинге кирзин дээш, ол оларга эттинип алырынга ынакшылдыы-биле дузалажып турган. Бир катап Иаков биле Иоанн Чагыргага хүндүткелдиг черлерни дилеп эккээр кылдыр, Иисусче авазын чоргузупкан (Мф. 20:20, 21). Иаков биле Иоанның дилээ оларның өрү көрдүнер чоруун база эрге-дужаалга ынаан көргүскен (У. ч. 16:18).

12. Иаков биле Иоанндан аңгыда, өске-даа элчиннерниң багай чаңнары үнүп келген деп чүге чугаалап болур? Тайылбырлаптыңар.

¹² Ол таварылгада чүгле Иаков биле Иоанның эвес, а өске-даа элчиннерниң багай чаңнары үнүп келген. Библияда: «Ону дыңнааш, арткан он элчин демги ийизинге хорадап үнген» — дээн (Мф. 20:24). Олар Иаков биле Иоаннга кайы хире аарышкылыг сөстерни чугаалап турганын сагыштаалап болур. Олар ол ийи акышкыга мынча деп турган чадавас: «Чүү дээш силер Чагыргага тускай черлерни дилеп турарыңар ол? Кончуг бис деп  бодап тур силер бе? Чүгле силер Иисус-биле кады кызымак ажылдап турган эвес силер! Бистиң база бедик черни ээлээр эргевис бар!» Олар кандыг-даа сөс эткен болза, түр када бот-боттарынга ынакшылды илеретпейн барган.

13. Иисус элчиннериниң четпес талаларын көргеш, канчалган? (Матфей 20:25—28).

¹³ А Иисус канчалган? Ол хорадаваан. «Силерден артык биче сеткилдиг, кезээде бот-боттарынга ынак өске элчиннерден тып аар мен» деп, Иисус чугаалаваан. Харын-даа ол ак сеткилдиг эрлер-биле шыдамыккай чугаалажып турган. (Номчуптуңар: Матфей 20:25—28.) Кым чугула дээш элчиннер ооң соонда база сайгаржып турган-даа болза, Иисус дөмей-ле оларга ынакшылын көргүзүп чораан (Мк. 9:34; Лк. 22:24).

14. Иисустуң элчиннери кандыг байдалга өскен?

¹⁴ Иисус элчиннериниң кандыг байдалга өзүп келгенин кичээнгейге ап турган (Ин. 2:24, 25). Олар бедик эрге-дужаалдыг, ат-алдарлыг болуксаар ном-хоойлу тайылбырлакчылары болгаш фарисейлер аразынга өзүп келген (Мф. 23:6; 2010 чылдың апрель 1-ниң «Таңныыл суургазында» «Иисус и его ученики проповедовали в синагогах» деп статьяны деңнеңер). Оон аңгыда, ол шажын башкарыкчылары боттарының караанга чөптүг-шынныг турганнар (Лк. 18:9—12) f. Ол чүүл элчиннерниң боттарынче база өскелерже көрүжүнге салдар чедирген деп, Иисус билип турган (У. ч. 19:11). Кажан өөреникчилери чазыптарга, ол хорадавайн, олардан хөйнү манавас турган. Иисус оларның чүрээ чымчак деп билир болгаш, өрү көрдүнер база эрге-дужаалга ынак чоруун тура тыртып, ынакшылды сайзырадырынга шыдамык дузалап чораан.

15. Иаков, Иоанн-биле болган болуушкундан чүнү өөренип ап болур бис?

¹⁵ Иаков, Иоанн-биле болган болуушкун бисти хөй чүүлге өөредип болур. Оларның Чагыргага бедик черни ээлээрин дилээни шын эвес болган. Өске элчиннер база ол дээш демниг чоруун үреп алганы-биле шын эвес алдынган. Ындыг-даа бол, Иисус 12 элчининге чылыг-чымчак болгаш ынакшылдыг хамаарылгалыг турган. Оон чүнү өөренип ап болур бис? Акы-угбаларның алдынып турары-даа эвес, а оларның частырыгларынга бистиң хамаарылгавыс чугула. Биске шын көрүштүг болурунга чүү дузалаар? Бисти бир кижи хомудадыптар болза, бодувуска бо айтырыгларны салып болур бис: «Чүге ынчаар хомудаарым ол? Бо байдал мээң эдер ужурлуг багай чаңым бар деп көргүзүп турар бе? Азы мени хомудадыпкан кижи бергелерни эртип турар эвес бе? Хомудай бергеним чөп деп бодап-даа турар болзумза, хомудадыкчыны өршээп, ажык сүрбес ынакшылды көргүзүп шыдаар мен бе?» Өскелерге шак ындыг ынакшылды көргүзер болзувусса, Иисустуң ёзулуг өөреникчилери бис деп бадыткаар бис.

16. Иисустуң чижээнден оон ыңай чүнү өөренип ап болур бис?

¹⁶ Иисустуң чижээ ха-дуңманы бодап билиринге  дузалап турар (У. ч. 20:5). Иисус кижиниң чүрээн өттүр көрүп турган, а бис шыдавас бис. Ынчалза-даа бисти хомудадыптар акы-угбаларга шыдамыккай бооп болур бис (Эф. 4:1, 2; 1 Пет. 3:8). Бир эвес оларны эки билип алыр болзувусса, ону кылыры белен боор. Чижектен көрээлиңер.

17. Кожуун хайгааракчызы бир акывыс-биле эки таныжып алырга, чүге ажыктыг болган?

¹⁷ Чөөн Африкадан эргий кезиир бараалгакчы берге чаңныг ышкаш болган акыйның дугайында чугаалаан. Кожуун хайгааракчызы канчаар алдынган? «Ол акыйдан дезериниң орнунга, ооң-биле чоок таныжып алырын шиитпирлээн мен» — деп, ол үлешкен. Демги акывыстың аажы-чаңынга эрткен үези кандыг салдар чедиргенин кожуун хайгааракчызы билип алган. Ол улаштыр мынча дээн: «Кижизидилгезиниң ужундан тыптып келген багай аажы-чаңы-биле тулчур дээш, акывыс кайы хире хөй күжениишкиннер үндүрүп турарын билип каан мен. Ооң чедиишкиннерин көргеш, магадап ханмаан мен. Бис дыка эки эжишкилер апарган бис». Шынап-ла, акы-угбаларывысты билип алыр дээш кызар болзувусса, оларга ынакшылды илередири белен боор.

18. Бисти хомудадыпкан болза, бодувуска кандыг айтырыгларны салыр болза эки? (Чугаалар 26:20).

¹⁸ Чамдыкта бисти хомудадыпкан кижи-биле чугаалажыр болза эки деп бодап болур бис. Ынчалза-даа баштай бо айтырыгларны бодуңарга салыңар: «Байдалды долузу-биле билип турар мен бе? [У. ч. 18:14]. Ол мени хомудадыр дивээн эвес бе? [Эккл. 7:20]. Бодум база ындыг частырыгны кылган эвес мен бе? [Эккл. 7:21, 22]. Ол кижи-биле чугаалашкаш, байдалды дам нарыыдадып каар эвес мен бе?» (Номчуптуңар: Чугаалар 26:20.) Акывыска азы угбавыска ынак болгаш, ол чүүлче кичээнгей салган херээ чок деп билип каарынга бо айтырыглар дузалаар.

19. Чүнү кылырынче хөөнненип алдыңар?

¹⁹ Иегованың Херечилери бот-боттарынга ынак болгаш, Иисустуң алыс шын өөреникчилери бис деп бадыткап турар. Бистиң кижи бүрүзү Иисусту эдерип турарын канчаар көргүзүп болур? Тергиин эвес ха-дуңмага ажык сүрбес ынакшылды көргүзүп тургаш. Шак ындыг ынакшылды илередир болзувусса, өске улус шажынывыстың алыс шынныын билип кааш, ынакшылдыг Иегова Бурганга бараалгап эгелээр. Ынчангаш алыс шын христианнарның кайгамчык шынарын, ынакшылды, кезээде илередиилиңер!