1. Ада-иелер ажы-төлүнге чүнү күзеп турар?

 ЭРГИМ ада-иелер, ажы-төлүңер Иегованы билип ап, Аңаа ынак апаарын күзеп турарыңарны билир бис. Ынчалза-даа Бурган көзүлбес. Ынчаарга Ол шын бар деп бүзүрээринге база Аңаа чоокшулаарынга ажы-төлүңерге канчаар дузалап болур силер? (Иак. 4:8).

2. Ада-иелер ажы-төлүн Иегованың шынарлары-биле канчаар таныштырып болур?

² Ажы-төлүвүс Иеговага чоокшулазын дизе, оларның-биле Библияны өөренири чугула (2 Тим. 3:14—17). Ынчалза-даа Ыдыктыг Бижилгеде база бир арганы чугаалаан. Угаадыглыг чугаалар номунда бир ада оглу-биле Иегованың чаяалгаларының дугайында чугаалажып турар. Адазы чаяалгаларда Бурганның көскү шынарларының дугайында утпас кылдыр, оглун чагып-сургап турар (У. ч. 3:19—21). Ада-иелер ажы-төлүн Иегова-биле таныштырар дээш, чаяалгаларже кичээнгейни канчаар салып болурунуң каш аргазын ам көөр бис.

3. Ада-иелер ажы-төлүнге чүнү билип алырынга дузалаар ужурлуг?

³ «Бурганның көзүлбес шынарлары — Ооң мөңге күчү-күжү база бурганчы бүдүжү бүгү чаяалганы топтап көөрүн дамчыштыр кижиниң угаанынга билдингир, көскү апарды» деп Библияда бижээн (Рим. 1:20). Ада-иелер, ажы-төлүңер-биле агаар-бойдусче үнүп, селгүүстээринге ынак чадавас силер. Ол үени ажы-төлүңерге Иегованың кайгамчыктыг шынарлары биле Ооң чаяалгаларының аразында харылзаазын көргүзер дээш ажыглаңар. Ону кылырынга Иисустуң чижээ канчаар дузалап болур?

4. Иисус кичээнгейни чаяалгаларже салбышаан, улусту канчаар өөредип турган? (Лука 12:24, 27—30).

 ⁴ Иисус кичээнгейни чаяалгаларже салбышаан, улусту канчаар өөредип турган? Бир катап ол өөреникчилерин каарганнарже болгаш лилия чечектеринче көөрүн дилээн. (Номчуптуңар: Лука 12:24, 27—30.) Чогум Иисус өске-даа дириг амытанны азы үнүштү чижек кылдыр ап болур турган. Ынчалза-даа ол дыңнакчыларының эки билир чечээн болгаш кушкажын шилип алган. Ооң өөреникчилери шөлде өзүп турар лилияларны база дээрде ужуп бар чыдар каарганнарны көрүп болур турган. Иисус оларже холун айтып турарын сагыштаалап көрүңер даан. Иисус ол чаяалгалар дугайында чугаалаан соонда өөреникчилеринге дээрде Адазының беримчелиг болгаш буянныг чоруунуң дугайында чугула кичээлди өөреткен. Иегова каарганнарның болгаш лилияларның дугайында сагыш човап турары дег, шынчы бараалгакчыларын база ашкарып-чемгерип, хепкерер.

5. Ада-иелер Иегованың дугайында чугаалаар дээш, ажы-төлүнүң кичээнгейин кандыг чаяалгаларже салып болур?

⁵ Ада-иелер, ажы-төлүңерни өөредип тургаш, Иисусту канчаар өттүнүп болур силер? Ынак дириг амытаныңар азы үнүжүңер дугайында чугаалап бериңер. Ол чаяалга Иегованың дугайында чүнү ажыдып турарын тайылбырлап бериңер. Оон төлүңерден ол кандыг дириг амытанга азы чечекке ынак, айтырыңар. Баштай төлүңерниң сонуургаар чаяалгазының дугайында чугаалажыр болзуңарза, ол силерни Иегованың дугайында чугаалап туруңарда, оон-даа кичээнгейлиг дыңнаар.

6. Кристоферниң авазының чижээнден чүнү өөренип ап болур?

⁶ Кандыг-бир чаяалга Иегованың шынарларын канчаар ажыдып турарын ажы-төлге тайылбырлаар дээш, ооң дугайында чугаалаарының мурнунда хөй информация дилээри албан бе? Албан эвес. Чижээ, Иисус бирден-бирээ чокка каарганнарның чүү чип турарын азы лилияларның тургузуун чугаалаваан. Ийе, ажы-төлүңер бойдустуң дугайында ханы билиглер алырынга ынак чадавас. Ынчалза-даа ону бир-ле чүүлге өөредир дизе, каш сөс азы бөдүүн айтырыг чедер боор. Бодунуң чашкы үезиниң дугайында Кри́стофер мынча деп сактып чугаалаан: «Ававыс бөдүүн сөстер-биле бистиң кичээнгейивисти Бурганның чаяалгаларынче салып билир турган. Чижээ, даглар чанынга келгеш, ол мынча дээр турган: „Кандыг кончуг өндүр улуг даглар чоор! Иегова кайгамчык дээн Чурукчу эвес-тир бе?“ Азы океан эриинге турувуста, ол мынча деп болур турган: „Бо чалгыгларның күштүүн көрүңер даан! Бурган дыка күштүг эвес-тир бе?“». Кристофер улаштыр мынча дээн: «Ол бөдүүн-даа болза, уткалыг сөстер бисти боданырынче оттуруп турган».

7. Ажы-төл Иегованың чаяалгаларының дугайында боданыр кылдыр канчаар өөредирил?

⁷ Ажы-төлүңер өзүп кээрге, чаяалгалардан Иегованың бүдүжүнүң аңгы-аңгы талаларын эскерер кылдыр оларны өөредиңер. Чижээ, кандыг-бир чаяалганы шилип алгаш, төлүңерден: «Бо чаяалгадан Иегованың дугайында чүнү өөренип ап болур сен?» деп айтырып болур силер. Ооң ханы уткалыг харыылары силерни кайгадыптар боор (Мф. 21:16).

8. Израильчилер ажы-төлү-биле орукка чорааш, кандыг арганы ажыглап турган?

⁸ Израильчилер ажы-төлүн Иегованың айтыышкыннарынга «бажыңынга олургаш-даа, орукка чорааш-даа» өөредир ужурлуг турган (Ы. х. к. 11:19). Израильде оруктар көдээ суур таварты эртер турган. Аңаа янзы-бүрү дириг амытаннарны, куштарны болгаш  чечектерни көрүп болур турган. Израильчи өг-бүле ол орук-биле бар чыдырда, ада-иелерниң чаяалгалар дугайында ажы-төлү-биле чугаалажыр аргазы тыптып кээр турган. Эргим ачалар болгаш авалар, силерде база ындыг аргалар бар чадавас. Чамдык ада-иелер чүнү канчап турарын көрүптээлиңер.

9. Пунита биле Катяның чижээ силерге чүзү-биле ажыктыг?

⁹ Индияның бир улуг хоорайында чурттап чоруур Пуни́та үлешкен: «Суурда төрелдерже чораан санывыста-ла, ажы-төлүвүс Иегованың чаяалгаларын билип алзын дээш, дузалаар чордувус. Дааш-шимээнниг, хөлзээзинниг хоорайга бодаарга, ыржым-шыпшың көдээ черге ажы-төлүмге чаяалгаларны эскерип, оларның дугайында боданыры белен деп бодаар мен». Ада-иелер, ажы-төлүңер оларны чараш бойдустуң булуңнарынче канчаар чедирип чорааныңарны кажан-даа утпас. Молдовадан Катя мынча дээн: «Мээң чашкы үемден эң-не солун сактыышкыннарым дээрге ада-ием-биле хоорай даштынче агаарлап чораанывыс. Олар мени бичиимден тура чаяалгаларны хайгаарап, оларны таварыштыр Иегованы көрүп каарынга өөреткени дээш, оларга аажок өөрүп четтирер-дир мен».

10. Хоорайдан дашкаар чорууру белен эвес болза, ада-иелер чүнү канчап болур? ( «Ада-иелерге дуза» деп көзенекти көрүңер.)

¹⁰ А хоорайдан үнер аргаңар чок болза канчаар? Индиядан Амо́л мынча дээн: «Мээң чурттап турар черимде ада-иелер дыка хөй ажылдап чоруур. А хоорайдан дашкаар аян-чорук кылыры дыка аар. Ынчалза-даа бичии парк азы балкон безин Иегованың чаяалгаларын эскерип, топтап көрүп, Ооң чараш шынарларының дугайында чугаалаарынга тааржы берип болур». Долгандыр кичээнгейлиг көрзүнер болзуңарза, бажыңыңар чанында безин ажы-төлүңерге көргүзүп болур Иегованың чаяалгалары бар черни тып аар силер (Ыд. ыр. 103:24). Чижээ, ында куштар, курт-кымыскаяктар, үнүштер база оон-даа өске чүүлдер бар чадавас. Германиядан Карина үлешкен: «Мен бичиимде авам-биле бо-ла  агаарлаар турган бис. Ол чечектерге ынак болгаш, мээң кичээнгейимни үргүлчү айыраң каас чечектерже салыр турган». Оон аңгыда, Иегованың чаяалгаларының дугайында организациявыстың үндүрүп турары хөй санныг видеолар болгаш статьялар бар. Эргим ада-иелер, оларны ажыглаар-дыр силер бе? Байдалыңар кандыг-даа бол, ажы-төлүңерни Бурганның чаяалгаларын эскерип топтап көөр кылдыр өөредип болур силер. Ам Иегованың кандыг шынарларынче кичээнгейни салып болурун көрүптээлиңер.

11. Ада-иелер уруг-дарыынга Бурганның ынакшылын эскерип каарынга канчаар дузалап болур?

¹¹ Уруг-дарыыңарга Иегованың ынакшылын көрүп каарынга дузалаар дээш, дириг амытаннар оолдары дээш кайы хире ынакшылдыг сагыш човап турарынче кичээнгейни салып болур силер (Мф. 23:37). Оон ыңай бисти долгандыр бойдуста янзы-бүрү чүүлдерже кичээнгейни салыңар. Кырында чугаалашканывыс Карина мынча дээн: «Авам-биле агаарлап чорувуста, ол мени тургузупкаш: „Уруум, долгандыр чечектерже көр даан! Чүге чечек бүрүзү бир тускай? Чүзүн-баазын чечектерден Иегованың сеңээ ынакшылы канчаар көстүп турар-дыр, эскерип көр даан“ дээр чораан. Чылдар эрткен, мен ам-даа чечектерниң эңме-тикчок хевирлерин, каас-чаражын магадап, топтап көөрүнге ынак мен. Иегованың биске кайы хире ынаан ол чечектер меңээ сагындырып чоруур».

12. Ада-иелер уруг-дарыынга Бурганның мерген угаанын эскерип каарынга канчаар дузалап болур? (Ырлар 138:14). (Ол ышкаш чурукту көрүңер.)

¹² Ажы-төлүңерге Бурганның мерген угаанын эскереринге дузалаңар. Иегованың мерген угааны бистиинден оранчок бедик (Рим. 11:33). Ону онзалаар дээш, мынча деп болур силер: «Булуттарже көр даан. Ында та чеже килограмм суг бар чүве! Ынчалза-даа олар, хөвең дег, чииги аажок көжүп турар эвес-тир бе?» (Иов 38:36, 37). Азы мага-бодувустуң кайгамчык тургузуунче кичээнгейни салып болур. (Номчуптуңар: Ырлар 138:14.) Владимир ону канчаар кылганыл? «Бир катап оглувус чадаг-тергеден кээп ушкаш, дискээн сүвүрүп алган. Каш хонук эрткенде, ооң балыы экирип калган. Иегова бисти кайгамчык кылдыр чаяап, клеткаларывыс мага-бодувусту септеп шыдаар кылдыр кылып каан деп кадайым-биле аңаа тайылбырлаан бис. А кижилерниң кылган механизиминде ындыг чүүл  чок. Чижээ, авария соонда машина бодун боду септеп шыдавас. Бо болуушкундан Иегова дыка мерген угаанныг деп, оглувус билип каан».

13. Ада-иелер уруг-дарыынга Бурганның күжүн эскерип каарынга канчаар дузалап болур? (Исайя 40:26).

¹³ Иегова бисти дээрже шиглей көргеш, Ооң кызыгаар чок күжү шупту сылдыстарны боттарының черлеринге канчаар тудуп турарын боданырынче оттуруп турар. (Номчуптуңар: Исайя 40:26.) Силер база ажы-төлүңер-биле дээрже көрүп, олар ында чүнү көрүп турарын чугаалажып болур силер. Тайваньдан Тинти́н деп угбавыс бодунуң чашкы үелерин сактып ора, мынча дээн: «Хоорайга сылдыстар көзүлбес боорга, сылдыстарлыг дээрни көөр дээш, авам-биле походтап чорупкан бис. Ол үеде мен школага бодумну өскелерден хоорук кылдыр миннип, Бурганга шынчы бараалгап шыдавас боор мен деп сагышсырап турган мен. Ынчан авам: „Уруум, Иеговага шупту сылдыстарны чаяарынга кайы хире хөй күш херек турган-дыр, бодап көр даан! Иегова база сеңээ кандыг-даа шенелдени ажып эртеринге ол-ла күштү ажыглап болур“ деп мени бүзүреткен. Ол сылдыстарны хайгаарап көрген соонда, Иегованы оон-даа эки билип алыксап, Аңаа чүткүлдүг бараалгаар күштүг күзелим тыптып келген».

14. Иегова — аас-кежиктиг Бурган деп, ада-иелер уруг-дарыынга канчаар көргүзүп болур?

¹⁴ Иегова аас-кежиктиг база оюн-баштак деп Ооң чаяалгаларындан көскү. Дириг амытаннарның хөй кезии, оларның санында куштар болгаш балыктар, ойнап-хөглээр чаңныг деп, эртемденнер билип каан (Иов 40:15). Ажы-төлүңерниң дириг амытаннарны көргеш, каттырып турганын эскерген чадавас силер. Олар бичии дииспейниң борбак хендир соондан маңнап бар чыдарын азы эниктерниң аразында ойнап турарын көрген чадавас. Кажан ажы-төлүңер кандыг-бир амытанның чаптанчыг чаңын көрүп кааш, тадыладыр каттырып турда, аас-кежиктиг Бурганга бараалгап турарывысты оларга сагындырыңар (1 Тим. 1:11).

15. Ада-иелерге ажы-төлүнүң сеткилин билип алырынга чүү дузалаар? (Чугаалар 20:5). (Ол ышкаш чурукту көрүңер.)

¹⁵ Чамдыкта ажы-төлү-биле бир-ле чүүл  болганда, олар сеткилин чугаалавайн турарын ада-ие билип турар. Бир эвес силер ындыг байдалда болзуңарза, төлүңерниң чүрээнде бодалдарын билип алыр дээш кызыңар. (Номчуптуңар: Чугаалар 20:5.) Чамдык ада-иелерге ажы-төлү-биле кады агаарлап чорааш, сеткилдежири белен. Чүге? Ада-ие-даа, ажы-төл-даа өскээр чардыкпас боор. Тайваньда чурттап чоруур Масахи́ко дээр акывыс өске чылдагаанны чугаалап турар: «Ажы-төлүвүс-биле агаарлап чорааш, дагже үнүп азы пляж кыдыынга дыштанып турувуста, олар боттарын хостуг кылдыр миннир. Ооң ачызында оларның бодалдарын билип аары биске белен». Кырында чугаалаанывыс Катя үлешкен: «Школа соонда авам-биле чараш паркче үргүлчү баар турган бис. Ындыг байдалда школага чүү болганын база мени чүү дүвүредип турарын үндүр чугаалаары меңээ белен турган».

16. Өг-бүлелер Иегованың чаяалгаларының чанынга канчаар кады дыштанып болур?

¹⁶ Өг-бүлелер кады дыштанып, арыг агаарга Иегованың чаяалгаларының чанынга үени эрттирип болур. Шак ынчаар оларның аразында ынакшыл оон-даа быжыгар. Библиядан алырга, «каттырар-даа үе турар», «хөглээр-даа үе турар» (Эккл. 3:1, 4). Иегова бөмбүрзекте каас-чараш булуңнарны чаяап, бисти аңаа таалап дыштанзын дээш кылып каан. Бис өг-бүлелеривис-биле арга-арыгже барып, дагларже үнүп азы далай эриинге дыштанып болур бис. А ажы-төл сывыртажып-маңнажып, паркка ойнап, суг сүзүп, боттарынче чашкылажып, дириг амытаннарны хайгаарап болур. Шынап-ла, өг-бүлелер арыг агаарга үени дыка эки эрттирип болур. Иегованың чаяап каан чүүлдериниң аразынга дыштаныры кайы хире аянныг-дыр!

17. Ада-иелер ажы-төлүн Бурганның чаяалгаларынга өөрүүр кылдыр чүге өөредир ужурлуг?

¹⁷ Чаа делегейге ада-иелерниң болгаш ажы-төлдүң мурнунга Иегованың чаяалгаларынга өөрүүр кайгамчыктыг көрүп көрбээн аргалар ажыттынып кээр. Ынчан дириг амытаннардан кортпас бис, олар база бистен кортпас (Иса. 11:6—9). Иегованың белек кылдыр берген чаяалгаларын чарашсынып сонуургаар үевис кызыгаар чок болур (Ыд. ыр. 21:27). Ынчалза-даа, ада-иелер, чаа делегейни манап турбайн, амдан эгелеп ажы-төлүңерге Бурганның дугайында чугаалап, Ооң чаяалгаларынга өөрүүр кылдыр өөредиңер. Ынчан ажы-төлүңер: «[Иегова], Сээңии дег ажыл-херектер... чок!» деп Давид хаанның сөстеринге катчыр (Ыд. ыр. 85:8).