1, 2. Сугга суктурарының мурнунда кандыг базым бар?

 СӨӨЛГҮ беш чылда сугга суктургаш, Иегованың Херечилери апарган улус миллион ажа берген. Дыка хөй улус алыс шынны бирги векте чурттап чораан Тимофей ышкаш «чажындан-на билир» (2 Тим. 3:14, 15). Өскелери Иегованы улгады бергеш билип алган. Чижээ, бир херээжен кижи 97 харлыында сугга суктуруп алган!

² Бир эвес силер Библияны өөренип турар болзуңарза азы ада-иеңер Иегованың Херечилери болза, сугга суктуруп алыр деп боданыр-дыр силер бе? Ол дыка эки сорулга-дыр! Иеговага чуртталгазын бараалгадыры деп чугула базымның утказын база коргуушкуннарны канчаар ажып эртип алырын бо статьяга сайгарар бис.

ЧУРТТАЛГАНЫ БАРААЛГАДЫРЫНЫҢ УТКАЗЫ

3. Библейжи үелерде Иеговага кым чуртталгазын бараалгатканыл?

³ Чуртталгавысты Бурганга бараалгадырының утказы кандыг? Библияда «бараалгадыр» деп сөс «кандыг-бир ыдыктыг сорулга» дээн уткалыг. Израильчилер чуртталгазын Бурганга бараалгаткан чон чораан. Чамдык израильчилер Бурганга тускай бараалгалга аңгылаттынган турган. Чижээ, Аароннуң бөргүнде «бараалгатканының демдээ» — кылагар алдын пластина турган. Ол демдек тускай бараалгакчы кылдыр аңгылаттынганын көргүзүп турган (Лев. 8:9). Назорейлерге хамаарыштыр база ынчаар  чугаалап болур. «Назорей» деп сөс «аңгылап каан; тураскааткан» дээн уткалыг еврей нази́р деп сөстен укталган. Назорейлер Моисейниң хоойлузунда тургускан кезек кызыгаарларны сагыыр ужурлуг турган (Сан. 6:2—8).

4. а) Иеговага чуртталгавысты бараалгатканывыс соонда чүү эң кол болур? б) Бодундан ойталаарының утказы кандыг? (Чурукту база көрүңер.)

⁴ Иеговага чуртталгазын бараалгаткан кижи — Иисустуң өөреникчизи болурун база Бурганның күзел-соруун чуртталгазында эң-не кол деп шиитпирлеп алыр. Чуртталгазын бараалгаткан кижиден чүү негеттинер? Иисус мынчаар чугаалаан: «Мени эдерер дээн кижи... бодунуң күзел-бодалындан ойталазын» (Мф. 16:24). Грек дылда «бодундан ойталазын» деп дамчыткан бодалды очулдурар база бир аргазы — «бодунга чок дээр ужурлуг». Иегованың бараалгакчызынга ооң күзел-соруунга чөрүшкек бүгү чүүлден хая көрнүрү чугула (2 Кор. 5:14, 15). Ынчаарга куду мөзүлүг эр-херээжен чорук дээн ышкаш бачыттыг ажыл-херектен ойталаар херек (Гал. 5:19—21; 1 Кор. 6:18). Ол кызыгаарлар чуртталгаңарны нарыыдадыптар бе? Чок, Иеговага ынак болзуңарза, ооң хоойлуларының ажыктыын билир силер (Ыд. ыр. 118:97; Иса. 48:17, 18). Ни́колас акый: «Иегованың дүрүмнерин сээң хосталгаңны кызагдаан кара-бажың кылдыр көрүп болур. Азы арзылаңнар айыылындан камгалал херим кылдыр көрүп болур» — деп тайылбырлаан.

5. а) Чуртталгазын Бурганга канчаар бараалгадыр? б) Чуртталгазын Бурганга бараалгадырындан сугга суктурары кандыг ылгалдыг? (Чурукту база көрүңер.)

⁵ Иеговага чуртталгазын канчаар бараалгадыр? Чүгле аңаа мөгейип, чуртталгаңарга ооң күзел-соруун бирги черге салырыңарны мөргүлге чугаалаар силер.  Иеговага «бүгү-ле чүлдү-чүрээңер-биле, бүгү-ле чуртталгаңар-биле, бүгү-ле угаан-сарыылыңар-биле болгаш бүгү-ле күжүңер-биле ынак» болурун аазаар силер (Мк. 12:30, Чаа делегей). Чуртталгазын бараалгадыры — Иегова-биле хууда чугаа. А сугга суктурары — хөй-ниити мурнунга чуртталгаңарны Бурганга бараалгатканыңарны көргүзери. Ам кол сорулгаңар дээрге даңгырааңарга шынчы артары. Иегова база силерден ону манаар (Эккл. 5:3, 4).

ИЕГОВАГА ЧУРТТАЛГАЗЫН БАРААЛГАДЫРЫ ЧҮГЕ ЧУГУЛА?

6. Иеговага чуртталгазын бараалгадырынче кижини чүү оттурар?

⁶ Иеговага чуртталганы бараалгадыр кол чылдагаан — ынакшыл. Бурганга ынакшылыңар сеткил хайныышкыны эвес, а ылап шын билигден база «Бурган-биле харылзааны... билип» алырындан өзүп кээр (Кол. 1:9, Чаа делегей). Ыдыктыг Бижилгени шинчилээш: 1) Иегова — ылап шын хуу бот, 2) Библияны Бурган хей-аът киирген, 3) ол бодунуң күзел-соруун организациязы таварыштыр күүседип турар деп шынзыккан силер.

7. Бурганга чуртталгаңарны бараалгадырынга белениңер чүден көстүр?

⁷ Иеговага чуртталгазын бараалгаткан улус библейжи кол өөредиглерни билир база Бурганның дүрүмнеринге дүүштүр чурттап, хостуг үезинде-ле бүзүрели-биле үлежип чоруур (Мф. 28:19, 20). Оларның Иеговага ынакшылы өскен тудум, чүгле аңаа бараалгаар күзелдиг. Силерни ол санче киириштирип болур бе? Ийе болза, шын орукта силер. Библия өөредип турар башкыңарны, ада-иеңерни өөртүр  дээш, азы улус өттүнүп сугга суктурбас болгай силер. А силерни Иеговага ханы ынакшыл оттурар.

8. Өөрүп четтирер хөөнүвүс Иеговага чуртталгавысты бараалгадырынга канчаар дузалап болур? (Ырлар 115:3—5).

⁸ Иегованың силерге кылган шупту чүүлдерин бодап кээр болзуңарза, аңаа бараалгаарда бодуңарны албадавас силер. Ындыг күзел ала чайгаар тыптып кээр. (Номчуптуңар: Ырлар 115:3—5.) Библияда Иегованы «шупту буянныг болгаш тергиин белектер» бээр Ада деп кончуг шын адаан (Иак. 1:17, Чаа делегей). Ол белектерниң эң-не улуу — ооң Оглунуң, Иисустуң өргүлү-дүр. Ол төлевир Бурганның чоок өңнүү болурунга база мөңгеде чурттаар арганы ажытканын бодап көрүңер даан! (1 Ин. 4:9, 10, 19). Иеговага чуртталгаңарны бараалгаткаш, кайгамчыктыг белектер дээш өөрүп четтиргениңерни көргүзер силер (Ы. х. к. 16:17; 2 Кор. 5:15). «Аас-кежиктиг мөңге чуртта!» деп номда, 46-гы кичээлде, 4-кү пунктуда «Бистиң Бурганга белектеривис» деп видеода ол теманы сайгарган.

ЧУРТТАЛГАҢАРНЫ БАРААЛГАДЫРЫНГА, СУГГА СУКТУРАРЫНГА БЕЛЕН СИЛЕР БЕ?

9. Кижи бүрүзүнүң Бурган-биле найыралының өзүлдези ылгалдыг деп сактыры чүге чугула?

⁹ Бурганга чуртталгаңарны бараалгадып, сугга суктурарынга белен эвес мен деп бодап болур силер. Иегованың дүрүмнеринге дүүштүр эттинер чүүлүңер бар чадавас. Бүзүрелиңер өзеринге чедир хөй үе негеттинип болур (Кол. 2:6, 7). Чуртталгазын бараалгадып, сугга суктурар дээн оолдар-кыстарның назы-хары дөмей болбас. Кижи бүрүзүнүң өзүлдези аңгы. Боттарыңарны өске улус-биле деңневейн, экижидип алыр чүүлүңерни тодарадып алыңар (Гал. 6:4, 5).

10. Чуртталгаңарны бараалгадып, сугга суктурарынга белен эвес болзуңарза, чүнү кылып болур силер? ( «Иегованың Херечилериниң өг-бүлезинде ажы-төлге» деп көзенекти база көрүңер.)

¹⁰ Иеговага чуртталгаңарны бараалгадырынга белен эвес-даа болзуңарза, ол сорулгаже чүткүүрүн уламчылаңар. Херек өскерлиишкиннер кылырда, Иеговадан дузаны дилеп, мөргүңер (Флп. 2:13; 3:16). Ол силерниң мөргүлүңерни дыңнааш, харыылаар деп чигзинмеңер (1 Ин. 5:14).

ЧАМДЫК УЛУС ЧҮГЕ ДАЛАШПАС?

11. Шынчы артарынга Иегова канчаар дузалап турар?

¹¹ Чамдык улус чуртталгазын Бурганга бараалгадып, сугга суктурарынга белен-даа болза, ол базымнарны кылырын дидинмейн турар. «Улуг бачыт кылыптарымга, чыыштан үндүрүпсе канчаар?» — деп, олар дүвүреп болур. Ындыг бодалдарлыг болзуңарза, Иегова силерге «бүгү чүүлге ооң сеткилин өөртүр[үнге]» дузалажыр деп бүзүреңер (Кол. 1:10, Чаа делегей). Оон аңгыда, ол шын алдынар күштү силерге бээр. Бурганга ынанып болур деп хөй акы-угбаларның чуртталгазындан көскү (1 Кор. 10:13). Христиан чыыштан үндүрткен улустуң саны хөй эвес. Иегова бараалгакчыларынга шынчы артарынга дузалажып турарын ол чүүл бадыткап турар.

12. Улуг бачыт кылбазынга чүү дузалаар?

¹² Тергиин эвес улус күткүлгелерге таваржып чоруур (Иак. 1:14). Аңаа алыспазы бодуңардан хамааржыр. Түңнелинде канчаар алдынарын бодуңар шиитпирлээр силер. Кижи бодун туттунуп шыдавайн баар деп бодал шын эвес. Бачыттыг күзелдериңерни туттунуп өөренип ап шыдаар силер.  Бачыт кылбазынга бо каш сүме дузалаар. Бурганга хүннүң-не мөргүңер. Библияны хууда шинчилээр графиктен тургускаш, оон туттунуңар. Христиан чыыштарны үспеңер база билип алган чүүлүңерни өскелер-биле үлежиңер. Ынчан даңгырааңар ёзугаар чурттаар күжүңер турар. Иегова силерге дузалаар деп кажан-даа утпаңар (Гал. 5:16).

13. Иосиф биске кандыг үлегер арттырган?

¹³ Күткүлгеге таварышкаш, канчаар алдынарын баш удур бодап алган болзуңарза, даңгырааңар ёзугаар чурттаары чиик болур. Библияда күткүлгеге алыспаан улустуң дугайында хөйү-биле бижиттинген. Иосифтиң чижээн көрээлиңер. Потифарның кадайы ону каш-даа катап көгүдерин оралдашкан. Ынчалза-даа ол канчаар алдынарын билир турган. Иосиф: «Мен ындыг улуг бачытты Бурганга удур канчап кылыр мен?» — деп ойталаанын Библияда бижээн (Э. д. 39:8—10). Ол херээженниң көгүдериниң мурнунда-ла канчаар алдынарын Иосиф билир турган. Ынчангаш аңаа алыспазы белен болган.

14. Иегованың хөңнү чок чүүлүнден канчаар ойталап өөренип алырыл?

¹⁴ Иосифтиң чижээн канчаар өттүнүп болур силер? Амдыгааштан тура, күткүлгеге удур канчаар алдынарын боданыңар. Иегованың көөр хөңнү чок чүүлдеринден дораан ойталаарынга өөренип алыңар. Бурганны хомудадыптар хире бодалдарны безин бажыңарже киирбеңер (Ыд. ыр. 96:10; 118:165). Баш бурунгаар чүнү канчаарын тода билир болгаш, күткүлгеге алыспас силер.

15. Иеговаже чүткүп чоруурун кижи канчаар көргүзүп болур? (Еврейлерге 11:6).

¹⁵ Алыс шынга бүзүрээр, Иеговага чуртталгаңарны бараалгадып, сугга суктурар күзелиңер бар, ынчалза-даа дидинмейн турар болзуңарза, чүнү канчаар? Ынчан Давид хаандан үлегер ап болур силер. «Мени шылгап көр, Бурганым, сеткил-чүрээмни билип ал, мени шенээш, дүвүрелимни билип ал. Човалаңга чедирер орукта эвес-тир мен бе — көрүп көр, мөңге орук-биле мени эдертип көр» — деп, Иеговага мөргүңер (Ыд. ыр. 138:23, 24). Ындыг мөргүл Бурганга чуртталгаңарны бараалгадып, сугга суктурар сорулгаңарны чедип  алыр дээш күжениишкиннерни үндүрүп, Иеговадан дузаны дилеп турарыңарны көргүзер. «Олче чүткүп чоруур» улусту Иегова шаңнап турар. (Номчуптуңар: Еврейлерге 11:6.)

ИЕГОВАГА ЧООКШУЛААРЫН УЛАМЧЫЛАҢАР

16, 17. Иегованың Херечилериниң өг-бүлезинде өзүп орар ажы-төлдү Иегова канчаар хаара тудуп турар? (Иоанн 6:44).

¹⁶ Бир эвес Иегова хаара тутпас болза, кым-даа ооң өөреникчизи болуп шыдавас деп, Иисус чугаалаан. (Номчуптуңар: Иоанн 6:44.) Ол ханы бодал чүнү илередип турарын боданып көрүңер! Иегова кижи бүрүзүнде эки чүүлдү көргеш, бодунче хаара тудуп турар. Бурган ындыг кижини бодунуң «улуг үнелиг өнчү-хөреңгизи» деп санаар (Ы. х. к. 7:6). Силер база аңаа дыка үнелиг силер.

¹⁷ Аныяктарывыска хамаарыштыр чүнү чугаалап болур? Иегованың Херечилериниң өг-бүлезинден болгаш, чыыштарже анаа-ла ада-иеңниң аайы-биле барып турар чадавас сен. Ынчан: «Бурганче чоокшулаңар, Ол база силерже чоокшулап кээр» деп сөстерни сактып кел (Иак. 4:8; 1 Чыл. 28:9). Кажан сен бодуң Иеговага чоок болур дээш базымнарны кылыр болзуңза, ол база сенче чоокшулаар. Иеговага сен хөй улустуң анаа-ла бирээзи эвес сен. Иегованың Херечилериниң өг-бүлезинден кижи бүрүзүн ол аңгы кылдыр хаара тудар. Кажан ол кижи Бурганче базымны боду баштай кылыр болза, Иаков 4:8-те бижээни дег, Бурган базымны уткуштур кылыр. (Деңнеңер: 2 Фессалоникчилерге 2:13.)

18. Дараазында статьяга чүнү сайгарар бис? (Ырлар 39:9).

¹⁸ Иеговага чуртталгаңарны бараалгадып, сугга суктуруп алыр болзуңарза, Иисусту өттүнүп турарыңар ол. Адазының бүгү дилээн чүүлүн ол күзелдии-биле күүседип турган. (Номчуптуңар: Ырлар 39:9; Евр. 10:7.) Сугга суктуруп алгаш, Иеговага шынчы бараалгап артарынга чүү дузалаарын дараазында статьяга сайгарар бис.