1. Иегованың чамдык бараалгакчылары кандыг минниишкиннер-биле демисежип турар?

 ИЕГОВА шупту бараалгакчыларынга ниитизи-биле ээ көрнүрү чигзиниг чок. Библияда мынча дээн: «Чонун көргеш, Иегованың сеткили өөрүп турар» (Ыд. ыр. 149:4, Чаа делегей). Ынчалза-даа бир кижи: «Иегованың хууда меңээ ээ көрнүрү берге» — деп муңгарап болур. Муңгарап, муңчулуп чораан шынчы бараалгакчыларның дугайында база Библияда бижээн (1 Хаан. 1:6—10; Иов 29:2, 4; Ыд. ыр. 50:13).

2. Иегованың эки хамаарылгазын чедип алырда чүү херек?

² Тергиин эвес кижилерге Иегова ээ көрнүрүн Библия көргүскен. Аңаа чүү херек? Иисуска бүзүрелди сайзырадып, сугга суктурары чугула (Ин. 3:16). Ол базымнар бачыттарывыс дээш буруувусту билингенивисти база Бурганның күзел-соруун күүседирин аазаанывысты көргүзер (Аж.-ч. 2:38; 3:19). Ооң-биле найыралга уткуштур базымнар кылырывыска, Иегова дыка өөрүүр. Даңгыраавыска шынчы болзувусса, ол биске ээ көрнүр, бисти чоок өңнүктери деп санаар (Ыд. ыр. 24:14).

3. Кандыг үш айтырыг сайгарар бис?

³ Чамдык улуска Иегованың сеткилинге кирбес деп минниишкин чүге тыптып кээр? Иегова биске ээ көрнүрүнге канчаар бүзүредип турар? Ол биске эки хамаарылгалыг деп кандыг бадыткалдар бар?

ИЕГОВАНЫҢ ЭЭ КӨРНҮРҮНГЕ ЧАМДЫК УЛУС ЧҮГЕ ЧИГЗИНЕР?

4, 5. Бодунга хамаарыштыр куду үнелелдиг улусту чүү аргалап болур?

⁴ Чамдыывыс чашкы үезинден тура бодунга хамаарыштыр куду үнелел-биле демисежип турар (Ыд. ыр. 87:16).  Адриа́н деп акывыс мынча дээн: «Черле сактырымга, мен бодумну кажан-даа ажык чок, чөгенчиг кылдыр миннир мен. Бичии тургаш, чоок улузум дываажаңга чурттазын деп мөргүп турган мен. А бодумну төлеп чок деп бодаар болган мен». То́ниниң ада-иези Иегованың Херечилери эвес. Ол мынчаар чугаалаан: «Авам биле ачам меңээ ынакшылын, меңээ чоргаарланырын кажан-даа чугаалаваан. Чүнү-даа кылырымга чедишпес болгаш, оон-даа экижип болур сен дээр турганнар».

⁵ Боттарывысты ажык чок деп бодаар болзувусса, Иегова ынчаар бодавазын сактыры чугула. Чүге дизе бисти ооң чоок өңнүү болур кылдыр ол боду чалаан (Ин. 6:44). Бодувустуң эскербес эки талаларывысты база чүрээвисти Иегова көрүп турар (1 Хаан. 16:7; 2 Чыл. 6:30). Бурган бодунуң ынакшылынга бисти төлептиг дээрге, чигзинер чылдагаанывыс чок (1 Ин. 3:19, 20).

6. Эрткен үеде бачыттары дээш, Павел элчин бодун канчаар миннип турганыл?

⁶ Алыс шынны билириниң мурнунда кылган херектери дээш, чамдык акы-угбалар ам-даа ыядыр (1 Пет. 4:3). Шынчы христианнар безин бачыттыг бодалдар-биле демисежир ужурга таваржып турар. Чүрээңер силерге: «Багай сен» — деп сымыраныр бе? Ийе болза, Иегованың төлептиг бараалгакчылары ындыг минниишкинниг чорааны силерни оожургадып болур. Чижээ, Павел элчин частырыглары дээш муңгараар турган (Рим. 7:24). Ол эрткен бачыттары дээш буруузун миннип, сугга суктуруп алган-даа болза, бодун дөмей-ле «элчиннерниң эң бичиизи», бачыттыгларның эң багы деп санаар турган (1 Кор. 15:9; 1 Тим. 1:15).

7. Бачыт үүлгеткен болзувусса, чүнү сактыры чугула?

⁷ Буруузун билинген улусту өршээрин Дээрде Адавыс аазаан (Ыд. ыр. 85:5). Ынчангаш бачыдывыс дээш сеткиливистен хараадаар болзувусса, Иегова өршээген болганда, херек кырында өршээп каан деп бүзүреп болур бис (Кол. 2:13).

8, 9. Иеговага кылган чүүлүм чедишпес деп бодалдан канчаар адырлып алырыл?

⁸ Бис Иеговага бүгү-ле күжүвүс-биле бараалгаксап турар бис. Ынчалза-даа чамдык улус кылган чүүлүн эвээш база Иегованың ээ көрүүшкүнүн кажан-даа чаалап албас бис деп бодаар. Ама́нда угбавыс үлешкен: «Иеговага эң дээре чүүлдү бээр дээрге — соксаал чокка бээри деп бодаар турган мен. Сорулгаларым болганчок чедип алыры болдунмас. А болдунмаска бодумга чөгенип каар мен. Сактырымга Иегова база ындыг бодалдыг».

⁹ Иеговага хөйнү кылып шыдавайн турар мен деп бодалдан канчаар адырлыр? Бурганның негелделери эмин эрттир шыңгыы эвес деп сактып чоруңар. Ол бистен кажан-даа кылып шыдавас чүүлүвүстү манавас, а шыдаар чүүлүвүстү кылырывыска өөрүүр. Ооң санында Иеговага күжүн харамнанмайн, бараалгап чораан улустуң чижээн боданыңар. Павел хөй чылдар дургузунда чүс хуу бараалгап, муң-муң километрлерни эртип, хөй-хөй чыыштарны тургускан. Чамдыкта байдалы өскерли бээрге, ол ооң мурнунда дег хөй суртаалдап шыдавайн баар турган. Ынчан Иегова аңаа таарзынмайн баар болган деп болбас. Павел шыдаар чүүлүн кылырга, Бурган ону йөрээп турган (Аж.-ч. 28:30, 31). Биске хамаарыштыр база ынча деп болур. Чамдыкта бис эвээшти-даа, хөйнү-даа кылып  болур бис. Иеговага эң-не кол чүүл — бистиң күзеливис. Ол ээ көрүүшкүнүнге бисти канчаар бүзүредип турарын сайгарыптаалы.

БУРГАН ЭЭ КӨРҮҮШКҮНҮНГЕ КАНЧААР БҮЗҮРЕДИП ТУРАРЫЛ?

10. Иегованың эки хамаарылгалыг сөстерин канчаар «дыңнап» болур бис? (Иоанн 16:27).

¹⁰ Библия. Иегова бодунуң бараалгакчыларынга ынак база оларны үнелээр. Библияда Иисусту Иегова ээ көрнүр ынак Оглум дээн ийи таварылга бар (Мф. 3:17; 17:5). Иеговадан ындыг чылыг-чымчак сөстерни дыңнаксаар-дыр силер бе? Амгы үеде ол бистиң-биле Библияның арыннарындан чугаалажып турар. Иисустуң өөреникчилеринге чылыг-чымчак сөстерин, Иегова ону биске хууда чугаалаан кылдыр хүлээп ап болур бис. (Номчуптуңар: Иоанн 16:27.) Иисус кезээде Ачазы ышкаш алдынып чораан. Тергиин эвес-даа болза, Иеговага шынчы бараалгалы дээш, Иисус өөреникчилериниң дугайында чылыг-чымчак чугаалап, мактаар турган. Ынчангаш Иисустуң өөреникчилеринге чүнү чугаалаанын номчааш, Иегова ону хууда биске чугаалаан кылдыр сагыштаалап болур бис (Ин. 15:9, 15).

11. Берге үелерни чүге Иегова бистен хая көрүнгениниң демдээ деп болбас? (Иаков 1:12).

¹¹ Херек кырында дуза. Иегова биске дузалаарынга кезээде белен. Чижээ, амыдыралга херек бүгү чүүлүвүс бар болзун дээш, ол сагыш човап турар. Ынчалза-даа шупту бергелерден камгалавас, ынчангаш Иов ышкаш бергелерге таваржып болур бис (Иов 1:8—11). Шенелделер дээрге Иегова бистен хая көрнү бергениниң демдээ эвес. Ол үеде Иеговага ынакшылывысты, бүзүреливисти көргүзер аргалыг бис. (Номчуптуңар: Иаков 1:12.) Оон аңгыда, бергелерге Иегова биске көңгүс чаа таладан ажыттынып болур. Ынчан биске төнчүзүнге чедир шыдажыптарынга дузалаар Бурганның ынакшылын, бүзүрелдиин көрүп каар бис.

12. Дмитрийниң төөгүзүнде биске кандыг өөредиг бар?

¹² Дмитрий акывыстың төөгүзүн көрээлиңер. Бир катап ол ажыл чок арткаш, үр үеде ажыл тып чадап каан. Ол Иеговага долузу-биле бүзүрээрин көргүзүп, хөй бараалгаар  деп шиитпирлеп алган. Ынчалза-даа айлар эрткен, ажыл тывылбаан. Оон Дмитрий аарааш, безин чыдыпкан. Ол өг ээзи, ада харыысалгазын күүседип шыдавайн барганын база бодун кандыг-даа ажык чок деп миннип турган. Иегова база аңаа таарзынмас деп дүвүрээн. Бир кежээ уруу аңаа саазын сунган. Ында Исайя 30:15-те сөстерни парлап каан болган: «Силерниң күжүңер — оожургалды миннип, меңээ бүзүрээринде» (Чаа делегей). Орун кыдыынга саазынын салып кааш, уруу мынча дээн: «Муңгарай бергеш, бо сөстерни сактып тур, ачай». Иегова ооң өг-бүлези дээш сагыш човап турарын Дмитрий билип каан. Оларның аъш-чеми, идик-хеви, чурттаар бажыңы бар болгай. Акывыс сактып чугаалаан: «Менден чүгле оожургалдыг артып, Иеговага бүзүрээри херек турган». Шак-ла ындыг байдалда болзуңарза, Иеговага бүзүреңер. Бурган силерге дузалаар, туруштуг болурунга күштү бээр.

13. Иегова ээ көрүүшкүнүнге кымны таварыштыр база канчаар бүзүредип болурул?

¹³ Ха-дуңмавыс. Иегова биске ээ көрүүшкүнүнге акы-угбалар таварыштыр бүзүредип турар. Чижээ, херек үеде биске чылыг-чымчак сөстерни чугаалаарынче бир кижини оттуруп болур. Азиядан угбавыс ону көрген. Ол ажылын чидирип алган база аажок аарый берген. Өөнүң ээзи аар бачыт кылгаш, удуртукчу кылдыр бараалгавайн барган. «Чүү дээш бергелерге таварышканымны билбейн турган мен. Бир-ле чүвени шын эвес кылыптарымга, Иегова мени йөрээвейн барганы ол бе?» деп бодалдарын угбавыс үлешкен. Ону кагбаанын көргүзүп бээрин Иеговадан чаннып дилеп турган. Бурган аңаа канчаар  харыылааныл? Угбавыс мынча дээн: «Удуртукчу акылар мени оожургадып, Иегова меңээ ынак дээрзинге бүзүредип турган». Үе эрткенде, база катап ооң деткимчезин хереглээш, Иеговага чугаалаанын ол үлешкен: «Ол-ла хүн чыышта акы-угбалардан чагаа алган мен. Оларның чылыг-чымчак сөстерин номчааш, Иегова мени дыңнап турар деп билип каан мен». Бо таварылгадан алырга, Иегова ээ көрүүшкүнүн өске улустуң чылыг-чымчак сөстери таварыштыр көргүзер (Ыд. ыр. 9:38).

14. Иегова ээ көрүүшкүнүн оон ыңай канчаар көргүзүп турарыл?

¹⁴ Иегова ээ көрүүшкүнүн херек апарган үеде акы-угбалар таварыштыр база илередип болур. Чижээ, бирги векте Павел элчин ыдыктыг сүлдеге башкарткаш, акы-угбаларга 14 чагаа бижээн. Чагааларга дорт болгаш чылыг-чымчак сүмелерни оларга берген. Иегова сагыш човангыр Бурган, Павелди ону кылырынче оттурган. Ол ажы-төлүнге ынак, ынчангаш оларны чагып-сургаар (У. ч. 3:11, 12). Библияга үндезилээн сүме алгаш, хомудавайн, харын-даа өөрүп хүлээр ужурлуг бис. Ооң ачызында Иегова бисти деткип турар деп көрүп каар бис (Евр. 12:6). Иегова биске ынак база деткип турарының оон өске кандыг бадыткалдары бар?

ИЕГОВАНЫҢ БИСКЕ ЭЭ КӨРҮНГЕНИНИҢ ӨСКЕ БАДЫТКАЛДАРЫ

15. Иегова ыдыктыг сүлдени берип турары бисти чүү чүвеге бүзүредир?

¹⁵ Сеткилинге кирген улуска Иегова ыдыктыг сүлдезин бээр (Мф. 12:18). Ол сүлде эки шынарларны сайзырадырынга дузалаар. «Шынарларның кайызын көргүзүп турар мен» деп хынанып болур бис. Чижээ, эгезинге бодаарга, амгы шыдамыыңарны деңнеп боданыңар. Христиан шынарларыңар экижип турар болза, Иегова силерге ээ көрнүп турарынга бүзүрээр чылдагааннар хөй. ( «Бурганның сүлдези кандыг шынарларны сайзырадырынга дузалап турарыл?» деп көзенекти көрүңер.)

16. Иегова өөрүшкүлүг медээни кымга бүзүреп каан, ол чүүл силерге кандыг минниишкиннер оттурар-дыр? (1 Фессалоникчилерге 2:4).

¹⁶ Иегова таарзынар улузунга өөрүшкүлүг медээни бүзүреп каан. (Номчуптуңар: 1 Фессалоникчилерге 2:4.) Джо́селин деп угбавыс канчаар аңаа шынзыкканын көрээлиңер. Бир эртен ол көңгүс  хөөн чок оттуп келген. «Харык чогумну, улуска чүнү-даа берип шыдавазымны миннип турган мен. Эгелекчи болганымда, бараалгалче дугуржуп алган болгаш, мөргүп алгаш, чыгдынып эгелээн мен». Ол эртен Джоселин Библияны өөрениринге чөпшээрешкен Мэри деп чөпшүл херээжен кижиге таваржы берген. Мэри каш ай эрткенде, Джоселинге мынча дээн: «Бурганга дуза дилеп мөргүп турумда сен эжиим соктап келген сен». Ол таварылганы сактып, Джоселин мынча дээн: «Иегова меңээ: „Эр хей! Сеңээ таарзынып тур мен“ дээн ышкаш болган». Бараалгалга ындыг эки улуска ховар ужуражыр бис. А бүгү сеткиливистен суртаалдаар болзувусса, Иегова биске ээ көрнүр деп бүзүреп болур бис.

17. Төлевир дугайында бодангаш, Виктория чүнү билип алган? (Ырлар 5:13).

¹⁷ Иегова төлевирге үндезилеп, таарзынар улузунуң бачыттарын өршээп турар (1 Тим. 2:5, 6). Сугга суктурган-даа болзуңарза, Иегованың ээ көрнүрүн чүрээңерге хүлээри берге чадавас. Чүрээвис бисти мегелептер. Ынчалза-даа Иеговага бүзүреп болур бис деп утпаалыңар. Төлевирге бүзүрээр улусту Бурган чөптүг-шынныг деп санаар база йөрээрин аазап турар. (Номчуптуңар: Ырлар 5:13; Рим. 3:26.) Викторияның таварылгазын көрээлиңер. Ол төлевир дугайында боданган: «Иегова меңээ дыка үр үеде шыдамык чорукту көргүзүп турар... А мен: „Сээң ынакшылың күжү чедишпес. Оглуңнуң өргүлү мээң бачыттарымны кажан-даа дуглап шыдавас“ дээн ышкаш болган мен». Ынчалдыр Виктория төлевир — Иегованың хууда аңаа белээ деп билип каан. Иегова аңаа дыка ынак деп бүзүрей берген. Бис база төлевирниң дугайында боданыр болзувусса, Иегова биске кайы хире эрге-чассыг ынаан, таарзынарын көрүп каар бис.

18. Дээрде Адавыска ынак болзувусса, чүү чүвеге бүзүрелдиг болур бис?

¹⁸ Бо статьяда сүмелерни кызып ажыглаар-даа болзувусса, катап-ла муңгарап, Иегова биске ээ көрүнмейн турар деп чигзине бээр бис. Ындыг үелерде Иегова силерниң ынакшылыңарны бедик үнелээрин сактып чоруңар (Иак. 1:12). Ынчангаш Иеговага ам-даа чоокшулаңар, ооң ээ көрүүшкүнүн эскерерин кызыңар. Ол «бистиң кижи бүрүзүнге чоок» деп кажан-даа утпаңар (Аж.-ч. 17:27).