1, 2. Сугга суктуруп алган соонда, кижи кандыг йөрээлдер алыр?

 ИЕГОВАНЫҢ өг-бүлезиниң кезии болуру дыка улуг өөрүшкү! Ооң өңнүү болуру — улуг хүндүткел. Давидтиң: «[Иегова] сээң шилип, чоокшуладып алган улузуң амыр-чыргалдыг! Ол улус Сээң өргээң чанынга чурттаар» — дээн сеткилин үлежир-дир бис (Ыд. ыр. 64:5).

² Иегова өргээзинче кымны чалап турар? Бурганче чоок болуксаан улуска ол чоокшулаар деп эрткен статьядан көрген бис (Иак. 4:8). Сугга суктуруп алырыңарга Бурган-биле араңарга тускай харылзаа тургустунар. Ынчангаш Иегова «ачы-буянын сыңырар чер чок кылдыр» бээринге бүзүреп болур силер (Мал. 3:10; Иер. 17:7, 8).

3. Кижи чуртталгазын Бурганга бараалгадып, сугга суктургаш, кандыг харыысалганы алыр? (Экклесиаст 5:3, 4).

³ Сугга суктурары — оруктуң чүгле эгези. Кандыг-даа күткүлдерге база шенелделерге алыспайн, улаштыр Бурганга шынчы артып, даңгыраавыска дүүштүр чурттаар ужурлуг бис. (Номчуптуңар: Экклесиаст 5:3, 4.) Иисустуң өөреникчизи апаргаш, ооң үлегерин чандыр баспайн, айтыышкыннарын күүседири чугула (Мф. 28:19, 20; 1 Пет. 2:21). Ону канчаар кылырын тодаргай көрээлиңер.

 ШЕНЕЛДЕЛЕРГЕ, КҮТКҮЛГЕЛЕРГЕ АЛЫСПАЙН, ИИСУСТУ ЭДЕРИҢЕР

4. Иисустуң өөреникчилери хилинчектиң чагызын кандыг уткалыг чүктеп чоруур? (Лука 9:23).

⁴ Сугга суктургаш шупту бергелерден хосталы бээр мен деп бодаваңар. Өөреникчилери хилинчектиң чагызын хүн бүрүде чүктээр дээн, Иисустуң сөстерин утпаалыңар. (Номчуптуңар: Лука 9:23.) А ынчаарга христиан кижиниң чуртталгазы чүгле хилинчек-човалаңдан тургустунган дээни ол бе? Чок. Иисус йөрээлдер-даа, бергелер-даа турар деп ылавылаан. Чамдык бергелер дыка нарын болур (2 Тим. 3:12).

5. Иисус дээш чидириглерге белен улуска ол чүнү аазаан?

⁵ Чоок улузуңар силерге удурланып турар чадавас. Бурганның ажыл-херээнче хөй үеңерни, күжүңерни үндүрер дээш, хөй чүүлдерден ойталап, бөдүүн чурттап турар чадавас силер (Мф. 6:33). Чигзиниг чок, Иегова бүгү ажыл-херээңерни эскерип турар (Евр. 6:10). Иисустуң сөстерин бодуңарга көрген чыгыы силер: «Мен дээш болгаш Буянныг Медээ дээш бажыңын, ха-дуңмазын, ава-ачазын, ажы-төлүн база черлерин каапкаш барган кижи бүрүзү, истедип-сүрдүрер-даа болза, амгы бо амыдыралынга-ла оон чүс катап хөй бажыңны, ха-дуңманы, аваларны, ажы-төлдү база черлерни... а келир үеде — мөңге амыдыралды алыр» (Мк. 10:29, 30). Иегованың йөрээлдери шупту чидирииңерни долузу-биле, харын-даа артыр дуглаар (Ыд. ыр. 36:4).

6. Сугга суктурган соонда, «бачыттыг бүдүжүңерниң» күзелдери-биле демиселди уламчылаары чүге чугула?

⁶ Сугга суктурган соонда, бачыттыг күзелдер-биле демиселиңер уламчылаар (1 Ин. 2:16). Чүге дизе тергиин апарбаан болгай силер. Үе-үе болгаш, силерге Павел элчинниң ышкаш минниишкиннер тыптып кээр: «Угаан-сагыжымга Бурганның хоойлузун өөрүшкү-маңнайлыг хүлээп алыр-дыр мен. Ынчалза-даа кижи бүдүжүмде өске дүрүм-хоойлу бар... Ол... угааным хоойлузунга удур демисежип, мени мага-бодумда ажыл-херээн боттандырган бачыттың ...хоойлузунуң туттурукчузу кылып турар» (Рим. 7:22, 23). Бодуңарга шын эвес күзел эскерип кааш, дыка муңгараваңар! Иеговага аазаашкыныңар дугайында боданыңар. Бараалгадыышкын даңгыраа күткүлгелер-биле демисежир күзелиңерни быжыктырар, херек кырында дуза болур. Кандыг уткалыг?

7. Бараалгадыышкын даңгыраа Иеговага шынчы артарынга канчаар дузалаар?

⁷ Иеговага чуртталгаңарны бергеш, бодуңардан ойталаан силер. Ол аазаашкын Иегованы хомудадып болур күзелдерге, сорулгаларга чок дээниңерни көргүскен (Мф. 16:24). Ынчангаш берге байдалдарда аайын тыппайн, ону сайгарар үе үндүрүп турбас силер. Чүге дизе Иеговага шынчы болурундан аңгыда, өске оруктарны дуглааш, ону өөртүр деп быжыг хөөнненип алган силер. Шыдажыр аргажок байдалда силерде: «Буруу чогумдан ойталавас мен» — дээн, Иов ышкаш чаныш-сыныш чок хөөннүг боор силер (Иов 27:5).

8. Бурганга даңгырааңар күткүлдерге удурланырынга канчаар дузалаар?

⁸ Иегованың күзел-соруун бедик кылдыр салыр аазаашкыныңарны сактыры, күткүлгелер-биле туржурунга дузалаар. Чижээ, өглүг кижи-биле ылчыңнажыр силер бе? Чок болбайн канчаар! Чүге дизе Иеговага сөзүңер берген болгай силер. А ол аазаашкын силерни шын эвес  күзелдерни өстүрүп алырга тыптып келир аарышкыдан камгалаар. «Бузуттуг улустуң оруундан» чайлай бергениңерге дыка-ла өөрүүр боор силер (У. ч. 4:14, 15).

9. Иеговага даңгырааңар чүдүлгени бирги черге салырынга канчаар дузалаар?

⁹ Чыыштар үзер ажыл сүмелээр болза канчаар силер? Ол айтырыгны шиитпирлеп алган болгаш, ооң дугайында боданмас-даа силер. Ынчангаш багай шилилге эки түңнелге чедирер деп бодуңарны мегелевес силер. Иисустуң дугайында сактып чоруңар. Ол Адазын кезээде өөртүр дээш, хөөнненип алган. Иисустуң чижээ силерге Бурганны хомудадыптар бүгү чүүлден дүрген болгаш чайгылыш чок ойталаарынга дузалаар (Мф. 4:10; Ин. 8:29).

10. Сугга суктурган соонда, Иисусту эдереринге Иегова силерге канчаар дузалаар?

¹⁰ Шенелделер үезинде силерге Иисусту эдерер дээн хөөнүңерни бадыткаар арга тыптып кээр. Ынчан Иегова силерге дузалаар деп чигзинмеңер. Библияда мынча дээн: «Бурган... сөзүнге шынчы. Ол кажан-даа силерге күш чедер шааңардан ажа бээр күткүлге эртерин чөпшээревес, а күткүлге[ни]... шыдажып эртсиннер дээш, канчап адырлырын база силерге айтып бээр» (1 Кор. 10:13).

ИИСУСТУ ЭДЕРЕРИНГЕ ЧҮҮ ДУЗАЛААР?

11. Иисусту эдерериниң эң-не эки аргаларның бирээзин адаңар. (Чурукту база көрүңер.)

¹¹ Иисус Иеговага бүгү чүрээнден бараалгап, аңаа үргүлчү мөргүп чораан (Лк. 6:12). Сугга суктурган соонда, Иисусту эдереринге силерге чүү дузалаар? Чуртталгаңарны Иеговага чоокшуладыр ажыл-херек-биле долдурары — эң-не эки аргаларның бирээзи. Библияда мынча дээн:  «Чүнү билип алган... бис, ооң аайы-биле улаштыр амыдырап көрээлиңер» (Флп. 3:16). Үе-үе болгаш, чамдык акы-угбаларның хөй бараалгап эгелээнин дыңнаар силер. Олар Чагырганың суртаалчыларының школазын доозупкан азы бараалгакчылар чедишпес черлерже чорупкан чадавас. Шыдаар болзуңарза, силер база сорулгадан салып алыңар! Иегованың чону хөй бараалгаар аргаларны дилеп чоруур (Аж.-ч. 16:9). А силерге амгы үеде ынчаар бараалгаары болдунмас болза канчаар? Бодуңарны өске улустан дора деп санаваңар. Бараалгалыңарны үнелеңер. Туруштуу-биле дүжүп бербези христиан чарышка дыка чугула (Мф. 10:22). Бодуңарның байдалыңарда Иеговага шыдаар чүүлүңерни кылыңар. Ындыг хөөн сугга суктурган соонда-даа, Иисусту эдереринге дузалаар (Ыд. ыр. 25:1).

12, 13. Чүткүлүңер оду өжүп эгелээн болза, чүнү канчап болур силер? (1 Коринфичилерге 9:16, 17). ( «Чарыштан дүшпеңер» деп көзенекти база көрүңер.)

¹² Мөргүлдериңер чаңгыс аайланып, бараалгалыңар солун эвес апарган болза чүнү канчаар? Азы Библия номчууру солун эвес апарган бе? Ындыг чүүл эскерип кааш, Иегова силерге ыдыктыг сүлдезин бербейн барган деп бодаваңар. Тергиин эвес улус болгаш, бистиң минниишкиннеривис белени-биле бо-ла өскерлип турар. Чүткүлүңер чидип бар чыдар болза, Павел элчинниң чижээн боданыңар. Ол Иисусту бүгү талазы-биле өттүнерин кызып чораан-даа болза, Бурганга бараалгаар күзели кезээде күштүг болбас деп билир турган. (Номчуптуңар: 1 Коринфичилерге 9:16, 17.) Павел: «Эки турам-биле суртаалдавайн турар болзумза, анаа-ла Бурганның даалгазын күүседип турарым  ол-дур» — дээн. Өскээр чугаалаарга, ол күзели бар-даа, чок-даа болза, бараалгаар хөөннүг турган.

¹³ Шак ынчалдыр силер база шиитпирлер хүлээп тургаш, бачыттыг күзелдериңерге чагыртпаңар. Күзелиңер чок-даа болза, шынны кылырын хөөнненип алыңар. Чоорту ажыл-херек соондан шын минниишкиннер сайзырап кээр. Ам дээрезинде бараалгал чурумундан туттунуңар. Силерниң Иеговага доктаамал бараалгалыңарны акы-угбалар эскергеш, сорук кирер (1 Фес. 5:11).

ШЫЛГАТТЫНЫП, ХЫНАНЫҢАР

14. Кижи бодун канчаар база чүге шылгаттынар? (2 Коринфичилерге 13:5).

¹⁴ Сугга суктурган соонда, бодун үргүлчү хынаныры дыка ажыктыг. (Номчуптуңар: 2 Коринфичилерге 13:5.) Үе-үе болгаш, чаңчылдарыңарны шүгдүнүңер. Хүннүң-не мөргүүр силер бе? А Библияны номчуп, шинчилээриңер, чыыштарны үспезиңер, суртаалга киржилгеңер кандыг? Ол бүгү өөрүшкүлүг болгаш ажык-дузалыг бе? Чок деп харыылаар болзуңарза, бир-ле чүүлдү экижидерин кызыңар. Чижээ, бодуңардан айтырыңар: «Кол библейжи өөредиглерни тайылбырлап шыдаар мен бе? Суртаалдан оон-даа хөй өөрүшкү алыр дээш, чүнү кылып болур мен? Мөргүлдерим тода болгаш Иеговага долузу-биле ынанырымны көргүзүп турар бе? Чыыштарже үргүлчү барып турар мен бе? Программаны оон-даа кичээнгейлиг дыңнаарынга, аңаа киржиринге меңээ чүү дузалаар?»

15, 16. Бир акывыс күткүлгеге канчаар алыспаан, ол чүүл биске кандыг өөредиг?

¹⁵ Кижиге бодунуң кошкак талаларын тодарадып алыры база чугула. Роберт акый ону бодунга көргенин сактып чугаалаан: «Чээрби хире харлыымда ажылымда бир уруг бажыңынче чалаан. Ийилээ „үени дыка эки эрттирер бис“ дээн. Баштай ооң чалалгазындан багайтыр былдап келгеш, түңнелинде дорту-биле ойталааш, чылдагаанын тайылбырлаан мен». Ийе, Роберт күткүлгени шыдажыпкан — ол эр-хей! Үе эртерге, ону оон-даа дээре кылдыр шиитпирлеп болур турганын ол билип каан. «Потифарның кадайы чыпшынып туруп бээрге, мен Иосиф ышкаш ол уругдан дүрген, быжыг ойталаваан мен [Э. д. 39:7—9]. Шынында чок дээри кайы хире берге болганын бодум кайгап каан  мен. Иегова-биле хамаарылгамны быжыглаар болза эки деп, ол таварылга меңээ көргүскен».

¹⁶ Силер база Роберт ышкаш бодуңарны хынанып болур силер. Күткүлгеге алыспаан-даа болзуңарза: «Чок дээринге меңээ кайы хире үе херек болган?» деп айтырыңар. Канчаар алдынганыңарга таарзынмас болзуңарза, муңгараваңар. Ол четпес талаңарны ам билир силер, ол дээш амыраңар. Ооң дугайында мөргүп эгелеп алгаш, кезээде Иеговага дыңнангыр болур күзелиңерни быжыглаңар (Ыд. ыр. 138:23, 24).

17. Роберт Иегованың буянныг адын канчаар камгалаан?

¹⁷ Роберттиң таварылгазы бисти оон өске чүүлге база өөредип болур. Роберт улаштырган: «Ажылымда уругнуң чалалгазындан ойталаптарымга, ол: „Байыр чедирип тур мен, сен шыдаптың!“ — дээн. Чүге ынча дээнин айтырарымга, ооң мурнунда Иегованың Херечизи чораан оол шупту аныяк акы-угбаларны ийи арынныг кылдыр чугаалаан болган. Кыйгырыптарыңга-ла, олар чүдүлгезин дораан уттуптар дээн. Ынчангаш олар мени дугуржуп алгаш шенээннер. Мен ону дыңнааш, Иегованың адын баксыратпаанымга дыка-ла өөрээн мен!»

18. Сугга суктурган соонда чүнү кылыр хөөннүг силер? ( «Аныяктарга сонуурганчыг статьялар» деп көзенекти база көрүңер.)

¹⁸ Иеговага чуртталгаңарны бараалгадып сугга суктуруп алгаш, кандыг-даа байдалдарда кезээде ооң адын алдаржыдар күзелиңерни көргүзер силер. Таваржып турарыңар шенелделерни база күткүлгелерни Иегова шуптузун билир деп чигзинмеңер. Шынчы болур дээш үндүрүп турар күжүңерни Иегова йөрээр. Бурган ыдыктыг сүлдени бээр болгаш, ону шыдаар силер (Лк. 11:11—13). Сугга суктуруп алган соонда-даа, Иисусту эдерип шыдаар силер.