1. Иегова бодунуң бараалгакчыларынга кандыг белектер бергенил?

 ДЕЛЕГЕЙДЕ байдал дам баксыраан. Ынчалза-даа Иегованың чонунда айыыл чок бис. Бурган биске бүгү делегейде демниг ха-дуңманы белек кылдыр берген (Ыд. ыр. 132:1). Ол биске өг-бүлелеривисти быжыглаарынга база дузалап турар (Эф. 5:33—6:1). Оон аңгыда, чүрээвиске оожургалдыг болурунга өөредип турар.

2. Иеговага бараалгаары чамдыкта чүге амыр эвес?

² Иеговага бараалгаары чамдыкта белен эвес. Акы-угбаларның сөстери азы кылган чүүлдери чамдыкта хомудадып болур. Азы катап-катап кылыптар частырыгларывыс дээш муңгарай бээр бис. Ынчалза-даа дүжүп бербес болза эки. Кажан: 1) акывыс азы угбавыс хомудадыптарга, 2) кады чурттаан эживиске чөгенгеш, азы 3) боттарывыска чөгени бергеш безин, Иеговага улаштыр бараалгаары чугула. Шак ындыг байдалдарга Бурганның үш бараалгакчызы канчаар алдынганын база олардан чүнү өөренип ап болурувусту көрээлиңер.

АКЫВЫС АЗЫ УГБАВЫС ХОМУДАДЫПТАРГА-ДАА, ИЕГОВАГА ШЫНЧЫ БАРААЛГАҢАР

3. Бурганның бараалгакчылары кандыг бергелерге таваржып турар?

³ Бергедээшкин. Чамдыкта акы-угбалардан чөгени бээр бис. Чүге? Оларның аажы-чаңындан, эпчок сөстеринден, алдынганындан хомудай бээр бис. Удуртукчуларның шиитпирлери-биле чөпшээрешпейн баар үевис база турар. Ол дээш чамдык улус кайгап: «Бурганның организациязынга ындыг чүве канчап болур?» — дээр. Ынчан олар  акы-угбазы-биле эгин-кожа бараалгаарының орнунга, хомудаткан улустан дезип, чыыштарже безин келбестеп каар (Соф. 3:9). Ынчаар кылыры мерген угаанныг бе? Шак ындыг бергелерге таварышкан кижиниң дугайында Библияда бижээн. Ол канчаар алдынганын көрээлиңер.

4. Павел элчин кандыг бергелерге таварышкан?

⁴ Библиядан чижек. Акы-угбалар тергиин эвес деп, Павел элчин эки билир чораан. Чижээ, чаа-ла христиан апаарга, чыыш оон коргуп, бүзүревейн турган (Аж.-ч. 9:26). Соонда чамдык улус ооң адын баксырадып, хоп чугаа тарадып турган (2 Кор. 10:10). Удуртукчу акый шын эвес алдынганы-биле, хөй улустуң бүзүрелин канчаар үреп каар часканын Павел көрген (Гал. 2:11, 12). Чоок ажылдакчызы Марк база ону дыка чөгендирген (Аж.-ч. 15:37, 38). Ол байдалдарда Павел олардан хая көрнүп болур турган. Ынчалза-даа ол акы-угбаларның эки талаларын көөрүн кызып, Иеговага шынчы бараалгаарын уламчылаан. Аңаа чүү дузалаан?

5. Акы-угбалардан ыравазынга Павелге чүү дузалап турган? (Колосчуларга 3:13, 14). (Чурукту база көрүңер.)

⁵ Акы-угбаларның четпестеринче эвес, а төлептиг шынарларынче кичээнгей салырынче Павелди ынакшылы оттуруп турган. Бодунуң бижээн сөстерин күүседиринге база аңаа ынакшыл дузалаан. (Номчуптуңар: Колосчуларга 3:13, 14.) Ол акыларны өршээринге өөредип турган. Бодунуң-на сүмезин Марк-биле таварылгага ооң канчаар ажыглаанын көрээлиңер. Марк Павелди бирги миссионер аян-чорукка кааптарга, ол хомудал шыгжаваан. Соонда Колосчуларга чылыг-чымчак чагаазында Маркты деткимчези дээш мактап, үнелиг ажылдакчы дээн (Кол. 4:10, 11). Римге кара-бажыңга олургаш, ол Маркты келдиртип алган (2 Тим. 4:11). Павел акы-угбаларны өршээп, олардан ойталавайн чорааны моон көскү. Биске мында кандыг кичээл бар?

6, 7. Акы-угбаларның четпестери бар-даа болза, оларга ынак болурунга чүү дузалаар? (Еврейлерге 13:1).

⁶ Кичээл. Иегова бистиң акы-угбаларга ынакшылывыс өшпезин деп күзээр. (Номчуптуңар: Еврейлерге 13:1.) Сөс-биле балыглаан болза, ону багай сеткилден чугаалаан дивес болза эки (У. ч. 12:18). Олар эки шынарларны илередирин күзээр, а чамдыкта болдунмайн баар деп бүзүреңер. Бурган шынчы бараалгакчыларынга ынак болгаш, чазыптарга-даа олардан хая көрүнмес.  Библияда: «Ол бисти үзүк-соксаал чок буруудатпас» деп чугаалаан (Ыд. ыр. 102:9). Дээрде Адавыстан үлегер ап, өске улусту өршээри чугула (Эф. 4:32—5:1).

⁷ Делегейниң төнчүзү чоокшулаан тудум, акы-угбалар-биле найыралывыс дам быжыгар ужурлуун сактып чоруңар. Истеп сүрүүшкүннер дам күштелир чадавас. Бүзүреливис дээш, кара-бажыңнадып болур бис. Ынчан акы-угбаларның дузазы дыка херек апаар (У. ч. 17:17). Испаниядан Хосе́па a дээр удуртукчу акывыстың чуртталгазынга чүү болганын көрээлиңер. Ону өске акылар-биле кады ок-боо тутпас боорга, кара-бажыңнап каан. Ол мынчаар чугаалаан: «Кара-бажыңга кызаа черге чөрүлдээлер үнери белен. Ынчангаш четпестеривисти билип, дүрген өршээп өөренири чугула болган. Биске ынчаар алдынары найыралдыг, демниг артарынга дузалаан. Долгандыр Иеговага бараалгавас улус бар болгаш, бис аравыста ынчалдыр камгалажып болур турган бис. Бир катап балыгланган холумну шарып каарга, өске кижи дузазы херек апарган. Бир акывыс шупту тала-биле дузалажып, идик-хевимни чуп берип турган. Бергеге таварышкаш, ёзулуг акы-дуңмашкы ынакшыл деп чүвени бодумга көрдүм». Багай үелерни манавайн, амдан эгелеп чөрүлдээлерни шиитпирлеп өөрениилиңер!

КАДЫ ЧУРТТААН ЭЖИҢЕРГЕ ЧӨГЕНГЕШ-ДАА, ИЕГОВАГА ШЫНЧЫ БАРААЛГАҢАР

8. Өг-бүле улус кандыг бергелерге таваржып болур?

⁸ Бергедээшкин. Бергелери чок өг-бүлелер турбас. Өгленген улус чаа түрегделдерни көөр деп Библия дорту-биле чугаалап турар (1 Кор. 7:28). Чүге дизе ашаа-даа, кадайы-даа тергиин эвес, аажы-чаңы тускай база күзелдери ылгалдыг. Өг-бүле туткан улустуң кижизидилгези, культуразы дыка аңгы база болур. Чоорту куда мурнунда эскертинмес аажы-чаң көстүп кээрге, чөрүлдээлер тыптып кээр чадавас. Бергелерни шиитпирлээриниң орнунга ашак-кадай улус бот-бодунга шорлуп, чемележир боор. Аңгы чурттаары азы чарлыры чаңгыс шын арга деп бодал безин кирип кээр. Олар ооң соонда аас-кежиктиг апаар бе? b Библейжи үеде өг-бүлези үлегерлиг эвес болган херээженниң чижээнден чүнү өөренип ап болурувусту көрээлиңер.

9. Авигея өг-бүлезинге кандыг бергелерге таварышкан?

⁹ Библиядан чижек. Авигея Навалдың кадайы турган. Библияда ооң ашаан каржы-хажагай, дошкун кылдыр бижээн (1 Хаан. 25:3). Авигеяга ындыг кижи-биле чурттаары берге болганы чугаажок. Израильдиң келир үеде хааны Давид ооң ашаан өлүрер деп баарга, хосталыр арга тургустунуп келген. Давид дайынчылары-биле Навалга куду көрдүрген соонда, ол шиитпирни үндүрген (1 Хаан. 25:9—13). Давидке шаптыктавайн, Авигея дезип болур турган. Ынчалза-даа ол аңаа киржип, Навалды дириг арттырарын Давидтен дилээн (1 Хаан. 25:23—27). Ол чүге ынчаар алдынган?

10. Өг-бүлезинде бергелер бар-даа болза, ону кадагалаарынче Авигеяны чүү оттурган?

¹⁰ Авигея Иеговага ынак болгаш, ооң өг-бүлеге хамаарыштыр негелделеринге хүндүткелдиг турган. Бурганның Адам биле Еваны өглээш, берген айтыышкынын ол  билир турган чадавас (Э. д. 2:24). Иегова өг-бүле харылзаазын ыдыктыг деп санаарын Авигея билир турган. Ол Бурганны өөртүксээр болгаш, бажыңында шупту улусту база ашаан камгалаар дээш, болдунар-ла чүүлдү кылган. Ол дүргени-биле байдалче киржи бээрге, Давид Навалдан өжээн негевээн. Авигея кылбаан каржы чүүлү дээш өршээл дилээринге база белен турган. Шак ол бодун хайыралавас, дидим херээженге Иегова ынак болганы чигзиниг чок. Ашак-кадай улус Авигеядан чүнү өөренип ап болур?

11. а) Өг-бүле туткан улустан Иегова чүнү манаар? (Эфесчилерге 5:33). б) Карменниң өг-бүлезин арттырып алыр дээш кысканында биске кандыг кичээл бар? (Чурукту база көрүңер.)

¹¹ Кичээл. Өг-бүле улуска чурттаары берге-даа болза, Иегова оларны кады артарын күзеп турар. Олар бергелерин шиитпирлээрин кызып, бот-боттарынга ажык сүрбес ынакшылын болгаш хүндүткелин көргүзерге, Бурган дыка өөрүүр. (Номчуптуңар: Эфесчилерге 5:33.) Ка́рмен кудазының соонда алды хире чыл эрткенде, Иегованың Херечилери-биле Библияны өөренип эгелээш, удатпаанда сугга суктуруп алган. Ол мынча дээн: «Ашаам аңаа таарзынмайн, мени Иеговага хүннеп эгелээн. Ол мени сөглеп, кааптар мен деп кыжанып турган». Ынчалза-даа ол өг-бүлезин кадагалап алыр дээш, болдунар-ла чүвени кылган. Ол 50 чыл иштинде ашаанга ынакшылды болгаш хүндүткелди көргүзерин кызып чораан. Ол улаштыр мынча дээн: «Чылдар дургузунда өөм ээзин билип эгелээш, эвилең-ээлдек чугаалажып өөренип алган мен. Иеговага ынак болгаш, аңаа өг-бүле ыдыктыг болганда, ону кадагалап алырын кызып, ашаамдан чарлырын бодаваан мен» c. Өг-бүлеңерде бергелерге таваржып чоруур болзуңарза, Иеговага ынаныңар, ол силерни деткип, шупту бергелерни ажып эртеринге дузалаар.

БОДУҢАРГА ЧӨГЕНГЕШ-ДАА, ИЕГОВАГА ШЫНЧЫ БАРААЛГАҢАР

12. Шыңгыы бачыт кылган улус кандыг бергелерге таваржып турар?

¹² Бергедээшкин. Аар бачыт кижиниң бодунга хүндүткелин чидириптер. Библияда бачыт үүлгеткен кижини сузу бастына бээр дээн (Ыд. ыр. 50:19). Робе́рто чыыштың дузалакчызы болур дээш, хөй чылдарда эки шынарларны сайзырадып келген. Ынчалза-даа аар бачыт кылыпкаш, Иеговага өскерлипкенин билип каанын, Роберто  үлешкен: «Буруум аар чүък дег базып кээрге, шыдажыр арга чок турган. Мен бодумга ческинчиг апарган мен. Мөөредир ыглап, Иеговага ханы мөргүп турган мен. Ол мен дег саттыныкчыны дыңнааш канчаар деп бодап турганымны сактыр мен». Бачытка алзыпкаш, сула салдына берип болур бис. Ындыг үелерде чүрээвис Иегова бистен хая көрнү берген база аңаа улаштыр бараалгаары утка чок деп катап-катап чугаалап болур (Ыд. ыр. 37:5). Шак ындыг чүүлдү миннип турар болзуңарза, бирги векте Иегованың бараалгакчызының дугайында сактып келиңер. Ол аар бачыт кылган соонда, Иеговага бараалгаарын соксатпаан.

13. Пётр элчин кандыг улуг бачыт кылган база аңаа ону чүү чедиргенил?

¹³ Библиядан чижек. Иисустуң өлүмүнүң бетинде дүне, Пётр элчин аар бачытка чедирген частырыгларны кылган. Баштай ол өске өөреникчилер Иисусту кааптар-даа болза, шынчы артар мен деп мактанып турган (Мк. 14:27—29). Оон Гефсимания садынга ол одуг-сергек болбаан (Мк. 14:32, 37—41). А Иисусту хүлүп апаар дээш улус чедип кээрге, Пётр дезипкен (Мк. 14:50). Адак сөөлүнде ол үш катап Иисусту билбес мен дээш, мегезин даңгыраглап бадыткаан (Мк. 14:66—71). Кажан Пётр улуг бачыт кылганын билип кааш, шыдашпайн ыыткыр ыглапкан. Ынчан ол буруузунуң кайы хире аарын билип каан чадавас (Мк. 14:72). Каш шак болгаш, ооң чоок эжин, Иисусту шаажылап каан. Пётрнуң аарышкызын бодап көрүңер даан! Ол бодун өөдежок деп миннип турган чадавас.

14. Иеговага улаштыр бараалгаарынга Пётрга чүү дузалааныл? (Журналдың даштында.)

¹⁴ Ынчалза-даа Пётр дүжүп бербейн, Иеговага бараалгаарын уламчылаан. Аңаа чүү дузалаан? Ол акы-угбаларындан аңгыланмаан. Пётр кады бүзүрээн акыларынга баарга, олар чигзиниг чок акызын оожургаткан (Лк. 24:33). Оон аңгыда, дирлип келген Иисус Пётрну деткиир дээш аңаа көзүлген (Лк 24:34; 1 Кор. 15:5). Сөөлүнде Иисус өөреникчизин частырыглары дээш чемелевейн, а харын-даа улуг харыысалгалыг даалга берген (Ин. 21:15—17). Пётр Иисус аңаа ынак деп билир болгаш, аар бачыт кылыпкан-даа болза, бодун чөгенчиг деп миннивейн турган. Кады бүзүрээн акылары база оон-даа улаштыр акызын деткип турган. Пётрнуң чижээнде биске кандыг кичээл бар?

15. Иегова бисти чүү чүвеге бүзүредип турар? (Ырлар 85:5; Римчилерге 8:38, 39). (Чурукту база көрүңер.)

¹⁵ Кичээл. Иегова бодунуң ынакшылынга  болгаш өршээлинге бисти кандыг-даа чигзиниг чок болзун деп күзеп турар. (Номчуптуңар: Ырлар 85:5; Римчилерге 8:38, 39.) Бачыт кылыптарывыска, арын-нүүрүвүс чий бээр. Ол черле ындыг. Ынчан Иегова биске ынак эвес, кажан-даа өршээвес деп бодавас болза эки. Дораан-на дузаны дилээри чугула. Кырында Роберто мынча дээн: «Күткүлгени бодум күжүм-биле ажып эртиптер мен деп бодумга идегээш, бачыт кылып алган мен». Ол удуртукчулар-биле чугаалажыр деп билген. Акывыс улаштыр мынча дээн: «Удуртукчулар таварыштыр Иегова меңээ ынакшылынга бүзүреткен. Ол акыларымга үнелиг мен деп көрдүм. Иегова менден хая көрүнмээн деп бүзүрээринге акыларым дузалашкан». Бис база Иегованың ынакшылынга чигзинмейн барып болур бис. Чазыг кылыпкаш, сеткиливистен өршээлди болгаш дузаны дилеп, ол-ла хевээр частырыгны катаптавазын кызар болзувусса, Иегова черле өршээр (1 Ин. 1:8, 9). Тайып дүжүп, чазыпкаш-даа, Иегованың ынакшылынга бүзүреливис улаштыр бараалгаарынга дузалаар.

16. Иеговага бараалгап тургаш, чүге дүжүп бербес хөөннүг силер?

¹⁶ Бо берге үеде күжениишкиннеривисти Иегова дыка үнелээр. Бодувуска, өске кижилерге чөгениишкиннерден бараалгаары амыр эвес. Ындыг-даа болза, Иегова-биле шыдаар бис. Акы-угбаларга ынакшылды быжыктырып, чеже-даа хомудадыр болза, өршээп шыдаптар бис. Ашак-кадай улус бергелерни кады демниг ажып эртип болур. Ынчалдыр олар өг-бүлениң Чаяакчызынга хүндүткелди, ынакшылды илередир. Бачыт кылыптар болзувусса, Иеговадан дузаны дилээр бис. Ооң ынакшылынга болгаш өршээлинге чигзинмейн, улаштыр бараалгаар бис. «Буян кылып тура, кажан-даа могап-турбаалы», ынчан Иеговадан шаңналывыс улуг деп чигзинмес бис! (Гал. 6:9).