1. Чүнүң дугайында дүвүреп болур бис?

 КЕЛИР үеде болур болуушкуннарның — меге шажынны узуткаарының, Магогтан Гогтуң халдаашкынының болгаш Армагеддон дайынның — дугайында боданып келгеш, дүвүрээр-дир силер бе? Ол шиитпирлиг үеде Иеговага шынчы артып шыдаар мен бе деп боданган чадавас силер. Ынчаар бодап турган болзуңарза, бо статья силерге дузалаар. Бо статьяның кол шүлүүнде Иисустуң: «Силерниң чүректериңер муңгарап хөлзевезин! Бурганга бүзүрээриңер дег, Меңээ база бүзүреңер!» дээн сөстерин тода сайгарар бис (Ин. 14:1). Быжыг бүзүрелдиг боор болзувусса, келир үеден кортпас бис.

2. Бүзүреливисти канчаар быжыктырып болур бис база бо статьяга чүнү сайгарар бис?

² Бүзүреливисти быжыктырарынга база келир үеде шенелделерни ажып эртеринге биске чүү дузалаар? Амгы үеде бергелеривистиң дугайында боданыр болзувусса, бүзүреливистиң кошкак талаларын тодарадып ап болур бис. Бергелерни ажып эрткен тудум, бүзүреливис быжыгар. Ынчан келир үеде болур шенелделерге белен боор бис. Иисустуң өөреникчилеринге чамдыкта бүзүрел чедишпейн турган. Бо статьяга дөрт ындыг таварылганы сайгаргаш, келир үеде болур болуушкуннарга бодувусту канчаар белеткээрин билип алыр бис.

3. Матфей 6:30, 33-те Иисустуң сөстеринден алырга, бүзүреливис чүүден көскү боор?

³ Кандыг-даа эр кижи өг-бүлезин аъш-чем, идик-хеп, бажың-балгат-биле хандырыксаар. А бистиң үевисте ону кылыры белен эвес. Чамдык акы-угбалар ажылын чидирип алган.  Олар канчаар-даа кыскаш, ажыл тып чадап турар. А өске ха-дуңмавыс Бурганга таарымча чок ажылдарга ажылдаксавас. Бо шупту байдалдарда Иегова өг-бүлелеривистиң дугайында сагыш човап шыдаар деп, быжыг бүзүрел херек. Ооң дугайында Иисус Даг кырынга суртаалынга чугаалаан. (Номчуптуңар: Матфей 6:30, 33.) Иегова бисти кажан-даа кагбас деп ыяк бүзүрээр болзувусса, Бурганның ажылын бирги черге салыр бис. А кажан Иегова бистиң хереглелдеривистиң дугайында сагыш човап турарын көргеш, Аңаа оон-даа чоокшулаар бис, а бүзүреливис улам быжыгар.

4, 5. Бир өг-бүлеге акша-төгерик талазы-биле сагышсыралдарны ажып эртеринге чүү дузалаан?

⁴ Иегова Венесуэладан бир өг-бүлеге акша-төгерик талазы-биле сагышсыралдарны ажып эртеринге дузалаан. Мигель Кастронуң * өг-бүлези фермазының ачызында амыдырап чораан. Оон ок-чепсектиг дээрбечилер келгеш, оларның черин хунаап алгаш, бажыңындан үндүр ойладыпкан. Мигель үлешкен: «Бис ам бичии чер хөлезилеп алгаш, аңаа өзүп келген чүүлүвүс ачызында-ла амыдырап чоруур бис. Мен оттуп келгеш, Иеговадан өг-бүлемге ол хүнде херек чүүлдерни бээрин дилеп мөргүүр чордум». Оларның чуртталгазы белен эвес. Ындыг-даа бол, олар дээрде ынакшылдыг Адазынга бүрүнү-биле идегеп, оларның хүн бүрүде хереглелдери дээш, Ол сагыш човап чоруур деп бүзүреп турарлар. Ооң ачызында Кастронуң өг-бүлези чыыштарже доктаамал барып, суртаалдап чоруур. Олар Бурганның Чагыргазын бирги черге салырга, Иегова оларга шупту херек чүүлдү берип турар.

⁵ Бо берге үеде Мигель биле ооң кадайы Юрай Иегованың сагыш човангыр холун эскерерин кызып турарлар. Чамдыкта Иегова акы-угбалар таварыштыр оларга херек чүүлдерни берип азы Мигельге тааржыр ажылды тып алырынга дузалап турар. А чамдыкта салбыр таварыштыр гуманитарлыг дузаны чедирип турар. Бурган кезээде оларның чанында деп чүүлдү миннип тургаш, оларның бүзүрели быжыгып орар. Иегованың оларга дузалаан бир таварылгазын чугаалааш, улуг уруу Йоселин үлешкен: «Иегова бис дээш сагыш човап чоруур. Ону көөрү сагыш-сеткилди өөртүп чылдыр-дыр. Иегованы мен Аңаа ынанып болур бүзүрелдиг өңнүүм кылдыр көөр чордум. Өг-бүлевистиң таваржып турар бергелери бисти келир үеде болур оон-даа шыңгыы шенелделерге белеткээн».

6. Акша-төгерик чедишпес үеде бүзүрелиңерни канчаар быжыктырып болур силер?

⁶ Акша-төгерииңер чедишпес боорга, ундарап турар силер бе? Ындыг берге байдалга тургаш безин, Иеговага бүзүрелиңерни быжыктырып шыдаар силер. Иеговага мөргүвүшаан, Матфей 6:25—34-те бижээн Иисустуң сөстериниң дугайында ханы боданыңар. Оон ыңай суртаал ажылынга идепкейлиг киржип чоруур акы-угбаларны Иегованың канчаар деткип турарын база боданыңар (1 Кор. 15:58). Дээрде Адавыс оларга  дузалаан болганда, силерге база албан дузалаар. Иегова силерниң чүнү хереглеп турарыңарны база ону канчаар бээрин дыка эки билир. Ооң деткимчезин эскерип тургаш, бүзүрелиңерни быжыктырып, келир үеде оон-даа берге шенелделерге белеткенип алыр силер (Авв. 3:17, 18).

7. Күштүг шуурган Иисустуң өөреникчилериниң бүзүрелиниң чедишпезин канчаар илереткен? (Матфей 8:23—26).

⁷ Иисус бир катап өөреникчилери-биле улуг хат-шуурганга таварышкан. Иисус ол байдалды ажыглап, өөреникчилериниң бүзүрелиниң кошкак талазын айтып берген. (Номчуптуңар: Матфей 8:23—26.) Ол үеде хөлде күштүг шуурган хадып, «чалгыглар хемени хөме шаап эгелээн». А Иисус дүвүрел чок удуп чыткан! Өөреникчилери кортканындан ону оттуруп, камгалаарын чаннып дилеп эгелээн. Иисус оларны: «Биче бүзүрелдиглер, чүге ындыг кортук силер?» — деп чылыг-чымчаа-биле чемелээн. Өөреникчилери чеже-даа коргуп турган болза, Иегова Иисусту болгаш оларны кандыг-даа айыылдан камгалап шыдаар деп бүзүрээр ужурлуг турган. Моон чүнү өөренип ап болур бис? Бүзүреливис быжыг боор болза, дорт-даа, доора-даа уткалыг күштүг шуурганнарны ажып эртип шыдаар бис.

8, 9. Анель кандыг шенелдеге таварышкан база ону туруштуг ажып эртеринге аңаа чүү дузалаан?

⁸ Пуэрто-Рикодан Анель дээр бот угбавыс берге шенелдеге таварышкаш, бүзүрелин быжыктырган. 2017 чылда «Мария» деп аттыг шуурган ооң чурттап турган бажыңын буза шаап каапкан. Ооң кадында, ол ажылын база чидирип алган. «Мен Иеговага сагыш-сеткилимни тө каап, Аңаа долузу-биле ынанып өөренип алган болгаш, дүвүрелдерге алыспаан мен» — деп, Анель чугаалаан.

⁹ Оон ыңай Анельге бергелерни ажып эртеринге дыңнангыр чорук дузалаан. Ол мынча дээн: «Бурганның организациязының шупту айтыышкыннарын эдерип турган мен, ынчангаш ынча дыка дүвүревээн мен. Иегова акы-угбалар таварыштыр мени канчаар сорук киирип, акша-төгерик талазы-биле канчаар дузалап турганын көрген мен. Иегова меңээ херек чүүлүмден артык хөйнү берген. Ынчангаш бүзүрелим оон-даа быжыг апарган».

10. «Күштүг шуурганны» ажып эртер дизе, чүнү канчаар херек?

¹⁰ Бистиң кижи бүрүзү «күштүг шуурганга» таваржып болур. Силер бойдустуң халавындан когараан азы доора уткалыг хай-халапка таварышкан чадавас силер. Чижээ, кадыыңар баксыраарга, ундарап, чүнү кылырын билбейн турар чадавас силер. Үе-үе болгаш, ындыг дүвүрелдер тыптып болур. Ынчалза-даа оларга алзыр болзувусса, Иеговага бүзүреливис кошкай бээр. Ынчангаш Бурганга сеткилиңер ханызындан мөргүп тургаш, Олче чоокшулаңар. Оон Иегованың силерге мооң мурнунда канчаар дузалап турганын база үргүлчү сактып чоруңар (Ыд. ыр. 76:12, 13). Ынчан Иегова силерни кажан-даа, чүү дээш-даа кагбас деп чүүлге бүзүрелиңер быжыгар.

11. Удуртулга ап турар улусту дыңнаары чүге чугула?

 ¹¹ Оон ыңай шенелделерни ажып эртеринге силерге чүү дузалаар? Кырында чугаалашканывыс Анельдиң эскергени дег, дыңнангыр чорук дузалаар. Иегова биле Иисустуң бүзүреп турар улузунга бүзүреп өөрениңер. Чамдыкта удуртулга ап турар акыларның шиитпирлери утка чок ышкаш сагындырып болур. Ынчалза-даа Иегова дыңнангыр улусту йөрээр. Библияда улустуң болгаш амгы үеде акы-угбаларның чижектеринден алырга, дыңнангыр чорук кижини камгалаар (Хост. 14:1—4; 2 Чыл. 20:17). Ынчангаш ындыг төөгүлерниң дугайында ханы боданыңар. Ынчаар силерниң амгы-даа, келир-даа үеде Иегованың организациязының айтыышкыннарын эдерер күзелиңер быжыгар (Евр. 13:17). Ынчан бо делегейже диргелип кел чыдар хай-халаптан кортпас силер (У. ч. 3:25).

12. Чөптүг эвес чорукка таваржы бээр болзувусса, бүзүреливис бисти чүүже оттурар? (Лука 18:1—8).

¹² Иисус өөреникчилериниң бүзүрели чөптүг эвес чорук таварыштыр шенеттинер деп билир турган. Ынчангаш ол арын-нүүр чок шииткекчиден чөптүг шииткел дилеп турган дулгуяк кадайның дугайында угаадыглыг чугааны оларга чугаалаан. Ол херээжен кижи канчап-даа тургаш, бодунуң сорулгазын чедип алыр деп бүзүреп турган. Шак ынчаар болган. Моон чүнү өөренип ап болур бис? Иегова арын-нүүр чок шииткекчиге көңгүс дөмей эвес. Ынчангаш Иисус мынча дээн: «А Бурган Олче дүн-хүн дивейн кыйгы салган, Бодунуң шилип алган улузун канчап камгалавас чүвел?» (Номчуптуңар: Лука 18:1—8.) Оон ол: «Кижи амытан Оглу ээп келгеш, чер кырындан ындыг бүзүрелди тывар ирги бе?» — деп немээн. Ынчап кээрге, чөптүг эвес чорукка таваржы бээр болзувусса, быжыг бүзүрел биске, демги дулгуяк херээженге ышкаш, шыдамык бооп, дүжүп бербезинге дузалаар. Ынчан Иегова дөмей-ле биске дузалаар деп ыяк бүзүрээр боор бис. Оон ыңай быжыг бүзүрел-биле мөргүүрү чугула. Чамдыкта Иегова мөргүлдеривиске манаваанывыс арга-биле харыылап болур.

13. Мөргүлдүң ачызында бир өг-бүле канчаар камгаланган?

¹³ Демократтыг Республика Конгодан Вероника угбавыстың чижээн көрээлиңер. Ооң чуртунга хамааты дайын эгелээрге, ол Иегованың Херечизи эвес ашаа база 15 харлыг уруу-биле дезер ужурга таварышкан. Бир блокпостуну эртип бар чыдырда, шериг улузу оларны тудуп алгаш, өлүрер деп барган. Вероника шыдашпайн, ыглай берген. Ооң уруу ону оожургадыр дээш, Иегованың адын каш катап ыыткыр адап, аңаа мөргүп эгелээн. Кажан ол мөргүп доозуптарга, дайынчыларның баштыңчызы: «Сени кым мөргүп өөредип кааныл?» — деп айтырган. «Авам» — деп чугаалааш, Иисус шак ынчаар мөргүүрүн өөредип турган база ооң дугайында Матфей 6:9—13-те шүлүктерде бижээн деп, ол тайылбырлаан. Элдепсинген баштыңчы аңаа  мынча дээн: «Хостуг силер! Бурганың Иегова сени камгалазын!»

14. Бүзүреливистиң быжыын чүү шенеп болур база туруштуг артарынга биске чүү дузалаар?

¹⁴ Ындыг таварылгалар мөргүлдүң кайы хире күштүүн көргүзүп турар. Ынчалза-даа Иегова мөргүлдериңерге ол-ла дораан база ындыг билдингир кылдыр харыылавас болза канчаар? Иисустуң угаадыглыг чугаазында дулгуяк кадай дег, чүткүлдүг мөргүңер. Мөргүп тургаш, Иегова чаныңарда база силерге канчаар база кажан харыылаарын билир деп чигзинмеңер. Ыдыктыг сүлдени улаштыр-ла дилеңер (Флп. 4:13). Утпаңар: Иегова силерни келир үеде элбээ-биле шаңнаар, а амгы үениң хилинчек-човалаңы сагыжыңарга безин кирбес. Амдыгааштан тура, Иеговага ынанып өөренип алыр болзуңарза, келир үеде оон-даа берге шенелделерге белен боор силер (1 Пет. 1:6, 7).

15. Матфей 17:19, 20-ден алырга, Иисустуң өөреникчилери чүнү кылып шыдаваан?

¹⁵ Бүзүрелдиң ачызында олар кандыг-даа бергелерни ажып эртип шыдаар деп, Иисус өөреникчилеринге чугаалаан. (Номчуптуңар: Матфей 17:19, 20.) Бир катап олар букту үндүр ойладып шыдаваан. Чүге? Ооң мурнунда олар чеже-даа буктарны ойладып турган болгай. Иисус оларга: «Силерниң бүзүрелиңер биче болган-дыр» — дээн. Ооң сөстеринден алырга, оларның бүзүрели быжыг турган болза, дагларны туружундан көжүрүп болур турган, өскээр чугаалаарга, оларга кылып болбас хире чүү-даа турбас турган. Бистиң мурнувуска, даглар дег, шиитпирлеттинмес ышкаш бергелер база туруп болур.

16. Хейдиге ажыг-шүжүгнү ажып эртеринге бүзүрели канчаар дузалаан?

¹⁶ Гватемаладан Хейди угбавыс-биле чүү болганын көрээлиңер. Ол ашаа Эдди-биле чыыштан чанып бар чыдырда, ашаан өлүрүп каапкан. Хейдиге ажыг-шүжүгнү ажып эртеринге бүзүрели канчаар дузалаан? Ол мынча дээн: «Мөргүлдүң ачызында Иеговаже үүрге-чүъгүмнү чая каапкаш, чүрээмге амыр-тайбыңны миннир-дир мен. Оон ыңай Иегова мени төрелдерим болгаш чыышта эш-өөрүм таварыштыр деткип турар. Ол ышкаш суртаалга идепкейлиг киржип тургаш, ажыг-шүжүүмге бастыртпайн, эртенги хүн дээш ынча дыка дүвүревес чордум. Ол берге үелерни чурттап эрткеш, мындыг чугула чүүлдү билдим: келир үеде меңээ кандыг-даа шенелделер таварышса, Иегованың, Ооң организациязының болгаш Иисустуң ачызында чүнү-даа шыдажып эртиптер мен».

17. Мурнувуска ажып эртери болдунмас хире бергелер тургустунар болза, чүнү канчаар?

¹⁷ Чоок кижизин чидирбээн кижи кайыын турар деп. Силер база чоок кижиңерни чидирген болзуңарза, Иегованың чок апарган улусту канчаар диргизип турганының дугайында библейжи төөгүлерни катап-катап номчуңар. Ынчан диргизиишкинге бүзүрелиңер быжыгар. Азы силерниң чоок кижиңерни чыыштан  үндүрүпкен чадавас. Ындыг таварылгада Иегованың кеземчези кезээде ажыктыг деп чүүлге чигзинмес дээш шинчилелден кылыңар. Кандыг-даа берге байдалды бүзүрелди быжыглаар арга кылдыр көрүңер. Иеговага сагыш-сеткилиңерни тө каап бериңер. Акы-угбалар-биле аралажып, олардан черле аңгыланмаңар (У. ч. 18:1). Сактыышкыннардан карааңар чажын тудуп шыдавас-даа болзуңарза, дөмей-ле улаштыр чыыштарже барып, суртаалдап, Библияны номчуңар (Ыд. ыр. 125:5, 6). Ол бүгү чүрээңерде балыгларны эмнээринге дузалаар. Оон аңгыда, Иегова силерге кайы хире кайгамчыктыг келир үени белеткеп алганын сактып чоруңар. Иегованың дузазын хөй көрген тудум, бүзүреливис дам быжыгар.

18. Кандыг-бир шенелдеге бүзүрелиңерниң чедишпейн турарын эскерип кагзыңарза, чүнү кылыр херек?

¹⁸ Кандыг-бир шенелдеге бүзүрелиңерниң чедишпейн турарын эскерип кагзыңарза, муңгараваңар. Чүге дизе ам ону канчаар быжыктырарын билир силер. «Бүзүреливисти өстүрүп көрүңер» дээн Иисустуң элчиннерин өттүнүңер (Лк. 17:5). Ол ышкаш бо статьяга сайгарганывыс акы-угбаларның үлегериниң дугайында боданыңар. Мигель биле Юрай ышкаш, Иегованың силерге канчаар дузалап чораанын утпаңар. Верониканың уруу болгаш Анель дег, ылаңгыя үнер арга чок байдалга таварышкаш, Иеговага чүткүлдүг мөргүңер. Оон ыңай, Хейди дег, Иегова төрелдериңер болгаш эш-өөрүңер таварыштыр силер дээш сагыш човап шыдаар деп утпаңар. Амдан тура Иеговага ынанып өөренип алыр болзуңарза, келир үеде болур кандыг-даа шенелделерни ажып эртеринге Иегова силерге дузалаар деп чигзинмес силер.

19. Иисус чүү чүвеге чигзинмээн база бис чүү чүвеге бүзүреп болур бис?

¹⁹ Иисус өөреникчилеринге бүзүрелиниң кошкак талаларын билип алырынга дузалаан. Ынчалза-даа олар Иегованың ачызында шупту шенелделерни ажып эртип шыдаар деп, ол бичии-даа чигзинмээн (Ин. 14:1; 16:33). Мөөң чон бүзүрелин сайзырадып алгаш, коргунчуг улуг хилинчекти ажып эртиптер деп, Иисус ыяк бүзүреп турган (Ажыд. 7:9, 14). Оларның аразынга турар бис бе? Бүзүреливисти бар шаавыс-биле быжыктырарын кызар болзувусса, Бурганның авыралының ачызында коргунчуг хилинчекти ажып эртиптер бис! (Евр. 10:39).