1, 2. а) Чаа өгленген улуска Иеговага ынаныры чүге чугула? (Ырлар 36:3, 4). б) Бо статьяга чүнү сайгарар бис?

 ЧООКТА чаа өгленген силер бе азы чоокку үеде өгленир деп турар силер бе? Ийе болза, ынак кижиңер-биле бүгү чуртталгаңарда аас-кежиктиг чурттаксаар боор силер. Ындыг-даа болза, өг-бүлеге бергелер турар, ынчангаш шыңгыы шиитпирлерни хүлээр апаар. Оларны канчаар хүлээп турарыңардан өг-бүлеңерниң аас-кежии хамааржыр. Бир эвес Иеговага долузу-биле ынаныр болзуңарза, мерген угаанныг шиитпирлерни хүлээр силер. Ынчан өг-бүлеңер быжыг болгаш аас-кежиктиг боор. А бир эвес Бурганның сүмелерин тооп дыңнавас болзуңарза, араңарда хамаарылгаңар баксырап, аас-кежик чок боор силер. (Номчуптуңар: Ырлар 36:3, 4.)

² Бо статья чаа өгленген улуска хамааржыр-даа болза, мында кандыг-даа өг-бүлеге тургустунуп болур бергелерни бижип каан. Бурунгу үеде Бурганга шынчы чораан эр-херээжен улустуң үлегеринден чүнү өөренип ап болурувусту көөр бис. Бо статьяда ажыктыг кичээлдер чүгле өг-бүлеге эвес, а чуртталганың өске-даа талаларынга ажыглаттынгыр. Оон аңгыда, чамдык өг-бүлелерниң чижектерин база сайгарар бис.

3, 4. Чаа өгленген улус кандыг бергелерге таваржып болур?

³ Долгандыр улус экини күзээш, чаа өгленген улусту өскелер  ышкаш чурттаарынче албадап болур. Чижээ, ада-иелери оларга уйнуктар божуп бээрин негээр. А эштери болгаш төрелдери оларны бажың садып алгаш, ону янзы-бүрү эт-сеп-биле албан долдурарын сүмелеп болур.

⁴ Чаа өгленген улус ол базыышкынга алзып, шын эвес шиитпирлер хүлээп алыр болза, чээлилер ап, өрелени бээр. Оон ону төлээр дээш, оларның кайызы-даа хөй ажылдаар апаар. Ол үени ооң мурнунда олар Библияны хууда шинчилээринче, өг-бүле мөгейиишкининче база суртаалдаарынче үндүрүп турган. Оон аңгыда, олар ажылдаар черин чидирип алырындан коргуп азы оон-даа хөй акша ажылдап алыр дээш, безин чыыштарны үзүп болур. Түңнелинде олар өөрүшкү миннивес боор. Бир эвес ол үезин Иеговага бараалгаарынче үндүрүп турган болза, олар аас-кежиктиг болур ийик.

5. Клаус биле Марисаның чижээнден чүү чүвеге өөренип болур силер?

⁵ Хөй эт-хөреңгиже чүткүүр кижиниң чуртталгазы аас-кежиктиг болбас. Клаус биле Мариса * аңаа шынзыккан. Олар өгленген соонда амыдыралынга шупту чүвези четчир болзун дээш, бүдүн хүн ажылдап турганнар. Ынчалза-даа олар сеткилинге хоозурал миннип турган. Клаус үлешкен: «Бистиң эт-хөреңгивис болгаш идик-хевивис чедер болгаш артар турган-даа болза, бараалгалга сорулгалар салбайн чораан бис. Ажыы-биле чугаалаарга, бис боттарывыс чуртталгавысты нарыыдадып, дүвүрелдер-биле долдуруп алган бис». Кижи чаа эт-септи садып-ла турарга, ол өөрүшкүнү эккелбес деп эскерген боор силер. Бир эвес чуртталгаңар Клаустуң чугаалааны ышкаш апарган болза, муңгараваңар. Бо статьяда сүмелер чуртталгаңарны өскертиринге дузалаар. Баштай Иосафат хаанның чижээнден өөнүң ээлери чүнү өөренип ап болурун сайгарыптаалыңар.

6. Иосафат берге байдалда Чугаалар 3:5, 6-да сөстерни канчаар ажыглаан?

⁶ Өөнүң ээлери, өг-бүлениң баштыңы болур харыысалганы күүседири силерге берге-дир бе? Ийе болза, Иосафат хаан база бүгү чоннуң менди-чаагай чоруу дээш улуг харыысалгалыг турган. Аңаа чедиишкинниг болурунга чүү дузалаан? Ол албатыларын камгалаар дээш, шыдаар-ла чүүлүн кылып чораан. Чижээ, ол Иудеяны дайзыннардан камгалаар дээш, 1 160 000 дайынчылардан тургустунган күчү-күштүг аг-шеригни чыып алган (2 Чыл. 17:12—19). Соонда Иосафаттың өг-бүлезинге болгаш чонунга айыыл диргелип келген: Сеир дагларының чурттакчылары болгаш моав, аммон чоннар дүк-түмен аг-шерии-биле Иудеяга удур үнүпкен (2 Чыл. 20:1, 2). Иосафат канчалган? Ол Иеговадан дуза дилеп мөргээн. Ол чүүл Чугаалар 3:5, 6-да сөстер-биле дүгжүп турар (номчуптуңар). 2 Чылдар 20:5—12-де Иосафаттың биче сеткилдиг мөргүлүн бижээн. Ооң сеткилинден  чугаалаан сөстеринден алырга, ол дээрде ынакшылдыг Адазынга бүрүнү-биле идегеп чораан. Иегова Иосафаттың мөргүлүнге канчаар харыылаан?

7. Иегова Иосафаттың мөргүлүнге канчаар харыылаан?

⁷ Иегова Яхазиил дээр левит таварыштыр Иосафатка: «Чүгле барып туруп алгаш, Дээрги-Чаяакчының силерге хайырлап турар камгалалынче көрүңер» — дээн (2 Чыл. 20:13—17). Тулчуушкунга белен турган дайынчыларга дыка-ла чиктиг айтыышкын эвес-тир бе? Ынчалза-даа ол айтыышкынны кижилер эвес, а Иегова Боду берген. Иосафат хаан Бурганга долузу-биле идегеп турган болгаш, шак ынчаар кылган. Ол шерииниң бажынга дадыккан дайынчыларны эвес, а Иегованы алдаржыдып турган, ок-чепсек чок ыраажыларны тургузуп каан. Бурган сөзүнге ээ болган: Ол дайзыннарны чылча шаапкан (2 Чыл. 20:18—23).

8. Иосафаттың чижээнден өөнүң ээлери чүнү өөренип ап болур?

⁸ Өөнүң ээлери, Иосафаттың чижээнден хөйнү өөренип ап болур силер. Чоок улузуңарның менди-чаагай чоруу дээш сагыш човаар харыысалга силерде. Оларны камгалап, деткиир дээш хөй ажылдап чоруур силер. А кажан бергелерге таваржып келгеш, ону бодум шыдаптар мен деп бодап болур силер. Ынчалза-даа бодуңарга черле ынанмайн көрүңер. Бодуңар-даа, кадайыңар-биле-даа Иеговага сеткилиңерден мөргүңер. Иегова күзел-соруун ажыдып бээр кылдыр Оон дилеп, Библияны болгаш Бурганның организациязының үндүрүп турар дептерлерин ханы шинчилеңер. Оон Бурганның сүмелерин ажыглаңар. Силерниң шиитпирлериңер чамдык улуска мелегей ышкаш көстүп болур. Чамдык улус өг-бүле эки амыдыразын дизе, өөнүң ээзи хөй акша ажылдаар ужурлуг деп чугаалап болур. Ынчалза-даа Иосафаттың чижээн сактып чоруңар. Ол Иеговага идегеп чораанын ажыл-херээ-биле көргүзүп турган. Иегова ол бердинген бараалгакчызын кагбаан болганда, силерни база кагбас! (Ыд. ыр. 36:28; Евр. 13:5). Өг-бүлези аас-кежиктиг болзун дизе, ашак-кадай улус чүнү кылып болур?

9. Исайя биле ооң кадайының дугайында Библиядан чүнү билир бис?

⁹ Исайяның өг-бүлезинге Иеговага бараалгал эң-не чугула черни ээлеп турган. Ону кайыын билир бис? Исайя медээчи турган. А Библияда ооң кадайын өттүр билип медеглээр чораан дээн. Ынчап кээрге, Иегова аңаа база медээлерин дамчыдып турган (Иса. 8:1—4). Шынап-ла, олар амгы шагның өг-бүлелеринге кайгамчык үлегерни көргүскен.

10. Библейжи өттүр билген медеглелдерни шинчилээри Иеговага чүткүлдүг бараалгаарынга канчаар дузалап турар?

¹⁰ Өг-бүле улус Иеговага бараалгалга кызымаа-биле киржип тургаш, Исайяның өг-бүлезин өттүнүп болур. Олар библейжи өттүр билген медеглелдерни кады шинчилээр болза, оларның күүсеттинип турарынга бүзүрели өзүп, Иеговага оон-даа идегээр (Тит. 1:1—2) *. Оон аңгыда, олар чамдык өттүр билген медеглелдерниң күүсеттинеринге үлүүн канчаар киирип болурун боданыр болза, ажыктыг боор. Чижээ, олар «Дээрниң Чагыргазының дугайында бо Буянныг Медээни бүгү делегейге, хамык чоннарга медеглээн турар» дээн Иисустуң өттүр билген медээзинге киржип болур (Мф. 24:14). Библейжи медеглелдерниң кара олчаан  күүсеттинип турарын ашак-кадай улус эки билген тудум, оларның Иеговага бараалгаар күзели улам күштелир.

11. Прискилла биле Акила чүнү кылып турган база чүге?

¹¹ Прискилла биле Акила дег, Бурганның Чагыргазын бирги черге салыңар. Римге чурттап чораан Акила биле Прискилла амгы үениң өг-бүлелеринге кайгамчык үлегерни көргүскен. Олар еврей чораан, а кажан Иисустуң өөрүшкүлүг медээзин дыңнап кааш, олар христиан апарган. Оларның чуртталгазы дыка эки турган. А кажан император Клавдий шупту еврейлерни Римден чоруур кылдыр дужааган соонда, байдал хенертен өскерли берген. Олар бажыңын болгаш майгыннар кылыр ажылын каар ужурга таварышкан. Оон олар чаа черге келгеш, шупту чүвени катап эгелээр турган. Ол өскерлиишкиннер Акила биле Прискиллага кандыг салдар чедирген? Олар Бурганның Чагыргазын ийиги черге салып эгелээн бе? Бо айтырыгларның харыызын билир боор силер. Ол өг-бүле Коринф хоорайга келгеш, тус черниң чыыжы-биле сырый ажылдажып, Павел-биле кады акы-угбаларны деткип турганнар. Сөөлүнде олар суртаалчылар чедишпес хоорайже элээн каш катап көшкен (Аж.-ч. 18:18—21; Рим. 16:3—5). Ийе, ол өг-бүлениң чуртталгазы солун болгаш кайгамчык болуушкуннарлыг турган!

12. Өг-бүлелер бараалгалга сорулгаларны чүге салыр болза эки?

¹² Амгы үеде өг-бүлелер Прискилла биле Акиладан үлегер ап, Бурганның Чагыргазын бирги черге салып болур. Олар таныжып тургаш-ла, сорулгаларын дугуржуп алыр болза эки. Бурган-биле харылзаазын быжыктырарынга ажыктыг, дөмей сорулгаларны салып, оларны чедип алыр дээш кады кызар болза, Иегованың өндүр улуг холун көрүп каарлар (Эккл. 4:9, 12). Расселл биле Элизабеттиң чижээ ону бадыткап турар. Расселл мынча дээн: «Кудавыс бетинде-ле, сорулгаларывысты чугаалажып алган бис». Элизабет үлешкен: «Ынчаар кылып алырывыска, өг-бүлевиске ажыктыг болган. Бис шиитпирлер хүлээрде, ол сорулгаларывысты  херекке ап, ону чедип алырынга биске чүү-даа шаптыктавас кылдыр кызар чордувус». Түңнелинде Расселл биле Элизабет суртаалчылар чедишпес Микронезияже көже берген.

13. Ырлар 27:7-ден алырга, Иеговага ынанып турар өг-бүлени чүү манап турар?

¹³ Расселл биле Элизабет ышкаш, хөй өг-бүлелер артык чүүлдерже чардыкпайн, бөдүүн амыдырап, хөй үезин суртаалче болгаш өөреникчилер белеткээр ажылче үндүрүп турар. Ашак-кадай улус Иеговага бараалгаарынга төлептиг сорулгаларны салып алгаш, ону чедип алыр болза, түңнели дыка эки боор. Ынчан Иегованың олар дээш сагыш човап турарын көрүп каарлар. Оон оларның Аңаа бүзүрели күштелип, аас-кежиктиг боор. (Номчуптуңар: Ырлар 27:7.)

14. Пётр биле ооң кадайы Матфей 6:25, 31—34-те аазаашкынга бүзүреп турарын канчаар көргүскен?

¹⁴ Пётр элчин биле ооң кадайындан амгы үеде өг-бүлелер хөй чүүлге өөренип ап болур. Иисуска бир дугаар ужурашкан соонда, чартык азы бир чыл эрткенде, Иисус Пётрдан ооң өөреникчизи болурун айтырган. Ол үеде Пётр өг-бүлезин балыктап тургаш, азырап чораан. Ынчангаш ол шиитпирни хүлээрде, өг-бүлезин азыраар хүлээлгезин база херекке алыр турган (Лк. 5:1—11). Ындыг-даа бол, Пётр Иисусту эдерер деп шиитпирлеп алган. Ооң мерген угаанныг шиитпирин кадайы деткээн деп болур. Библиядан алырга, Иисус дирилген соонда, Пётрну ооң кадайы кезек үе иштинде эдерип, кады суртаалдап турган (1 Кор. 9:5). Чугаажок, Пётрнуң кадайы эки болгаш шынчы кижи чораан, ынчангаш Пётр чыышта өг-бүлелерге сүмелерни берген (1 Пет. 3:1—7). Бурганның Чагыргазын бирги черге салып турар улус дээш, Иегова сагыш човаар деп аазаашкынга Пётр биле ооң кадайы бүзүреп чораан. (Номчуптуңар: Матфей 6:25, 31—34.)

15. Тьягу биле Эстерниң чижээнден чүнү өөренип ап болур бис?

¹⁵ Өгленгениңерден бээр каш чыл эрте берген болза, Иеговага хөй бараалгаар күзелди чидирбезинге силерге чүү дузалаар? Өске акы-угбаларның арга-дуржулгазын сонуургаңар. Чижээ, «Они с готовностью предоставили себя для служения» * деп статьяларда ындыг акы-угбаларның дугайында бижээн. Ол статьяларны номчааш, Бразилиядан Тьягу биле Эстер суртаалчылар чедишпес черже көжүксей бергеннер. Тьягу мынча дээн: «Иегова бараалгакчыларының дугайында кайы хире сагыш човап турарын көргүскен төөгүлерни номчаан бис. Ынчангаш Иегованың бисти канчаар удуртурун база канчаар сагыш човаарын амзангырлап шенеп көрүксей берген бис». Чоорту олар Парагвайже көже бергеш, 2014 чылдан эгелеп, португал дылдыг улуска суртаалдап эгелээн. «Бистиң ынак шүлүүвүс — Эфесчилерге 3:20. Иеговага бараалгап тургаш, ол сөстерниң чуртталгавыска канчаар күүсеттинип турарын бо-ла көөр-дүр бис» — деп, Эстер үлешкен. Павел бо шүлүкте Иегованы «дилеп аар азы бодап чоруур бүгү чүүлүвүстен оранчок хөйнү кылып шыдаар» дээн. Ол сөстерниң дыка хөй бадыткалдары бар.

16. Сорулгалар салырынга аныяк өг-бүлелерге кымнар дузалап болур?

¹⁶ Аныяк өг-бүлелер Иеговага ынанып өөренип  алган дуржулгалыг өг-бүлелерден хөй чүүлге өөренип ап болур. Чижээ, чамдык өг-бүлелер он-он чылдар дургузунда долу бараалгап чоруур. Кандыг сорулгаларны салырын билбейн турар болзуңарза, олар-биле чүге сүмележип болбас деп? Ынчаар силер Иеговага идегеп турарыңарны көргүзер силер (У. ч. 22:17, 19). Оон аңгыда, аныяк өг-бүлелерге бараалгалга хамаарышкан сорулгаларны салырынга удуртукчулар дузалап болур.

17. Клаус биле Марисаның чуртталгазы канчаар өскерилген база олардан чүнү өөренип ап болур бис?

¹⁷ Чамдыкта Иеговага бараалгалга хөйнү кылыксаар күзеливис эгезинде бодап турганывыс ышкаш эвес бооп болур. Шак ындыг чүүл кырында чугаалашканывыс Клаус, Мариса-биле болган. Кудазының соонда, үш чыл эрткенде, Финляндияда салбырның тудуунга дузалажыр дээш көже бергеннер. Оларның аңаа бараалгалы чүгле алды ай ишти уламчылаар деп билип кааш, аажок муңгарааннар. Ынчалза-даа үе эрткенде, оларга араб дылды өөренирин сүмелээн. Оон олар өске чуртче көже бергеш, араб дылдыг улуска суртаалдап эгелээн. Эрткен үени сактып тура, Мариса үлешкен: «Өске чуртче көжери коргунчуг турган. Бис Иеговага долузу-биле ынанып өөренир ужурлуг турган бис. Иегованың биске үргүлчү, арта эң кайгамчык аргалар-биле, дузалажып турарын көрген мен. Ооң соонда Аңаа бүрүнү-биле идегеп эгелээн мен». Клаус биле Марисаның чижээнден алырга, Иегова Аңаа ынанып турар улусту албан шаңнаар.

18. Иеговага кезээде ынанырынга өг-бүлелерге чүү дузалаар?

¹⁸ Өг-бүле — Иегованың кайгамчык белээ-дир (Мф. 19:5, 6). Иегова өгленген улустуң аас-кежиктиг чурттаарын күзеп турар (У. ч. 5:18). Чаа өгленген улус, силерниң чуртталгаңар чүүже угланган? Иегованың берип турар шупту белектери дээш, өөрүп четтиргениңерни илередип турар силер бе? Иеговага үргүлчү мөргүп, байдалыңарга тааржыр библейжи дүрүмнерни тып алыр дээш, Ооң Сөзүн ханы шинчилеңер база тып алган сүмелериңерниң аайы-биле чурттаңар. Иеговага бараалгал бирги черни ээлээр болза, чуртталгаңар аас-кежиктиг болгаш солун болур!