ӨӨРЕНИР СТАТЬЯ 48
Бердинген чорууңар шенеттинип турда, бодамчалыг болуңар
«Бодамчалыг болуңар» (1 ПЕТ. 4:7).
ЫРЫ 130 Бот-боттарыңарны өршээңер
ДОПЧУЛАЛ a
1. Бодамчалыг болуру дээрге чүү дээни ол? (1 Пётр 4:7).
БЕРГЕЛЕР үезинде Иеговага болгаш Ооң организациязынга бердинген артары белен эвес. Ол бергелерни канчаар ажып эртип болур? Бодамчалыг, сергек болгаш быжыг бүзүрелдиг боору чугула. (Номчуптуңар: 1 Пётр 4:7.) Бодамчалыг болуру дээрге чүү дээни ол? Ол дээрге-ле дүвүревейн, таптыг шын боданып, бүгү чүүлче Иегованың караа-биле көөрү-дүр. Ынчаар алдынар болзувусса, сагыш-сеткил хайныышкынынга алыспас бис.
2. Бо статьяга чүнү сайгарар бис?
2 Эрткен статьяга бис чыыштан дашкаар таваржып болур үш берге байдалдың дугайында чугаалашкан бис. А бо статьяга чыыштың иштинге тургустунуп болур база Иеговага бердинген чоруувусту шенээр үш берге байдалды сайгарар бис. 1) Чыышта акывыс азы угбавыс бисти чөптүг эвес аажылаан болза, 2) бисти эдип-чазап турда, 3) организацияда өскерлиишкиннерни хүлээри биске берге болза, канчаар алдынып болурувусту ам көөр бис. Ындыг байдалдарда безин бодамчалыг бооп, Иеговага болгаш Ооң организациязынга бердинген артып шыдаар бис.
БИСТИ ЧӨПТҮГ ЭВЕС ААЖЫЛААН ДЕП БОДАП ТУРАР БОЛЗУВУССА
3. Чыышта угбавыс азы акывыс бисти чөптүг эвес аажылаан болза, чүнү миннип болур бис?
3 Силерни чыышта кандыг-бир кижи чөптүг эвес аажылаан бе? Безин ол хуралдың удуртукчузу болган чадавас. Ол силерни хомудадыр-даа дивээн боор оң (Рим. 3:23; Иак. 3:2). Ынчалза-даа силер дөмей-ле аңаа аажок хомудап, безин уйгу-дыжыңарны чидирип алган чадавас силер. Безин бажыңарга бо бодалдар кирип турган чадавас: «Чыышта харыысалга ап турар акылар ынчаар алдынар болза, шынап-ла, бо Бурганның организациязы чүве бе?» Шак ынчаар боданырывысты Эрлик аажок күзеп турар (2 Кор. 2:11). Бир эвес ооң аайынче кирер болзувусса, Иеговага бараалгавайн, Ооң организациязындан үне бээр айыыл бар. Бисти чөптүг эвес аажылаан деп бодап турар болзувусса, бодамчалыг артып, шын эвес бодалдарга алыспазынга чүү дузалаар?
4. Иосифти чөптүг эвес аажылаарга, ол бодамчалыг чоруун канчаар көргүскен? Ооң чижээнден чүнү өөренип ап болур бис? (Эге дөс 50:19—21).
4 Каржыланмаңар. Иосиф элээди турда, ооң улуг акылары ону чөптүг эвес аажылаан. Олар ону көрбестеп, безин өлүрер деп турган (Э. д. 37:4, 18—22). Оон артык, олар Иосифти кулданыгже садыптарга, ол 13 чыл дургузунда берге шенелделерни көрүп эрткен. Ол хире үр хинчектенип келгеш, Иосиф мынча деп боданып болур турган: «Иегова меңээ ынак эвес, Ол мени каапкан». Ынчалза-даа Иосиф каржыланмаан. Ол бодамчалыг чоруун көргүскен. Канчаар? Иосиф бичии-даа хорадаваан. А эптиг арга тыптып кээрге, ол акыларындан өжээн негевейн, харын-даа оларны ынакшылдыы-биле өршээп каан (Э. д. 45:4, 5). Ол бодамчалыг болгаш, ынчаар алдынган. Иосиф бодунуң бергелеринче дүлнү бербейн, Иегованың күзел-соруун кичээнгейге ап, байдалды бүгү талазындан көрүп турган. (Номчуптуңар: Эге дөс 50:19—21.) Моон чүнү өөренип ап болур? Силерни чөптүг эвес аажылаан болза, Иеговаже каржыланып, Ол силерден хая көрнү берген деп бодаваңар. Ооң орнунга Бурган силерге ол шенелдени ажып эртеринге канчаар дузалап турарын бодаңар. Оон аңгыда, өске улус силерни хомудадыптарга, оларның бачыттарын ынакшыл-биле дуглаарын кызыңар (1 Пет. 4:8).
5. Микеасты доңгун аажылаарга, ол бодамчалыг чоруун канчаар көргүскен?
5 Мурнуу Америкада чурттап турар Микеас b дээр удуртукчу акывыс-биле мындыг чүүл болган. Ооң чыыжында хуралдың удуртукчулары ону доңгун аажылаан. Микеас ол үени сактып тура, мынча дээн: «Мен кажан-даа ындыг улуг стресске таварышпаан мен. Ишти-хөңнүм карарып, уйгу-дыжым чидирип, хинчектенип, чүнү-даа кылып шыдавазымдан ыглап турган мен». Ынчалза-даа Микеас бодамчалыг артып, сагыш-сеткилиниң хайныышкынынга алыспайн, кызып туттунуп турган. Шупту чүвени ажып эртиптеринге дузалаар кылдыр, ол Иеговадан ыдыктыг сүлдени үргүлчү дилеп чаннып турган. Оон ыңай акывыс аңаа дузалап болур информацияны дептерлеривистен дилеп турган. Моон чүнү өөренип ап болур? Бир эвес кандыг-бир кижи силерни чөптүг эвес аажылаан болза, хөлзеп хорадавайн, оожургап алгаш, шын эвес минниишкиннерге алыспаңар. Иеговага сеткилиңерни тө каап бериңер. Бисти хомудадыпкан кижиниң сеткилин бодап билип каарынга дузалаар кылдыр, Оон дилеңер. Ынчан хомудадыкчыңарны агартып, өршээптер силер (У. ч. 19:11). Иегова силерниң байдалыңарны көрүп турар база шупту чүвени ажып эртиптер күштү бээр деп утпаңар (2 Чыл. 16:9; Эккл. 5:7).
БИСТИ ЭДИП-ЧАЗАП ТУРДА
6. Эдип-чазаашкын дээрге Иегованың ынакшылы-дыр деп чүге утпас болза эки? (Еврейлерге 12:5, 6, 11).
6 Иегова бисти эдип-чазаарга, ол чүүл сеткиливиске кирбейн барып болур. Бир эвес чүнү миннип турарывысче кичээнгей салыр болзувусса, эдип-чазаашкынны эмин эрттир шыңгыы азы чөптүг эвес деп бодап эгелээр бис. Оон Иегова биске ынак болгаш, бисти эдип-чазап турар деп эң-не чугула чүүлдү уттуп ап болур бис. (Номчуптуңар: Еврейлерге 12:5, 6, 11.) Шын эвес минниишкиннерге алзыптар болзувусса, Эрлик кошкак талавысты эскерип кааш, ынаар халдаар. Ол бистиң кеземчеден дезип, эң коргунчуг чүүл, Иеговага бараалгавайн баргаш, чыышты кааптарывысты күзеп турар. Силерниң частырыыңарже айтыпкан болза, бодамчалыг чорукту канчаар көргүзүп болур силер?
Пётр эдип-чазаашкынны биче сеткилдии-биле хүлээп алгаш, Иеговага оон-даа ажыктыг апарган (7-ги абзац.)
7. а) Чурукту көрүңер. Пётр эдип-чазаашкынны биче сеткилдии-биле хүлээп аарга, Иегова ону канчаар ажыглап турган? б) Пётрнуң чижээнден чүнү өөренип алдыңар?
7 Эдип-чазаашкынны хүлээп, эттиниңер. Иисус Пётрну өске элчиннер мурнунга чаңгыс удаа эвес эдип-чазаарга, ол эпчоксунуп турган чадавас (Мк. 8:33; Лк. 22:31—34). Ынчалза-даа ол Иисуска шынчы арткан. Ол эдип-чазаашкынны хүлээп алгаш, частырыгларын эдип алган. Ынчангаш Иегова ону шынчы чоруу дээш шаңнаан база чыышка аңаа харыысалгалыг даалгаларны бүзүреткен (Ин. 21:15—17; Аж.-ч. 10:24—33; 1 Пет. 1:1). Пётрнуң чижээнден чүнү өөренип ап болур бис? Бисти эдип-чазап турда, сагыш-сеткиливис дугайында хөй бодавайн, эдип-чазаашкынны хүлээп, эттинип алыр болзувусса, чүгле бодувуска эвес, өске-даа улуска эки боор. Шак ынчаар Иеговага болгаш акы-угбаларывыска ажыывыс көргүзер бис.
8, 9. Бернардону эдип-чазаарга, ол чүнү миннип турган база угаан-бодалын өскертип алырынга аңаа чүү дузалаан?
8 Ам Мозамбиктен Бернардо акывыстың чижээн көрээлиңер. Кажан ону удуртукчу эвес деп чарлаптарга, ол чүнү миннинген? «Мен хомудай берген мен, чүге дээрге ооң-биле чөпшээрешпейн турган мен» — деп, Бернардо сактып чугаалаан. Чыышта улус аңаа кандыг хамаарылгалыг боор ирги дээш, ол дүвүреп турган. Бернардо улаштыр мынча дээн: «Чүгле каш айлар эрткенде, байдалче шын көрүп, Иеговага болгаш Ооң организациязынга катап бүзүреп эгелээн мен». Акывыска шын көрүштүг болурунга чүү дузалаан?
9 Бернардо угаан-бодалын өскертип алган. Ол мынча дээн: «Мен хуралдың удуртукчузу тургаш, Иегованың эдип-чазаашкынын шын хүлээп аарынга дузалаар дээш, акы-угбалар-биле Еврейлерге 12:7-ни сайгарып турган мен. Ынчангаш бодумдан: „Ам бо шүлүктү кым ажыглаар ужурлуг?“ деп айтырган мен. Иегованың шупту бараалгакчылары, ооң санында мен». Ол ышкаш Иеговага болгаш Ооң организациязынга бүзүрелин катап тургузар дээш, Бернардо Библияны оон-даа хөй номчуп, номчаан чүүлүнүң дугайында ханы боданып эгелээн. Акы-угбалар ооң дугайында чүнү бодап турар ирги дээш, ол сагышсырап турган-даа болза, оларның-биле кады суртаалдап, чыыштарга харыылап турган. Соонда Бернардону катап хуралдың удуртукчузу кылдыр томуйлап каан. Бир эвес силерни эдип-чазап турар болза, хорадап турбайн, сүмени хүлээп алгаш, херек ужурлуг өскерлиишкиннерни кылыңар (У. ч. 8:33; 22:4) c. Ынчан Иегова силерни элбээ-биле шаңнаар, чүге дээрге силер Ооң Бодун болгаш организациязын бердинген деткип чоруур силер.
ОРГАНИЗАЦИЯДА ӨСКЕРЛИИШКИННЕРНИ ХҮЛЭЭРИ БЕРГЕ АПАРГАНДА
10. Чамдык израильчилерниң Иеговага бердинген чоруун кандыг өскерлиишкиннер шенеп болур турган?
10 Организацияда өскерлиишкиннер бердинген чоруувусту шенеп болур. Бир эвес серемчилелдиг болбас болзувусса, Иеговадан ырай бээр айыыл бар. Чижээ, Моисейниң хоойлузу болгаш аңаа хамаарыштыр өскерлиишкиннер чамдык израильчилерге кандыг салдарлыг болганын көрүптээлиңер. Ол хоойлу чок турда, өргээ бараалгакчыларының хүлээлгезин өг-бүле баштыңнары күүседип турган. Олар өргүл салыр бедигээштерни кылып, өг-бүлези дээш өргүлдү Иеговага эккеп турган (Э. д. 8:20, 21; 12:7; 26:25; 35:1, 6, 7; Иов 1:5). А кажан хоойлу күш кирип кээрге, өг-бүле баштыңнары ол хүндүткелдиг хүлээлгени күүсетпейн барган. Иегова өргүл салыр кылдыр Аароннуң өг-бүлезинден эр улусту томуйлап каан. Бир эвес Аароннуң үре-салгалындан эвес өг-бүле баштыңы өргээ бараалгакчызының ажылын кылыптар болза, ону өлүмге шиидер турган (Лев. 17:3—6, 8, 9) d. Корах, Дафан, Авирон база ниитилелдиң 250 баштыңчыларының Моисейге болгаш Ааронга удур тура халаан чылдагааны ол болган бе? (Сан. 16:1—3). Ону билбес бис. Ынчалза-даа Корах болгаш өске-даа үймээнчилер Иеговага бердинген чоруун кадагалап шыдаваан. Организацияда өскерлиишкиннер бүзүрелиңерни болгаш Иеговага бердинген чорууңарны шенеп турар болза, чүнү канчап болур силер?
Кохаттың үре-салгалы ыдыктыг аптараны дажывайн баргаш, ыраажылар, хаалгачылар болгаш эртинелер шыгжамырларының кол таңныылдары кылдыр өөрүшкүлүг бараалгап турган (11-ги абзац.)
11. Кохаттың өг-бүлезинде левиттерден чүнү өөренип ап болур бис?
11 Организацияда өскерлиишкиннерни сеткилиңерден деткиңер. Израильчилер ээн кургаг ховуга турда, Кохаттың өг-бүлезинден укталган левиттер чугула даалганы күүседип турган. Чон орукче үнүп, чоруур деп баарга, олар ыдыктыг аптараны көдүрүп алгаш, орук баштап чорааннар (Сан. 3:29, 31; 10:33; Иис. 3:2—4). Ол дыка улуг алдар-хүндү-дүр! Ынчалза-даа израильчилер Аазаттынган черже чедип кээрге, шупту чүве өскерли берген. Ыдыктыг аптараны бир черден өске черже көжүрбес апарган. Ынчангаш Кохаттың үре-салгалынга өске даалгалар берген. Соломоннуң хүннеринде оларның чамдыызы — ыраажылар, өскелери — хаалгачылар, а үшкүлери эртинелер шыгжамырларының кол таңныылдары турган (1 Чыл. 6:31—33; 26:1, 24). Олар оон-даа бедик даалга негеп, хыйыңайнып турган деп кайда-даа биживээн. Олардан чүнү өөренип ап болур? Иегованың организациязында өскерлиишкиннер силерге хууда хамааржып-даа турар болза, ону сеткилиңерден деткиңер. Кандыг-даа даалга бээрге, өөрүшкүлүг күүседиңер. Иегова силерниң кандыг даалга күүседип турарыңарны эвес, а Аңаа дыңнангыр чорууңарны үнелээр деп сактып чоруңар (1 Хаан. 15:22).
12. Рахима өскээр томуйладып алгаш, чүнү миннип турган?
12 Чоокку Чөөн чүкте чурттап турар Рахима дээр угбавыстың чижээн көрээлиңер. Ол Вефилге бараалгалынга дыка ынак турган. Ынчалза-даа 23 чыл бараалгаан соонда, ону тускай эгелекчи кылдыр томуйлап каан. «Ону дыңнааш, аңгадай берген мен. Бодумну чөгенчиг кылдыр миннип эгелээн мен. „Чүнү шын эвес кылыпканым ол?“ деп айтырыг мени амыратпайн турган» — деп, ол үлешкен. Муңгаранчыг чүүл, чыышта чамдык акы-угбалар кыр-кырындан бодал чок сөстер чугаалап турган: «Сени Вефилден анаа эвес чоргузупкан эвес бе, бир-ле чүвени шын эвес кылып турган хевирлиг сен». Кезек үе дургузунда Рахима ундараанындан хүннүң-не ыглап турган. Ынчалза-даа ол мынча дээн: «Иегованың-даа, организацияның-даа ынакшылынга кажан-даа чигзинмес турган мен». Угбавыска бодамчалыг болурунга чүү дузалаан?
13. Рахимага шын эвес бодалдар-биле туржурунга чүү дузалаан?
13 Рахимага шын эвес бодалдар-биле туржурунга чүү дузалаан? Ол ооң байдалынга дөмей статьяларны номчуп турган. Аңаа ылаңгыя 2001 чылдың февраль 1-ниң «Таңныыл суургазында» «Побеждай уныние» деп статья дузалаан. Ында Буянныг медээ бижикчизи Марктың томуйлаашкыннары өскерлирге, ол база шак ындыг минниишкиннерлиг турган деп бижээн. «Марктың чижээ мени сорук киирип, оожургадып турган» — деп, Рахима сактып чугаалаан. Ол бодун кээргеп, эштеринден аңгыланып, муңгаралга алзып турбаан. Угбавыс Иегованың организациязын ыдыктыг сүлде башкарып турар база харыысалгалыг акылар аңаа дыка ынак деп түңнелге келген. Оон ыңай Иегованың күзел-соруун күүседири — организацияда эң-не чугула чүүл деп, ол билип алган.
14. Владога кандыг өскерлиишкиннерни хүлээп аары берге болган база аңаа чүү дузалаан?
14 Ам Словениядан 73 харлыг Владо дээр акывыстың чижээн көрээлиңер. Ооң чыыжын өске чыышка каттыштырыпкаш, барып турган Хурал залын хааптарга, аңаа дыка берге болган. Ол мынча дээн: «Ындыг аянныг, чараш Хурал залын чүү дээш хаапканын билбейн турган мен. Сеткил-сагыжым аарып турган, чүге дизе ол залды чоокта чаа септеп каан бис. Мен бызаңчы болгаш, ол залда кезек мебельди бодум кылган мен. Чыыштарны каттыштырыптарга, бис ышкаш, улгады берген суртаалчыларга хөй өскерлиишкиннерни кылыры ындыг кончуг белен эвес болган». Владога акыларның айтыышкыннарынга дыңнангыр болурунга чүү дузалаан? Ол улаштыр мынча дээн: «Иегованың организациязында өскерлиишкиннерни чөпшүл хүлээр болзувусса, Ол бисти албан йөрээр. Бо бүгү бисти келир үеде болур улуг өскерлиишкиннерге белеткеп турар». Томуйлаашкыныңарны өскертип азы чыыжыңарны өске чыышка каттыштырыпкан болза, ону хүлээри белен эвес деп, Иегова дыка эки билип турар. Ынчалза-даа шак ындыг өскерлиишкиннерни сеткилиңерден деткип, Иеговага болгаш Ооң организациязынга бердинген боор болзуңарза, Ол силерни албан шаңнаар (Ыд. ыр. 17:26).
ҮРГҮЛЧҮ БОДАМЧАЛЫГ БОЛУҢАР
15. Чыыш иштинге бергелерге таварышкаш, канчаар бодамчалыг алдынып болур бис?
15 Бо делегейниң төнчүзү чоокшулаан тудум, чыыш иштинге бергелер дам көвүдээр. Ол бергелер Иеговага бердинген чорууңарны шенеп болур. Ынчангаш бодамчалыг болуру дыка чугула. Чыышта кандыг-бир кижи силерни чөптүг эвес аажылаан деп бодап турар болзуңарза, каржыланмаңар. Азы удуртукчулар силерни эдип-чазап турар болза, минниишкиниңер дугайында бодап турбайн, сүмени хүлээп алгаш, эттинип алыңар. Иегованың организациязынга силерге хууда хамааржыр өскерлиишкиннер болурга, ону сеткилиңерден хүлээп, айтыышкыннарны эдериңер.
16. Иеговага болгаш Ооң организациязынга бүзүрээринге силерге чүү дузалаар?
16 Иеговага бердинген чорууңар шенеттинип турда, Аңаа болгаш Ооң организациязынга бүзүреп шыдаар силер. Ону кылырынга бодамчалыг чорук дузалаар. Ол дээрге-ле дүвүрел чок артып, таптыг шын боданып, бүгү чүүлче Иегованың караа-биле көөрү-дүр. Силерниң байдалыңарга дөмей библейжи маадырлар-биле чоок таныжып, оларның чижээниң дугайында ханы боданыр кылдыр, хөөнненип алыңар. Иеговадан дузаны дилеп, мөргүңер. Чыышта акы-угбалардан кажанда-даа аңгыланмаңар. Ынчан чүү-даа болу бээр болза, Эрлик силерни Иеговадан болгаш Ооң организациязындан ырадып шыдавас (Иак. 4:7).
ЫРЫ 126 Сергек, быжыг, туруштуг болуңар!
a Иеговага болгаш Ооң организациязынга бердинген болуру чамдыкта белен эвес. Ылаңгыя кажан бергелер чыыш иштинге тургустунуп кээрге, ону кылыры берге. Бо статьяга ол бергелерниң үжүн сайгарар бис. Оон аңгыда, Иеговага болгаш Ооң организациязынга бердинген артар дизе, чүнү канчаарын көөр бис.
b Чамдык аттарны өскертип каан.
c 2009 чылдың август 15-тиң «Таңныыл суургазында» «Можешь ли ты снова предоставить себя для особого служения?» деп статьяда оон-даа ажыктыг сүмелер бар.
d Өг-бүлениң баштыңы бода азы шээр малды дөгерер дээн болза, хоойлу ёзугаар ол ону ыдыктыг өргээге эккээр турган. А бир эвес ол өг-бүле өргээден ыракка чурттап турган болза, боттары дөгерип болур турган (Ы. х. к. 12:21).