1. Иегованың биске чоок болуксап турарын кайыын билир бис?

 ИЕГОВА бисти Олче чоокшулаарын күзеп турар (Иак. 4:8). Ол бистиң Бурганывыс, Адавыс болгаш Өңнүүвүс болуксап турар. Бурган мөргүлдеривиске харыылап, берге үелерде дузалажып чоруур. Оон аңгыда, организациязы таварыштыр Ол бисти өөредип база камгалап чоруур. А бис Иеговага чоок болур дизе, чүнү канчаар ужурлуг бис?

2. Иеговаже канчаар чоокшулап болур бис?

² Иеговага мөргүп, Ооң Сөзүн номчуп база ханы боданыр болзувусса, Олче чоокшулаар бис. Шак ынчаар кылыр болзувусса, Аңаа ынакшылывыс болгаш өөрүп четтирген хөөнүвүс өзер. Ынчан Ону дыңнаар база алдаржыдар күзеливис тыптып келир. Чүге дизе Ол кымдан-даа артык аңаа төлептиг! (Ажыд. 4:11). Иегованы эки билген тудум, Аңаа болгаш Ооң организациязынга бүзүреливис улам быжыгар.

3. Эрлик бисти Иеговадан ырадыр дээш канчаар кызып турар? Бургандан болгаш Ооң организациязындан кажан-даа хая көрүнмезинге биске чүү дузалаар? (Ырлар 30:14, 15).

³ Ынчалза-даа Эрлик бисти, ылаңгыя берге үелерде, Иеговадан ырадырын күзеп турар. Ол ону канчаар кылып турар? Эрлик бистиң Иеговага болгаш Ооң организациязынга бүзүреливисти чоорту кошкадыптарын кызып турар. Ынчалза-даа бис аңаа удурланып болур бис. Бир эвес Иеговага долузу-биле ынанып, быжыг бүзүрелдиг боор болзувусса, Иеговадан болгаш Ооң организациязындан кажан-даа хая көрүнмес бис. (Номчуптуңар: Ырлар 30:14, 15.)

4. Бо статьяга чүнү сайгарар бис?

 ⁴ Бо статьяга чыыштан дашкаар тургустунуп болур үш берге байдалды сайгарар бис. Олар Иеговага болгаш Ооң организациязынга бүзүреливисти кошкадып болур. Ол бергелер Иеговадан бисти канчаар ырадып болур база Эрликке канчаар удурланырыл?

5. Шенелделер Иеговага болгаш Ооң организациязынга бүзүреливисти канчаар кошкадып болур?

⁵ Ажылывысты чидирип азы өг-бүлевиске удурланыышкыннарга таваржып болур бис. Бо бүгү Иеговага болгаш Ооң организациязынга бүзүреливисти кошкадып болур. Үр хилинчектенип эгелээш, ундарап, боттарывысты күш чок кылдыр миннир бис. Эрлик ону ажыглап, Иегова биске ынак эвес деп бодалды угаанывысче киирерин кызар. Бистиң бергелеривиске Иегова болгаш Ооң организациязы буруулуг деп, Эрлик бисти бүзүредиксеп турар. Ындыг чүүл Египетке чамдык израильчилер-биле болган. Оларны кулданыгдан хостаар кылдыр, Моисей биле Ааронну Иегова чорудупкан деп, израильчилер эгезинде бүзүреп турган (Хост. 4:29—31). А кажан фараон оларның чуртталгазын аар-берге кылыптарга, олар аңаа Моисей биле Ааронну буруудадып эгелээн: «Силер бисти фараоннуң болгаш ооң дүжүметтериниң ийи караа-биле көрбес улузу кылып кагдыңар, бисти өлүрзүн дээш, хылышты оларның холдарынга тутсуп бердиңер» (Хост. 5:19—21). Кончуун аа, канчап олар Бурганның бараалгакчыларын буруудадырын диттигипкени ол? Бир эвес шенелделер төнчү чок апарза, Иеговага болгаш Ооң организациязынга бүзүреливисти канчап чидирбейн барып болур бис?

6. Аввакум медээчиниң үлегери бергелерни ажып эртеринге биске канчаар дузалаар? (Аввакум 3:17—19).

⁶ Иеговага мөргүлге сагыш-сеткилиңерни тө каап, деткимчени дилеңер. Аввакум медээчи хөй бергелерге таварышкан. Бир катап ол Иегованың сагыш човаашкынынга чигзинип эгелээн. Оон ол Бурганга минниишкиннерин чугаалап: «Дээрги-Чаяакчы, чежеге дээр дуза дилеп кыйгырар мен, а Сен мени дыңнавас-тыр сен... [...] Базындырыышкынче чүге анаа көрүп турар сен?» — дээн (Авв. 1:2, 3). Иегова шынчы бараалгакчызының мөргүлүнге харыылап берген (Авв. 2:2, 3). Иегованың ооң мурнунда чонун канчаар камгалап турганын ханы бодангаш, медээчи катап өөрүшкүлүг апарган. Иегова ол дээш сагыш човап турар база кандыг-даа шенелдени ажып эртеринге дузалаар деп, медээчи шынзыккан. (Номчуптуңар: Аввакум 3:17—19.) Моон чүнү өөренип ап болур? Чуртталгаңарга бергелер төнместей бээр болза, Иеговага мөргүп, Аңаа сеткилиңерни ажыдып, бүрүнү-биле ынаныңар. Бурган силерге ол бүгүнү ажып эртер күштү бээр дээрзинге чигзинмеңер. Кажан Ооң деткимчезин көрүп каарыңарга, бүзүрелиңер улам быжыгар.

7. Ширлиниң төрелдери аңаа чүү дээн? Иеговага бүзүрелин чидирбезинге аңаа чүү дузалаан?

⁷ Эки бараалгал чурумундан быжыг туттунуңар. Папуа — Чаа Гвинеяда Ширли b дээр угбавыс бергелерге таваржы бээрге, аңаа бараалгал чуруму дузалаан. Ооң өг-бүлези ядыы чораан, чамдыкта оларга чем тып аары безин берге турган. Ооң бир төрели аңаа: «Силерге ыдыктыг сүлде дузалап турар дээр сен. Ооң дузазы кайыл ынчаш? Көр даан, ам-даа ядыы хевээр силер. Суртаал деп чүвеңче хей черге үең чарып турар сен» деп ооң Иеговага бүзүрелин чигзиниг кырынга салган. Угбавыс ажыы-биле үлешкен: «Ынчан: „Бурган бисти уттупкан эвес бе?“ деп боданган мен. Ынчалза-даа  чигзиниглеримни чажырбайн, Иеговага ол дораан мөргээн мен. Библияны болгаш дептерлерни номчуурун, суртаалдаарын, чыыштарже баарын соксатпаан мен». Удатпаанда Иегова ооң өг-бүлези дээш сагыш човап турар деп, Ширли билип каан: олар аштап-суксаваан база, чүү-даа болуп турда, аас-кежиктиг турган. «Иегованың мөргүлдеримге харыылап турарын көрген мен» — деп, Ширли үлешкен (1 Тим. 6:6—8). Силер база эки бараалгал чурумундан туттунуп турар болзуңарза, кандыг-даа бергелер, чигзиниглер Иеговадан силерни ырадып шыдавас.

8. Харыысалгалыг акылар чүү чүвеге таваржып болур?

⁸ Бистиң дайзыннарывыс удуртукчу акыларның дугайында нүгүл-мегени массалыг информация чепсектери болгаш социал четкилер таварыштыр тарадып турар (Ыд. ыр. 30:14). Чамдык акыларны кем-херек үүлгедиишкиннеринге буруудаткаш, хосталгазын казаан. Шак ындыг чүүл бирги векте Павел элчин-биле болган. Ону чөптүг эвес шииткеш, кара-бажыңга олуртуп каан. Акы-угбалар ол болуушкунга кандыг хамаарылгалыг болган?

9. Павел элчинни кара-бажыңга олуртуп каарга, чамдык христианнар канчалган?

⁹ Бирги векте Павелди Римде кара-бажыңга олуртуп каарга, чамдык христианнар оон хая көрнү берген (2 Тим. 1:8, 15). Чүге? Чамдык улус Павелди кем-херек үүлгедикчизи кылдыр көөрге, оон ыядып турган чадавас (2 Тим. 2:8, 9). Азы оларны база истеп сүре бээр деп бодааш, коргуп турган чадавас. Олар Павелди деткивейн баарга, ол чүнү миннип турган деп бодаар силер? Павел олар дээш хөй-ле бергелерни ажып эртип, безин амы-тынын артынга каап чораан болгай (Аж.-ч. 20:18—21; 2 Кор. 1:8). Павел берге байдалга таваржы бээрге, ону каапкаш чорупкан улуска кажан-даа дөмей болбаалыңар! Харыысалгалыг акыларны истеп сүрүп эгелээрге, чүнүң дугайында утпас болзувусса эки?

10. Харыысалга ап турар акыларны истеп сүрерге, чүнүң дугайында сактыр ужурлуг бис база чүге?

 ¹⁰ Бисти чүге истеп сүрүп турарын база ону кым кылып турарын утпаңар. 2 Тимофейге 3:12-де: «Бурганны хүндүлеп, Христос Иисус-биле сырый харылзаалыг амыдыраар дээн улустуң шуптузу истедип-сүрдүре бээр» — дээн. Ынчангаш харыысалга ап турар акыларже Эрликтиң халдап турары бисти кайгатпас ужурлуг. Ол оларны шын оруктан чандыр базыптарынче албадап база бисти коргударын күзеп турар (1 Пет. 5:8).

11. Онисифорнуң чижээнден чүнү өөренип ап болур бис? (2 Тимофейге 1:16—18).

¹¹ Акыларны үргүлчү деткип, оларны кагбаңар. (Номчуптуңар: 2 Тимофейге 1:16—18.) Бирги векте чурттап чораан Онисифорну сактып кээлиңер. Павел ооң дугайында: «Мээң кинчилерим көргеш-даа, менден ыятпаан болгай» — деп бижээн. Харын-даа Онисифор Павелди дилеп турган, а кажан тып алгаш, аңаа херек дузаны каткан. Ынчаар ол өлүрүнден безин кортпаан. Моон чүнү өөренип ап болур бис? Улустан кортпайн, истедип сүрдүрген акыларны деткип, эрес-дидим болуулуңар. Оларны кезээде камгалап, дузадан кадып чоруулуңар (У. ч. 17:17). Акыларга бистиң ынакшылывыс болгаш деткимчевис дыка херек.

12. Россияда акы-угбалардан чүнү өөренип ап болур бис?

¹² Россияда акы-угбалар биске эки үлегерни көргүзүп чоруур. Олар кара-бажыңда олурар эргим ха-дуңмазынга дузазын кадып турарлар. Ха-дуңмазының бирээзин шиидип эгелээрге, хөй акы-угбалар судка кээп, ону деткип турарлар. Моон чүнү өөренип ап болур бис? Харыысалга ап турар акыларывысты нүгүлдеп, истеп сүрүп база хосталгазын казып эгелээрге, кортпаңар. Олар дээш мөргүп, оларның чоок улузу дээш сагыш човап база оон-даа өске дузалажыр аргаларны дилеңер (Аж.-ч. 12:5; 2 Кор. 1:10, 11).

13. Кочу-шоот Иеговага болгаш Ооң организациязынга бүзүреливисти канчаар кошкадып болур?

¹³ Иеговага бүзүревес төрелдеривис, кады ажылдап турар улузувус, чаңгысклассчыларывыс суртаалдаарывыска азы Иегованың бедик дүрүмнерин сагып чурттаарывыска, бисти кочулап болур (1 Пет. 4:4). Чамдыкта олар: «Сен чогум эки кижи-дир сен, арай сээң чүдүлгеңде кылыр-кылбас дүрүмнер эңдерик. Чуртталгадан чыдып каан-дыр сен» — дээр. Азы чыыштан үндүрткен улуска хамаарыштыр олар бисти шиидип: «Чаныңда кижиңге ынакшылың ол чүве бе?!» деп сөглеп болур. Ындыг чугаалар биске чигзиниглер тывылдырар. «Иегованың негелделери эмин эрттир бедик эвес бе? Ооң организациязында чөпшээревес чүүлдер хөлүн эрттир хөй эвес бе?» дээн ышкаш айтырыглар бажывыска тыптып болур. Ындыг байдалга таваржып турар болзуңарза, Иеговадан болгаш Ооң организациязындан ыравазынга силерге чүү дузалаар?

14. Иегованың негелделери-биле чурттап турар дээш, улус бисти кыжырарга, аңаа кандыг хамаарылгалыг боор ужурлуг бис? (Ырлар 118:50—52.)

¹⁴ Иегованың негелделери-биле чурттаар дээш быжыг хөөнненип алыңар. Аңаа хамаарыштыр Иов биске дыка эки үлегерни көргүскен. Ону улус чеже-даа кочулаза, ол Иегованың негелделеринден быжыг туттунуп турган. Бурганның хоойлуларын сагыыр-сагывазыңга-даа, Ол сени тогбас деп, ооң эжи аттыг кижи Иовту бүзүредип турган (Иов 4:17, 18; 22:3). Ынчалза-даа Иов ол мегеге бүзүревээн. Иегованың эки-бакка хамаарышкан негелделериниң ылап шынныынга ол чигзинмейн, аңаа дүүштүр чурттаар дээш быжыг хөөнненип алган. Иов буруудадыкчыларынга: «Дириг чорааш, буруу чогумдан ойталавас мен» — дээн (Иов 27:5, 6). Моон чүнү өөренип ап болур бис? Улустуң  кыжырыгларын дыңнааш, Иегованың негелделеринге кажан-даа чигзинмээлиңер. Ооң дүрүмнери эң-не эки деп чуртталгаңарга чаңгыс удаа эвес көрген силер. Ол бедик негелделерден туттунуп турар организацияны кажан-даа кагбаңар. Ынчан улус силерни чеже-даа кочулаза, Иеговадан черле ыравас силер. (Номчуптуңар: Ырлар 118:50—52.)

15. Бриджитти чүү дээш кочулап турган?

¹⁵ Индиядан Бриджит дээр угбавыстың чижээн көрээлиңер. Бүзүрели дээш ооң төрелдери ону кочулап турган. Бриджит 1997 чылда сугга суктуруп алырга, удатпаанда ооң Иегованың Херечизи эвес ашаа ажылын чидирип алган. Ынчангаш ооң ашаа өске хоорайда чурттап чоруур ада-иезиниң чанынче өг-бүлезин көжүрүп алган. Аңаа угбавыс өске шенелделерге таварышкан. Ашаа кайнаар-даа ажылдап кирип чадап каарга, Бриджит өг-бүлезин азыраар дээш хүннү бадыр ажылдап турган. Оон аңгыда, аңаа эң-не чоок хурал 350 километр ыракка турган. Муңгаранчыг чүүл, ашааның төрелдери угбавысты ооң бүзүрели дээш көрбестей берген. Ынчангаш байдал оон-даа нарыыдай бээрге, олар өскээр көжер ужурга таварышкан. Хенертен Бриджиттиң ашаа чок апарган, а соонда ооң 12 харлыг уруу рактан база чок апарган. Ооң кадында ашааның төрелдери болган чүүлге угбавысты буруудадып эгелээн. «Ол Иегованың Херечизи апарбаан болза, шупту чүве анаа боор турган» деп, олар хорадап турган. Ынчалза-даа угбавыс Иеговага болгаш Ооң организациязынга ынанырын соксатпаан.

16. Бриджит Иегованы болгаш Ооң организациязын кагбааны дээш канчаар шаңнаткан?

¹⁶ Бриджит хуралдан элээн ыракта чурттап турган боорга, кожуун хайгааракчызы ону тус черниң чурттакчыларынга суртаалдап, чыыштарны бажыңынга эрттирерин сүмелээн. Эгезинде ол чүүл Бриджитке дыка берге ышкаш сагындырган. Ынчалза-даа акывыстың сүмезин ол хүлээп алган. Бриджит өөрүшкүлүг медээни өскелерге чугаалап, чыыштарны бажыңынга эрттирип база уруглары-биле өг-бүле мөгейиишкинин доктаамал эрттирип турган. Түңнели кандыг  болган? Угбавыс хөй библейжи кичээлдерлиг апарган, безин оларның чамдыызы сугга суктуруп алган. А 2005 чылда ол доктаамал эгелекчи апарган. Бриджиттиң Иеговага бүзүрели болгаш Ооң организациязынга бердинген чоруу шаңнаттынган. Ооң уруглары Иеговага шынчы бараалгап чоруур, а чурттап турар черинде амгы үеде ийи хурал бар. Угбавыс төрелдериниң кыжырыгларын болгаш бергелерни ажып эртер күштү Иегова берген деп бүзүреп турар.

17. Чүү чүвеже хөөнненген боор ужурлуг бис?

¹⁷ Эрлик бергелер үезинде Иегова бисти кааптар база Ооң организациязынга артып каар болзувусса, амыдыралывыс дам бергедей бээр деп бодаарывысты күзеп турар. Харыысалгалыг акыларывысты нүгүлдээрге, истеп сүрерге азы кара-бажыңче олуртурга, ону көргеш, корга бээривисти база Эрлик аажок күзеп турар. Ол кочу-шоотту ажыглап, Иегованың негелделериниң ылап шынныынга болгаш Ооң организациязынга бүзүреливисти кошкадырын оралдажып турар. Ынчалза-даа Эрликтиң кара сагыштыг бодалдарын эки билир болгаш, ооң мегезинге алыспас бис (2 Кор. 2:11). Бурганга болгаш Ооң организациязынга бердинген бооп, Эрликтиң мегезинден ойталаңар. Иегова силерни кажан-даа кагбас деп утпаңар (Ыд. ыр. 27:7). Иеговадан силерни чүү-даа ыратпазын! (Рим. 8:35—39).

18. Дараазында статьяга чүнү сайгарар бис?

¹⁸ Бо статьяга чыыштан дашкаар кандыг бергелерге таваржып болурувусту сайгарган бис. Ынчалза-даа чыыштың иштинге тургустунуп болур бергелер Иеговага болгаш Ооң организациязынга бүзүреливисти кошкадып болур. Ону канчаар ажып эртерил? Дараазында статьяга ону сайгарар бис.