1. Удавас чүге таваржыр бис база чүү чүвеге бүзүреп болур бис?

 ЧАМДЫК улус суртаалдаарывыска удурланып болур. А келир үеде удурланыышкыннар оон-даа хөй апаар (Дан. 11:44; 2 Тим. 3:12; Ажыд. 16:21). Ынчалза-даа херек дузаны Иегова албан бээр деп бүзүреп болур бис. Чүге дизе Бурган бараалгакчыларынга даалгазы чеже-даа берге болза, ону күүседиринге кезээде дузалажып чораан. Чижээ, Вавилонга туттуруушкунга турган еврейлерге суртаалдап турган Иезекиил медээчиниң чуртталгазындан каш болуушкунну көрүптээлиңер.

2. Иезекиилдиң суртаалдап турган улузунуң дугайында Иегова чүү дээн? Бо статьяга чүнү сайгарар бис? (Иезекиил 2:3—6).

² Иезекиил кандыг улуска суртаалдап турган? Иегова оларны «ыядыр арын чок база чөрүү», «үймээнчи чон» деп адаан. Олар шагар оътка база хоранныг курттарга дөмей болган. Ынчангаш Бурган медээчизинге чаңгыс удаа эвес «кортпа» деп чугаалап турган. (Номчуптуңар: Иезекиил 2:3—6.) 1) Иегова Иезекиилди чоргускан, 2) Бурганның сүлдези аңаа дузалажып турган, 3) Бурганның сөстери аңаа күштү берип турган боорга, медээчи чедиишкинниг суртаалдап шыдаан. Бо үш чүүл аңаа канчаар дузалап турган? Биске канчаар дузалаар?

3. Иезекиилди кандыг сөстер быжыктырган база Иегова деткимчезинге ону канчаар бүзүреткен?

³ Иегова Иезекиилге: «Мен сени... айбылап чорудуп тур мен» — дээн (Иез. 2:3, 4). Ол сөстер Иезекиилди дыка-ла сорук киирген боор. Чүге ынча деп болур? Чүге дизе Иегованың Моисей биле Исайяны медээчилер кылдыр томуйлап тура, ынча дээнин ол сактыр чадавас (Хост. 3:10; Иса. 6:8). Оон ыңай Иегованың ол ийи бараалгакчызынга бергелерни ажып эртеринге дузалап турганын ол билир турган. Ынчангаш кажан Бурган аңаа ийи катап «Мен сени... айбылап чорудуп тур мен» дээрге, ооң Аңаа ынаныр шупту чылдагааннары турган. Ол ышкаш Иезекиил номунда «Дээрги-Чаяакчы меңээ Бодунуң сөзүн ажыдып чугаалаан» деп сөстер дыка хөй катап таваржып турар (Иез. 3:16; 6:1). Чугаажок, Иезекиил ону Иегова чорудупкан деп бүзүреп турган. Оон аңгыда, ооң ачазы өргээниң бараалгакчызы чораан болгаш, бараалгакчыларынга Бурганның канчаар дузалап турганын оглунга чугаалап чораан чадавас. Чижээ, Бурган Исаакка, Иаковка болгаш Иеремияга: «Мен сээң-биле кады Мен» деп турган (Э. д. 26:24; 28:15; Иер. 1:8).

4. Кандыг сөстер Иезекиилди аргалап, хей-аъдын көдүрген?

⁴ Иезекиилдиң суртаалынга израильчилерниң хөй кезии кандыг хамаарылгалыг болган? Иегова баш удур: «А израиль чон сени тооп дыңнаар хөңнү чок-тур, чүге дээрге олар... Мени тооп дыңнаар хөңнү чок-тур» — дээн (Иез. 3:7). Чон Иезекиилди тогбайн турганы-биле Иегованы тогбайн турган. Израильчилер Иезекиилди дыңнаксаваан боорга, ону багай медээчи дивээн деп, Бурган ону бүзүреткен. Оон аңгыда, кажан Иезекиилдиң суртаалдап турган  шииткели күүсеттине бээрге, шупту улус «оларның аразынга Бурганның медээчизи турган» дээрзин билип алыр деп, Иегова чугаалаан (Иез. 2:5; 33:33). Чугаажок, ол сөстер медээчини аргалап, хей-аъдын көдүрген.

5. Исайя 44:8-тен алырга, кайыын күш ап турар бис?

⁵ Иегова бисти чорудупкан деп бодал бисти күш киирип турар. Ол бисти «Мээң херечилерим» деп адаан (Иса. 43:10). Дыка-ла улуг алдар-хүндү-дүр! Иезекиилге: «Кортпа» дээни ышкаш, Ол биске база: «Кортпаңар» деп турар. Удурланыкчыларывыстан чүге кортпас ужурлуг бис? Иегова Иезекиилди суртаалдап чорутканы дег, бисти база чоргузуп турар болганда, албан деткиир. (Номчуптуңар: Исайя 44:8.)

6. а) Иегова биске дузалажырын канчаар аазап турар? б) Бисти чүү күш киирип база оожургадып турар?

⁶ Иегова биске дузалажырын аазап турар. Ол: «Силер мээң херечилерим силер» деп чугаалаарының мурнунда: «Суглар кежип туруңда, Мен сээң-биле боор мен, хемнер кежип туруңда, суг сени хөме албас. От өттүр эртип тургаш, өрттенмес сен, чалбыыш сени чивес» — деп бүзүреткен (Иса. 43:2). Шынап-ла, суртаалдап турувуста, шапкын хемнер дег, бергелер азы, чалбыыштыг от дег, шенелделер бо-ла тургустунуп кээр. Ынчалза-даа Иегованың ачызы-биле улаштыр суртаалдап турар бис (Иса. 41:13). Иезекиилдиң үезинде дег, хөй улус бөгүн база библейжи медээни дыңнаксавас. Оларның дыңнаксавайн турары бисти багай суртаалчылар дивээни ол-дур. Бис улаштыр суртаалдаарывыска, Иегова дыка өөрүп турар. Чаңгыс ол бодал безин бисти күш киирип, оожургадып турар. Павел элчин: «Кижи... кылган ажыл-херээнге дүүштүр шаңнал алыр» — дээн (1 Кор. 3:8; 4:1, 2). А хөй чылдар дургузунда эгелекчилеп чоруур угбавыс мынча дээн: «Күжениишкиннеривисти Иегова албан шаңнаар дээрге дыка-ла улуг аас-кежик-тир!»

7. Көстүүшкүннүң дугайында боданып тургаш, Иезекиил чүнү миннип турган? (Журналдың даштында чурукту көрүңер.)

⁷ Бурганның сүлдези — дыка улуг күш деп, Иезекиил көстүүшкүнге көрген. Ол ыдыктыг сүлде Бурганның күчүлүг төлээлерин болгаш чуузаның кедергей улуг дугуйларын башкарып турар болган (Иез. 1:20, 21). Ол көстүүшкүн медээчиге кандыг салдар чедирген? Ол мынча дээн: «Ону көргеш, доңгая кээп дүшкен мен» (Иез. 2:1). Ындыг улуг сүртенчиг көстүүшкүннү көргеш, Иезекиилдиң доңгая кээп дүшкени кайгамчык эвес. Соонда ол көстүүшкүннүң дугайында чаңгыс удаа эвес боданган чадавас. Ол бодалдар Иезекиилди бараалгалын Бурганның дузазы-биле күүседип шыдаар дээрзинге быжыктырган.

8, 9. а) Иегова Иезекиилге айтыышкын бээрге, ооң-биле чүү болган? б) Белен эвес девискээрге суртаалдаар кылдыр, Иегова Иезекиилди канчаар быжыктырган?

⁸ Иегова Иезекиилге: «Кижи амытан, бут кырынга туруп кел! Мен сээң-биле чугаалажырым ол-дур» — дээн. Ол айтыышкын биле Бурганның сүлдези медээчиге черден туруп кээринге дузалаан. «Ооң Сүлдези мени бүргепкеш, бут кырынга тургузуп кагды» — деп, ол бижээн (Иез. 2:1, 2). Иезекиилдиң медээчи кылдыр бараалгап чораан үезинде ону Бурганның сүлдези башкарып турган (Иез. 3:22; 8:1; 33:22; 37:1; 40:1). Бурганның сүлдези Иезекиилди «хай-чагырга чок, чөрүү улуска» суртаалдап шыдаар кылдыр деткип турган (Иез. 3:7). Иегова Иезекиилге: «Мен сени олардан дудак чок хедер, чөрүү, кадыг-быжыг кижи кылып каар мен. Мен сени  алмаз ышкаш кылдыр, оттук-даштан кадыг-быжыг кылдыр кылып каар мен. Олардан кортпа» — деп чугаалаан (Иез. 3:8, 9). Ажыы-биле чугаалаарга, Иегова Иезекиилге: «Дедир чаңныг улус дээш, холуң сула салба. Мен сени деткиир мен» — дээн.

⁹ Ооң соонда Бурганның сүлдези Иезекиилге ооң «суртаалдаар черин» көргүскен. Медээчи: «Дээрги-Чаяакчының холу мени чайгылыш чок башкарып турду» — деп бижээн. Медээниң утказын хандыр билип алгаш, эрес-дидим суртаалдаарынга Иезекиилге бир неделя херек болган (Иез. 3:14, 15). Оон Иегова медээчини оргулаашче эккээрге, ону «Бурганның сүлдези бүргей апка[н]» (Иез. 3:23, 24). Ам Иезекиил суртаалдаарынга белен апарган.

10. Суртаалдаарынга биске кандыг дуза херек база чүге?

¹⁰ Суртаалдаарынга биске кандыг дуза херек? Иезекиилдиң дугайында боданып көрээлиңер. Даалгазын күүседир мурнунда аңаа Бурган херек күштү берген. Бис база, Иезекиил ышкаш, чүгле ыдыктыг сүлдениң ачызында суртаалдап чоруур бис. Чүге дизе Эрлик суртаал ажылын соксадыр дээш, биске удур дайылдажып турар (Ажыд. 12:17). Кижи бодаарга, ооң халдаашкыннарынга күш четпес ышкаш бис. Ынчалза-даа суртаалдаан тудум, ону тиилеп турар бис! (Ажыд. 12:9—11). Канчаар? Суртаалга киржип турарывыс-биле Эрликтиң халдаашкыннарындан кортпайн, аңаа удурланып шыдаар бис деп көргүзүп турар бис. Кандыг-даа удурланыышкыннар турза, суртаалдап шыдаар бис деп бисти чүү бүзүредип турар? Иегованың бисти чүүлдүгзүнүп турары болгаш ыдыктыг сүлде (Мф. 5:10—12; 1 Пет. 4:14).

11. Бурганның сүлдези биске канчаар дузалап турар база ону үргүлчү алыр дизе, чүнү канчаар ужурлуг бис?

¹¹ Иезекиилди доора уткалыг алмаз ышкаш кылдыр, оттук-даштан кадыг-быжыг кылып каанындан чүнү өөренип алыр бис? Бурганның сүлдезиниң ачызында бараалгалга  таваржыр кандыг-даа бергелерни ажып эртиптер бис (2 Кор. 4:7—9). Ыдыктыг сүлдени үргүлчү алыр дизе, чүнү канчаар ужурлуг бис? Иегова бисти албан дыңнаар деп чигзинмейн, мөргүүр ужурлуг бис. Иисус өөреникчилерин: «Дилениңер... дилеңер... соктаңар» деп өөредип турган. Ол айтыышкынны сагыыр болзувусса, «дээрде Адавыс... Ыдыктыг Сүлдени бербес деп бе?» (Лк. 11:9, 13; Аж.-ч. 1:14; 2:4).

12. Дүрүг-ном кайыын тыптып келген база ында чүнү бижээн? (Иезекиил 2:9—3:3).

¹² Иезекиилге күштү чүгле Бурганның сүлдези эвес, а Ооң сөстери база берип турган. Иезекиил көстүүшкүнге дүрүг-ном туткан холду көрген. (Номчуптуңар: Иезекиил 2:9—3:3.) Ол кайыын тыптып келген? Ында чүнү бижээн? База ол Иезекиилди канчаар күш киирген? Ол дүрүг-ном Бурганның дүжүлгезинден келген. Иегова ону Иезекиилдиң мооң мурнунда көргени дөрт дээрниң төлээзиниң бирээзинден чорудупкан чадавас (Иез. 1:8; 10:7, 20). Дүрүг-номда Иезекиилдиң үймээнчи чонга дамчыдар ужурлуг узун шииткел медээзин бижээн (Иез. 2:7). Шииткелди дүрүг-номнуң ийи талазында бижип каан болган.

13. Иегова Иезекиилди чүге дүрүгнү чивит дээн база ол чүге чигирзиг болган?

¹³ Иегова медээчиге: «Дүрүгнү чивит, ооң-биле бодуңну долдуруп ал» — дээн. Ол дүрүг-номну чипкен. Ооң утказы кандыгыл? Иезекиил суртаалдаар медээзиниң ханы утказын билип алыр ужурлуг турган. База ооң изиг күзели хып кээр кылдыр, ол медээге бүзүрээр ужурлуг турган. Оон кайгамчык чүүл болган. Иезекиил ону чиптерге, «ары чигири дег амданныг болган» (Иез. 3:3). Ол чүнү илередип турарыл? Иезекиилге Иегованың төлээлекчизи кылдыр бараалгаары чаагай чигирзиг чем ышкаш болган (Ыд. ыр. 18:9—12). Иегова ону медээчизи кылдыр шилип аарга, ол аажок өөрээн.

14. Даалганы хүлээнип алырынга Иезекиилге чүү дузалаан?

¹⁴ Иегова Иезекиилге: «Кижи амытан, кичээнгейлиг дыңна, Мээң чугаалап турар бүгү сөстеримни ыяк сактып ал» — дээн (Иез. 3:10). Медээчи дүрүг-номда сөстерни сактып алгаш, ооң дугайында ханы боданыр ужурлуг турган. Ынчаар Бурганның сөстери Иезекиилге аъш-чем бооп, ооң бүзүрелин быжыктырган. Оон ол чуртундан өскээр көшкен улуска Бурганның медээзин медеглеп шыдаар апарган (Иез. 3:11). Ол медээ Иезекиилдиң чүрээнде болгаш аксында боорга, ол даалганы хүлээнип база күүседиринге белен болган. (Деңнеңер: Ырлар 18:15.)

15. Суртаал ажылынга үргүлчү идепкейлиг киржир дизе, чүнүң дугайында шыңгыы боданыр ужурлуг бис?

¹⁵ Суртаал ажылынга идепкейлиг киржир дизе, бис база Бурганның сөстеринден күштү үргүлчү алыр ужурлуг бис. Ол дээрге-ле Иегованың биске чугаалап турар чүүлүнүң дугайында шыңгыы боданыры-дыр. Бөгүн Иегова бистиң-биле Бодунуң Сөзү, Библия, таварыштыр чугаалажып турар. Ооң Сөзү бистиң хөөнүвүсче, бодалдарывысче болгаш минниишкиннеривисче салдар чедирер кылдыр чүнү канчаар ужурлуг бис?

16. Доора уткалыг чүрээвиске Бурганның Сөзүн эки билип алырынга чүү дузалаар?

¹⁶ Бис чемненип тургаш, мага-бодувусту тоттуруп аар бис. Ооң-биле дөмей, Бурганның Сөзүн номчуп, ооң дугайында ханы боданыр болзувусса, бүзүреливис быжыгар.  Дүрүг-ном дугайында үзүндү биске ону өөредип турар. Иегова бисти Библия-биле «долдуруксап» турар, өскээр чугаалаарга, бисти Библияны эки билип алзын деп күзеп турар. Ону кылыр дизе, мөргүп, номчуттунуп, ханы боданыр ужурлуг бис. Бурганның бодалдары чүрээвиске дээштиг болзун дээш, баштай мөргүп алыр бис. Оон библейжи үзүндүнү номчааш, турупкаш, ооң дугайында ханы боданыр бис. Түңнели кандыг болур? Хөй ханы боданыр-ла болзувусса, доора уткалыг чүрээвис Бурганның Сөзүн оон-даа эки билир апаар.

17. Библиядан номчаан чүүлүвүстүң дугайында ханы боданыры чүге эргежок чугула?

¹⁷ Библияны номчуп, ханы боданыры чүге эргежок чугула? Ол чүүл Чагырга дугайында медээни суртаалдаарынга биске күштү бээр. Ооң ачызында келир үеде шыңгыы шииткелдерни чугаалап шыдаар бис. Оон аңгыда, Иегованың кайгамчык шынарларының дугайында ханы боданыр болзувусса, Ооң-биле найыралывыс улам быжыгар. Түңнелинде сагыш-сеткиливиске амыр-тайбыңны болгаш оожургалды миннир бис (Ыд. ыр. 118:103).

18. Бистиң девискээривисте улус чүнү хүлээр ужурга таваржыр база чүге?

¹⁸ Иезекиилге бодаарга, бис медээчилер эвес-тир бис. Ынчалза-даа Бурганның Сөзүнде бижээн медээни өске улуска, Иезекиил ышкаш, дамчыдар хөөннүг бис. Иегова суртаал ажылын соксатпаан шаанда, ону уламчылаар бис. Шииткел хүнү кээрге, девискээривисте улус бисти сагындырбаан азы Бурган оларны уттупкан деп шыдавас боор (Иез. 3:19; 18:23). Олар бистиң чугаалап турган медээвис Бургандан деп чүүлдү хүлээр ужурга таваржыр.

19. Бараалгалывысты күүседиринге биске чүү дузалаар?

¹⁹ Бараалгалывысты күүседиринге биске чүү дузалаар? Иезекиилди күш киирип турган демги-ле үш чүүл. 1) Иегова Боду бисти чорудупкан, 2) Ол ыдыктыг сүлдезин биске берип турар база 3) Ооң Сөзү бисти күш киирип турар деп билир болгаш, суртаал ажылын уламчылап турар бис (Мф. 24:13). Ынчангаш Иегованың ачызында бараалгалывысты күүседиринче база эчизинге чедир шыдажырынче хөөнненип алган бис.