ӨӨРЕНИР СТАТЬЯ 46
Иегова өөрүшкүвүстү чидирбезинге дузалап турар
«Дээрги-Чаяакчы элээн манааш, силерге өршээл көргүзер, Ол туруп келгеш, силерже ээ көрнүр» (ИСА. 30:18).
ЫРЫ 3 Бистиң күжүвүс, идегеливис, бүзүреливис
ДОПЧУЛАЛ a
1, 2. а) Кандыг айтырыгларны сайгарар бис? б) Иегова биске дузалаар изиг күзелдиг деп кайыын билир бис?
ИЕГОВА биске бергелерни ажып эртип, Аңаа өөрүшкүлүг бараалгаарынга дузалап шыдаар. Ол биске канчаар дузалап турар база Ооң дузазын алыр дизе, чүнү канчаар ужурлуг бис? Ол айтырыгларны сайгарыптаалыңар. Баштай Иегова биске херек кырында дузалажыксап турар бе деп билип алыылыңар.
2 Павел элчин еврейлерге чагаазында Иегованы чүү деп адаанын көрүптээлиңер. Ол мынча дээн: «Мээң дузалакчым — Дээрги-Чаяакчы-дыр, корткан херээм чүл: кижи амытан меңээ чүнү кылып шыдаарыл?» (Евр. 13:6). Библейжи справочниктерден алырга, бо шүлүкте «дузалакчы» дээн сөс дуза дилээн кижини камгалаар дээш, далажып бар чыдар кижини илередип турар. Айыыл-халапка таварышкан кижиге дузалаар дээш, Иегованың далажып бар чыдарын сагыштаалап көрүңер даан. Моон Иегованың биске дузалаар изиг күзели көстүп турар. Ол бистиң-биле болза, кандыг-даа шенелдени ажып эртип, өөрүшкүвүстү чидирбес бис.
3. Иегова биске шенелделерни туруштуг болгаш өөрүшкүлүг ажып эртеринге канчаар дузалап турар?
3 Иегова биске шенелделерни туруштуг болгаш өөрүшкүлүг ажып эртеринге канчаар дузалап турар? Ол айтырыгның харыызын Исайя номундан тып ап болур бис. Чүге дизе Исайя номунда өттүр билген медеглелдерниң хөй кезии амгы шагның бараалгакчыларынга хамааржыр. Оон аңгыда, Иегованың дугайында бижип тургаш, Исайя билдингир болгаш бөдүүн сөстерни ажыглаан. Чижээ, Исайя 30-ги эгени номчуур болзувусса, чонунга Иегованың канчаар дузалап турары угаанывыска чуруттунуп кээр. Исайяның сөстеринден алырга, Бурган: 1) мөргүлдеривисти кичээнгейлиг дыңнап, харыылап турар, 2) херек удуртулганы берип турар база 3) амгы үеде болгаш келир үеде бисти элбээ-биле йөрээр. Ол үш чүүлдү тодаргай көрүптээлиңер.
ИЕГОВА БИСТИ ДЫҢНАП ТУРАР
4. а) Исайяның үезинде чурттап турган еврейлерни Иегова канчаар адаан база олар-биле чүү болган? б) Иегова шынчы еврейлерге кандыг идегелди берген? (Исайя 30:18, 19).
4 Исайя 30-ги эгеде Иегова еврейлерни «бачытка бачыт немеп турар» «чөрүү ажы-төлүм» деп адаан. Оон ыңай Ол: «Бо дээрге чагырга билбес чон-дур... Дээрги-Чаяакчының хоойлузун дыңнаар хөңнү чок ажы-төл-дүр» — дээн (Иса. 30:1, 9). Дыңнангыр эвес чоруу оларны айыыл-халапка чедирер деп, Исайя баш удур медеглээн (Иса. 30:5, 17; Иер. 25:8—11). Ол шын болган, оларны Вавилонда кулданыгже аппарган. Ынчалза-даа оларның аразынга Бурганга шынчы улус база турган. Иегова оларга катап ээ-хайыразын көргүзер хүн чедип кээр деп, Исайя шынчы улусту бүзүреткен. (Номчуптуңар: Исайя 30:18, 19.) Бурган оларны хостаптарга, шак ол чүүл күүсеттине берген. Ынчалза-даа ол дораан болбаан. «Дээрги-Чаяакчы элээн манааш, силерге өршээл көргүзер» дээн сөстер Бурганга шынчы израильчилер хосталганы алыр үезинге чедир манаар ужурлуг деп айтып турар. Иегованың чону Вавилонга кулданыгга 70 чыл болган. Ооң соонда оларның чамдыызы Иерусалимче эглип келген (Иса. 10:21; Иер. 29:10). Олар хары черге кударалдан ыглап чораан болза, ам чанып келгеш, өөрүшкүден ыглажып турганнар.
5. Исайя 30:19 бисти чүү чүвеге бүзүредип турар?
5 «Дээрги-Чаяакчыдан камгалал дилеп кыйгырарыңарга, Ол силерже ээ көрнүр» деп сөстерден аргалалды тып ап болур бис (Иса. 30:19). Иегова бистиң чаннып дилээн сөстеривиске дыка кичээнгейлиг деп, Исайя бүзүреткен. Медээчи улаштыр: «[Камгалал дилээн кыйгыңарны] дыңнап кааш-ла, Ол харыылаар» — деп бижээн. Ол аазаашкын биске чүнү сагындырып турар? Дээрде Адавыс Оон дуза дилээн кижиге дузалаарын изии-биле күзеп турар. Бо бодал биске бергелерни туруштуг болгаш өөрүшкүлүг ажып эртеринге дузалаар.
6. Иегова бараалгакчы бүрүзүнүң мөргүлдерин кичээнгейлиг дыңнап турар деп Исайяның сөстери канчаар көргүзүп турар?
6 Бо шүлүкте оон ыңай кандыг аргалалдыг бодал бар? Иегова бараалгакчы бүрүзүнүң мөргүлүн кичээнгейлиг дыңнап турар. Аңаа бисти чүү бүзүредип турар? Исайя 30-ги эгениң бир дугаар кезээнде «силер» деп ат орнун ажыглап турар, чүге дээрге Иегова чонунга ниитизи-биле чугаалап турар. Ынчалза-даа 19 дугаар шүлүктүң оригинал сөзүглелинде «сен» деп ат орнун ажыглаан. Ол дээрге Иегова кижи бүрүзүнге хууда чугаалап турар. Оригинал сөзүглелде ол шүлүк мындыг: «Карааң чажы акпастай бээр. ...Ол сенче ээ көрнүр. ...Сени дыңнап кааш-ла, Ол харыылаар». Ынакшылдыг Адавыс Иегова муңгарап турар төлүнге кажан-даа: «Көр даан, дуу ол акыйны азы угбайны. Сен ол ышкаш күштүг бол» дивес. Ол бараалгакчы бүрүзүн үнелеп, мөргүлүн кичээнгейлиг дыңнап турар (Ыд. ыр. 114:1; Иса. 57:15).
Исайя: «[Иеговага] амыр-дыш бербеңер» деп бижээни-биле чүнү чугаалаксааныл? (7-ги абзац.)
7. Исайя биле Иисус чүткүлдүг мөргүүрүнүң кайы хире чугулазын канчаар көргүскен?
7 Бисти дүвүредип турар чүүлдүң дугайында Иеговага мөргүүрүвүске, Ол ону ажып эртер күштү дораан берип болур. А бир эвес шенелде узамдыга бээр болза, дүжүп бербес дээш, Иеговадан күштү чаңгыс удаа эвес дилээр апаар бис. Бурган ону Боду күзеп турар деп Исайяның: «Аңаа [Иеговага] амыр-дыш бербеңер» дээн сөстеринден көскү (Иса. 62:7). Ол чүү дээни ол? Иеговага чайлыг олурар үе бербейн турар ышкаш кылдыр, Ону амыратпайн, катап-катап мөргүүр болзувусса эки. Исайяның сөстери Иисустуң мөргүл дугайында бижээн сөстерин сагындырар (Лк. 11:8—10, 13). Ында Иисус ыдыктыг сүлдени дилээрде, чүткүлдүг мөргүүрүнче азы, ол шүлүктерниң оригинал сөзүглелинде бижээни дег, ыят чокка, катап-катап мөргүүрүнче кыйгырып турар. Оон аңгыда, мерген угаанныг шиитпирлер хүлээрде, Иеговадан удуртулганы дилеп болур бис.
ИЕГОВА БИСКЕ УДУРТУЛГАНЫ БЕРИП ТУРАР
8. Исайя 30:20, 21-де сөстер бурунгу үеде канчаар күүсеттингенил?
8 Номчуптуңар: Исайя 30:20, 21. Вавилон шериг Иерусалимни бир чыл чартык ишти бүзээлеп алгаш турда, чон хилинчек-човалаңга, хлеб биле сугга ышкаш, өөрени берген. Ынчалза-даа 20, 21 дугаар шүлүктерден алырга, еврейлер бачыттарын миннип, эттинип алыр болза, хостаарын Иегова аазаан. Исайя Иегованы Өндүр улуг Башкы деп адап, Ол кижилерни шын мөгееринге өөредип каар дээн. Еврейлер кулданыгдан хосталы бээрге, ол сөстер күүсеттинген. Иегова оларга Өндүр улуг Башкы болган. Ооң удуртулгазы-биле олар арыг чүдүлгени чедиишкинниг тургузуп алган. Иегова бистиң Өндүр улуг Башкывыс боорга, дыка-ла өөрүнчүг-дүр!
9. Иегованың бисти өөредип турар бир дугаар аргазы кандыгыл?
9 Исайяның ол шүлүктерин номчуп турувуста, угаанывыска мындыг чүүл чуруттунуп кээр: бис — өөреникчилер, а Иегова — бистиң Башкывыс. Бурган бисти ийи арга-биле өөредип турар. Бир дугаар арга. «Силер башкыңарны карааңар-биле көрүп каар силер» — деп, Исайя бижээн. Мында Башкы өөреникчилериниң мурнунда турар. Бурган биске улуг алдар-хүндүнү көргүзүп, чагып-сургап турар. Канчаар? Ол биске организациязы таварыштыр тода удуртулганы берип чоруур. Ол дээш Аңаа өөрүп четтирер-дир бис! Иегова бисти чыыштар болгаш шуулганнар таварыштыр өөредип турар. Оон ыңай бисте парламал болгаш электроннуг ном-дептерлер, JW Broadcasting® болгаш оон-даа өске чүүлдер бар. Ол бүгү биске өөрүшкүнү чидирбейн, шенелделерни туруштуг ажып эртеринге дузалап турар.
10. Кандыг уткалыг Бурганның үнүн артывыста дыңнап турар бис?
10 Оон ыңай Исайя Иегованың бисти өөредип турар ийи дугаар аргазын бижээн: «Артыңарда... үннү дыңнап каар силер». Мында Исайя Иегованы Бодунуң өөреникчилериниң соондан кылаштавышаан, оларны өскээр чорбазын дээш, орукту айтып берип турар кичээнгейлиг башкыга деңнээн. Амгы үеде Иегованың үнүн артывыста дыңнап турар бис. Кандыг уткалыг? Библияны шагда-ла бижээн болгаш, ону номчуп турувуста, Бурганның үнү артывыста дыңналып турар ышкаш (Иса. 51:4).
11. Бергелерни өөрүшкүлүг болгаш туруштуг ажып эртер дизе, кандыг базымнарны кылыры чугула? Тайылбырлаптыңар.
11 Иегова бисти организациязы биле Сөзү таварыштыр башкарзын деп бодаар болзувусса, чүнү канчаар ужурлуг бис? Исайя мында ийи бодалче кичээнгейни салган: 1) «Орук бо-дур», 2) «Ону истеп чоруңар!» (Иса. 30:21). «Орукту» анаа билип аары чедишпес. Ол «орук-биле чоруур» ужурлуг бис. Иегованың организациязы Ооң Сөзүн тайылбырлап турар. Ынчангаш Иегованың бистен чүнү негеп турарын база ол билиглерни канчаар ажыглаарын эки билип ап турар бис. Иеговага өөрүшкүлүг болгаш туруштуг бараалгаар дизе, ол ийи базымны кылыры чугула. Чүгле ынчан Иегова бисти йөрээр.
ИЕГОВА БИСТИ ЙӨРЭЭП ТУРАР
12. Иегова чонун канчаар йөрээген? (Исайя 30:23—26).
12 Номчуптуңар: Исайя 30:23—26. Бо өттүр билген медеглел Вавилоннуң кулданыындан чуртунче чанып келген еврейлерге канчаар күүсеттинген? Шупту чүвези чедер кылдыр, Иегова оларны элбээ-биле йөрээген. Ол бараалгакчыларынга элбек, чаагай дүжүттү берип, оларның бүгү хереглелдерин хандырган. А эң кол чүүл, Бурган оларны быжыктырып, арыг чүдүлгени катап тургузарынга дузалаан. Бурганның чону ынча хөй йөрээлдерни кажан-даа ап көрбээн. 26 дугаар шүлүктен көөр болза, Иегова оларны өндүр чырыы-биле чырыдыпкан (Иса. 60:2). Бо бүгү йөрээлдер еврейлерни быжыктырып, Аңаа өөрүшкү-маңнайлыг бараалгаарынга дузалаан (Иса. 65:14).
13. Арыг чүдүлгениң катап тургустунганының дугайында өттүр билген медеглел амгы үеде канчаар күүсеттинип турар?
13 Арыг чүдүлгениң катап тургустунганының дугайында бо өттүр билген медеглел биске хамааржыр бе? Ийе. 1919 чылдан эгелээш, сая-сая кижилер Өндүр улуг Вавилоннуң, делегей чергелиг меге шажыннарның, кулданыындан хосталып турар. Иегова оларны Аазаттынган черден артык эки доора уткалыг дываажаңче эккеп турар (Иса. 51:3; 66:8). Доора уткалыг дываажаң дээрге чүл ол?
14. Доора уткалыг дываажаңның дугайында чугаалап көрүңерем база ында кым чурттап турарыл? («Тайылбырны» көрүңер.)
14 1919 чылдан эгелеп, доора уткалыг дываажаңга b шилип чагдырганнар чурттап эгелээн. Оон оларга «өске хойлар», азы черге мөңге чурттаар идегелдиг улус, катчып келген (Ин. 10:16). Олар ол доора уткалыг чурттуң хамаатылары апаарга, Иегова оларны элбээ-биле йөрээп эгелээн (Иса. 25:6; 65:13).
15. Доора уткалыг дываажаң кайда?
15 Доора уткалыг дываажаң кайда? Иегованың бараалгакчылары делегейниң бүгү булуңнарында чурттап турар болганда, доора уткалыг дываажаң бүгү делегейде бар. Ынчангаш кайда-даа чурттап турар болзувусса, арыг чүдүлгени идепкейлиг деткип-ле чоруур болзувусса, доора уткалыг дываажаңда бис.
Бистиң кижи бүрүзү доора уткалыг дываажаңны канчаар деткип болур? (16, 17-ги абзацтар.)
16. Доора уткалыг дываажаңның чаражын үргүлчү эскерип чоруурунга биске чүү дузалаар?
16 Доора уткалыг дываажаңга артар дизе, делегей чергелиг чыыштарывысты кезээде үнелээр ужурлуг бис. Канчаар? Доора уткалыг дываажаңның чурттакчыларының четпес талаларынче эвес, а оларның чараш шынарларынче кичээнгейни салыр болза эки (Ин. 17:20, 21). Ол чүге чугула? Чижектен көрүптээлиңер. Кандыг-даа чараш сесерликте азы паркта янзы-бүрү ыяштар өзүп турар. Ооң-биле дөмей, чыыштарывыста тергиидеп турар доора уткалыг дываажаңны Библияда ыяштарга дөмейлээн, аңгы-аңгы акы-угбалар каастап турар (Иса. 44:4; 61:3). Ынчангаш кичээнгейивисти «чанывыста өзүп» турар аңгы-аңгы «ыяштарның» четпестеринче эвес, а «арганың» чаражынче үргүлчү углаалыңар. Бир эвес бодувустуң азы акы-угбаларывыстың четпестеринче кичээнгей салып туруп бээр болзувусса, делегей чергелиг ха-дуңмавыстың чараш демниг чоруун эскербейн баар бис.
17. Бистиң кижи бүрүзү чыыштың демниг чоруун канчаар деткип болур?
17 Бис чыышта демниг чорукту хууда канчаар деткип болур бис? Амыр-тайбың нептередикчилери болур ужурлуг бис (Мф. 5:9; Рим. 12:18). Чыышта акы-угбалар-биле эп-найыралдыг болур дээш кызар болзувусса, доора уткалыг дываажаңны оон-даа артык каастаар бис. Доора уткалыг дываажаңның чурттакчы бүрүзүн Иегова Бодунче хаара туткан болгай (Ин. 6:44). Ол бараалгакчы бүрүзүн үнелиг белек кылдыр санап турар. Ынчангаш амыр-тайбыңче чүткүп, демниг чорукту деткииривиске, Ол кайы хире өөрүп турар деп бодаар силер! (Иса. 26:3; Агг. 2:7).
18. Чүнүң дугайында үргүлчү ханы боданыр ужурлуг бис база чүге?
18 Иегова бараалгакчыларын элбээ-биле йөрээп турар. Ооң ачы-буянын бодувуска миннир дизивиссе, чүнү канчаар ужурлуг бис? Бурганның Сөзүн болгаш аңаа үндезилээн дептерлерни шинчилеп, ханы боданыр ужурлуг бис. Шак ынчаар кылыр болзувусса, ха-дуңмашкы дег, бот-бодувуска ынак болурунга дузалаар чараш шынарларны сайзырадып база бот-боттарывыска чылыг-чымчак хамаарылгалыг боор бис (Рим. 12:10). Бисте ам бар йөрээлдерниң дугайында боданыр болзувусса, Иегова-биле найыралывыс быжыгар. А Иегованың келир үеде бээр белектериниң дугайында боданыр болзувусса, мөңге чурттаар идегеливис черле өшпес. Бо бүгү биске Иеговага аас-кежиктиг бараалгаарынга дузалаар.
ЧЕРЛЕ ДҮЖҮП БЕРБЕС БИС!
19. а) Исайя 30:18-тен алырга, чүү чүвеге чигзинмес бис? б) Бергелерни туруштуг болгаш өөрүшкүлүг ажып эртеринге биске чүү дузалаар?
19 Удавас Иегова бүгү бузут-бактың когун үзүп, бис дээш «туруп келгеш», хөделир (Иса. 30:18). Бурган чөптүг болгаш, Эрликтиң делегейинге хуусаазындан эртир чаңгыс хүн турарын безин чөпшээревес (Иса. 25:9). Иегова-даа, бис-даа ол үени четтикпейн манап турар бис. А ол үе келбээнде, моон-даа улаштыр Иеговага мөргүп, Ооң Сөзүн шинчилеп, ону ажыглап, йөрээлдеривистиң дугайында ханы боданырын черле соксатпас бис. Ынчан Иегова биске шупту бергелерни өөрүшкүлүг болгаш туруштуг ажып эртеринге албан дузалаар.
ЫРЫ 142 Идегеливистен быжыг туттунаал
a Иегова бараалгакчыларынга бергелерни өөрүшкүлүг ажып эртеринге дузалаар дээш, кандыг үш арганы ажыглап турарын бо статьяга сайгарар бис. Исайя номунуң 30 дугаар эгезин сайгаргаш, Иеговага мөргүүрү, Ооң Сөзүн шинчилээри болгаш Ооң амгы үеде берип турар база келир үеде бээр белектериниң дугайында ханы боданыры чугула деп көөр бис.
b ТАЙЫЛБЫР. «Доора уткалыг дываажаңга» Иеговага чаңгыс аай, демниг бараалгап турар бис. Бистиң чип турар «аъш-чемивис» арыг база меге шажыннарның кандыг-даа хоралыг салдары чок. Бис эң-не солун ажылды кылып, Бурганның Чагыргазының дугайында өөрүшкүлүг медээни суртаалдап турар бис. Иегова-биле чоок хамаарылгалыг бис, ол ышкаш акы-угбалар-биле эп-найыралдыг чурттап чоруур бис. Олар биске өөрүшкүнү чидирбейн, бергелерни ажып эртеринге дузалап турар. Иеговага таарымчалыг мөгейип, Ону өттүнер дээш, бар шаавыс-биле кызып эгелээривиске, доора уткалыг дываажаңның хамаатылары апаар бис.