1. Хуралдың дузалакчыларынга Павелдиң хамаарылгазы кандыг турган?

 ХУРАЛДЫҢ дузалакчылары чугула ажылды кылып турар. Ол Бурганга бердинген эр улусту Павел элчин бедик үнелээр турган. Чижээ, Филиппыда христианнарга чагаазынга хуралдың удуртукчуларынга болгаш дузалакчыларынга ол аңгы байырны чедирген (Флп. 1:1).

2. Дузалакчы бараалгалга Луистиң хамаарылгазы кандыг?

² Хуралдың дузалакчылары кылдыр аңгы-аңгы назы-харлыг сугга суктурган акылар өөрүшкүлүг бараалгап чоруур. Чижээ, Де́ван акый 18 харлыында, а Лу́ис — 50 хар ажа бергенде хуралдың дузалакчызы апарган. Ол бараалгал акыларга улуг өөрүшкүнү эккеп турар. Луис: «Акы-угбаларга бараалгаары меңээ улуг аас-кежик! Олар меңээ ынакшылын көргүзүп турар. Ынчангаш мен оларга база бир-ле чүвени кылыксаар-дыр мен» — дээн. Бүгү делегейде дыка хөй акылар ооң сөстери-биле чөпшээрежир.

3. Кандыг айтырыгларны сайгарар бис?

³ Бир эвес сен сугга суктурган эр кижи болзуңза, хуралдың дузалакчызы болур сорулга салып шыдаар сен бе? Бо статьяга кандыг хөөнге башкартыры шын база кандыг библейжи негелделерге дүгжүр ужурлууңну сайгарар бис. Ынчалза-даа баштай хуралдың дузалакчылары кандыг ажылды кылып турарын чугаалажыптаалыңар.

 ХУРАЛДЫҢ ДУЗАЛАКЧЫЛАРЫНЫҢ ХАРЫЫСАЛГАЛАРЫ

4. Хуралдың дузалакчылары кандыг ажыл кылып турар? (Чурукту база көрүңер.)

⁴ Хуралдың дузалакчызы — удуртукчуларның аңгы-аңгы ажылдарынга дузалажыр кылдыр томуйлаттынган сугга суктурган акый. Чамдык дузалакчылар ном-дептер, суртаалдаар девискээрлер дээш харыылаар. Өскелери Хурал залын чогуур байдалга тударынга дузалап турар. А оон ыңай чыыш үезинде олар чурум хайгаарап, аудио болгаш видеоаппаратура-биле ажылдаар. Колдуунда хуралдың дузалакчылары күш-ажылга хамааржыр даалгалар күүседир. Чүнү-даа мурнай олар Бурган-биле харылзаазы быжыг, ооң дүрүмнерин сагып чоруур, кады бүзүрээн акы-угбаларынга ханы ынак улус (Мф. 22:37—39). Сугга суктурган эр кижи канчаар хуралдың дузалакчызы апарып болур?

5. Хуралдың дузалакчы болурунга кандыг негелделер бар?

⁵ Хуралдың дузалакчылары болурунга негелделерни Библияда бижээн (1 Тим. 3:8—10, 12, 13). Аңаа дүгжүр дээш күжениишкиннерни үндүрүп, ону эки шинчиле. Баштай чүге хуралдың дузалакчызы болуксаарыңны бодан.

КАНДЫГ КҮЗЕЛДЕР ШЫН?

6. Чыышка бараалгаарынче эр кижини чүү оттурар ужурлуг? (Матфей 20:28; Чурукту база көрүңер.)

⁶ Иисус Христос — бистиң өттүнер ужурлуг үлегеривис. Ол кижилерге база бодунуң Адазынга ынак. Хүндүткел чок деп санаттынар ажылды кызымаккай кылырынче Иисусту ынакшылы оттуруп турган. (номчуптуңар: Матфей 20:28; Ин. 13:5, 14, 15.) Сенде база ындыг ынакшыл бар болза, хуралдың дузалакчызы болур сорулгаңны чедип алырынга, Иегова сени деткиир база дузалаар (1 Кор. 16:14; 1 Пет. 5:5).

7. Бодунга чоргаарланыры, хууда күзелдер — хуралдың дузалакчызы болурунга чүге шын эвес хөөн?

⁷ Бо делегейде колдуу ат-алдар чедип алган улусту магадаар. А Иегованың организациязында көңгүс өске. Чыышта акылар эрге-дужаал, бедик байдал чедип аар дээш эвес, а Иисустуң ышкаш ынакшылды илередир ужурлуг. Бир эвес бот тогдунар,  хууда күзелдерин бодаар кижи удуртукчу азы дузалакчы апаар болза, Иегованың үнелиг хойлары дээш сагыш човаарынга херек көскү эвес хүлээлгелерни күүсетпес. Бөдүүн даалгаларны ол бодунга таарышпас деп санаар (Ин. 10:12). Бодунга ынак, өрү көрдүнер улустуң күжениишкиннерин Иегова кажан-даа йөрээвес (1 Кор. 10:24, 33; 13:4, 5).

8. Иисус элчиннеринге чүнү тайылбырлап берген?

⁸ Иисустуң чоок өңнүктериниң безин хөөнү шын эвес турган. Чижээ, Иаков биле Иоанн элчиннерни сактып кээли. Олар Иисустан ооң Чагыргазынга бедик дужаалды дилээн. Иисус чүү деп харыылаан? Ол дээш оларны мактавайн, харын-даа 12 элчининге мынчаар тайылбырлаан: «Араңардан алдар-хүндүлүг болуксаар кижи бар болза, чалчаңар болзун. ...Бир дугаар болуксаан кижи бар болза, шупту улустуң кулу болзун» (Мк. 10:35, 43, 44). Өске улуска бараалгаар күзелдиг шын хөөннүг акылар чыышка ёзулуг белектер (1 Фес. 2:8).

ӨСКЕ УЛУСКА БАРААЛГААР КҮЗЕЛДИ КАНЧААР ӨСТҮРЕР?

9. Өске улуска бараалгаар күзелди канчаар сайзырадыр?

⁹ Сен Иеговага ынак болгаш, өскелерге бараалгаксаар болгай сен. Ынчалза-даа хуралдың дузалакчыларынга дагзыр немелде даалгаларга шоолуг күзел чок чадавас сен. Ындыг хамаарылганы өскертип алырынга чүү дузалап болур? Акы-угбаларга дуза каткаш, кайы хире өөрүшкү ап болуруңну боданып көр. Иисус мынча дээн: «Алырынга көөрде, бээри оон-даа улуг аас-кежик» (Аж.-ч. 20:35, ЧД). Бо сөстерге дүүштүр чурттап, өскелерге бараалгааш, ол дыка улуг өөрүшкүнү ап турган. Сен база бодуңну шак ынчаар миннип болур сен.

10. Иисус кижилерге сеткилинден бараалгаарын канчаар көргүскен? (Марк 6:31—34).

¹⁰ Иисустуң кижилерге бараалгаарынга беленин көргүскен болуушкунну сактып кээлиңер. (Номчуптуңар: Марк 6:31—34.) Бир катап Иисус биле элчиннер шылай бергеш, дыштыг черже чорупканнар. Ынчалза-даа хөй улус Иисустуң мерген угаанныг сөстерин дыңнаар дээш, ол черже оларны мурнай чеде берген. Мөөң чонну көрүп кааш, Иисус өөредиринден ойталап болур турган. Чүге дизе «оларга чемненир безин хос-чай тывылбас болган». Азы бир-ийи бодал-биле үлешкеш, чонну чандырып болур турган. Иисус ынакшылга башкартып, «улусту хөй чүвеге өөредип» эгелээш, «кежээликтей, хүн ажып турда» дооскан (Мк. 6:35). Ол ужур аайы-биле эвес, а оларга ынак болгаш, кээргээш күзелдии-биле өөреткен. Өске улуска бараалгааш, Иисус хөй өөрүшкүнү миннип турган.

11. Дыңнаар дээш келген улуска Иисус херек кырында канчаар дузалаан? (Чурукту база көрүңер.)

¹¹ Ол байдалда Иисус өөредиринден аңгыда, оларның хереглелдерин база хандырган. Ону дыңнаар дээш келген кижи бүрүзүнге аъш-чем чедер кылдыр хуулгаазынны кылгаш, ону чонга үлээрин өөреникчилеринге дааскан (Мк. 6:41). Өскелерге канчаар бараалгаарын ол шак ынчаар өөреникчилеринге көргүскен. Күш-ажыл даалгаларын кылыры чугула деп билип алырынга өөреникчилеринге дузалаан. А ол ажылдарны хуралдың дузалакчылары кылып турар болгай. Иисус-биле кады мөөң чонну тоттур чемгерипкенинге элчиннерниң кайы хире өөрүп турганын, бодап безин көрүңер даан! (Мк. 6:42). Иисус өске-даа таварылгаларда улустуң сонуургалдарын  бирги черге салып турган. Черге бүгү чуртталгазын ол өске улуска бараалгаткан болгай (Мф. 4:23; 8:16). Улусту өөредири база олар дээш сагыш човаары Иисуска дыка хөй өөрүшкүнү эккеп турган. Хуралдың дузалакчызы апаргаш, акы-угбаларга сеткилиңден дузалажыр болзуңза, шак-ла ындыг өөрүшкү миннир деп чигзинме.

12. Чыышка чүнү-даа берип шыдавас мен деп чүге бодавас болза эки?

¹² Тускай арга-мергежилим чок деп бодаар болзуңза, муңгарава. Чыышта акы-угбаларга дузалажыр эки шынарлар сенде ылап бар. Павелдиң 1 Коринфичилерге 12:12—30-де сөстерин бодангаш, сеңээ канчаар хамааржырын билип алырынга дузалажырын Иеговадан диле. Бараалгакчы бүрүзү ышкаш чыышка дыка херек сен деп бо шүлүктерден тода көскү. Хуралдың дузалакчызы болур негелдеге амдыызында дүүшпес болзуңза, сула салдынма. Иеговага болгаш акыларга бараалгаар дээш, бүгү күжүңнү үндүрерин кызыт. Удуртукчулар сени кичээнгейге ап, кылып шыдаарың даалганы албан дагзыр деп чигзинме (Рим. 12:4—8).

13. Хуралдың дузалакчыларынга негелделерниң хөй кезиинге чүнү чугаалап болур?

¹³ Дараазында чүүлдү база боданып көр. Хуралдың дузалакчыларынга библейжи негелделер колдуунда шупту христианнарга хамааржыр. Иегованы өөртүп чурттаар дизе, ооң-биле хамаарылгавысты быжыглап, буянны кылыр ужурлуг бис. Ынчангаш сенде дузалакчы болурунга херек шынарларның хөй кезии бар чадавас. Чыышта хүндүткелдиг хүлээлгелер күүседир күзелдиг акый чүнү кылыр болза эки?

СОРУЛГАНЫ КАНЧААР ЧЕДИП АЛЫРЫЛ?

14. «Хүндүткелге төлептиг» алдынары дээрге кандыг уткалыг? (1 Тимофейге 3:8—10, 12).

¹⁴ Номчуптуңар: 1 Тимофейге 3:8—10, 12. Ол негелделерниң чамдыызын сайгарыптаалыңар. Хуралдың дузалакчылары «хүндүткелге төлептиг» кылдыр алдынар ужурлуг. Ол шынарны «харыысалгалыг, шыңгыы бүдүштүг» деп база очулдуруп болур. Ынчалза-даа баштактанып, каттырып болур болгай (Эккл. 3:1, 4). А хүлээлгелерге шыңгыы хамаарылгалыг болуру чугула. Чыышта акы-угбалар сени бүзүрелдиг кижи деп билир болза, хүндүлээр.

15. Ак сеткилдиг болгаш алыксак-чиксек эвес деп шынарларның утказы кандыг?

 ¹⁵ «Ак сеткилдиг». Ол дээрге шынчы, биче сеткилдиг, бүзүрелге төлептиг, сөзүн тудар, улусту мегелевези чугула дээни ол (У. ч. 3:32). «Алыксак-чиксек эвес» дээрге ажыл-агый, акша-төгерик айтырыгларынга шынчы деп уткалыг. Акы-угбаларны хуу ажык бодап, хөй акша ажылдап алыр дээш, ажыглап болбазын база айтып турар.

16. а) Арагага сунду чок деп негелдениң утказы кандыг? б) Арыг арын-нүүрлүг деп негелдениң утказы кандыг?

¹⁶ «Арагага сунду чок». Хуралдың дузалакчызы эмин эрттир хөй арага ишпес азы эзиртир ижиптер аттыг болбас ужурлуг. «Арыг арын-нүүрлүг» христиан кижи Иегованың негелделерин сагып амыдыраар. Ол тергиин эвес-даа болза, Бурган-биле хамаарылгазы эки, а ооң ачызында сеткилинде оожургалды миннип турар.

17. Хуралдың дузалакчызы болурунга беленин эр кижи канчаар көргүзүп болур? (1 Тимофейге 3:10; чурукту база көрүңер).

¹⁷ Библиядан алырга, хуралдың дузалакчыларын шилиирде «баштай шенээр херек». Удуртукчулар чыышка даалгаларыңны эки күүседип турарыңга шынзыгар ужурлуг. Ынчангаш удуртукчулар сеңээ даалга дагзырга, оларның болгаш Иегованың организациязының айтыышкыннарын эдерерин кызыт. Даалганы кажанга чедир күүседирин база сенден чүнү манаарын тодарадып ал. Удуртукчуларның дилеглерин кызымаккай күүседир болзуңза, хуралда акы-угбалар сени төлептии-биле үнелээр. Удуртукчулар, сугга суктурган акыларны өөредири чугула деп утпаңар. (Номчуптуңар: 1 Тимофейге 3:10.) Чыыжыңарда 10—14 харлыг азы оон биче сугга суктурган дуңмаларыңар бар бе? Олар Библияны боттары хууда шинчилеп, хуралдарга эки белеткенип турар бе? Чыыштарга доктаамал харыылаар, суртаал ажылынга киржип турар бе? Ийе болза, оларның харынга дүгжүр даалгаларны бериңер. Ынчан бараалгалга тааржыр-таарышпазын билип алыр силер. Оон 17 харлыында оларны хуралдың дузалакчылары кылдыр томуйлап болур.

18. «Оларга удур кандыг-даа буруудадыышкын тывылбаза» деп негелдениң утказы кандыг?

¹⁸ «Оларга удур кандыг-даа буруудадыышкын тывылбаза». Ол дээрге кем-буруу чок христиан кижини шыңгыы үүлгедигге чылдагаан чокка буруудадыры болдунмас  дээн уткалыг. Ынчалза-даа оларны меге буруудады берип болур. Иисусту безин бо-ла нүгүлдээр турган, а ооң өөреникчилери-биле база ындыг болур деп ол өттүр сөглээн (Ин. 15:20). Иисус ышкаш шын алдынар болзуңза, чыышка эки атка төлептиг болур сен (Мф. 11:19).

19. Дузалакчы кадайынга өскерилбес ужурлуг деп негелдениң утказы кандыг?

¹⁹ «Дузалакчы кадайынга өскерилбес» ужурлуг. Иегова эр биле херээжен кижиниң аразында эвилелди тургускан. Ол дээрге шупту христианнарга үреп болбас алыс шын (Мф. 19:3—9). Христиан кижиге мөзүзү куду эр-херээжен чоруктан ойлаары чугула (Евр. 13:4). Ол кадайынга шынчы болуп, өске херээжен улусту сонуургавас ужурлуг (Иов 31:1).

20. Өг-бүлезин эки башкарып шыдаар деп негелдениң утказы кандыг?

²⁰ «Ажы-төлүн база өг-бүлезин эки башкарып шыдаар улус боор ужурлуг». Өг-бүлелиг болзуңза, баштың хүлээлгеңге шыңгыы хамаарылгалыг болур ужурлуг сен. Өг-бүле мөгейиишкинин доктаамал эрттирип, кижи бүрүзү-биле кады хөй суртаалдаарын кызыт. Ажы-төлүңге Иегованың өңнүктери апаарынга дузалаш (Эф. 6:4). Өг-бүлең дээш сагыш човап билириңни, чыыш дээш сагыш човап шыдаарыңны көргүзүп турар. (Деңнеңер: 1 Тимофейге 3:5.)

21. Эр улус хуралдың дузалакчызы апарбаан шаанда чүнү кылып болур?

²¹ Эргим бараалгакчы, дузалакчы эвес болзуңза, бо статьяда сүмелерни боданып, аңаа хамаарыштыр Иеговага мөргү. Хуралдың дузалакчыларынга негелделерни кичээнгейлиг өөренип көргеш, аңаа дүгжүр дээш күжениишкиннерни үндүр. Акы-угбаларга ынакшылды сайзырадып, чүге бараалгаксап турарыңны боданып көр (1 Пет. 4:8, 10). Хуралдың дузалакчызы болурунче чүткүүр болзуңза, акы-угбаларга дузалажып тургаш, хөй өөрүшкүнү миннир сен. Иегова сени элбээ-биле шаңнаар деп бүзүре! (Флп. 2:13).