ӨӨРЕНИР СТАТЬЯ 47
ЫРЫ 103 Шынчы акыларывыс — Бургандан белек
Хуралдың удуртукчузу болур сорулгаң бар бе?
«Кандыг-бир кижи христиан ниитилелдиң удуртукчузу боор дээш чүткүүр болза, ол эки ажыл-херек кылыксаан-дыр» (1 ТИМ. 3:1).
КОЛ БОДАЛ
Хуралдың удуртукчузу болуп бараалгаар күзелдиг акыйга библейжи негелделер.
1, 2. Хуралдың удуртукчулары кандыг ажыл кылып турар?
ХУРАЛДЫҢ дузалакчызы болзуңза, удуртукчу болур сорулгаң бар чадавас. Сен ол «эки ажыл-херек» кылырынче чүткүүр-дүр сен бе? (1 Тим. 3:1).
2 Ол «ажыл-херекче» чүү кирип турар? Удуртукчулар чыыш-биле кады идепкейлиг суртаалдап, кадарчы ажылын кылып, өөредип, чугаа-сөзү-биле үлегерни көргүзүп, оларның бүзүрелин быжыктырып турар. Ынчангаш Библия оларны «белектер» деп адаан (Эф. 4:8, ЧД).
3. Хуралдың удуртукчузу болурунга чүнү кылыр херек? (1 Тимофейге 3:1—7; Титке 1:5—9).
3 Хуралдың удуртукчузу болурунга чүнү кылыр херек? Ажылче кирерде ышкаш анаа-ла каш арга-мергежилдиг болуру чедишпес. Суртаалчы база башкы болурундан аңгыда, 1 Тимофейге 3:1—7 биле Титке 1:5—9 (номчуптуңар) бижээн негелделерниң шуптузунга дүгжүр ужурлуг. Оларның кажын бо статьяга сайгарар бис. Чыышка ол эки аттыг, өг-бүлениң үлегерлиг баштыңы база акы-угбалар-биле күзелдиг бараалгаарынга аңаа чүнү кылырын чугаалажыр бис.
ЭКИ АТ
4. «Кем-буруу чок» деп негелдениң утказы кандыг?
4 Удуртукчу болур кижиде «кем-буруу чок» азы ооң дугайында акы-угбалар чүгле экини чугаалар база алдынарында буруудадыр чүве чок болуру чугула. Чыыштан «дашкаар... ат-сурааң база чүгле эки боор ужурлуг». Иеговага бараалгавас улус бүзүрелиңни шүгүмчүлээр-даа болза, сени кижизиг, шынчы деп чигзинмес ужурлуг (Дан. 6:4, 5). «Акы-угбалар болгаш Херечи эвес улус мээң дугайымда чүнү бодап турар?» — деп айтырыгны бодан.
5. «Буян кылырынга ынак» деп негелдениң утказы кандыг?
5 «Буян кылырынга ынак» кижи өске улустуң эки шынарларын эскерер, оларны мактаар. Оон ыңай хөйнү кылып, буянны көргүзер (1 Фес. 2:8; англи дылда «Шинчилел Библиязында» Титке 1:8-ке тайылбырны көрүңер, «буян кылырынга ынак» деп фраза). Ол чүүл удуртукчуларга чүге чугула? Чүге дизе акывыс буянга ынак болза, акы-угбалар дээш сагыш човап, даалгаларын күүседиринге хөй үезин үндүреринге белен болур (1 Пет. 5:1—3). Ынаар хөй күш үнер-даа болза, өске улуска бараалгааш, ол улуг өөрүшкүнү алыр (Аж.-ч. 20:35).
6. Хүндүлээчел ээ болурунуң утказы кандыг? (Еврейлерге 13:2, 16; чурукту база көрүңер).
6 «Хүндүлээчел ээ» болуру дээрге биске чоок эвес улуска безин бир-ле эки чүүлдү кылыры-дыр (1 Пет. 4:9). Библейжи справочникте хүндүлээчел кижини: «Ооң чүрээ база бажыңының эжии танывазы улуска безин кезээде ажык» — дээн. «Чыыштың кандыг-даа аалчыларынга өөрүшкүлүг хүндүткелдиг кижи деп улус сени билир бе?» — деп бодан. (Номчуптуңар: Еврейлерге 13:2, 16.) Ол аалчылар аразында бөдүүн ха-дуңма база кожуун хайгааракчылары, өскээртен келген илеткелчилер, акы-угбаларны деткиир дээш хөйнү кылып турар өске-даа бараалгакчылар бар (Э. д. 18:2—8; У. ч. 3:27; Лк. 14:13, 14; Аж.-ч. 16:15; Рим. 12:13).
Аалчыларга экииргек өг-бүле христианнар бажыңында кожуун хайгааракчызын хүлээп алган (абзац 6).
7. Акшага чазыйлавас дээрге чүү дээни ол?
7 «Акша-мөңгүнге чазыйлавас» дээрге ону чуртталгага эң кол кылдыр санавазы-дыр. Каш-даа акша ажылдап ап турар болзуңза, Бурганның Чагыргазын бирги черге сал (Мф. 6:33). Иегованың ажыл-херээн деткип, өг-бүлең база чыыш дээш сагыш човаарынга, үеңни, күжүңнү, акша-төгерииңни ажыгла (Мф. 6:24; 1 Ин. 2:15—17). «Акшага хамаарылгам кандыг? Бар чүүлүм дээш өөрүп азы хөй акша ажылдап, үргүлчү чаа эт-сеп садар кол сорулгалыг мен бе?» — деп бодуңдан айтыр (1 Тим. 6:6, 17—19).
8. Буруудаткы дег чүве чок, бодун туттунуп билир деп шынарларның утказы кандыг?
8 Удуртукчу «буруудаткы дег чүве чок», «бодун туттунуп билир» ужурлуг. Ол аъш-чемге, арагага өй-хемчээлин билир, оюн-тоглаа, дыштанылгага шын шилилгелиг, идик-хепке шын хамаарылгалыг. Оон ыңай удуртукчу Библияга карышкак, бо делегейде нептерээн салдарга алыспас (Лк. 21:34; Иак. 4:4). Ооң аңгыда, күткүлгелерге бодун туттунуп билир. Удуртукчу дыка «арагаже сундукпас» база үе-үе болгаш хөй арага ижиптер аттыг болбас ужурлуг. «Шупту чүүлге өйлүг база туттунуп билирим чуртталгамдан көскү бе?» — деп бодуңдан айтыр.
9. Бодамчалыг база төлептиг алдынарының утказы кандыг?
9 «Бодамчалыг» болуру дээрге шиитпирлер хүлээп тургаш, библейжи дүрүмнерни ажыглаары-дыр. Бодамчалыг кижи ол дүрүмнерни ханы бодангаш, эскериичел чорукка өөренип ап турар. Ол далаштыг түңнелдер үндүрериниң орнунга, херек бадыткалдарны чыырын кызар (У. ч. 18:14). Шиитпирлерни ол Иегованың үзел-бодалы-биле үндүрер. «Төлептиг алдынып чоруур» кижи эрте дээре белеткенир болгаш, бүгү ажыл-херээн үе-шаанда кылыр. Ындыг кижиге кезээде идегеп болур. Ол шупту айтыышкыннарны күүседир. Чугаалашканывыс негелделерге дүгжүр болзуңза, эки атты чедип алыр сен. Ам өг-бүлениң баштыңы болур удуртукчуларның негелделерин сайгарар бис.
ӨГ-БҮЛЕЗИ ДЭЭШ САГЫШ ЧОВААРЫ
10. «Бодунуң өг-бүлезин башкарып шыдаар» дээрге кандыг уткалыг?
10 Удуртукчу болуксап турар өг-бүле баштыңы болзуңза, өөң ишти, ажы-төлүң чыышка эки аттыг болур ужурлуг. Ынчангаш бодуңнуң өг-бүлеңни эки башкарар хүлээлгелиг сен. Өг-бүлеңниң харыысалгалыг, ынакшылдыг баштыңы деп улус сени билир боор ужурлуг. Өг-бүле мөгейиишкинин эрттирер, өөң-иштинге, ажы-төлүңге христиан ужуражылгаларже баарынга база суртаалдаарынга дузалажыр чугула хүлээлгеңни күүседириң чугула. Павел элчин: «Бодунуң өг-бүлезин башкарып шыдавас кижи Бурганга бүзүрээннер ниитилели дээш канчап сагыш човаарыл?» — деп бижээн (1 Тим. 3:5).
11, 12. Ажы-төлүнүң алдынары ачазының удуртукчу бараалгалынга кандыг салдарлыг? (Чурукту база көрүңер.)
11 Назы-хар четпээн ажы-төлдүг болзуңза, олар «дыңнангыр база кижизиттинген» болур ужурлуг. Оларны ынакшылдыг өөредири чугула. Бичии ажы-төл ойнап, хөглээринге ынак. Ынчалза-даа оларны ада-иезинге дыңнангыр, өске улусту хүндүлээр база эки алдынар кылдыр кижизидери чугула. Оон аңгыда, ажы-төлүңге Бурганның өңнүктери апаарынга, библейжи дүрүмнер-биле чурттаарынга, сугга суктурар сорулгаже чүткүүрүнге дузалап, бүгү күжениишкиннерни үндүрер ужурлуг сен.
12 «Ажы-төлү Бурганга шынчы, самыыраан деп чектетпээн болгаш дыңнангыр боор ужурлуг». Сугга суктурган азы ол сорулганы салып алган төл шыңгыы бачыт кылыптар болза, чыышка ачазының хүлээлгезинге кандыг салдарлыг болур? Ачазы төлүн кижизидип өөретпээн болза, удуртукчунуң негелдезинге дүүшпес чадавас. («Таңныыл суургазын» көрүңер, 1996 чыл, октябрь 15, ар. 21, абз. 6, 7.)
Өг-бүлениң баштыңы ажы-төлүн Иегова болгаш чыыш дээш ажылдап өөредир ужурлуг (абзац 11).
ЧЫЫШ ДЭЭШ САГЫШ ЧОВААРЫ
13. Бодамчалыг база турамык болбас дээрге кандыг уткалыг?
13 Христиан шынарларны илередип турар акылар — чыышка ёзулуг белек. «Бодамчалыг» кижи өске улус-биле тайбың хамаарылганы тудар, оларга дузалаар. Ол өске улусту дыңнап, көрүжүн билип алырын кызар. Удуртукчу апарган дижик сен. Удуртукчулар ужуражылгазынга акыларның хөй кезии сээң күзээниң шиитпирни үндүрбээн. Библейжи дүрүмнерни хажытпайн турар болза, ол шиитпир-биле чөпшээрежир сен бе? Удуртукчу болуксаар кижи «бодун турамык ап чорбас», бодунуу-биле турбас. Өске улус-биле сүмележири чугула деп ол билир (Э. д. 13:8, 9; У. ч. 15:22). Удуртукчу кижи «шугул, содаачы» болбас ужурлуг. Улус-биле каржы-хажагай алдынмас, маргышпас, харын-даа чылыг-чымчак, эвилең-ээлдек кижи болуру чугула. Нарын байдалдарда безин тайбыңны кадагалаар дээш, күжениишкиннер үндүрери херек (Иак. 3:17, 18). Чылыг-чымчак сөстер-биле байдалды оожургадып болур. Ынчаар алдынары Иегованың Херечилеринге багай хамаарылгалыг улус-биле чугаалажырда ылаңгыя чугула (Башт. 8:1—3; У. ч. 20:3; 25:15; Мф. 5:23, 24).
14. Чоокта чаа бүзүрээн дээрге кандыг уткалыг? Бурганны хүндүлеп чурттаарының утказы кандыг?
14 Удуртукчу болур акый «чоокта чаа бүзүрээн» болбас. База хөй чылдар бурунгаар сугга суктурган болуру албан эвес. Ынчалза-даа быжыг бүзүрелдиг христиан болур дизе, үе херек. Чыышка кандыг-даа даалгалар күүседиринге белен болурунга, биче сеткилди илередиринге дузалаар Иисустуң үлегерин эдерип, Иегованың немелде хүлээлгелер бээрин шыдамык мана (Мф. 20:23; Флп. 2:5—8). Удуртукчу кижиге «Бурганны хүндүлеп» чурттаары чугула. Өскээр чугаалаарга, Иегованың чөптүг-шынныг дүрүмнери ёзугаар чурттаар база ооң организациязының айтыышкыннарын эдерер ужурлуг сен (1 Тим. 4:15).
15. Удуртукчу кижиге тулган илеткелчи болуру албан бе? Тайылбырлаптыңар.
15 Удуртукчу кижи «улусту өөредип шыдаар» болурун Библияда тода көргүскен. Ынчалза-даа тулган илеткелчи болуруң албан эвес, чүге дизе удуртукчулар шупту эки илеткелчилер болбас (англи дылда «Шинчилел Библиязында» 1 Тимофейге 3:2-де тайылбырны көрүңер, «улусту өөредип шыдаар» деп фраза; деңнеңер: 1 Коринфичилерге 12:28, 29; Эфесчилерге 4:11). Удуртукчу суртаал үезинде азы акы-угбаларны өөредип, деткиирде, Библияны мергежилдиг ажыглап билир ужурлуг. Ынчангаш өөредир арга-мергежилди үргүлчү бедидери чугула. Ону чедип алырынга сеңээ чүү дузалаар?
16. Канчаар эки башкы болурул? (Чурукту база көрүңер.)
16 Хуралдың удуртукчузу «Бурганның сөзүнден быжыг туттунар ужурлуг» (Тит. 1:9, ЧД). Ынчангаш сценадан илеткелге азы бир кижиге хууда сүме бээрде, сөстериңни кезээде Бижилгеге үндезиле. Библияны, ном-дептеривисти кызымак шинчиле (У. ч. 15:28; 16:23; англи дылда «Шинчилел Библиязында» Титке 1:9-ка тайылбырны көрүңер, «Бурганның сөзүнден быжыг туттунар» деп фраза). Шинчилел үезинде шүлүктерниң канчаар тайылбырлаанынче кичээнгей салыр болзуңза, ону шын ажыглап шыдаар сен. Өске улустуң чүрээнге дээштиг кылдыр өөрет. Мергежилдиг башкы болур дизе, чүнү экижидип ап болурун дуржулгалыг удуртукчулардан айтырып, оларның сүмелерин эдер (1 Тим. 5:17). Олар акы-угбаларны «сорук киирер» харыысалгалыг. Чамдыкта удуртукчулар өске христианнарга сүме бээр, безин оларны «сойгалаар» апаар. Канчаарга-даа ону эвилең-ээлдек кылыры чугула. Өске улуска чылыг-чымчак, ынакшылды көргүзүп, сүмелерни кезээде Библиядан алыр болзуңза, Өндүр улуг башкывыс Иисустан үлегерни ап турарың болур (Мф. 11:28—30; 2 Тим. 2:24).
Дуржулгалыг удуртукчу хуралдың дузалакчызынга Библия дузазы-биле акы-угбаларны сорук кииреринге өөредип, дузалажып турар. Ол-ла дузалакчы көрүнчүк мурнунда илеткелин шенеп чугаалап турар (абзац 16).
СОРУЛГАҢАРЖЕ ЧҮТКҮҮРҮН СОКСАВАҢАР
17. а) Удуртукчу болур күзелдиг дузалакчылар чүнү кылыр болза эки? б) Акыларның удуртукчу болур негелделерге дүгжүрүн тодарадырда, удуртукчулар чүнү сактыр ужурлуг? ( «Хуралдың удуртукчулары, бодамчалыг болуңар!» деп көзенекти көрүңер.)
17 Чамдык дузалакчылар бодун кажан-даа удуртукчу болуп шыдавас деп бодаар. Чугаалашканывыс негелделер оларга күүсеттинмес кылдыр сагындырар. Ынчалзажок Иегова-даа, ооң организациязы-даа аңаа чүс хуу дүгжүрүңнү манавас деп сактып чор (1 Пет. 2:21). Оон аңгыда, Иегова сени кажан-даа чааскаандырзын кагбас база сүлдези-биле дузалаар деп утпа (Флп. 2:13). Ол негелделерниң бирээзин күүседир күзелиң бар болза, Иеговага мөргүп, ном-дептеривистен ол темага информацияны шинчилеп, чүнү экижидип ап болуруңну удуртукчулардан айтыр.
18. Хуралдың дузалакчылары кандыг сорулга салыр болза эки?
18 Бо статьяда негелделер аразында кижи бүрүзүнүң база удуртукчуларның сайзырадыр ужурлуг чугула шынарлары бар (Флп. 3:16). Хуралдың дузалакчызы болзуңза, чыышче үндүрер үеңни көвүдедир сорулгадан салып ал. Акы-угбаларга дузалаарын ам-даа экижидип алыр дээш, сени өөредип, эдип-чазаарын Иеговадан мөргүп диле (Иса. 64:8). Удуртукчу болур күжениишкиннериңни Иегова албаан йөрээр деп чигзинме!
ЫРЫ 101 Демниг ажылдажып турар бис
