1, 2. Чөптүг эвес хамаарылгага таварышкаш, чүнү миннир бис?

 ШИИТКЕКЧИДЕН чөптүг шиитпир диленген дулгуяк херээженниң дугайында угаадыглыг төөгүнү Иисус чугаалаан. Ол үеде бөдүүн чон болганчок чөптүг эвес чорукка таваржып чораан. Ынчангаш Иисустуң өөреникчилери ол херээженниң сеткилин эки билип болур турган (Лк. 18:1—5). Ол төөгү амгы үеде-даа ажыктыг. Бис база бо-ла чөптүг эвес хамаарылганы көрүп турар бис.

² Бистиң үеде улус деңнээри, ылгай көөрү, кызагдаары анаа чүүл апарган. Ынчангаш биске багай хамаарылга көргүзерге кайгавас бис (Эккл. 5:7). А ындыг чүүл чыышка болурга, ылаңгыя аарышкылыг. Акы-угбалар дайзыннарывыс эвес. Олар бисти өжегерээн эвес, а тергиин эвезинден хомудадыптар. Ынчалза-даа дөмей-ле берге. Ындыг минниишкиннер-биле туржурунга Иисустуң үлегери дузалаар. Дайзыннары чөптүг эвес хамаарылга көргүзерге, ооң канчаар алдынганын көөр бис. Христианнар багай улуска безин шыдамык болур болганда, акы-угбаларга хамаарыштыр оон-даа артык шыдамык болур ужурлуг. Чыышка азы өске черге чөптүг эвес чорукка таваржыр болзувусса, Иегова чүнү миннир? Ол бисти билип турар бе?

3. Бараалгакчыларынга багай хамаарылга көргүзерге, Иегова таарзынмас деп кайыын билир бис?

³ Дээрде Адавыс чуртталгавыста шупту болуушкуннарны көрүп турар. Өскелерниң биске хамаарылгазы аңаа хамаанчок болбас. Иегова «чөптүг чорукка ынак» (Ыд. ыр. 36:28). Бурган херек үеде дораан камгалаар деп, Иисус чугаалаан (Лк. 18:7, 8). Удавас Иегова шупту бергелеривисти  соксадыптар, чөптүг эвес чоруктан хинчектениривисти кажан-даа чөпшээревес (Ыд. ыр. 71:1, 2).

4. Чөптүг эвес чорукка таваржырывыска Иегова биске канчаар дузалаар?

⁴ Иегова шупту бергелеривисти шиитпирлептерин ам-даа манаар апаар бис (2 Пет. 3:13). Ынчалза-даа ам безин ол биске дузалажып турар. Бурган бисти чөптүг эвес чорукка таварышкаш, байдалды улам баксыратпас дизе, канчаар алдынарын өөредип турар. Ынчангаш ол черже бодунуң Оглун чорудупкан. Багай хамаарылга көргүзерге, канчаар алдынарынга хамаарыштыр Иисус биске тергиин үлегерни арттырган. Оон аңгыда, Бурган чөптүг эвес чорукка таварышканда ажыглап болур сүмелерни Библияда берген.

БАЙДАЛДЫ БАКСЫРАДЫП БОЛУР АЙЫЫЛ БАР

5. Чөптүг эвес чорукка таварышкаш, оваарымчалыг болуру чүге чугула?

⁵ Чөптүг эвес чорук дыка аарышкылыг, бисти ундаралга безин чедирип болур (Эккл. 7:7). Ындыг минниишкиннер Бурганның өске-даа бараалгакчыларынга турган. Чижээ, Иов биле Аввакум (Иов 6:2, 3; Авв. 1:1—3). Ындыг сагышсыралдар черле турар, ынчалза-даа оваарымчалыг болуру чугула. Оон башка изиглени бергеш, байдалды улам баксырадып, частырыгларны кылыптар бис.

6. Авессаломнуң таварылгазы биске кандыг өөредиг? (Чурукту база көрүңер.)

⁶ Биске азы ынак киживиске чөптүг эвес хамаарылга көргүзерге, хомудаткан кижини кезедир күзел тыптып болур. Ынчаар кылыр болза, байдал оон-даа нарыыдай бээр. Давид хаанның өг-бүлезинге болган чүүлдү сактып кээлиңер. Оглу Авессалом дуңмазы Фамарны Амноннуң күштеп каанын билип кааш, дыка хорадаан. Моисейниң хоойлузу-биле алырга, Амнон өлүр ужурлуг турган (Лев. 20:17). Авессаломнуң килеңи чөп-даа болза, ооң шииткел үндүрер эргези чок турган (2 Хаан. 13:20—23, 28, 29).

7. Чөптүг эвес чорук 72-ги Ырының авторунга кандыг салдарлыг болган?

⁷ Хомудаткан кижи кеземче албаан ышкаш болза, шын алдынары утка чок деп шиитпирлээр чадавас бис. 72-ги Ырының автору ынчаар бодаан. Каржы кижилер чөптүг-шынныг улусту кызагдааны  дээш, кеземче чогун ол эскерген (Ыд. ыр. 72:12). Муңгаралдан Иеговага бараалгаар күзели чиде бергенин ыраажы: «Ол бүгүнү билип аар дээш, боданып турдум, ынчалзажок меңээ бергези кончуг болду» — деп илереткен (Ыд. ыр. 72:14, 16). Ол безин ажыы-биле: «Буттарым бичии-ле болза [шын оруктан]... тая бээр часты» дээн (Ыд. ыр. 72:2). Альбе́рто деп акывыс-биле база ындыг чүүл болган.

8. Бир акывыс чөптүг эвес чорукка таварышкаш, канчаар алдынган?

⁸ Альбертону чыыштың акшазын оорлаан деп меге буруудаткан. Түңнелинде ол удуртукчу эвес апарган, а чамдык улус олче хүндүткел чок көрүп эгелээн. «Ажынганымдан иштимде хомудалым хайнып турган» — деп, ол сактып чугаалаан. Альберто хомудаанындан чыышче беш чыл барбаан. Чөптүг эвес чорукка таварышкаш, килеңивисти тудуп шыдавайн баарывыска чүү болуру бо таварылгадан көскү.

ИИСУС ЧӨПТҮГ ЭВЕС ЧОРУККА КАНДЫГ ХАМААРЫЛГАЛЫГ ТУРГАН?

9. Иисус кандыг чөптүг эвес хамаарылга көрген? (Чурукту база көрүңер.)

⁹ Чөптүг эвес чорукка таварышкаш, канчаар алдынарынга хамаарыштыр Иисус  тергиин үлегерни арттырган. Ол чөптүг эвес буруудадыышкыннарны, анчыг сөстерни хөй катап дыңнаан. Чоок улузу ону сээдеңней берген, а шажын башкарыкчылары буктар-биле харылзаалыг дээн. А рим шериглер ону кыжырып, куду көрүп турган, сөөлүнде барып өлүрүп каан (Мк. 3:21, 22; 14:55; 15:16—20, 35—37). Иисус өжээргевейн, шупту чүвени шыдажып эрткен. Оон чүнү өөренип ап болур?

10. Чөптүг эвес чорукка таварышкаш, Иисус канчаар алдынган? (1 Пётр 2:21—23).

¹⁰ Номчуптуңар: 1 Пётр 2:21—23 a. Бис чөптүг эвес чорукка таварышкаш, Иисусту өттүнүп болур бис. Ол кажан ыыттавазын, кажан чугаалаарын билир турган (Мф. 26:62—64). Иисус ооң дугайында меге чугаа тараткан улус-биле сайгарышпаан (Мф. 11:19). Ону истеп сүрген улуска кыжанмаан. Шын алдынарынга Иисуска чүү дузалаан? Ол «чөптүг Шииткекчиге бүрүнү-биле ынанган». Оглу кандыг шенелделерге таварышканын Иегова көрүп турарын Иисус билген. Чогуур үеде Иегова шупту чүүлдү шиитпирлептер деп, ол бичии-даа чигзинмээн.

11. Ыттавайн эрттирер азы киржир дээн болза, чүнү кичээнгейге алыр херек? (Чурукту база көрүңер.)

¹¹ Биске чөптүг эвес хамаарылга көргүзерге, Иисустуң үлегерин канчаар эдерип болур? Чүнү чугаалаарын боданыры чугула. Бир эвес билишпейн барган болзуңарза, ону эрттириптиңер. Байдалды улам баксыратпас дизе, ыыттавааны дээре (Эккл. 3:7; Иак. 1:19, 20). Чамдыкта бир кижиге болчурда азы алыс шынны  камгалаарда чугаалаар апаар бис (Аж.-ч. 6:1, 2). Ынчан оожум болгаш хүндүткелдиг болуру чугула (1 Пет. 3:15) b.

12. «Чөптүг Шииткекчиге» канчаар ынанырыл?

¹² Иисустуң үлегерин эдерип, «чөптүг Шииткекчиге» ынаныр бис. Өске улус багай хамаарылга көргүзүп, бисти багай кылдыр бодаар болза, Иеговага шупту чүве билдингир деп билир болгаш, аңаа идегээр бис. Үезинде Бурган шупту байдалды эдиптер деп бүзүреливис биске чөптүг эвес хамаарылганы шыдажырынга дузалаар. Иеговага бүзүреп, аңаа долузу-биле ынанып, чүрээвиске килеңни, көөр хөөн чок чорукту ириң ышкаш чыглы бээрин болдурбас бис. Оон башка багай бодалдар бисти шын эвес алдынарынче албадаптарга, өөрүшкүвүстү чидирип, Иегова-биле найыралывысты баксырадып ап болур бис (Ыд. ыр. 36:8).

13. Чөптүг эвес хамаарылганы шыдажырынга чүү дузалаар?

¹³ Иисустуң үлегерин тергиини-биле эдерери амдыызында биске болдунмас. Үе-үе болгаш, хараадай бээр чүүлдү чугаалаптар, кылыптар бис (Иак. 3:2). А чамдыкта улус биске чөптүг эвес хамаарылгалыг болур. Бо делегейниң төнчүзүнге чедир аарыыр ханы балыглар база турар. Ындыг чүүлге таварышкан болзуңарза, Иегова чүнү эртип турарыңарны билир дээрзинге чигзинмеңер. Чөптүг эвес хилинчекти көрген Бурганның Оглу силерниң минниишкиниңерни дыка эки билир (Евр. 4:15, 16). Иегова биске Иисустуң тергиин үлегеринден аңгыда, багай хамаарылганы ажып эртеринге дузалаар сүмелерни Библияда арттырып каан. Римчилерге чагаадан ийи сүмени көрээлиңер.

«ӨЖЭЭН НЕГЕВЕЙН, БУРГАНГА ЧАЙЛАП БЕРИҢЕР»

14. «Өжээн негевейн, Бурганга чайлап» бээриниң утказы кандыг? (Римчилерге 12:19).

¹⁴ Номчуптуңар: Римчилерге 12:19, ЧД. Павел элчин «өжээн негевейн, Бурганга чайлап» бээринче христианнарны кыйгырган. Херек кырында ону канчаар кылырыл? Чөптүг чорукту кажан база канчаар тургузарын Иеговага чөпшээрээр бис. Багай хамаарылгага көрген Джон мынча дээн: «Шын эвес алдынмас дээш, кылыымны тудары меңээ дыка-ла берге болган. Римчилерге 12:19-та сөстер меңээ Иегованы шыдамык манаарынга дузалаан».

15. Берге айтырыгны шиитпирлээрин Иеговага чөпшээрээри чүге эң-не эки?

¹⁵ Иеговага идегээр болзувусса, бергелеривисти олче чууй каап, артык стресс биле ундаралдан чайлаар бис. Иегова биске дуза кадыксап: «Бо айтырыгны меңээ арттырып каг, ону шиитпирлептер мен» — дээн ышкаш. «Мен өжээн негеп, кезедир мен» — деп аазап турар. Бо сөстерге бүзүрээр болзувусса, Бурган шупту чүвени эң-не эки арга-биле шиитпирлээрин билир болгаш, дүвүревес бис. Джон шак ынчаар хөделген. Ол мынча дээн: «Бергелеримни Иегованың шиитпирлептерин манаар мен. Ол менден артык эки кылыр болгай».

БУЗУТТУ БУЯН-БИЛЕ БАС

16, 17. Бузутту буян-биле базарынга мөргүл канчаар дузалаар? (Римчилерге 12:21).

¹⁶ Номчуптуңар: Римчилерге 12:21. Павел христианнарны каржыны буян-биле базарын оттурган. Даглыг черге суртаалынга Иисус: «Хора чедирерин күзеп турар  улуска ынак бооп, силерге багай хамаарылгалыг улус дээш мөргүңер» — деп чугаалаан (Мф. 5:44, ЧД). Иисус боду ол сөстер ёзугаар чурттап чораан. Рим шериглер ону чагыга кадап каарга, хинчектенгенин сактып келиңер. Ооң кайы хире аарышкыны, дорамчылалды эрткенин бодаары безин берге.

¹⁷ Иисус чөптүг эвес чорукка торулбайн, ынакшылын өжүрбээн. Шериглерге багай чүве күзевейн, харын-даа: «Ачай! Оларны өршээ, чүнү кылып турарын билбес улус-тур» — деп, ол мөргүп турган (Лк. 23:34). Бисти бак көрген улус дээш мөргүүрү, хорадаарынче далашпайн, оожургалды минниринге дузалаар. Хомудаткан улуска хамаарылгавысты безин өскертип ап болур бис.

18. Альберто биле Джонга мөргүл канчаар дузалааныл?

¹⁸ Чугаалашканывыс ийи акыйга база мөргүл дузалаан. Альберто мынча дээн: «Чөптүг эвес хамаарылга көргүскен акылар дээш мөргүп турган мен. Хомудалды уттупкаш, моон соңгаар сагынмас кылдыр Иеговадан каш-даа катап дилээн мен». Ам Альберто Иеговага шынчы бараалгап чоруур. А Джон мынчаар үлешкен: «Меңээ дыка улуг аарышкы чедирген акый дээш хөй катап мөргээн мен. Мөргүлдер меңээ акымны шиитпейн, өске талазы-биле көөрүнге дузалаан. Ынчан сагыш-сеткилим оожургай берген».

19. Бо делегейде чурттап чоруур үевисте чүнү кылыр ужурлуг бис? (1 Пётр 3:8, 9).

¹⁹ Бо эрги делегей читпээн шаанда, чөптүг эвес чорукка таварышпас деп чүве турбас. Чүү-даа болза, Иеговага мөргүүрүн соксатпаалыңар. Иисустуң чөптүг эвес чорукка таварышкаш, канчаар алдынганын база өттүнер ужурлуг бис. Библейжи дүрүмнерни улаштыр ажыглаары чугула. Ынчан Иегова бисти албан йөрээр (Номчуптуңар: 1 Пётр 3:8, 9.)