1. Хөй улусту кандыг айтырыг дүвүредип турар?

 ХРИСТИАННАР бис дээр шажыннарның саны он-он муң четкен, олар шуптузу Бурганга шын чүдүп турар бис дээр. Ынчангаш хөй улусту мындыг айтырыг дүвүредип турар: Бурган чүгле чаңгыс шажынны алыс шын деп санаар бе азы кижи кандыг-даа шажынга хамааржырга, Аңаа хамаанчок бе? Хөй улустуң аайын тыппайн турары кайгамчык эвес! А бис Иегованың Херечилериниң алыс шынга өөредип турарынга база Бурган оларның мөгейиишкининге чөпсүнүп турарынга ыяк бүзүрээр бис бе? Бистиң бүзүреливис бадыткалдарга үндезилеттинген бе, сайгарыптаалыңар.

2. Павел алыс шынны тып алганынга чүге чигзинмээн? (1 Фессалоникчилерге 1:5).

² Павел элчин алыс шынны тып алганынга бичии-даа чигзинмээн. (Номчуптуңар: 1 Фессалоникчилерге 1:5.) Ооң бүзүрели согур турбаан. Павел «бүгү Бижилгени» шинчилеп көргеш, ону «Бурганның аксындан үндүр тынган сөзү» деп билип каан (2 Тим. 3:16). Ол шинчилелдер чүге чедирген? Иисус — аазаттынган Мессия деп бадыткалдарны Павел Ыдыктыг Бижилгеден тып алган. А иудей шажын башкарыкчылары ол бадыткалдарны тооваан. Ол ийи арынныг шажын башкарыкчылары Бурганны билир бис дижир, а херек кырында Ону хүлээвес турган (Тит. 1:16). Оларга бодаарга, Павел Бурганның Сөзүнде кандыг өөредиглерге бүзүрээр-бүзүревезин шиливес чораан. Ол Бурганның күзел-соруун улуска долузу-биле коргуш чок суртаалдап турган (Аж.-ч. 20:27).

3. Шупту айтырыгларывыска харыыны тып албаан-даа болзувусса, алыс шынны тып алганывыска чигзинмейн барып болур бис бе? (« Кижилер Бурганның... ажыл-херээн эгезинден төнчүзүнге чедир билип шыдавас» деп көзенекти көрүңер.)

 ³ Чамдык улустуң саналы-биле алырга, алыс шын шажын кандыг-даа айтырыгларга, дорт харыызы Библияда чок-даа болза, харыыны бээр ужурлуг. Ынчаар бодаары шын бе? Павел элчинниң чижээн көрээлиңер. Ол акы-угбаларны: «Шуптузун хынап чаңчыгыңар» деп кыйгырып турган (1 Фес. 5:21). Ындыг турбуже, ол чамдык чүүлдерни чедир билип шыдавазын ажыы-биле чугаалап чораан: «Бистиң билиивис долу эвес... Ам бис бүгү чүвени бүлүргей көрүнчүкте дүрзүнү дег көрүп турар бис» (1 Кор. 13:9, 12). Шынап-ла, Павел, бис ышкаш, чамдык чүүлдерни чедир билбейн турган. Ынчалза-даа ол Иегованың дугайында кол өөредиглерни эки билир турган. Ол чүүл алыс шынга быжыг бүзүрээринге аңаа чедер турган.

4. Алыс шынны тып алганывыска канчаар шынзыгып болур бис база Бурганның алыс шын бараалгакчыларының дугайында бо статьядан чүнү билип алыр бис?

⁴ Алыс шынны тып алганывыска шынзыгар дээш, Иегованың Херечилери Иисустуң үлегерин өттүнүп, шак ол ышкаш амыдырап база улусту өөредип турар бе? Билип алыылыңар. Бурганның алыс шын бараалгакчылары: 1) дүрзү-бурганнарга чүдүвес; 2) Бурганның Иегова деп адын ханы хүндүлеп турар; 3) алыс шынга ынак база 4) бот-боттарынга аажок ынак деп бо статьяга көөр бис.

5. Иисустуң ачызында Бурганга шын мөгеериниң дугайында чүнү билип ап турар бис база ооң эдерикчилери аңаа хамаарыштыр канчаар алдынар ужурлуг?

⁵ Иисус дээрге-даа, черге-даа тургаш, чүгле чаңгыс Иеговага мөгейип турган (Лк. 4:8). Чүге дээрге ол Аңаа аажок ынак. Ол эдерикчилерин база чүгле Иеговага чүдүүрүн  өөредип турган. Иисус боду-даа, ооң шынчы өөреникчилери-даа Бурганга мөгейип тургаш, дүрзүлерни кажан-даа ажыглавас турган. Бурган көзүлбес хуу-бот болганда, кижилер канчап Ооң дүрзүзүн кылып шыдаарыл? (Иса. 46:5). А ыдыктыг деп санаттынып турар улустуң дүрзүлеринге мөгейип, оларга мөргүп болур бе? Он айтыышкынның ийи дугаарында Иегова мынча деп чугаалаан: «Бодуңга дүрзү-бурган кылба. Өрү дээрде, чер кырында чоруур чүвениң кандыг-даа чурук дүрзүзүн кылба. Оларга мөгейбе база бараан болба» (Хост. 20:4, 5). Иегованың сеткилинге кирер дээн улуска бо сөстер дыка тода болгаш билдингир.

6. Иегованың Херечилери Бурганга чүдүүрүнге хамаарыштыр кандыг үлегерден туттунуп чоруур?

⁶ Төөгүчүлерниң сөстери-биле алырга, бирги векте христианнар чүгле чаңгыс Бурганга чүдүп чораан. Христиан церковь төөгүзүн бижээн бир ажылда баштайгы христианнарга чүдүлге черинге дүрзү тургузар деп бодал безин бужар турган дээн (History of the Christian Church). Амгы үеде Иегованың Херечилери база шак ындыг көрүштүг. Бис «ыдыктыгларга-даа», дээрниң төлээлеринге-даа, безин Иисус Христоска-даа мөргүвейн турар бис. Ол ышкаш чуртувуска мөгейбейн, күрүнениң сүлде-демдектеринге чүдүвейн турар бис. Ол дээш бистиң-биле чүү-даа боор болза, Иисустуң: «Чүгле Дээрги-Чаяакчы Бурганыңга мөгейип чор» дээн сөстеринге дүүштүр чурттап чоруур бис (Мф. 4:10).

7. Иегованың Херечилери өске шажыннардан чүзү-биле ылгалып турар?

⁷ Янзы-бүрү церковьтарда ат-сураглыг шажын башкарыкчылары хөй. Оларның мөгейикчилери ол башкарыкчыларның суртаалын магадап дыңнап турарын бодаарга, оларга чүдүүр чыгыы чедип турар. Оларның өөреникчилери церковьтарынче долдур кээп, номнарын төндүр садып ап, хөй акша-төгерикти оларның агар санынче шилчидип турар. Церковьче келген улус шажын башкарыкчыларының сөс бүрүзүнге бүзүреп, оларның бараанын көргеш-ле магадап турар. Безин Иисус Христос дириг боду келген болза, олар ынча дыка амыравас ийик. А Иегованың алыс шын бараалгакчыларының дугайында чүнү чугаалап болур? Бисте ындыг шажын башкарыкчылары чок. Удуртулга ап турар акыларны хүндүлеп турар-даа болзувусса, Иисус бодунуң эдерикчилеринге: «Силер шупту акы-дуңмашкы силер» деп тода чугаалаан (Мф. 23:8—10). Ынчангаш бис кымга-даа, ооң санында шажын азы политиктиг башкарыкчыларга чүдүвейн, оларның сорулгаларын болгаш организацияларын деткивейн турар бис. Оон аңгыда, политикага болгаш бо делегейниң херектеринге киришпес бис. Ооң-биле бис боттарын христиан деп санаар шажыннардан ылгалып турар бис (Ин. 18:36).

8. Иегова Бодунуң адын алдаржыыр кылдыр база шупту улуска билдингир апаар кылдыр күзеп турарын кайыын билир бис?

⁸ Бир катап Иисус мөргүп тургаш: «Адам! Бодуңнуң адыңны алдаржыт-ла!» — дээн. Ынчан дээрден: «Алдаржыткан мен, ам-даа алдаржыдар мен!» — деп Иегованың өндүр улуг үнү дыңналган (Ин. 12:28). Иисус черге бараалгап тургаш, Адазының адын алдаржыдып чораан (Ин. 17:26). Моон кандыг түңнелди үндүрүп болур? Бурганның алыс шын бараалгакчылары база Бурганның адын ажыглап, ооң дугайында өске улуска чугаалап, ону улуг алдар-хүндү кылдыр санаар ужурлуг.

9. Бирги векте христианнар Бурганның адынга хүндүткелди канчаар көргүскен?

⁹ Бистиң эраның бирги векте, христиан чыыш тургустунган соонда, Иегова «өске чоннар улузунче ээ көрүп, Бодунуң адын  хүндүлээр кылдыр, оларның аразындан улусту шилип» алган (Аж.-ч. 15:14). Ол үеде чурттап турган христианнар Бурганның адын шупту улуска чугаалаар аргазынга чоргаарланып турган. Оон ыңай олар Библияже кирген номнарны бижиирде, Бурганның адын ажыглап турган *. Ооң-биле олар боттарын Бурганның адын эдилеп чоруур чон деп көргүскен (Аж.-ч. 2:14, 21).

10. Иегованың Херечилери — Бурганның адын эдилеп турар чон деп, кандыг бадыткалдар бар?

¹⁰ Иегованың Херечилери — Бурганның адын эдилеп чоруур чон. Чүге ынча деп болур? Амгы үеде хөй шажын башкарыкчылары Бурганның хууда адын улустан чажырар дээш, бар шаа-биле кызып турар. Олар Библияның очулгаларындан Ооң адын балап, а чамдык таварылгаларда ону ажыглаарын шуут хоруп турар *. Бурганның Иегова деп адынга хүндүткелдиг хамаарылга көргүзүп турар Иегованың Херечилеринден өске улус бар бе? Бурганның хууда адын улус билип алзын дээш, дыка хөй күжениишкиннерни үндүрүп чоруур оон өске шажын бар бе? Бисти анаа эвес Иегованың Херечилери кылдыр адаан болгай! (Ис. 43:10—12). «„Чаа делегей“ очулгазынга» 240 миллион ажыг Библияларны үндүрген бис. Ында Иегованың адын турар ужурлуг черлерде киирип каан бис. Бис Библияга үндезилеттинген Иегованың адын  ажыглаан дептерлерни 1 000 ажыг дылдарга үндүрүп турар бис!

11. Бирги векте христианнарның алыс шынга ынакшылы чүүден көскү турган?

¹¹ Иисус Бурганның болгаш Ооң үзел-бодалының дугайында алыс шынга ынак турган. Ол алыс шынга дүүштүр чурттап, ону өскелерге чугаалап чораан (Ин. 18:37). Иисустуң эдерикчилери база алыс шынга дыка ынак турган (Ин. 4:23, 24). Безин Пётр элчин христиан шажынны «алыс шынның оруу» деп адаан (2 Пет. 2:2). Бирги вектиң христианнары алыс шынга ынак болгаш, аңаа чөрүшкек шажынчы бодалдардан, ёзу-чаңчылдардан азы хууда сонуургалдарындан ойталап турган (Кол. 2:8). Амгы үеде база Бурганның шынчы бараалгакчылары «алыс шынның оруу-биле» чоруурун кызып, үзел-бодалдарын Иегованың Сөзүнге үндезилеп, аңаа дүүштүр чурттап чоруур (3 Ин. 3, 4).

12. Удуртукчу чөвүлел алыс шынның билиишкинин өскертир болза эки деп билип кааш, чүнү кылып турар база чүге?

¹² Библияда бижээн шупту чүвени 100 хуу билир бис деп, Бурганның бараалгакчылары чугаалавайн турар. Чамдыкта олар библейжи өөредиглерни шын эвес тайылбырлап азы шын эвес шиитпирлерни хүлээп турар. Бисти ол чүүл кайгатпас ужурлуг. Библия-биле алырга, Иегова Бодунуң чонунга алыс шынның билиишкинин чоорту ажыдар (Кол. 1:9, 10). Ынчангаш алыс шынның чырыы «даңның чырык хаяазы дег», улам-на чырып келбээн шаанда, ооң ажыттынарын шыдамык манаар болзувусса эки (У. ч. 4:18). Удуртукчу чөвүлел кандыг-бир библейжи өөредигниң шын эвес тайылбырлап турганын билип кааш, ону дораан эде көрүп турар. Амгы үеде христиан шажыннар улустуң аайынче кирер дээш азы бо делегейден чыдып калбас дээш, бир-ле чүвени өскертип турар. А Иегованың чону өскерлиишкиннерни Бурганның сеткилин өөртүр дээш база Иисустуң үлегерин эдерер дээш кылыр (Иак. 4:4). Олар бо делегейде нептерээн чүүлдерни сүрер дээш эвес, а библейжи өөредиглерни тода билип алыр сорулгалыг өскерлиишкиннерни кылып турар. Шынап-ла, алыс шынга ынак бис! (1 Фес. 2:3, 4).

13. Алыс шын христианнар кандыг шынары-биле ылгалыр ужурлуг база Иегованың Херечилери ону канчаар илередип турар?

¹³ Бирги векте христианнар аразында ынакшылы-биле өске улустан ылгалып турган. Иисус мынча дээн: «Силерниң араңарга ынакшыл-ла турар болза, силерни Мээң өөреникчилерим-дир деп делегейде хамык улус танып алыр» (Ин. 13:34, 35). Амгы үеде база бүгү делегейде Иегованың Херечилерин ынакшыл каттыштырып турар. Бистиң аравыста кым-даа улусту язы-сөөгү-биле болгаш социал байдалы-биле аңгылавайн турар. Ооң-биле бис өске шажыннардан ылгалып турар бис. Бот-боттарывыска сеткиливистен ынаавыс чыыштарывыста болгаш шуулганнарывыста көстүп турар. Иегова мөгейиишкинивиске чүүлзүнер деп чигзинмес бис.

14. Бот-боттарывыска күштүг ынакшыл чүүден көскү? (Колосчуларга 3:12—14).

¹⁴ Библия бисти: «Бот-боттарыңарга быжыг ынакшылыңарны кадагалаңар» деп кыйгырып турар (1 Пет. 4:8). Акы-угбаларга ынак болгаш, оларның кошкак талаларынче хөй кичээнгей салбайн, оларны өршээп турар бис. Ол ышкаш беримчелиг бооп, чыышка шупту улуска, безин бисти хомудадыпкан кижилерге, экииргек хамаарылганы көргүзүп чоруур бис. (Номчуптуңар: Колосчуларга 3:12—14.) Ха-дуңмавыстың аразында ынакшыл бисти Бурганның алыс шын бараалгакчылары деп бадыткап турар.

15. Бирги векте христианнарның Бурганга мөгейип чораанын өттүнүп турар бис деп оон ыңай чүү көргүзүп турар?

¹⁵ Бирги вектиң христианнарының Бурганга мөгейип чораанын өттүнүп турар бис деп оон ыңай кандыг бадыткалдар бар? Чижээ, бистиң чыыштарда элчиннерниң тургузуп каан корум-чуруму ам-даа сагыттынып турар. Бистерде кожуун хайгааракчылары, хуралдың удуртукчулары болгаш дузалакчылары бар (Флп. 1:1; Тит. 1:5). Ол ышкаш эр-херээжен чорукка база өг-бүле тургузуунга баштайгы христианнар дег хамаарылгалыг бис. Оон аңгыда, бис олар ышкаш, ханны ыдыктыг деп хүндүлеп турар бис база буруузун миннивес бачыт үүлгеткен кижилерден чыышты камгалаксаар бис (Аж.-ч. 15:28, 29; 1 Кор. 5:11—13; 6:9, 10; Евр. 13:4).

16. Эфесчилерге 4:4—6-да кандыг чугула алыс шын бар?

¹⁶ Боттарын Иисустуң өөреникчилери бис дээр улус көвей болур деп, Иисус чугаалаан (Мф. 7:21—23). Оон ыңай сөөлгү хүннерде хөй улус «Бурганны хүндүлээриниң чүгле даштыкы хевиринден туттунар» база Бурган чүгле «чаңгыс бүзүрелге» чүүлзүнер деп ында тода бижээн (2 Тим. 3:1, 5; номчуптуңар: Эфесчилерге 4:4—6).

17. Алыс шын чүдүлге кымда база амгы үеде Иисусту кым эдерип чоруур?

¹⁷ Кара чаңгыс алыс шын шажын кымда? Иисус Христостуң үндезилеп тургузуп каан шажынын, бирги христианнар ышкаш, амгы үеде кымнар эдерип чоруур? Шупту бадыткалдарны шинчилеп көргеш, ол дээрге Иегованың Херечилери деп шынзыккан бис. Бурганның чонунга хамааржып, Ооң күзел-бодалының дугайында алыс шынны билири — дыка улуг алдар хүндү-дүр! Моон-даа соңгаар, бичии-даа чигзинмейн, алыс шындан быжыг туттунаалыңар!